Akronomano Rin̂e Me Cehcerî
6
On wara wîîkes hara awya so oyakno komo,
kicicme exitaw na awakno komo noro tak akîhrecoko.
Kaan Yekatî ponarono komo mak nakîhrecowpe.
Arwon komo mera tko akîhrecoko,
yîpînîn yawno me xa kacoko.
Ow meero kepohke kicicitho poko kica twerîhra oyexitaw,
kacoko amyamro rma noro yipu yakîhretaw.
2 Awakno komo yakronoman̂e me n̂he ehcoko,
ahworen̂e me marha.
Ero wa awexitaw so awakno komo poko Kristu ya kpanatanmetopo yewetîn̂e me tak maxe okre.
3 On wara kexe anarî komo,
Takîhsom ow ha,
kexe.
Ero wa kexe akpîn komo rma anarimaw.
N̂examro rma n̂esewkukmexe ero wa kan̂e komo.
4 Ahce wa wai Kaan ya?
Ahce wa oyeen̂a Noro?
kapore xa matko nasî.
Ero wa ketaw awya so merepowaxe tak,
Kir̂wan̂he rma oyen̂a ham,
karî ke awya so.
Kir̂wan̂he anarî komo yehtopo poko mak cerepotaxmu me exihra tak maxe.
5 Takîhso na wai ahce na poko oyexitaw,
kapore mak nasî.
Akpîra nasî noro,
kan̂e me exihra cexpore nasî anarî komo poko.
6 On wara marha ehcoko,
Kaanî mtapotarî poko apanatanmekn̂e komo wakrecoko.
Mîn hak mak tîmcoko yîwya yiixe ehtopo kom ha.
7 On wara marha wîîkes awya so,
camkî exihra ro mak men ehcoko on poko.
Esewkukmapora ro mak nasî Kaan kehtopo komo poko.
Knatîrî ciitopo wara rma nasî kehtopo komo.
Ahce na yatho ciir̂ataw kîwya so ero warai me rma thakwa n̂eperwas amn̂e.
8 Ero ke kicicitho xe kehtoponhîrî yaw roro kexitaw ero wa kehtopo rma tak n̂eperwasî kîwîrîman̂e me okwe.
Kaan Yekatî yewetîn̂e me roro kexitaw reha Noro rma tak waipînî ro me kehtopo me cepetaxmu me kiir̂as hara.
Ero wa cepetaxmu wara tasî.
9 Ero ke kir̂wan̂he roro cehcerî miya roro pokahnî me ro mak.
Kir̂wan̂he kehtopo komo rma nas amn̂e cepetaxmu me okre pokahra kexitaw so ha.
10 Ahce na xe exitaw kpoyino komo ero tîmpore nasî yîwya,
exitaw kîhyaw so.
Takronomapore marha nasî cemyarke xa exihra kexitaw so.
Ero wa cehcerî miyan komo poko rma.
Kaan pona enîn̂e komo poko n̂he ero wa cehcerî.
Yîmtapotarî Yîtîhkacho
11 Taa,
owî rma tak on mewresî an̂enîrî komo.
Enko xe porin me so mewru exirî.
12 Anato apanatanmekn̂e komo poko kîmtapowas hara.
On wara ketu noro yipu komo awya so kica,
Etanpikacoko men,
ketu.
On wara naxe n̂examro,
tooto komo pohkan̂e me mak cexi xe so naxe poreno yenporirî ke mak kica.
Ero ke ero poko awerepokexe so.
Kristu waihtoponho ponaro xa men ehcoko,
ka xera naxe cemetanmekrî komo pona.
Ero wara naxe n̂examro kica.
13 On wara marha naxe n̂examro,
etanpikaxapu komo rma,
Moises pen nmewretho yewetîra rma naxe okwe.
Awetanpikacho komo poko apanatanmekyaxe so apun komo poko mak tahwotachome so.
14 On wara wasî owî reha,
mîn hak poko oyahwota xera ro mak wasî.
Kporin komo Xesus Kristu yamowotoponho poko makî reha oyahwota xe wasî.
Ero ponaro oyexirî ke amowoxapu wara tak nasî roowo pono ro mko owya.
Amowoxapu wa xa marha wasî ow ero yipu pokono pîn me hara.
Ero wara wasî.
15 Kir̂wan me exihra rma taxe etanpikaxapu me kexitaw so mak.
Kir̂wan me exihra marha taxe etanpikan me kexitaw so hara.
Anarî ro me tak Kaan kakîhcetken̂e so pahxanînhîrî yaw rorono pîn me tak okre.
Ero wa kirirî ke so mak kir̂wan me taxe.
16 Ero wa cehtopo komo ponaro rma naxe anarî komo.
Ahwokan me exi xe so wasî noro yipu komo,
yîpînîn yaw Kaan yehtopo me marha exi xe so wasî.
Ero wa xa marha exi xe wasî Ixaw Yana kom hara,
Kaan xîkrî me cehsom komo xa.
17 On wara mak tak wîîkes awya so,
Kporin komo Xesus poyero oyesemetanmetopo rma n̂esenpesî opun poko.
Ero ke oyewrucpera tak ehcoko,
wîîkesî tak.
18 Taa,
On wara wîîkes awya so oyakno komo,
Kporin komo ya awakronoma xe so wasî Xesus Kristu ya.
Awekatî yecehto xe xa wasî yîwya.
Ero wa awiri xe so wasî yîwya.
Ero wa mak wîîkes awya so.
Amen.