Noro Re Me Awir̂atken̂e So Kaan Yekatî Rma
4
On wara marha wîîkes awya so,
kahrutopo yawno ow,
Kporin komo nahrupotho ha.
On wara wîîkes awya so,
tîmxîkrî me awan̂ikyatken̂e so Kaan.
Ero ke Noro xîkrî wara ehcoko ahce poko so na awexitaw so.
2 On wara xa ehcoko Kaan xîkrî wara awehtome so,
awakrono komo yopono mera ro mak esehtînocoko.
Etîrwonmekîn me marha ehcoko.
Awîrîman̂e komo yînîmn̂e me ehcoko.
Kica kan̂e pîn me ehcoko ahce wa na exitaw apoyino komo apoko so.
Yiixe so xa matko ehcoko.
3 Noro re me awir̂atken̂e so Kaan Yekatî.
Ero ke iito re esehtînocoko,
yukukmacoko mak.
Tawake mak ehcoko etpoko.
4 On wara maxe,
Kristu pun me re maxe cewn̂an me.
Cewn̂e marha nasî Kaan Yekatî kropotawno kom ha.
Etîme re tak awitome so awan̂ikyatken̂e so Kaan.
5 Cewn̂e marha nasî Kporin komo.
Ero re marha mîn kn̂ewetîrî kom ha.
Noro re yosotî pona marha wa cemihcaxe Kaan yosotî pona mak ha.
6 Cewn̂an mak Mîk Kaan.
Kîîm komo Mîk ha miyan komo Yîîmî rma.
Kyopono ro mak Noro miyan komo yopono rma.
Ahce wa na kiin̂e ro komo marha Mîk ha.
Aropotawno komo marha Mîk ha miyan komo ropotawno rma.
Noro yipu Mîk Kaan.
Ero ke iito re esehtînocoko.
Anamerpan Pokono Me Kiir̂atken̂e So Kristu
7 Anarmerpan pokono me tko kiir̂atken̂e so Kristu kemyawno ro pokono me so ha.
Ero wa kiir̂atken̂e so kwakretopo kom ha.
8 Ero yipu poko rma kekn̂e Kaan.
On wara kekn̂e,
Kah yaka tîcetaw hara Kristu ahruxapunhîrî komo tak naar̂akn̂e.
Ero yimaw marha tooto komo wakrekn̂e anarmerpan ke,
kekn̂e Kaan.
9 Taa,
ahce wa kyam tîhtînoyatu ero yipu yencetaw kîwya so,
Kah yaka cekn̂e hara Kristu,
kacho ha?
On wara tîhtînoyaxe,
Miya cokorî ka nîhcekn̂e Kristu roowo yatumnaka ha kapu,
kacho tîhtînoyaxe.
10 Yuhnaka toxapunhîrî Noro rma tak cekn̂e hara kah yaka hara.
Miya ro makî tî cekn̂e kaapu mkaino pona.
Ero ke ahnoro tînakîtothîrî yecehton̂e me tak nasî.
Ero wa tak nasî Xesus kaapu mkaino pona tîtorî ke.
11 Noro rma tak anarmerpan pokono me kiir̂atken̂e so kah yaka tîtoche.
Anarî komo n̂iir̂akn̂e tînantomarî ro me.
Anarî komo n̂iir̂akn̂e hara weronomano rin̂e me hara.
Anarî komo n̂iir̂akn̂e Xesus ya kakir̂wamacho komo yekatîmn̂e ro me hara.
Anarî komo n̂iir̂akn̂e Kaan xîkrî komo yenîn̂e me hara.
Akîhreno rin̂e me marha n̂examro n̂iir̂akn̂e.
Ero warai me kiir̂atken̂e so.
12 Kaan xîkrî komo yakîhrechome mak ero warai pokono me kiir̂atken̂e so.
Takîhso cexiche so n̂examro makîrha tak naxe anarmerpan poko hara.
Ero wa Kristu pun me cehsom komo yakîhretîka xe nai Kaan.
13 Takîhso kehtîkache so tak Xesus ya kakir̂wamacho ponarono me re tak taxe etîme re.
Noro yehtopo poko kîhcamhokatîka xe nasî Kaan,
Tumumuru yehtopo poko ha.
Kenporitîka xe nai Kaan okre,
ahce wa na Kristu yehtopo yaw rorono me tak kehtome so.
14 Rikomo warahra tak kexi xe so nai Kaan.
Rikomo warai me kexitaw so ocowo narîrî wara mak taxe okwe,
emapona cetowyaxe anarî pona,
kpanatanmetopo komo pona okwe.
Mer̂pora men naxe kewkukman̂e komo,
anato kpanatanmekn̂e komo.
Ehn̂ara ro mak naxe kica kewkukmacho komo poko.
Wooto wakman̂e wa mak naxe kica.
Ero ke takîhso men cehcerî Kaan Mumuru yehtopo poko,
etîtîkaxapu me tak cehcerî.
15 Yaaro mak tîtkacerî kakrono komo yakro kîmtapowataw so,
yiixatî me mak ha tko.
Ero wa kîmtapowataw so tîtpor̂mamtîkexe tak.
Kristu warai me tak taxe.
Kîhtîpîrî komo warai Mîk Kristu.
16 Kristu rma nasî kpormamnon̂e komo me,
kakîhren̂e komo me ha.
Etîxatî me kehtopo komo poko kakîhrexe so.
Cewn̂an me etahsîsîknoxapu wara taxe.
Kupun komo wara rma taxe.
On wara nasî kupun komo,
kîhtarî nasî roowo yapikrî poko.
Kamorî nasî ahsîtopo ro me.
Kewru nasî enîrî poko hara.
Anarmerpan pokono me nasî kupun komo.
Ero wa xa marha taxe kîwyam hara Kaan xîkrî komo,
anamerpan pokono me hara.
Ero wara taxe takîhso n̂he kehtome so,
etîxatî me marha.
Poonotho Mohkan̂e Wa Ehcoko, Yaxan Yamrun̂e Wa Marha Ehcoko
17 Taa,
on poko wîîkes hara awya so,
yaaro men tan wîîkesî,
Kporin komo yanme rma tan wîîkesî,
apoyino komo warahra tak ehcoko kica,
Xenciu komo warahra.
Tohnawno ponarono mak mîkyam kica.
18 Yuhnari yîhtînon̂e pîn me mak naxe okwe.
Ero ke waipîn me Kaan yehtopo ken̂ehra ro mak naxe okwe.
Camkî ro mak naxe ero yipu poko.
Ero wa naxe ceipu wara exirî ke yîropotarî komo.
19 Yîhyapamnî me ro mak ehtîkaxapu mîkyam okwe.
Mîk hak poko twakpamtîkaxmu ro mak mîkyam kica.
Kicicitho poko mak naxe kica,
iyoponkano ritopo poko marha.
Ero wara naxe okwe apoyino komo,
Xenciu komo.
20 On wara kacho yentara ro mak mîxatken̂e amyamro reha,
Ero yipu pokono Mîk Kristu,
kacho yentara.
21 Kristu mtapotarî rma na mencetken̂e aropotaw so.
Noro rma na apanatanmekyatken̂e so.
Yaarono xa Mîk Xesus.
Ero wara Noro yehtopo na mencetken̂e.
22 On wara marha kesî Xesus awya so apanatanmetopo komo me,
awehtoponhîrî komo mohkan̂e wa tak ehcoko,
poonotho mohkan̂e wa,
kesî awya so.
Kicicme mak mîxatken̂e kica kicicitho poko awepokarî ke so.
Mesewkukmetken̂e ro mak mîn hak xe awehtopo komo yanme.
Kir̂wan wa meen̂atken̂e kicicitho rma kica.
Ero wa awehtoponhîrî komo mohkan̂e wa tak ehcoko.
23 Pahxa kicicitho poko mak awesehtînotopo tpoxwe xakn̂e awya so.
Ero warahra tak ehcoko hara oroto,
poxumra tak encoko ero wara awesehtînotoponhîrî komo.
24 Kîr̂wan̂he awehtopo komo tak amrucoko hara poono wara.
Ero wara awehtopo komo nakîhcekn̂e Kaan.
Kir̂wan̂he kehtopo mîn Kaan ponaro kehtopo ha,
kesî.
Ero poko apanatanmekyaxe so Xesus.
25 Ero ke acemaronthîrî komo tak ahsîpînkacoko.
Yaaro mak tak amtapotacoko amîtwono komo yakro.
Ero wa amtapotacoko noro re me awexirî ke so.
26 Arwonataw so twerî men ehcoko.
Kicicme exihra men ehcoko arwonthîrî komo yanme.
Arwonataw so yohno rma etîrwoxinkacoko hara kokmamra rma ka exitaw.
27 Ciabu men mewehcaxe kica pahkî arwonataw so.
28 Cen̂epan̂em komo exitaw ahyaw so n̂examro yîtwermacoko.
On wara kacoko yîwya so,
En̂epamra ro mak tak ehcoko.
Kir̂wan poko xa matko etapickacoko awemyawno komo yepamnotome.
Ero wara epamnocoko awemyawno komo cesemetanmesom komo ya tîmtome tak,
kacoko yîwya so.
29 On wara marha wîîkes awya so,
kicicitho poko yîmtapotara ro mak ehcoko.
Kir̂wan poko mak amtapotacoko awentan̂e komo yakîhren̂e me tak awehtome so.
Ero warai poko amtapotacoko.
30 Kaan Yekatî ahwokara ro mak ehcoko.
Noro men nasî aropotaw so.
Kaan xîkrî me awehtopo komo kuknon me.
Kaan xîkrî moso ha,
kacho Mîk aropotaw so ha.
Iito rma nasi Noro aropotaw so miya roro kakir̂wamatîkacho komo pona roro.
Ero ke men Noro ahwokara ehcoko.
31 Eserewton me ro mak tak ehcoko.
Etpoko yîrwomnî me marha tak ehcoko,
esein me marha.
Etwîrîyakara marha ehcoko.
Noro kr̂a cemetanmekpore nasî,
kahra marha ehcoko.
Ero wa awehtoponhîrî komo tak ahsîpînkatîkacoko ha.
32 Etwakrecoko xa matko.
Etpînîn yaw marha ehcoko.
Awemetanmetoponhîrî komo mak yîhcamnocoko.
Ero wa awya so cemetanmetoponhîrî nîhcamnoyakn̂e Kaan hara.
Kristu yanme mak nîhcamnoyakn̂e.
Ero ke Noro wa xa marha ehcoko amyamro hara.
Ero wa ehcoko.