Anarmerpan Komo Panatanmetopo
6
Taa,
rikomo komo,
awakro so tan kîmtapowas hara.
On wara wîîkes awya so,
aamo komo men ewetîcoko,
anocwan komo marha.
Kporin komo yanme rma ewetîcoko.
Yaaro rma n̂examro mewehcaxe aamo me exirî ke,
anocwan me exirî ke marha.
2-3 On wara kesî kpanatanmetopo,
Ayopono me encoko aamo komo,
anocwan komo marha,
kesî.
Ayopono me n̂examro yeen̂ataw awya so awepethîrî komo mahsîyaxe,
kesî marha.
Yihcitopo tko mîn kpanatanmetopo yewetîtoponho yepetho pokono ha.
Ero ke ero wa ehcoko rikomo komo.
4 Yîîm kom hara,
awakro so tan kîmtapowas hara.
On wara wîîkes awya so,
amxîkrî komo yîrwonmekîra ehcoko.
Kporin komo yanme mak antomacoko,
Noro yanme marha panarecoko.
Yîmtapotarî poko marha panatanmecoko.
Ero wa amxîkrî komo por̂mamnocoko ha.
5 Tooto yanton kom hara,
awakro so kîmtapowas hara.
On wara wîîkes awya so hara,
apun yantoman̂e komo ewetîcoko.
Ponaro xa ehcoko.
Twerî mak ehcoko noro poko,
tatanîmso ro ehcoko ponaro so.
Ewetî xe ro mak ehcoko Kristu yewehcatawno wara rma.
6 Awantoman̂e komo n̂enîrî me mak kar̂pe etapickara ehcoko.
On wara kahra ehcoko,
Noro men oyantoman̂e oyen̂asî.
Kar̂pe tak ketapickesî noro wero ro,
Kir̂wan mîkro oyanton,
kachome mak opoko,
kahra ehcoko.
Noro yarînaw meero kar̂pe etapickacoko.
Tahwore ewetîcoko.
Kristu yanton xa ow ha.
Kaan xe oyexirî ke mak moso wewehcasî oyantoman̂e ha,
kacoko ahnaw so.
7 Tahwore xa n̂examro ewetîcoko Kaan yanme rma ha.
Tooto yanton mak pîn ow.
Kporin komo yanton xa ow ha,
kacoko mak.
8 On wara marha kacoko,
Kir̂wan̂he oyexitaw ahce na poko,
ero yepetho Kporin komo nîmyas owya amn̂e.
Ahnoro rma kepemexe so,
tooto yanton komo,
tooto yanton pîn komo marha,
kacoko mak.
9 Tooto yosom kom hara,
awakro so makîrha tan kîmtapowas hara.
On wara wîîkes awya so,
Ero wa xa marha ehcoko amyamro hara,
Kaan yanme mak ehcoko.
Awanton komo eraspera ehcoko.
On wara xa yîhtînocoko,
Oyantoman̂e nas hara kah yaw.
Etîme re ciino rin̂e xa Mîk Kaan,
kacoko.
Ero ke kir̂wan̂he mak ciicoko awanton komo.
Ero wa ehcoko.
Akurun Komo Ahsîtîkacoko Kaan Nîmîtho Awya So
10 Taa,
on poko tak wîîkes hara awya so oyakno komo.
Wahra mak tak wîîkes awya so.
Kar̂pe roro xa ehcoko kar̂pe Kporin komo yehtopo ke rma.
Karitî xa Mîk Kporin komo.
11 Akurun komo amrucoko ahnoro Kaan nîmîtho awya so.
Mîn hak poko kewkukman̂e mîk Ciabu kica.
Ero ke tamrupore nasî akurun komo emacakara ro mak awehtome so noro yanme.
12 Kamxukrem komo yakro etar̂mara wa taxe.
Worokyam yakro xa matko cetar̂mexe.
Kayaritomo komo mîkyam,
yukurumîkno kom ha.
Roowo pono komo yawarparen̂e komo mîkyam ha.
Kah yawno marha mîkyam worokyam,
kicicitho komo ro mak kica.
Noro yipu komo yakro cetar̂maxmu kîwyam.
13 Ero ke akurun komo ahsîtîkacoko Kaan nîmîtho awya so.
Ero yipu yahsîche awya so mecececexe rma epîrkara kicicitho poko awîrîmacho komo me enmayataw amn̂e.
Mîn hak poko men akukmexe so Satanas.
Emacakara rma tko maxe akurun komo yahsîtîkache awya so.
14 Ero ke ececetocoko taan̂apotui so yaarono ponaro awehtopo ke makî.
Awawrutarî komo warai marha amrucoko kuripara warai ha.
Kir̂wan̂he kexitaw so kuripara ke tawrutakem wa tak taxe okre.
15 Tîhtakem wa marha ehcoko kir̂wan̂he awtotome so tooto cheka.
On wara kacoko,
Kaan tak nasî tawake kpoko so Xesus waihîrî ke,
kacoko.
Ero wa kacho nasî kîhtarî wara.
16 Awecen̂an komo marha ahsîcoko.
Kaan pona entopo rma mîn awecen̂an kom ha.
Wehto ke cetahsisom warai ke men awetu so oco Kicicitho imo.
Kaan pona en̂în̂e me awexitaw so kicicitho yuhre meihkexe wehto ken̂arînhîrî warai.
17 Kuripara ke tîhtîwomkem wa marha ehcoko.
Okurunpen̂e xa Mîk Xesus,
kacho nasî kîhtîwom wara kuripara wara.
Kacipara imo warai marha ahsîcoko ececokan warai ha.
Kaanî mtapotarî rma mîn kacipara imo warai,
ececokan warai.
Kaan Yekatî rma nasî ero ke paraxkano rin̂e me.
18 Amtapotacoko marha Kaan yakro emapona roro.
Mîk hak poko amtapotacoko,
Kaan Yekatî yanme mak ha.
Awero ro so marha amtapotacoko.
Kaan nakir̂wamatho komo poko amtapotacoko miyan komo poko rma.
Miya roro amtapotacoko poko so yîtîtmamnî me ro mak ha.
Yîmtapotarî Yîtîhkacho
19 Opoko meero n̂he cma re mîmtapowaxe iito.
On wara cma re mîîkexe,
Apa kah yawno,
kakir̂wamacho yekatîm xe tî nai Pawru,
ekatîmnînhîrî yekatîm xe ha.
Ero ke kir̂wan̂he ekatîmpoko yîwya.
Erasîra n̂he tak cirko noro,
mîîkexe cma re Kaan ya opoko.
20 Ero yekatîmrî poyero mak wasî tan kahrutopo yaw tapomiso.
Ero ke on wara cma re mîmtapowaxe opoko,
Apa,
erasîn me ro mak Pawru cirko amtapotarî yekatîmyataw,
takîhso ekatîmn̂e me marha cirko,
mîîkexe cma re opoko.
Ero wa cma re mîmtapowaxe opoko.
21-22 Taa,
Cikiku tak wen̂epesî ahyaka so amn̂e ahce wa na oyehtopo yekatîmn̂e.
Kakno komo mîk noro,
yîpînîn yaw kehtopo komo.
Kporin komo yanton xa mîk,
yuwun̂unu ro mak okre.
On wara kan̂e me noro wen̂epesî,
Ero wa natu Pawru komo.
Ero poko natu.
Kir̂wan̂he nat ha,
kan̂e me wen̂epesî.
Awahworeso so marha wen̂epesî.
Ero wa noro wen̂epesî.
23 Taa,
on wara awexi xe so wasî oyakno komo,
ahwokan me awiri xe so wasî Kîîm komo Kaan ya.
Etîxatî me marha awiri xe so wasî yîwya,
Kaan pona enîn̂e me marha.
Kporin komo Xesus Kristu ya marha ero wa awiri xe so wasî.
24 Awakronoma xe so wasî Kaan ya.
Ero wa wîîkesî Kporin komo Xesus Kristu xatî komo ya.
Yaaro xa yîîxatî komo ya mak ero wa wîîkesî.
Ero wa awexi xe so wasî.
Ero wa mak wîîkes awya so.