Anarî Komo Xawyakan Me Esehtînocoko
2
1-2 On wara wîîkes hara awya so oyakno komo,
ahce wa na matu?
Tahwore na matu Kristu yakrono me awexirî ke so?
Ooxe xa nai Kristu okre,
kan̂e me na matu?
Ahce wa na matu Kaan Yekatî poko hara?
Noro mtapotarî ponaro na matu?
Ahce wa mat hara etpoko?
Etponarono me na matu,
etpînîn yawno me marha?
Kir̂wan̂he nasî ero wa awehtopo komo okre.
On wara meero tko awexi xe so wasî miya xe n̂he tahwore oyehtome apoko so,
iito re cesehtînosom me awexi xe wasî,
Etîxatî me marha,
ero re ponarono me marha.
Ero wa awexitaw so tahwore xa wasî apoko so.
3 On wara marha awexi xe so wasî,
anarî komo yoponkan̂e pîn me ro mak awexi xe so wasî.
Ow xa takîhsom,
kan̂e pîn me awexi xe so wasî.
Anarî komo xawyakan me xa matko esehtînocoko.
N̂examro xa oyopono komo,
kacoko mak anarî komo poko.
4 Awemyawno ponaro mak exihra ehcoko.
Anarî komo yemyawno ponaro marha ehcoko akronomachome so.
5 On wara xa esehtînocoko,
Kristu Xesus n̂esehtînoyakn̂e ero wa xa marha esehtînocoko amyamro hara.
6 On wara xakn̂e Kristu,
Kaanî rma Mîk xakn̂e.
Kaan yecenarîno me cesenpotopo pînîn yawra rma tko xakn̂e.
7 Ero ke anarî komo xawyakan me xa tak n̂esenpekn̂e.
Tooto yanton wa kyam mak n̂esenpekn̂e okyo.
Tooto me tak n̂ewruyakn̂e.
Ero wa xakn̂e Xesus.
8 Tooto me cexitaw tak Tîîm mamawno me tak n̂ecir̂akn̂e.
Noro n̂ewehcakn̂e twaihîrî meero,
tpanaxkem pona cetamoworî meero oko.
Ero wa Tîîm n̂ewehcakn̂e Xesus.
9 Ero ke kayaritomo me xa tak Noro n̂iir̂akn̂e hara Kaan.
Kayaritomo ro xa Moso,
anarî komo yopono ro,
kacho me tak Kaan n̂iir̂akn̂e.
10 Ero ke Xesus mamakan me tak n̂esewnapexe amn̂e tooto komo ahnoro.
Kah yawno komo meero marha n̂esewnapexe Noro mamakan me,
roowo pono komo marha,
roowo yatumnawno komo marha.
11 On wara tak kexe n̂examro ahnoro,
Kporin komo xa Mîk ham Xesus Kristu.
Kaanî rma ero warai me n̂iir̂akn̂e,
Kîîm kom ha.
Ero ke,
Kir̂wan̂he ro mak mai ham Apa,
kexe tak miyan komo rma amn̂e Noro ya.
Weeyu Wa Maxe, Kacho
12 Ero ke on wara wîîkes awya so oyakno komo,
Pahxa Kaan mewehcatken̂e kir̂wan̂he,
iito oyexitaw achew so ha ka.
Ero ke miya xe xa tak Noro ewetîcoko n̂he oyarînaw hara.
Awakir̂wametken̂e so Noro.
Ero ke takîhso n̂he men ehcoko Noro yewetîtopo poko.
Ahce wara oyexitaw xa kir̂wan̂he wai Kaan ya?
kacoko.
On wara ehcoko kicicme awehtoponhîrî komo poko hara,
twerî men ehcoko ero poko tatanîmso ro.
Ero wara rma ehcoko oyarînaw meero.
13 Kaan mak Mîkî awakir̂waman̂e komo.
Noro rma cewetî xatî me awir̂axe so.
Noro marha akaricexe so ehn̂ara awehtome so cewetîtopo poko.
Ero warai pokono me awir̂axe so tawake xa tak cehtome apoko so.
Noro mak ero wa awir̂axe so.
14 Ahce na poko awexitaw so,
Okwe okwe,
kan̂e pîn me ehcoko.
Eseseikura marha ehcoko.
15 Ero wa ehcoko,
Kicicitho mak moxam ham kica,
kacho mera ro mak awehtome so,
yîwîrîmano rin̂e pîn me marha awehtome so.
Kaan xîkrî komo amyamro.
Ero ke kir̂wan̂he mak esenpocoko miyan komo ya rma.
Kwexixino warai mak mîkyam yîchew awehtopo komo,
kanwekn̂e komo mak kica.
Noro yipu komo weyuru wara xa ehcoko.
16 Kaanî mtapotarî yahsîpînkara ro mak ehcoko.
Waipîn me kiin̂e mîn Noro mtapotarî.
Ero ponarono me roro awexitaw so tawake xa tak was amn̂e Kristu mohtopo po.
Yaaro kîwcekn̂e ham okre Piriposu pono komo cheka,
wîîkesî tak ero yimaw.
Tohnaw ekaritora marha wîxakn̂e yîchew so Kaanî mtapotarî yekatîmrî poko,
wîîkesî marha ero yimaw.
17 On wara marha wasî,
Kaan pona enîn̂e me awitoponhîrî komo yepetho me na kwaihya amn̂e,
Kaan pona awahworetoponhîrî komo yepetho me ha.
Wooku nîmyatken̂e kporin pen komo Kaan ya,
xoo ketken̂e mak.
Ero wara rma na kar̂pe oyehtoponho wîmtîke Kaan ya twaihso ro.
Ero wara owaiyataw tawake rma wasî,
tahwore marha wasî awakro so.
18 Tawake marha ehcoko amyamro hara.
Tahwore ehcoko oyakro ro hara.
Ero wa ehcoko.
Cimocu Komo Wen̂epesî Awenso So
19 Taa,
on wara wîîkes hara awya so,
yohno rma Cimocu yen̂epe xe tak wasî awenso so.
Ero poko rma kîmtapowasî Kporin komo Xesus yakro.
Iina cma re maar̂asî Apa,
wîîkesî yîwya.
Ero ke,
cee rma ahyaka so,
wîîkesî.
Amn̂e tak ohyaka tmokuche hara awehtopo komo tak n̂ekatîmyasî owya tahwore oyehtome.
20 Owara rma cesehtînosom mîk Cimocu.
Yaarono me xa aponaro so nasî.
Apînîn yaw so marha nasî ahce wa so na awexitaw so.
Anarî exihra ro mak nas okwe ero wa cesehtînosom xa.
21 On wara naxe anarî komo ahnoro,
cemyawno ro komo ponaro makî reha naxe okwe.
Xesus Kristu yemyawno ro ponarora naxe okwe.
22 Kir̂wan̂he Cimocu yehtopo meen̂atken̂e amyamro rma.
Omxîkrî wa mak nasî noro okwe.
Oyakronomesî Kaan ya kakirwamacho komo yekatîmrî poko.
Ero warai mîk Cimocu.
23 Ero ke noro yen̂epe xe wasî yohno rma.
Oyahrunkacho poko ka n̂esencexe kayaritomo komo.
Yîmtapotarî yentache tak owya Cimocu tak wen̂epesî.
24 Owî marha cma re kmokyasî awenso so yohno rma.
Kporin komo rma wa oyarasî iina,
wîîkesî omohtopo poko.
Epapocitu Poko Nîmtapowasî Pawru
25 Epapocitu marha wen̂epes hara ahyaka so.
Oyakno mîk okwe Epapocitu.
Oyakro cekaritosom marha mîk Kaanî mtapotarî yekatîmrî poko.
Satanas yakro cetarmaxmu mîk okre oyakro ro.
An̂en̂epethîrî rma mîk.
Xiya ohyaka men̂epetken̂e.
Oyakronomekn̂e tan cexitaw.
Noro ponaro tko kîhtînoyatken̂e so.
Ero ke wen̂epes hara ahyaka so.
26 Apînîn yaw so xa tî xakn̂e noro.
Mencetken̂e ha tî amototoponhîrî.
Ero ke ahwora tî xakn̂e ero wa cehtoponhîrî yentarî ke awya so.
Ero ke cen̂epepore nas hara n̂examro yaka,
wîîkekn̂e noro poko.
27 Yaaro rma wa mencetken̂e amototoponhîrî.
Okoh me ka xakn̂e waiporo xa okwe.
Yîpînîn yaw tko xakn̂e Kaan.
Ero ke karihcekn̂e hara.
Opînîn yaw marha cexirî ke meero noro karihcekn̂e ahwokatîkara oyehtome.
Ahwora rma cik tan wasî oyakrononho komo pînîn yaw.
Noro waihyataw ketaw ha re miya xe xa tak ahwora wexirî ha re okwe.
28 Ero ke yohno rma noro wen̂epesî ahyaka so.
Noro yenîche tak awya so merepowaxe hara.
Ow meero marha tak kerepowasî n̂he.
29 Ero ke tawake xa tak ehcoko noro yenîche awya so.
Ahnoro noro warai komo ponaro xa ehcoko.
Kakronoman̂e komo mîkyam okre,
kacoko noro yipu komo poko.
30 Waiporo thakwa noro xakn̂e okwe Kristu yanme cekaritorî ke.
Oyakronomekn̂e xa noro kar̂pera xa cexitaw rma.
Amyamro reha oyakronomara n̂he mîxatken̂e okwe.
Ero ke awemtaka so oyakronomekn̂e noro.
Kwaihya na tan.
Wara rma Pawru wakronomesî,
kekn̂e.
Ero wa xakn̂e Epapocitu.