Pawru Yesekatîmtopo
3
On wara wîîkes hara awya so oyakno komo,
yîtîhkarî me tan wîîkesî,
Kporin komo poko ahwotacoko roro.
Pahxa rma ero wa wîîkekn̂e awya so.
Karita yaka tan mewresî ero wa kacho xa hara.
Pokahra rma wasî ero wa karî poko awya so twerî awehtome so kicicitho poko.
2 Ero ke anato apanatanmekn̂e komo poko tan kweronomexe so.
Anarî komo naxe xapari warai me okwe.
Kicicitho pokono komo mîkyam.
Cecaikaxmu komo mîkyam kica.
Noro yipu komo poko twerî ehcoko.
3 Etanpikaxapu komo rma kîwyam.
Kaan poko tahwotaxmu me xa tko taxe Noro Yekatî yanme mak.
Kristu Xesus poko marha tahwowaxe.
Oyanme ro mak ketakir̂wamesî,
kahra ro mak taxe.
4 On wara naxe anarî komo,
cehtoponhîrî komo pona n̂eserepotanmekyaxe.
Ow xa matko re keserepotanmekrî noro yipu komo yopo.
5 On warainhîrî owî,
anpikaxapu owî 8 kaamo exitaw oyewrutoponho.
Ixaw Yana yepamtho ow,
Benxamin tribun me ewruxapu.
Ebrew mtapotarî kukman̂e marha ow,
yaana me yukukman̂e ha.
Parisewnhîrî marha ow,
Moises penî nmewretho ponarono xa.
6 Yuwun̂ura marha wa wîxakn̂e.
Kekaricekn̂e ro mak Kaan xîkrî pen komo yemetanmetopo poko okwe.
On wara ehcoko kir̂wan̂he awentome so Kaan ya,
kacho mîn Moises penî nmewretho.
Ero wa kacho yaw roro mak wîxakn̂e,
ewetîn̂e pîntho mîk Pawru kica,
kacho mera ro mak ha.
Kristu Ponarono Me Oyexi Xe Mak Was Oroto
7 Ero wa oyexirî ke kir̂wanî ro me kesehtînoyakn̂e.
Ero warahra tak wîhtînoyasî.
Poxumra tak ween̂asî ero wa oyehtoponho Kristu ponaro oyexirî ke tak.
8 Ahce wa na oyehtoponho poko twen̂ekano wara ro mak wasî.
Ero wara tak wasî Oporin Xesus Kristu yîhtînotome xa tak okre.
Kir̂wan̂he ro mak nasî Noro ponaro kehtopo.
Noro ponaro oyehtopo yanme kesemyawnonketîkekn̂e.
Yukpurukpuruntho wa mak ween̂asî ahce wa na oyehtoponho Kristu yakrono me xa tak oyehtome.
9 Kristu yakrono ro me oyehtopo ponaro xa tak wasî kir̂wanî ro me oyentome Kaan ya.
Oyanme ro cetakir̂wamaxmu me mak exihra tak wasî,
kpanatanmetopo yewetîtopo pona enîn̂e pîn me ha.
Kristu pona mak tak ween̂asî oyakir̂wamachome Kaan ya.
10 Karitî ro me cexirî ke Kristu pakekn̂e.
Ero ke karitî ro me cehtopo ke rma okariton̂e me exi xe wasî.
N̂esemetanmekyakn̂e marha Noro.
Ero ke ero wa xa marha oyesemetanmetopo yînîmn̂e me oyexi xe wasî.
Waihyakn̂e tak Noro pen.
Ero ke waixapu wa xa marha oyexi xe was ow hara.
Ero wa Kristu yehtoponho yaw rorono me oyexi xe wasî.
11 Ero wa oyexi xe wasî pakaxapu wa oyehtome tak hara,
waixapu komo chewnonho wara.
Kristu Ya Oyakir̂wamacho Ponaro Wasî, Kesî Pawru
12 On wara tko kahra wasî,
Pakaxapu wara xa tak wai ham,
iime xa tak wai okre,
kir̂wan̂he xa,
kahra marha wasî.
Pîra rma ka wasî.
Kesenpor̂pesî rma ka Xesus Kristu ya.
Tîn̂enporirî me rma wa oyahsîyakn̂e Noro.
Ero ke Noro ya oyenporitîkacho ponaro xa wasî.
13 Ero wa wasî oyakno komo.
Enporitîkaxapu me was ow ha,
kahra ro mak wasî.
Kristu ya oyenporitîkacho ponaro xa tko wasî,
ahce na ponarora.
Pahxa oyehtoponho ponarora tak was oroto.
Ahce wa xa tko na oriya Kaan amn̂e?
kan̂e me mak wasî.
14 On wara nasî Kaan kpoko so amn̂e kah yaka karîche so,
cewetîtoponhîrî yepetho nîmyasî kîwya so,
Xesus Kristu yakrono komo ya ha.
Ero ke Noro yewetîtopo ponaro xa wasî.
15 Ero ke takîhso cesehtînosom me awexitaw so,
ero wara awitopo komo ponaro xa marha ehcoko amyamro hara.
Ero wa awitopo komo ponarora exitaw anarî komo ero wa ehtopo komo tak n̂enpesî rma Kaan awya so.
16 Etakîrexapu n̂he ha re kîwyam.
Kaanî mtapotarî ponaro kexirî ke so mak cetakîretken̂e.
Ero ke ero ponaro rma cehcerî miya roro.
Ahce wa na cesehtînoyatken̂e,
ero wara rma esehtînocoko miya roro.
17 Owara rma ehcoko oyakno komo.
Iito exitaw so anarî kom hara,
amna wara cehsom komo,
n̂examro wa xa marha ehcoko.
18 Naxe rma tko anarî komo mer̂pono pîn,
anarme cehsom komo.
Pahxa rma kweronometken̂e so noro yipu komo poko.
Emapona wîîkekn̂e awya so.
Kweronomexe so xa hara oroto owratarî me mak.
On wara naxe noro yipu komo,
Kristu yamowotoponho xatî pîn me ro mak naxe okwe.
19 Noro yipu komo mak n̂ehcamnoyaxe amn̂e okwe.
Ponaro cehtopo komo me xa n̂iir̂axe twethîrî komo rma kica.
Kicicitho poko mak nahwowaxe kîhyapamtopo komo poko ro mak kica.
Roowo po cehtopo komo ponaro mak naxe okwe.
Ero wa naxe noro yipu komo.
20 Kah yaw reha nasî kewton komo.
Kah yai tak Kporin komo Xesus Kristu mokyas amn̂e.
Kakir̂wamatîkaxi so mokyasî.
Ero ke Noro mohtopo ponaro xa taxe.
21 Tmokuche takî kupunthîrî tak nakîhces hara.
Kir̂wanî ro xa on okre,
kacho pîn me ro makî ka nasî kupun komo.
Amn̂e tak tupun wara xa marha nakîhcesî kupun komo kir̂wanî ro me tak ha.
Ehn̂ara nasî ero poko.
Miyanî mko poko ehn̂anî ro me mak nasî,
Tanmero rma ciino n̂iir̂asî Noro yanme mak ehtome ahnoro.
Ero wa nas amn̂e Kporin komo.