Mîn Hak Poko Kpanatanmetopo
4
Ero ke on wara wîîkes hara awya so oyakno komo,
aaxe so ro mak wasî.
Apînîn yaw so marha was okwe.
Tahwore oyehtopo xa amyamro.
Oyarokorî wa mak maxe okre.
On wara wîîkes awya so,
Kporin komo pona encoko miya roro emacakan me.
Ero wa ehcoko oyakno komo.
2 Amyamro hara aaci komo,
Epocia komo,
Sinciki komo,
awya so tan wîîkesî.
Iito re yîhtînon̂e me awexi xe so wasî Kporin komo yakorono me re awexirî ke so.
3 Amoro hara oyakno,
awya tan wîîkes hara.
Oyakrononho xa amoro.
Wooxam komo tak akronomak hara.
Xesus ya kakirwamacho yekatîmyataw owya,
n̂examro oyakronometken̂e.
N̂ekaricetken̂e xa ero poko.
Kremence marha akronomakî,
anarî komo marha.
Yaake naxe oyakronoman̂enho komo.
Kir̂wan komo mîkyam.
Karita nai kah yaw,
Waipîn Me Cehsom Komo Yosotî,
kacho.
Ero yaw tmewreso nasî n̂examro yosotî.
Amna nakronometken̂e n̂examro wooxam komo.
Ero ke n̂examro akronomakî.
4 Taa,
on wara marha wîîkes awya so,
Tahwore roro ehcoko Kporin komo poko.
Ero wa xa marha wîîkesî xa hara awya so,
tahwore mak ehcoko.
5 Etpînîn yawno me esenpocoko miyan komo ya rma.
Pahnoke xa men nasî Kporin komo mohtopo.
6 Ahce na poko eserepokan me mak ehcoko.
Kaan yakro mak amtapotacoko yiixe awehtopo komo poko.
Kir̂wan̂he mai ham Apa,
kacoko marha yîwya amtapowataw so.
7 Ero wa amtapotache so tak Kaan yakro ahwokan me xa tak awir̂axe so Noro.
Ero ke on wara kexe apoyino komo,
Ahce wa natu n̂examro okyo?
Ahwokan me roro mak naxe ahce wa so cexitaw so rma.
Ero wa awehtopo komo rma tak nasî aropotarî komo kurun wara.
Awesehtînotopo komo kurun wara marha nasî ahwokara awehtome so.
Kristu Xesus ponaro awexirî ke so ero wa nasî.
8 Taa,
on wara xa hara wîîkes awya so oyakno komo.
Yohno mak tan kîmtapowasî awakro so.
Onî wara ehcoko,
yaarono yencetaw awya so,
ero ponaro ehcoko.
On warai marha na mencetu,
kir̂wan̂he tooto komo yehtopo,
takîhso ehtopo komo,
kicicitho pokohra ehtopo komo,
wakreno rin̂e me ehtopo,
ero warai na mencetu tooto komo yehtopo.
Ero yipu yencetaw awya so ponaro ehcoko.
Kir̂wan̂he nasî ero wara kehtopo,
kacho ponaro marha ehcoko.
Kir̂wan komo yehtopo yencetaw awya so ero ponaro mak ehcoko.
Ero yipu ponaro mak ehcoko.
9 Taa,
apanatanmekn̂enhîrî komo ow ha.
Kaanî mtapotarî wekatîmyakn̂e awya so.
Ero poko rma kpanatanmekyatken̂e so.
Omtapotarî yaw roro oyehtopo marha meen̂atken̂e.
Ero ke owara xa marha ehcoko amyamro hara.
Ero wa awexitaw so awakronomexe so tak Kaan,
ahwokara kiin̂e ro ha.
Kir̂wan̂he Ween̂asî Anmîthîrî Komo
10 Taa,
on wara wîîkes hara awya so,
oponaro xa hara mat ham.
Tawake ro mak wîxakn̂e okre an̂ekpothîrî komo yenîche.
Kir̂wan̂he xa mai ham Apa,
wîîken̂e Kporin komo ya enîche.
Orotono wa xa tak ow mîwakrexe.
Opînîn yaw rma re ka mîxatken̂e pahxa n̂he.
Anîmrî komo yekn̂e tko ka exihra xakn̂e.
Kokon̂oro tak Epapocitu ya tak mekpetken̂e.
Kir̂wan̂he ween̂e okre an̂ekpothîrî komo.
11 Kesemetanmekyasî mak okwe,
kahra tan was awya so.
Pîra ro mak.
Pahxa rma kepanatanmekyakn̂e cerepore oyehtopo poko.
Ahce wa so na oyexitaw cerepore tak wasî.
12 Ero ke oyesemetanmekyataw oyewru yarîhra rma wasî.
Cemyawnoi oyexitaw hara oyemyawno poko ahwotara marha wasî.
Ahto so na oyexitaw cerepore mak wasî.
Ero wa wasî tînahke xa oyexitaw,
yînapumra n̂he oyexitaw marha,
cemyawnoi oyexitaw,
emyawnomra n̂he oyexitaw marha.
Ahce wa so na oyexitaw cerepore so rma wa was ha.
Ero warai poko kepanatanmekyakn̂e.
13 Ahce na poko ehn̂ara ro mak wasî Kristu exirî ke oropotaw.
Noro xa okarihces okre.
14 Wara rma kir̂wan̂he mekpetken̂e opurantan.
Oyesemetanmekyataw rma okwe mekpetken̂e.
15 Pahxa ka puranta mîmyatken̂e owya ahyaw so oyexitaw.
Xesus ya kakirwamacho wekatîmyakn̂e awya so yihcirî me ha ka.
Ero yinhîrî Maseton̂a poi kîwcekn̂e hara.
Owcetaw tak opurantan mîmyatken̂e.
Anarî pono komo ka tîmîhra xatken̂e Kaan xîkrî komo.
Amyamro mak mîmyatken̂e puranta owya.
16 Tesaronika po oyexitaw marha owakrecho mekpetken̂e asakî ro.
Ahce na xe oyehtopo yapontopo mekpetken̂e.
17 Opurantanî n̂he men ekmexpocoko xa hara,
kacho pîn tan wîîkes awya so.
On wara xa wîîkesî,
mer̂pora awepethîrî komo yahsî xe was awya so amn̂e Kaan nîmîtho ha.
Ero ke wakreno ciicoko,
wîîkes mak tan.
18 Ohyaw tak nasî anmîthîrî komo ahnoro.
An̂ekpothîrî komo nîmtîkekn̂e owya Epapocitu.
Ero ke esemetanmekîra tak wasî.
Tawake nasî Kaan apoko so tîmrî ke awya so.
Pahxan pen komo Kaan ya tîmsom nakn̂iyatken̂e.
Kotoporem nakn̂iyatken̂e,
Tokuthîrî komo marha nakn̂iyatken̂e Kaan ya tîmsom me.
Kir̂wan̂he Kaan n̂een̂akn̂e ero yipu.
Ero wa xa marha on n̂een̂asî hara anmîthîrî kom hara.
19 Ero ke awya so marha Kaan nîmyasî yiixe awehtopo kom hara ahnoro.
Mer̂pora ro mak nasî noro yemyawno meye kir̂wanî ro po.
Ero poi rma nîmyasî yiixe awehtopo komo esemetanmekîra ro mak awehtome so.
Ero wa nîmyasî Xesus Kristu yakrono me awexirî ke so.
20 Taa,
on wara makî takî ka xe wasî awya so,
Kir̂wan̂he ro mak mai ham Apa okre,
kapore nasî Kaan ya.
Miya roro kapore nasî yîwya yîtîtmamnî me ro mak.
Yaaro tan wîîkes awya so.
Pawru Mtapotarî Yîtîhkacho
21 Taa,
iitono komo ya cma re mîîkexe,
Pawru tî nai aponaro so,
mîîkexe cma re.
Kaan ponarono komo ya cma re mîîkexe Xesus Kristu yakrono ro me cehsom komo ya.
Tantono komo marha tî natu aponaro so kakno kom ha.
22 Kir̂wan̂he matu iito,
kexe Kaan xîkrî komo ahnoro awya so.
Ero wa xa kexe Sesa yawno kom ha.
23 Taa,
awakronoma xe so wasî Kporin komo Xesus Kristu ya.
Ero wa mak wîîkes awya so oyakno komo.