4
Taa,
amyamro hara tooto yosom komo,
awya so makîrha tan wîîkes hara.
Kir̂wan̂he mak antomacoko awanton komo.
Ecenarî so mak apickacoko.
Kir̂wan̂he marha tîmcoko yîywa so yiixe ehtopo komo etîme re.
On wara kacoko,
Owî xa marha wasî tosomke hara.
Kah yawno Mîk oyosom ha,
kacoko.
Ero ke ero wa ehcoko poko so.
2 Taa,
mîk hak yakro tak kîmtapowas hara.
On wara ehcoko amyamro ahnoro,
Kaan yakro amtapotacoko roro cerewre.
Awero ro so xa amtapotacoko.
Kir̂wan̂he xa mai ham Apa,
kacoko marha Kaan ya Noro yakro amtapowataw so.
3 On wara was ow,
tahruso thakwa wasî.
Kaanî mtapotarî yekatîmn̂e me wasî,
Kristu pokono yekatîmn̂e me.
Ekatîmnînhîrî mîn Kristu pokono.
Ero yekatîmrî poyero oyahruyatken̂e.
Ero ke amna poko amtapotacoko Kaan yakro.
On wara kacoko yîwya,
Pawru komo akronomak Apa Kristu pokono yekatîmtome xa hara yîwya so,
kacoko amna poko.
4 On wara marha kacoko opoko,
Centaxmu me xa ekatîmn̂e me Pawru cirko Apa,
sara wara xa entachome entan̂e komo ya,
kacoko opoko.
Awanme xa ekatîmn̂e me cirko,
kir̂wan̂he ekatîmpoko yîwya,
kacoko marha.
5 Amyamro hara Kaan xîkrî pîn komo yakro awexitaw so takîhsom me mak esenpocoko yîwya so.
Xesus ya kakir̂wamacho komo ekatîmcoko marha yîwya so.
Ecmamra mak ehcoko ero poko.
6 Tawake mak amtapotacoko tooto komo yakro.
Erewsî tîtpoxuresî yîmîtî ke ero wa xa marha amtapotarî komo poxurecoko takîhso awesehtînorî komo ke hara.
Ero wa esehtînocoko mîk hak yeyuhtome takîhso.
Ero wa amtapotacoko.
Pawru Yakrono Komo Pokono
7-8 Taa,
yarî wen̂epesî amn̂e Cikiku oyekatîmn̂e.
Kakno komo rma moso Cikiku,
yîpînmîkno xa.
Oyakronoman̂e marha moso,
oponarono xa.
Kporin komo yanton xa marha moso owarai xa marha.
Noro yipu moso wen̂epesî yarî.
Noro tak n̂ekatîmtîkesî oyehtopo awya so.
Taa,
kir̂wan̂he nat ham Pawru komo,
mîîkexe tak yîmtapotarî yentache.
9 On̂esimu marha wen̂epesî Cikiku yakro.
Kakno komo marha mîk hara On̂esimu.
Kemîknon̂e pînî ro mak mîk,
yiixe kehtopo komo marha.
Apoyino komo rma mîk ha.
Cikiku yakro wen̂epesî yarî ahyaka so.
N̂examro tak n̂ekatîmtîkexe amn̂e ahce wa na amna yehtopo awya so.
10 Taa,
aponaro so tî natu tantono komo.
Ow men ekatîmko yîwya so,
kesî Aristaku.
Kahrutopo yawno xa marha mîk ha.
Ero wa xa marha kesî Mahkus hara awya so.
Banabe parî mîk Mahkus,
epeka mrerî ha.
Pahxa rma noro yehtopo wekatîmyakn̂e awya so.
Ero ke noro toche ahyaka so etarî men enpocoko yîwya.
11 Xesus marha tî nai aponaro so hara.
Xustu,
kacho mîk noro yosot hara.
Xutew komo moxam Aristaku,
Xustu,
Mahkus komo.
N̂examro mak Xutew komo poyino oyakronomexe,
Kîkayaritomon xa Mîk Kaan,
kacho yekatîmrî poko ha.
Oyahworen̂e mîkyam okre.
12 Epapras marha tî nîîke awya so,
Ow ekatîmko yîwya so,
nîîke tî.
Apoyino komo marha mîk Epapras,
Kristu Xesus yanton xa.
Apoko so tîmtapotaxmu xa mîk Kaan yakro.
Cerewre ro mak nîmtapowasî apoko so.
On wara kesî apoko so,
Apa kah yawno,
n̂examro cma re makir̂wametîkesî.
Awanme mak poko ehtopo komo yîhtînon̂e me roro cirko,
kesî Kaan ya apoko so.
Ero wa kesî Epapras apoko so.
13 Apoko so ceserepokaxmu me ro mak ween̂asî noro.
Rawciseia pono komo poko marha nîmtapowasî,
Ieraporis pono komo poko marha.
Ero wa ween̂asî Epapras.
14 Aponaro so tî nai Rukas marha,
kehceman̂e ha.
Yîpînîmîkno mîk ha.
Temas marha tî nai aponaro so.
15 Ow takî cma re mekatîmyaxe Rawciseia pono komo ya,
kakno komo ya ha.
Ninpa ya marha cma re ow mekatîmyaxe hara.
Yîmîn yaka cesenmesom komo ya marha ow mekatîmyaxe.
Ero wa cma re ow mekatîmyaxe.
16 Taa,
on okaritan yîmtapotarecoko amyamro ha ka.
Ero yinhîrî tak awakrono komo yaka xa hara arpocoko Rawciseia pono komo yaka yînîmtaporerî komo marha.
Anarî nai hara okaritan Rawciseia pono komo yaw hara.
Ero marha men ahsîcoko hara amn̂e amyamro anîmtapotarerî kom hara.
Ero wa men encoko okaritanî mko.
17 Taa,
on wara kacoko Akipu ya hara,
Pahxa tîmxîkrî komo yenîrî poko awantomekn̂e Kporin komo.
Ero ke ero poko xa esko,
kacoko yîwya.
18 Taa,
ow xa tak on mewresî okaritan mapitho cik mak.
Pawru rma ow ha.
Yîtwen̂ekarîntara ehcoko opoko.
Mînto nai Pawru tîhraknumiso kuripara ke,
kacoko roro opoko.
Taa,
awakronoma xe so wasî Kaan ya.
Ero wa mak wîîkes awya so,
amen.