Kir̂wan̂he Amna Xakn̂e Kakir̂wamacho Komo Yekatîmyataw Awya So
2
On wara marha wîîkes awya so,
amna rma meen̂atken̂e,
oyakno komo achew so amna exitaw.
On wara amna xakn̂e,
tohnaw mak mokuhra ro mak amna xakn̂e acheka so.
2 Piripos po ka amna exitaw iitono komo amna n̂emetanmekyatken̂e okwe.
Noro pîntho wara ro mak amna n̂iir̂atken̂e okwe.
Ero wa amna yehtoponho rma mencexe.
Ero wa emetanmexapunhîrî rma tko yîkrîpîra xakn̂e amna Kaan ponaro cexirî ke.
Noro ya kakir̂wamacho komo amna n̂ekatîmyakn̂e awya so hara erasîn me ro mak.
Tanwekn̂e komo chew rma ero wa amna kekn̂e.
3 Cemaro pînî ro poko mak apanatanmekyatken̂e so amna.
Kicicitho pokono pîn me marha amna xakn̂e iito cexitaw amna.
Kir̂wan wara kyam mak esenpora xakn̂e amna awya so.
Yaarono me mak amna n̂ekatîmyakn̂e awya so.
4 Takîhsom me amna nîhtînoyakn̂e ham Kaan.
Ero ke amna nantomekn̂e kakir̂wamacho komo yekatîmrî poko.
Ero ke Kaan yanme mak amna n̂ekatîmyakn̂e awya so.
Tooto pohkachome me mak ekatîmra amna xakn̂e.
Kaan xa nasî kropotarî komo yukukman̂e me.
Ero ke Noro yanme mak amna n̂ekatîmyakn̂e.
5 Aaxatî komo wara kyam mak esenpora ro mak xakn̂e amna,
tohnaw ro mak esenpora.
Tupurantan yahsîtome mak ekatîmra marha xakn̂e amna awya so.
Pîra ro mak.
Ero warahra ro mak amna xakn̂e.
Amna meen̂atken̂e rma.
Kaan marha kir̂wan̂he amna yehtopo n̂enpekn̂e.
6 Tooto mtapotarî ponarora marha xakn̂e amna,
Kir̂wan̂he xa ekatîmn̂e ma amoro okre,
kacho ponarora.
Amyamro marha ero wa kan̂e me awexi xera so xakn̂e amna tpoko.
Kristu nantomatho rma re amna.
Ero ke on wara na re amna karî awya so,
Amna purantanî n̂he thakwa tîmcoko,
karî na re awya so.
Ero wa kan̂e pîn me tko amna xakn̂e awya so.
7 Awein̂e mera so amna xakn̂e achew so cexitaw.
Tîmxîkrî nosomcesî yîson ero wa xa marha xakn̂e amna hara apoko so.
8 Aaxe so ro mak amna xakn̂e okwe.
Ero ke tahwore amna n̂ekatîmyakn̂e Kaan ya kakir̂wamacho awya so.
Iinan me mak exihra amna xakn̂e.
Amna n̂esekatîmtîkekn̂e meero awya so apînîn yaw so xa amna exirî ke.
Ero wa awen̂atken̂e so amna tîpîn̂em me xa.
9 Ero ke amna n̂etapickekn̂e iito.
Amna yetapickarî rma meen̂atken̂e oyakno komo.
Cekar̂kaxi ro mak amna n̂etapickekn̂e tupurantan yahsîtome.
Katpanaw,
kosope marha,
ero wa amna n̂etapickekn̂e tînahrî yepetho me.
Awya so ka xera amna xakn̂e,
Amna purantan ehcoko,
ka xera.
Ero ke amna n̂etapickekn̂e Kaan Karitan yekatîmn̂e rma.
10 Kir̂wan̂he mak amna xakn̂e iito achew so.
Ero wa amna yehtopo rma wa meen̂atken̂e.
Kaan marha amna n̂een̂akn̂e ero wara.
Kaan ponarono me mak amna xakn̂e.
Takîhso marha amna xakn̂e apoko so.
Kicicitho mîkyam kica,
kacho mera marha amna xakn̂e.
Ero wa amna xakn̂e achew so,
Kristu pona enîn̂e komo chew.
11-12 Rikomo yîîm panatanmekyasî tîmxîkrî komo ero wa xa marha amna apanatanmekyatken̂e so.
Awahworen̂e komo me marha amna xakn̂e,
aweronoman̂e komo me marha.
On wara marha amna kekn̂e awya so,
Tmaywen me awan̂ikyatken̂e so Kaan kir̂wanî ro me awitome so.
Ero ke kir̂wan̂he xa ehcoko Kaan nan̂ikîtho me awexirî ke so,
kekn̂e amna awya so.
Ero wa kekn̂e amna awya so.
13 Kaanî mtapotarî yencetaw awya so amna n̂ekatîmtho kir̂wan̂he ro mak mencetken̂e okre.
Kaanî mtapotarî me rma mencetken̂e ham tooto mtapotarî mera.
Yaaro rma ha,
Kaanî mtapotarî rma mîn amna n̂ekatîmyakn̂e awya so.
Ero yipu rma nas aropotaw so awakir̂waman̂e komo me Xesus pona enîrî ke awya so.
Kir̂wan̂he xa mai ham Apa okre,
kesî roro amna Kaan ya ero wa awexirî ke so.
14 Awemetanmetopo komo yînîmn̂e me marha maxe.
Xuteia pono komo wara xa marha mîxatken̂e Kaan xîkrî komo wara.
Ero wa thakwa n̂examro pen n̂emetanmekyatken̂e Xutew komo rma.
Kaan xîkrî komo n̂emetanmekyatken̂e okwe,
Xesus Kristu yakrono komo rma.
Ero wa xa marha awemetanmekyatken̂e so apoyino kom hara.
15 Noro yipu komo mîkyam Xutew kom okwe.
Kporin komo Xesus waihkan̂enho komo rma mîkyam okwe.
Tweronoman̂e pen komo marha waihketken̂e okwe.
Amna marha thakwa n̂emetanmekyatken̂e.
Kaan n̂enîrî mexan mera ro mak naxe okwe.
Tooto yanwekn̂e me marha naxe,
miyan komo yanwekn̂e me rma okwe.
16 On wara marha kexe amna ya,
Kaanî mtapotarî ekatîmra ro mak ehcoko kica Xenciu komo ya,
kexe amna ya.
Xenciu komo yakir̂wamapo xera naxe Kaan ya.
Ero wara naxe Xutew komo okwe.
Kicicme ro mak tak n̂ehtîkexe okwe.
Ero ke Kaan tak nîrwonîmtîkesî ro mak n̂examro pen poko okwe.
Ero wa naxe Xutew kom okwe.
Awenî Xe So Xa Nas Amna
17-18 Taa,
ahyai so amna toche yohno rma cetîrama xe xakn̂e hara amna awenso so xa hara.
Awenîra so amna xakn̂e okwe.
Awenîn̂e komo wara rma tko amna xakn̂e tîropotaw so.
Ero ke awenso so tmoku xe ro mak amna xakn̂e.
Emapona tmohtopo amna nîhtînoyakn̂e,
owî rma wîhtînoyakn̂e,
Pawru ha.
Pîra ham okwe.
Amna mak porohkekn̂e roro Satanas kica.
Ero wa amna xakn̂e.
19 Ahce ponaro xa nai amna awya so?
Ahce poko xa amna nahwowa amn̂e Kporin komo Xesus mokyataw hara?
Ahce xa nai amna yarokorî warai ero yimaw awya so?
Amyamro rma ero warai me maxe.
Apoko so amna nahwowasî ro mak amn̂e Noro mokyataw.
20 Amna porokru warai xa amyamro,
amna yahwotacho marha okre.
Ero warai me amna ahtînoyaxe so.
Ero ke ahyaka so tmoku xe xa xakn̂e amna okwe.