1-2 Taa,

ero wa amna xakn̂e ahyai so amna toche,

expora ro mak amna xakn̂e awehtopo komo yenta xe xa hara.

Ero ke Cimocu yen̂epetopo tak amna nîhtînoyakn̂e ahyaka so.

Amna reha n̂etînomyakn̂e Atenas po rma ha ka.

Kakno komo moso Cimocu,

Kaan yanme cekaritosom ha.

Amna yakronoman̂e marha moso Kristu ya kakir̂wamacho yekatîmrî poko.

Ero ke on wara kekn̂e amna yîwya,

Okopuci,

amoro cma re mîîcesî Tesaronika pona iitono komo yahworeso.

On wara cma re mîîkesî yîwya so,

Ahwokara ro mak men cexpore nasî Kaan poko,

mîîkesî yîwya so,

kekn̂e amna yîwya.

Ero wa Cimocu amna n̂en̂epekn̂e ahyaka so.

3 Awemetanmetopo komo amna n̂encekn̂e.

Ero ke ahwokara awehtome so noro n̂en̂epekn̂e amna ahyaka so.

Ero warai me ciisom kîwyam Kaan xikrî komo,

cemetanmesom me.

4 Pahxa ka achew so amna exitaw ero yipu poko rma wa amna aweronometken̂e so.

Cemetanmesom me so taxe amn̂e,

kekn̂e amna awya so.

Yaaro amna kekn̂e ham,

awemetanmekyatken̂e so thakwa ham okwe iitono komo.

5 Ero ke aponaro so tak wehtîkekn̂e.

Ero wa oyehtopo yînmîra tak wîîxakn̂e okwe.

Ero ke Cimocu wen̂epekn̂e awenso so,

Xesus ponaro rma awehtopo komo yenso.

On wara wîîkekn̂e,

Satanasî tko na nîmtapowa kicicme yîropotaw so.

Noro tak na n̂ewehcatu okwe.

Ero wa exitaw so na tohnaw mak xakn̂e ham okaritotoponho n̂examro panatanmetopo poko,

wîîkekn̂e.

Ero ke Cimocu wen̂epekn̂e awenso so.

6 Taa,

kokon̂oro tak noro mokyakn̂e hara awenso so toxapunhîrî.

Kir̂wan̂he xa awehtopo komo n̂ekatîmyakn̂e amna ya.

On wara kekn̂e,

Kaan pona rma n̂een̂axe okre Tesaronika pono komo.

Etîxe marha naxe okre.

On wara kexe apoko so Apa,

Pawru komo pînîn yaw amna nas okwe.

Moku xe so xa hara nas amna,

ketu apoko so,

kekn̂e.

Ero wa amtapotarî komo n̂ekatîmyakn̂e Cimocu amna ya.

Ero wa xa marha wa nas amna hara,

awenî xe so xa marha nas amna.

7 Kaan pona n̂een̂atu rma ham okre,

kes amna apoko so,

ero ke cerepore nas amna.

Amna rma re n̂esemetanmekyasî,

anarimaw amna n̂esemerwesî marha.

Cerepore rma tko nas amna Kaan pona enîn̂e me ahtînorî ke so.

8 Ahwokan me ro mak Kporin komo ponaro mat ham okre,

ero ke tahwore xa nas amna.

9 Kaan poko marha nahwowas amna kir̂wan̂he awexirî ke so.

Kir̂wan̂he mai ham Apa,

Tesaronika pono komo makir̂wame ham okre,

kes amna Kaan ya.

Ekatîmrî yopo ro mak amna nahwowasî apoko so.

Ero wa nas amna.

10 Ero ke cerewre amna nîmtapowasî Kaan yakro.

Amna cma re maar̂as hara n̂examro yenso,

kes amna yîwya.

Katpanaw kes amna,

kosope meero marha.

Awakîretîka xe n̂he nas amna Kaan pona enîn̂e me n̂he awehtome so.

11 Kîîm komo Mîkî Kaan.

Noro rma ahyaka so amna yaan̂e me exi xe wasî,

Kporin komo Xesus Kristu yakro.

12 Taa,

on wara marha awiri xe so wasî Kporin komo ya,

etîxatî me xa tak,

miya xe n̂he tak.

Ero wa awiri xe wasî etpoko rma,

miyan komo poko meero marha.

Aaxatî komo me xa nas amna,

ero wa xa marha etîxatî me awiri xe so wasî yîwya.

13 Akariton̂e me marha exi xe wasî aropotaw so,

kir̂wanî ro me awentome so Kaan ya amn̂e Kporin komo Xesus Kristu mokyataw tînakir̂wamathîrî komo yakro rma.

Ero yimaw kir̂wan me xa awexi xe so wasî Kaan n̂enîrî me.

Kicicme mas okwe,

kacho pîn me awexi xe so wasî yîwya.

Ero wa awexi xe so wasî ero yimaw.