Takîhso Mak Ehcoko Mîk Hak Poko
4
1-2 Taa,
on wara wîîkes hara awya so oyakno komo,
yîtîhkarî me tak.
Apanatanmecho komo rma tan mewresî an̂enîrî komo.
Pahxa rma apanatanmekyatken̂e so amna.
Ero wa ehcoko Kaan n̂enîrî mexan me awehtome so,
kekn̂e amna awya so.
Ero ke amna mtapotarî ponaro xa tak ehtîkacoko.
Ero wa kes amna awya so Kporin komo Xesus yanme rma.
3 Ero yipu poko rma kpanatanmekyaxe so xa hara oroto.
On wara tî awexi xe so nai Kaan,
tponarono me xa awexi xe so tî nai anarî ponarono pîn me.
Ero ke yikicicintara ro mak awexi xe so tî nai.
4 Awewetîn̂e me apun komo ciicoko.
Kaan yanme rma ero wa ciicoko,
takîhsom me xa.
5 Xenciu komo warahra kexi xe so tî nai Kaan.
Cipici pîn poko n̂epohketîkexe n̂examro okwe,
Kaan ponarono pîn me cexirî ke so.
Ero ke ero warahra ro mak ehcoko amyamro reha.
6 Takno komo na n̂emetanmekyatu anarî komo yipici poko cehtopo komo ke.
Yipici pohkan̂e me na natu anarimaw kica.
Ero wara emetanmexapu komo yepanîn̂e me nasî Kporin komo kopi.
Ero wara rma kekn̂e amna awya so pahxa rma.
7 Kicicitho pokono me ciisom me kan̂ikîra ro mak xakn̂e Kaan.
Tponarono me xa ciisom me xa matko kan̂ikyatken̂e so.
8 Ero wa kacho yanwekn̂e na nai iito.
Tooto mtapotarî pîn mîn nanwekyasî.
Kaan xa nanwekyasî okwe.
Kîwya so Kir̂wanî ro Yekatî tîmn̂enho rma mîkî Kaan,
Noro rma nanwekyas okwe.
Ero wa nasî.
9-10 Taa,
on wara tî matu okre,
awakno komo xatî me tî matu okre.
Kaanî rma apanatanmekyatu so ham ero yipu poko.
Awakno komo xe ehcoko,
kesî aropotaw so.
Ero ke ero yipu poko tmewrepore nai n̂examro panatanmetopo,
kahra wasî.
Miyan komo xatî me rma tî matu,
awakno komo xatî me.
Maseton̂a poko hakno komo xatî me rma tî mat okre.
Ero ke,
awakno komo xatî me xa tak ehtîkacoko,
kesî mak amna awya so oyakno komo.
Ero wa kes amna awya so.
11 On wara marha kes amna awya so,
kir̂wan̂he awehtopo kommo ponaro mak ehcoko.
Ahce wa na nai noro hara,
kahra ro mak ehcoko awakno komo poko.
Awemyawno ro komo poko ehcoko,
ahce na ciitopo poko.
Ero yipu poko rma amna apanatanmekyatken̂e so.
12 Ero ke ero wa ehcoko takîhsom me awesenpotome so Kaan xîkrî pîn komo ya,
esemetanmekîra marha awehtome so amyamro rma.
Ero wa ehcoko ha.
Tîtpakexe Hara Amn̂e Waixapunhîrî
13 Taa,
on wara marha wîîkes awya so oyakno komo,
camkî awexi xera so wasî yîwînxapu komo poko.
Anarî komo nahwokexe ro mak tpoyinonhîrî pen komo waipuche.
Opoyinonho pen yenîhra ro mak tak wai ham okwe,
kexe mak okwe.
Ero wara awahwoka xera so wasî amyamro reha.
14 On ponarono xa kîwyam,
Xesus waihtoponho ponarono,
Noro pakachonho ponarono marha.
Ero ponarono komo xa kîwyam.
Ero ke on wara marha kapore nas hara,
Xesus mokyataw hara oona yîwînxapunhîrî komo tak Kaan n̂en̂epesî xiya hara Noro yakro.
Xesus yakrono ro komo mak n̂en̂epesî,
kapore nasî.
15 On wara marha kes amna awya so,
Kporin komo mtapotarî xa tan amna n̂ekatîmyasî awya so.
Xesus mokyataw oona hara waipîra na tatu anarimaw,
roowo po rma na tatu.
Ero yimaw tak cetanîmyaxe.
Yîwînxapunhîrî komo tko yîywanokara taxe.
16 N̂examro ka pakexe cokorî.
On wara nasî Kporin komo noro yipu komo paketaw,
Noro rma tak nîhcesî kah yai.
Yîhcetaw rma ancu yantoman̂e n̂emtarakesî,
Kaan ratîn marha n̂eceyas hara.
Ero yimaw tak waixapunhîrî komo pakexe,
Kristu yakrono ro komo mak.
Kah yaka tak n̂etanîmyaxe.
17 Ero yimaw tak on wara taxe kîwyam hara waipîn komo,
roowo po cehsomînhîrî komo rma,
waixapunhîrî komo yakro rma tak cetanîmyaxe.
Kaapu smun cheka rma cetanîmyaxe miya kah yaka.
Iito tak taxe eroromero Kporin komo yaw.
18 Ero ke ero wa kacho tak ekatîmcoko ahwokaxapu komo ya ahworetome so hara.
Ero wa ekatîmcoko.