Kaanî Rwonîmtopo Pokono
5
Taa,
on wara kacho poko tmewrepore xa nasî yîn̂enîrî komo me,
kahra cma re nas amna.
On po xa mokyasî Xesus,
kacho.
Ero yimaw xa Kaanî rwonîmtopo me n̂enmayasî,
kacho poko.
Ero poko tmewrepore nasî,
kahra nas amna.
2 Ero yipu pokono rma tko mencetken̂e pahxa rma,
esehtînopîn me mak n̂enmayasî amn̂e,
kacho ha.
Kosope mokyasî cen̂epan̂em esehtînopîn me mak,
ero wa xa marha n̂enmayas amn̂e Kporin komo kamon,
kacho rma mencetken̂e ha.
3 On wara kexe tooto komo amn̂e,
Ahce na pona erasîra ro mak taxe,
tukurui xa taxe okre,
kexe.
Ero wara ketaw rma yîwya so waihkacho komo me tak nas okwe.
Tîhra rma wooxam n̂erewasî ewrutopo me exitaw,
ero wa xa marha n̂examro pen waihkacho me nasî.
Yukurun komo thakwa exihra nas okwe ero yimaw.
Ero wa naxe tooto komo amn̂e okwe.
4-5 Ero warahra maxe amyamro reha oyakno komo.
Awarpanawno pîn amyamro,
kosope cetarisom warai pîn ha.
Weeyu pono xa amyamro reha,
katpan pono ha.
Ero ke cen̂epan̂em wara awekatkara nasî Kporin komo yîrwonîmtopo me enmacho amn̂e.
6 Ero ke yîwînkîra ro mak cehcerî.
Anarî komo warahra ro mak cehcerî.
Cewke xa matko cehcerî,
takîhso marha.
7 Kosope nîwînîkyaxe tîwînsom komo reha.
Kosope marha wenaxe twenîmsom kom hara.
8 Katpan pono xa kîwyam reha.
Ero ke takîhso mak cehcerî.
Kuripara ke tawrutakem wa xa cehcerî,
kecen̂an ken̂arî wa.
Kawrutarî warai rma mîn Kaan pona entopo kîwya so.
Ero warai xa marha mîn etîxatî me kehtopo kom hara.
Kuripara ke tîhtîwomkem wa marha cehcerî.
Ero warai ke tîhtîwomkem wa taxe Xesus ya kakir̂wamatîkacho ponaro kexitaw so.
9 N̂examro poko kîrwonasî ro mak amn̂e,
kahra ro mak tî xakn̂e Kaan kpoko so.
Tukurunpesom mîkyam,
kekn̂e xa matko kpoko so Kporin komo Xesus Kristu yakrono ro me kexirî ke so.
10 Noro rma waihyakn̂e kepethîrî me so tîhyaka kaatome so eroromero.
Yîwînkîn komo naar̂asî,
yîwînxapunhîrî komo marha.
11 Ero ke awakno komo ahworecoko,
akîhrecoko marha.
Ero wara rma tî mahworetu,
makîhretu marha.
Kir̂wan̂he nasî ero wara awehtopo komo.
Mîn Hak Pokono
12-13 Taa,
awenîn̂e komo poko kîmtapowas hara oyakno komo.
On wara naxe n̂examro awenîn̂e komo,
Kporin komo yanme mak naxe awenîrî komo poko.
Kir̂wan̂he awitopo komo poko n̂ekaricexe,
apanatanmetopo komo poko ha.
Ero ke n̂examro ponaro men ehcoko.
Ayopono komo me encoko.
Yiixe so marha ehcoko apoko so cekaritosom me exirî ke so.
On wara marha ehcoko amyamro ahnoro,
tawake ehcoko etpoko.
14 On wara marha wîîkes awya so oyakno komo,
Kaan mîn yenîn̂e komo yewetîn̂e pîn komo weronomacoko.
Kicicme men awen̂atu so Kaan okwe n̂examro yewetîn̂e pîn me awexitaw so,
kacoko yîwya so.
Apehceme tahwokaxmu exitaw anarî komo n̂examro ahworecoko hara.
Kar̂pen komo exitaw noro yipu komo tak akronomacoko.
Anarme ciki na natu anarî komo.
Ero wa exitaw so,
yînîmn̂e me mak ehcoko.
15 Awemetanmekn̂e komo exitaw esepanpîra ro mak ehcoko.
Kir̂wan̂he roro mak ehcoko awakno komo poko,
tooto komo poko marha miyan komo poko rma.
16 On wara marha ehcoko,
tahwore roro ehcoko miya roro.
17 Kaan yakro marha amtapotacoko,
iinan me mak kîmtapowasî,
kan̂e pîn me makî.
18 Ahce wa so na awexitaw so,
Kir̂wan̂he xa mai ham Apa,
kacoko mak.
Ero wa kan̂e me roro awexi xe so nasî Kaan,
Xesus Kristu yakrono ro me awexirî ke so.
19 On wara marha wîîkes awya so,
Kaan Yekatî ponaro ehcoko.
Wehto wara rma nasî Noro aropotaw so.
Ero ke eihkan̂e pîn me men ehcoko.
20 Aweronoman̂e komo mtapotarî yîwîrîyakara ro mak ehcoko.
21 Anarî komo mtapotarî yencetaw apanatanmetopo komo twerî men ka entacoko cokorî.
Kir̂wan̂he yîhtînopuche mak tak awya so ewetîcoko.
22 Anarmerpa nasî kicicme tooto komo yehtopo.
N̂expe ro kr̂a mak ero yipu ahnoro.
Pokohra ro mak ehcoko.
Ero wa ehcoko.
23 On wara awiri xe so wasî Kaan ya,
tponarono me mak.
Kir̂wan̂he mak awiri xe so wasî,
Kicicme maxe kica,
kacho mera ro mak.
Ero wa awiri xe so wasî yîwya miya roro Kporin komo Xesus Kristu mohtopo pona roro.
Kir̂wan̂he exi xe wasî apun komo,
awesehtînotopo komo marha,
awekatî komo marha.
Ahwokan me kiin̂e ro Mîkî Kaan,
Noro ya ero wa awiri xe so wasî.
24 Kemîknon̂e pînî ro mak Mîk Kaan.
On wara kesî Noro awya so,
Kir̂wan me on̂irirî me wa kan̂ikyatken̂e so,
kesî.
Ero ke tîmtapotachonhîrî yaw roro rma kir̂wan̂he awitîkexe so amn̂e.
25 Oyakno komo,
amna poko n̂he amtapotacoko Kaan yakro.
26 On wara marha ehcoko,
awakno komo yakro aweseporîche so esewcokacoko Kaan yanme mak.
27 On okaritan yîmtapotarecoko men amn̂e kakno komo n̂entarî me,
ahnoro Kaan xîkrî komo n̂entarî me ha.
Kporin komo yanme xa tan ero wa wîîkes awya so.
28 Awakronoma xe so wasî Kporin komo Xesus Kristu ya.
Amen.