Amn̂e Mak Kaanî Rwonîmtopo Me N̂enmayasî
2
Taa,
on wara wîîkes hara awya so oyakno komo,
Kporin komo Xesus Kristu mohtopo poko tan kîhcamhokexe so.
Noro yaka kesenmetopo komo poko marha kîhcamhokexe so.
2 On wara amna kes awya so,
awahwoka xera so nas amna tapota yanme.
Kristu kamon n̂enmai pahxa rma,
kacho poko tî awerepoketu so iitono komo okwe.
Kaan Yekatî yanmen wara tî ero wa ketu kica.
Kaanî mtapotarî tî re n̂ekatîmyatu kica awya so.
Amna karitan marha tî re nai yîhyaw so ero wa kacho.
3 Yîmtapotarî komo ponarora ro mak ehcoko.
Kristu kamon me enmapîra ka nasî.
On wara cokorî ka naxe tooto komo ero yipu me enmapîra ka exitaw,
Kaanî mtapotarî ka poxunkexe mer̂pono pîn komo.
Kicicitho pokono ro marha ka n̂esenpesî,
tîwîrîmaxmu me cehsom xa.
Ero wa cokorî ka naxe tooto komo Kporin komo kamon me enmapîra ka exitaw.
4 On warai mîk kicicitho pokono ro,
Kaan yanwekn̂e ro xa mîk.
Mîk hak yopono me n̂esenpesî kica,
Kaan mîkro,
kacho komo yopo.
Onok na poko nahwowaxe anarî komo,
noro yipu komo yopono me marha n̂esenpesî.
Kaan mîn yawno me tak nasî,
Kaan ow ha kan̂e me kica.
5 Noro pokono rma wa wekatîmyakn̂e awya so iito oyexitaw ha ka.
Ponarora katî mat ha?
6-7 Noro ka esenpora nasî esenpotopo mera ka exirî ke.
Cetanwesom me rma tko naxe tooto komo oroto.
En̂epa me ka n̂ihciyasî kicicme ehtopo komo.
Nas ha tko ka kicicme cehsom komo yîkrîren̂e.
Noro yehtopo rma wa mencexe,
yîkrîren̂e komo yehtopo.
Amn̂e n̂he tak yîkrîren̂enhîrî komo tak naar̂as hara Kaan.
8-9 Ero yimaw tak noro n̂esenpesî kicicitho ro,
kanwekn̂e ro mak.
Satanas yanme ciino rin̂e xa mîk kica.
Noro yanme marha emîknono n̂iir̂asî kica.
Cirihnî mko n̂iir̂asî emîknono ritopo mko.
Karitî ro me n̂esenpesî tooto komo yeserepokachome.
Cemaro me mak cirihnî n̂iirasî kica.
Noro penî tko waihkesî amn̂e Kporin komo.
Tapepen ke rma waihkesî.
Tîroromutwe cehtopo ke marha nakn̂iyas oco.
Ero wa tî noro pen nar̂me Xesus tmokyataw hara.
10-11 On wara marha nasî noro kicicitho pokono ro,
mîn hakî ke emîknono n̂iir̂asî,
kicicitho ke kica.
Cehcamnosom komo makî reha n̂emîknoyasî.
Yaarono yenta xera cexirî komo ke mak cemaro n̂ewehcaxe n̂examro okwe.
Enta xe cexitaw so ketaw ha re n̂examro pen nakir̂wamarî ha re Kaan.
Enta xera tko tî xatken̂e okwe.
Ero ke cemaro xa tak Kaan n̂enpesî yîwya so ero yewetîtome okwe.
12 Ero wa n̂examro pen n̂iir̂asî Kaan,
cemaro yewetîn̂e me ro mak n̂iir̂asî,
Twaihkaxmu komo amyamro ham okwe,
kachome ehtome so amn̂e.
Yaarono yewetîn̂e pîn komo mak mîkyam waihkesî,
kicicitho poko cexi xatî kom ha.
Ero wa Kaan n̂iir̂asî okwe yaarono yewetîn̂e pîn komo reha.
Takir̂wamaxmu Me Amen̂eketken̂e So Kaan
13 Ero warai pîn komo reha amyamro oyakno komo,
yiixe Kporin komo yehtopo.
On wara kes amna Noro ya apoko so,
Kir̂wan̂he xa mai ham Apa,
Tesaronika pono komo mîmen̂ekekn̂e ham amxîkrî me okre,
kes amna apoko so.
Pahxa rma amen̂eketken̂e so Noro takir̂wamaxmu me.
Cekatî rma nîmyakn̂e awya so tponarono me xa awehtome so.
Yaarono yewetîn̂e me marha awir̂atken̂e so,
tîmtapotarî yewetîn̂e me ha.
14 Amna n̂ekatîmîtho mencetken̂e,
Kaan ya kakir̂wamacho komo.
Ero ke tak takir̂wamaxmu me awan̂ikyatken̂e so.
Kporin komo Xesus Kristu wara rma tak awiri xe so xakn̂e.
Xesus nasî kir̂wanî ro me ero wa xa marha kir̂wanî ro me awir̂axe so hara.
15 Ero ke an̂entathîrî komo ponaro ehcoko oyakno komo.
Apanatanmekyatken̂e so amna tîmtapotarî ke.
Karita marha mewrekn̂e amna apanatanmetopo kom hara,
ero yipu yaw roro xa ehcoko etowîn me ro mak.
16-17 Taa,
Kporin komo Xesus Kristu ya rma awerepore xe so wasî.
Akronomano rin̂e me awiri xe so marha wasî yîwya.
Kir̂wan poko tîmtapotaxmu me marha awiri xe so wasî yîwya.
Kîîm komo Kaan ya marha ero wa awiri xe so wasî.
Kîîxatî Mîkî Kaan,
ero ke kwakretken̂e so kahworetopo komo ke.
Eroromerono mîn kahworetopo komo okre.
Kakir̂wamatîkacho ke marha kwakretken̂e so.
Kakir̂wametîkexe so amn̂e,
kesî kîwya so,
ero ke ero wa kacho ponaro taxe.
Ero warai Mîkî Kaan.
Noro ya awerepore xe so wasî.
Ero wa awiri xe so wasî Kaan ya.