On okaritan an̂enîrî.

Pawru ow ha,

Kaan nantomatho.

Kakir̂waman̂e komo Mîkî Kaan,

Noro oyantomekn̂e,

Kporin komo Xesus Kristu yakro oyantometken̂e.

Kîîka so tmohsom Mîk Xesus Kristu.

Noro yipu oyantometken̂e.

2 Cimocu amoro,

omumuru xa okwe.

Kaan pona meen̂akn̂e ham opoyero.

On wara awiri xe wasî Kîîm komo Kaan ya,

awakronoma xe wasî yîwya.

Apînîn yaw exi xe marha wasî.

Ahwokan me marha awiri xe wasî yîwya.

Kporin komo Xesus Kristu ya marha ero wa awiri xe wasî.

3 Taa,

on wara wîîkekn̂e awya pahxa Maseton̂a pona owcetaw,

Tan ka esko amoro Epesu po,

wîîkekn̂e awya.

Ero wara rma wîîkes awya oroto hara,

iito rma ka esko.

Iitono komo men yîtwermakî.

Anarmen poko panatanmekno cirihra ro mak ehcoko,

kasko yîwya so.

4 On wara marha kasko yîwya so,

N̂expe kr̂a pahxan pen komo mtapotarî tohnaw akîhtoxaputho.

Aporin pen komo yosotîtho poko marha epanatanmekîra ehcoko.

Miya ro mak nasî ero yipu enatîn me kica.

Cetanwesom me kiin̂e mîn ero yipu kica.

Kaan pona enîn̂e me kiin̂e poko mak amtapotacoko,

kasko yîwya so.

Ero wa kasko anarmen poko panatanmekno riin̂e komo ya.

5 Kaanî reha kn̂ewetîrî komo mewrepekn̂e etîxatî me kehtome so yaaroono me xa.

Exihra wîhtînoyasî kicicme oyehtopo,

kachome marha kîwya so mewrepekn̂e.

Tpona enîn̂e ro me kehtome so marha mmewrepekn̂e.

Ero wa kehtome so kn̂ewetîrî komo mewrepekn̂e Kaan.

6 Ero wa kehtopo komo ponarora tak naxe anarî komo.

N̂etowce tak ero pîntho ponaro mak cehtome so hara okwe,

tapota ponaro mak okwe.

7 Moises pen nmewretho poko tî re panatanmekno ciri xe natu.

Camkî ro makî tko naxe,

wara rma ero poko panatanmekno n̂iir̂axe okwe.

Ero pîntho poko marha panatanmekno n̂iir̂axe.

Yaarono tan ha,

kexe rma re camkî cexitaw so rma ero poko.

8 Kir̂wan̂he rma wa nasî Moises pen nmewretho takîhso kexitaw so ero poko.

9-10 On warai me tîhtînopore nasî Moises pen nmewretho,

kir̂wan komo panatanmetopo pîn mîn.

Kicicitho komo yîtwermacho makî reha mîn.

On wara naxe anarî komo,

kicicme naxe okwe.

Kayaritomo yewetîn̂e pîn me naxe anarî komo,

cetanwesom me mak naxe.

Anarî komo naxe Kaan xatî pîn me hara kicicitho pokono me.

Anarî komo naxe Kaan ponarono pîn me ro mak,

tweeno pîn me.

Anarî komo naxe tîîm waihkan̂e me hara,

tînocwan waihkan̂e me marha,

mîk hak waihkan̂e me marha.

Anarî komo naxe cipici yai rono me,

anarî komo naxe etpoko cehsom me.

Kipici poko tasî,

ero wara rma naxe noro re rma.

On wara so naxe anarî komo hara,

tooto yen̂epanmekn̂e me naxe,

cemarontaxmu me marha,

yaarono yaknaman̂e me marha.

Miya rma nasî kicicme tooto komo yehtopo ahce na poko kica,

Kaanî mtapotarî yaw rorono pîn poko ha,

noro yipu komo yîtwermacho xa mîn Moises pen nmewretho ha.

11 Kakir̂wamacho komo yaw rorohra naxe noro yipu komo.

Kaan n̂ekatîmîtho mîn kakir̂wamacho komo,

yiixe xa kehtopo Mîkî Kaan.

Kir̂wanî ro xa mîn kakir̂wamacho komo okre.

Ero yipu yekatîmn̂e me rma oriyakn̂e Kaan.

12 On wara wîîkesî Kporin komo Kristu Xesus ya,

Kir̂wan̂he xa mai ham Apa okre.

Ow mîkaricekn̂e oropotaw.

Awewetîn̂e me roro ow meen̂akn̂e ham.

Ero ke amtapotarî yekatîmn̂e me ow miir̂akn̂e,

wîîkesî yîwya.

13 On warainhîrî ow,

kicicitho me tîmtapotaxmunhîrî Kaan poko kica.

Kaan xîkrî komo yemetanmekn̂enho marha ow okwe.

Waapanhîrî marha ow okwe.

Kaan poko camkî ro mak wîxakn̂e,

Noro pona enîhra marha wîxakn̂e.

Ero wa oyexirî ke cma opînîn yaw rma xakn̂e Kaan.

14 Owakrekn̂e xa Kporin komo okre,

Kaan pona enîn̂e me tak oriyakn̂e,

etîxatî me marha oriyakn̂e.

Ero wara Xesus Kristu yehtopo rma n̂iir̂akn̂e oropotaka.

15 On wara marha wîîkes awya,

yaaro xa tan wîîkes,

ponaro xa awehtopo tan wekatîmyas awya.

Kicicithonhîrî komo yakir̂wamaxi rma mokyakn̂e Kristu Xesus roowo pona.

Noro yipu komo yopononho ro mak owî,

kicicithonhîrî xa.

16 On wara nîhtînoyakn̂e Kaan,

tîîxatî pîn komo pînîn yawno me cehtopo yenpo xe xakn̂e tooto komo ya.

Ero ke opînîn yaw xakn̂e yihcirî me ka ero wa cehtopo yenpotome yîwya so.

Amn̂e tak anarî komo Noro pona n̂een̂axe hara.

Noro yipu komo n̂enîrî me ero wa xakn̂e opoko,

On wara xa marha apînîn yaw so was hara,

kacho me yîwya so.

17 Ero ke on wara wîîkesî Kaan poko,

Kir̂wanî ro xa Noro ham okre.

Noro mak Mîkî Kaan cewn̂e,

takîhso cesehtînosom ha.

Kayaritomo ro xa Mîk ham.

Exihkanî ro Mîk,

waipînî ro mak ha.

Esenponî ro marha Mîkî.

Kyopono ro mak Mîk Noro,

Kir̂wanî ro xa,

kacho me mak Noro yexi xe wasî miya roro,

Ero wa wîîkesî Kaan poko.

Miya roro wîîkesî.

Amen.

18 Taa,

on wara wîîkes awya hara okopuci Cimocu,

awehtopo n̂ekatîmyatken̂e kweronoman̂e komo pahxa rma.

Kir̂wan̂he nasî moso amn̂e Satanas yakro cetar̂maxmu me,

ketken̂e apoko.

Ero ke ero poko men esko kir̂wan̂he,

Satanas yakro awetar̂macho poko.

19 On wara marha esko,

Kaan pona enko roro.

Kicicime awehtoponhîrî yîhtînoyataw rma ekatîmko Kaan ya amnupîra ehtome aropotarî.

Ero wa kacho nanwekyatken̂e anarî komo okwe.

Ero ke kpanatanmetopo komo nahsîpînketken̂e okwe.

Enorixapu wa mak tak xatken̂e okwe.

20 Noro yipu komo rma mîkyam Imenew,

Arexantre komo.

Satanas ya on̂ekanpîtho mîkyam yîn̂emetanmekrî me.

Panawatu tak na amn̂e cesemetanmekîche so,

wîîkesî.

Kaan poko kicicme yîmtapotan me tak na natu ero yimaw,

wîîkesî.

Ero wa wîîkesî.