Kaan Yakro Kîmtapotacho Komo Pokono
2
Ero ke on poko kpanatanmekyasî,
ponaro awehtopo xa tan wîîkes awya,
Kaan yakro tîmtapotapore nasî tooto komo poko,
miyan komo poko rma.
On wara kapore nasî,
Kir̂wan̂he n̂examro cirko Apa,
yukurunpeko marha kicicitho yewetîra ehtome so,
esemetanmekîra ehtome so marha,
kapore nasî.
On wara marha kapore nasî,
Kir̂wan̂he xa mai ham Apa okre n̂examro makronome ham,
kapore nasî.
Ero wa kapore nasî miyan komo poko rma.
2 Kayaritomo komo poko marha tîmtapotapore nasî,
kantoman̂e komo poko marha.
On wara kapore nasî noro yipu komo poko,
Kir̂wan̂he n̂examro cirko esewrucpera amna yehtome,
ahwokan me mak amna yehtome.
Aponaro marha amna yehtome ero wa cirko apa,
awewetîn̂e ro me marha amna yehtome,
kapore nasî.
Ero wa kapore nasî Kaan ya.
3 Kakirwaman̂e komo Mîkî Kaan.
Ero ke kir̂wan̂he nasî Noro ya ero yipu poko kîmtapotacho komo,
tpoxwe n̂encesî.
4 Tooto komo yakir̂wama xe cma re nasî Kaan ahnoro.
Ero ke tîmtapotarî ponaro exi xe so nasî.
Yaarono xa mîn Noro mtapotarî.
5 Noro mak Mîkî Kaan cewn̂e mak.
Cewn̂e marha nasî yîmtapotarî mahriman̂e hara tooto komo ya,
Kristu Xesus mak ha.
Tooto rma Mîk Noro,
kîmtapotarî mahriman̂e ha.
6 Noro rma n̂etwaikapekn̂e kepaman̂e komo me,
miyan komo yepeman̂e me rma.
Ero ke Noro waihtoponho yekatîmtopo me tak nasî oroto.
7 Ero yekatîmn̂e me oriyakn̂e Kaan.
Noro nantomatho ow ha.
Xenciu komo panatanmekn̂e me xa oriyakn̂e.
Yaarono poko xa n̂examro panatanmekyasî Kristu pona entome tak yîwya so.
Noro yipu mak ow ha.
Yaaro tan kesekatîmyasî awya,
cemaro pîn tan ha.
8 Ero ke ahnoro kîrkomo yîmtapota xe wasî Kaan yakro miyan komo rma.
Tapockantaxi yîmtapota xe so wasî.
Kicicitho ken̂ehra cexpore nasî ero wa apockanwataw.
Tooto komo poko yîrwomnî me cexpore nasî,
eseseikun me marha.
Ero wa cehsom komo yîmtapota xe wasî Kaan yakro.
Wooxam Komo Panatanmetopo
9-10 Taa,
on wara wooxam komo yexi xe so wasî hara,
tweeno me mak esenpo xe so wasî,
takîhsom me marha.
Ero ke takîhso men̂eka xe wasî yîwya so tponon komo ero wa cesenpotome so.
On wara natu wooxam komo anarî komo,
anarmerpa tîhpoci komo n̂iir̂atu tooto komo n̂enîrî me.
Ooru ke n̂eporenomexe,
perora ke marha.
Ero wa n̂eporenomexe kir̂wan̂he cesenpotome tî re yîwya so.
On wara marha natu anarimaw,
cepethîkem wamruyasî okre osayan,
kir̂wan̂he oyesenpoteme,
kan̂e me.
Ero wa exi xera so marha wasî.
Wakreno ritopo ke xa matko ceporinomapore nas okre,
akronomano ritopo ke marha.
Ero yipu ke xa wooxam komo eporinoma xe wasî.
Kaan ponarono ow ha,
kan̂e me exitaw so ero wa xa cexpore nasî.
11 On wara marha wîîkesî wooxam komo ya,
tîtken̂e mak Kaan karitan centapore nasî,
panatanmekno rin̂e yewetîn̂e me mak.
12 On wara marha wîîkesî yîwya so,
Kîrkomo panatanmekîra ehcoko.
Kîrkomo yopono me exihra marha ehcoko.
Tîtken̂e mak ehcoko Kaan mîn yaw,
wîîkesî.
13 On wara tooto nakîhcekn̂e Kaan pahxa ha ka,
yihcirî me tî ka Ataw nakîhcekn̂e.
Amn̂e makî tî Epa nakîhcekn̂e hara.
14 Ataw reha tî esewkukmara xakn̂e Satanasî mtapotarî yanme.
Epa reha tî n̂esewkukmekn̂e.
Ero ke Kaanî mtapotacho yewetîra xakn̂e.
Ero ke noro poyero ero wa naxe wooxam komo kîrkomo yopono pîn me.
15 Takîhsom me cekaiporesom me rma tko naxe wooxam komo tîmxîtarî ke so.
Kaan pona enîn̂e me roro mak cexpore nasî,
etîxatî me marha.
Kicicitho pokono pîn me marha cexpore nasî,
wara hakî kan̂e pîn me marha.
Ero wa exitaw so wooxam komo n̂etakir̂wamexe rma.
Ero wa mak wîîkesî ero poko.