Kaan Mîn Yenîn̂e Komo Pokono
3
On wara wîîkes hara awya,
yaaro xa tan wîîkesî.
Kaan mîn yenîn̂e me cexi xe so na natu anarî komo.
Kir̂wan̂he nasî ero yipu poko cexi xe ehtopo komo.
2 On warai komo mak cirpore nasî Kaan mîn yenîn̂e me,
Anarmen mîkro okwe,
kacho pînî ro mak,
cewn̂an mak yipici,
ahce na poko wakpamtîkan,
takîhso cesehtînosom,
kir̂wan̂he cesenposom,
pawana ponarono,
panatanmekno rin̂e,
3 kawaxiyem pokono ro pîn,
apehceme etîrwonmekîn,
kir̂wan̂he keyukn̂e mak,
kîmtayar̂man̂e pîn,
cemyawno poko epohkan.
Ero warai me exitaw so mak Kaan mîn yenîn̂e me cirpore nasî.
4 On wara exitaw so marha ero wa ciisom me naxe,
takîhso tîhyawno komo panatanmekn̂e me exitaw so,
cewetîtopo poko tîmxîkrî panatanmekn̂e me exitaw so marha,
yîmtayar̂man̂e pîn me exitaw so yîmxîkrî komo marha.
Noro yipu komo mak cirpore nasî Kaan mîn yenîn̂e me.
5 Akpîra cexitaw kîîrî tîhyawno komo panatanmetopo poko,
ahce wa thakwa ma re takîhso Kaan xîkrî komo panatanmekyat hara?
Pîra thakwa naxe okwe.
6 Kokon̂oro mak Xesus yahsîn̂enho komo cirihra cexpore nasî Kaan mîn yenîn̂e me.
Noro yipu komo ciir̂ataw rma,
Kir̂wan ow ham anarî komo yopo,
kexe men kica amn̂e.
Ero wa kekn̂e Ciabu pahxa.
Ero wa karî poyero kicicme ro mak xakn̂e noro.
Ero ke noro wa xa marha men naxe okwe ero wa kan̂e kom hara.
7 Kir̂wan̂he cekaiporesom komo marha tmen̂ekapore nasî,
Kaan xîkrî pîn komo nîwîrîyakarî pîn ha.
Yînwîrîyakarî komo rma men̂eketaw Ciabu nahsîrî me na natu amn̂e okwe.
Ero ke kir̂wan̂he cekaiporesom komo mak cirpore nasî Kaan mîn yenîn̂e me.
Ciakonu Komo Pokono Hara
8 On warai mak cirpore nasî ciakonu me hara.
Kir̂wan mîkro,
kacho mak,
anarmerpa kan̂e pîn,
kawaxiyem pokono ro pîn,
puranta poko epohkan.
9 Kristu ya kakir̂wamacho ponarono komo marha tmen̂ekapore nasî ciakonu me.
Pahxa entanînînhîrî mîn kakir̂wamacho komo,
oroto tak cencexe,
ero yipu ponarono komo tmen̂ekapore nasî.
Amnupîra tîropotarî ciin̂e komo marha,
noro yipu komo mak cirpore nasî ciakonu me.
10 Noro yipu komo rma tko ka encoko ka,
Kir̂wan̂he nat ham,
kachome awya so.
Kicicme exihra exitaw so pahkî enîche ero yimaw mak tak ciakonu me ciicoko.
11 Kir̂wan̂he exitaw mak yipici komo ciakonu me iin̂o ciicoko.
Kir̂wan mîkro,
kacho me exitaw mak,
yîwîrîyakano rin̂e pîn me marha,
ahce na poko wakpamtîkan me,
kemîknon̂e pîn me marha.
Ero warai me mak exitaw yipici komo ciakonu me tak ciicoko iin̂o komo.
12 On warai komo marha cirpore nasî ciakonu me,
cewn̂e cehsom mak yipici,
tîhyawno komo poko takîhso cehsom marha,
cewetîn̂e me tîmxîkrî komo panatanmekn̂e marha.
Noro yipu komo mak cirpore nasî ciakonu me.
13 Takîhso exitaw so Kaan mîn yenîn̂e komo yakronomarî poko,
Kir̂wan mîkro,
kacho me marha nasî takrono komo ya.
Xesus Kristu ya kakir̂wamacho yekatîmn̂e me marha tak n̂ehtîkexe yîhyapamnî me ro mak okre.
Ero wa naxe ciakonu komo takîhso exitaw so.
Yaarono Yecehton̂e Kîwyam Kaan Xîkrî Komo
14-15 On okaritan makî ka mewresî ahyakan.
Yohno rma tko omoku xe wasî awenso.
Apanatanmetopo rma tan mewresî,
Kaan mîn yaw awexitawno pokono ha.
Kaan mîn mapatan warai me rma taxe kîwyam Kaan xîkrî komo,
waipînî ro mîn mapatan warai me ha.
Yaarono yecehton̂e marha kîwyam Kaanî mtapotarî yecehton̂e ha.
Ero wa taxe Kaan xîkrî kom ha.
16 Yaaro tan wîîkesî,
oroto tak cencexe Kaan ya kakir̂wamacho komo,
Pahxa entanînhîrî mîn Noro ya kakir̂wamacho komo.
Miya rma nasî ero pokono,
ekatîmrî yopo ro mak.
On wara xakn̂e Kaan,
tooto me n̂etpuncekn̂e kn̂enîrî komo me.
Kir̂wan me xakn̂e Kir̂wanî ro Yekatî yanme.
Ancu komo n̂enîrî me marha xakn̂e.
Noro pokono tak n̂ekatîmyatken̂e ekatîmn̂e komo Xenciu komo ya.
Roowo pono komo tak Noro pona n̂een̂atken̂e.
Kah yaka tak cekn̂e hara,
kir̂wanî ro pona hara.
Ero wa xakn̂e Kaan.