Worokyamu Npanatanmekrî Me Naxe Okwe Tooto Komo Amn̂e
4
Taa,
on wara wîîkes hara awya so,
Kaan Yekatî kweronomexe so tooto komo poko.
On wara kesî kir̂wantaw xa,
On wara men naxe tooto komo amn̂e,
eromanhîrî kaamo pahnoke exitaw,
Xesus pona enîn̂enhîrî komo rma tak Noro ponarora ro mak tak n̂ehtîketu okwe.
Cewkukman̂e komo ponaro mak tak n̂ehtîketu kica worokyam ponaro.
Worokyamu npanatanmekrî me tak naxe kica ero yimaw,
kesî.
Ero wa kesî Kaan Yekatî kîwya so.
2 On wara marha tî natu tooto komo ero yimaw,
kir̂wan wa tî n̂esenpetu tohnaw ro mak okwe.
Cemaronwatu ro makî tî kica.
Ecahxapu wa makî tî nai yîropotarî komo.
Anarimaw kuripara nai ocorono xa.
Ero yipu yahsîyataw kîwya cecakyasî mak oco.
Ero wa ecahxapu wa nai yîropotarî komo tîhyapammrî yarohra ro mak okwe.
Ero ke kicicitho poko naxe yîhyapamra ro mak.
3 Anato panatanmekno rin̂e me naxe okwe.
On wara kexe,
yipitan me ro mak ehcoko.
On yipu tonohra ro mak men ehcoko wooto,
kexe marha anarî mko poko,
wooto poko.
Ero wa so kexe tînpanatanmekrî komo ya amn̂e.
On warai me xa matko Kaan nakîhcekn̂e wooto,
kotî komo me rma.
Ero wa wooto tîhtînoyaxe kîwyam Kaanî mtapotarî yentan̂e me kexirî ke so.
Yaarono xa mîn Kaanî mtapotarî,
ero yipu yentan̂e me taxe,
ewetîn̂e me marha.
Ero ke kirwan̂he nasî wooto tonotopo,
Kir̂wan on anmîthîrî Apa amna yotî,
ketaw Kaan ya.
4-5 Ahnoro wooto nasî kir̂wan̂he Kaan nakîhtotho ha.
Tonohnî reha on kica,
kahra ro mak cexpore nasî anarî mko poko.
Kir̂wan on Apa anmîthîrî amna yot okre,
ketaw kîwya so kir̂wan̂he nasî ahnoro rma.
Tîmtapotarî ke rma kir̂wan̂he Kaan n̂iir̂akn̂e.
Ero wa nasî wooto.
Kaanî Mtapotarî Yekatîmn̂e Mexan Me Esko
6 Ero ke kakno komo men panatanmeko ero yipu poko.
Ero wa awexitaw Xesus Kristu yanton mexan me mas okre.
Mehxa ro Kaanî mtapotarî yentan̂enho amoro.
Xesus pona encoko,
kacho mencekn̂e kpanatanmecho komo.
Kir̂wan mîn ero poko kpanatanmecho komo.
Ero yipu mencekn̂e,
mewehcasî roro marha okre.
7 Anarimaw so pahxan pen komo mtapotarî n̂ekatîmyaxe wooxam komo nocwakomo.
Kaanî mtapotarî yaw rorono pîn mîn n̂ekatîmyaxe anarimaw.
Ero yipu yanwekn̂e me mak esko.
Kaanî mtapotarî poko xa matko ekaritoko Noro ponaro xa awehtome.
8 Kir̂wan̂he rma ciki re nasî kekaritotopo komo kupun ke.
Kupun komo karihton̂e me nasî.
Kaan wara kehtopo komo poko kekaritotopo xa nasî kir̂wan̂he kiin̂e me xa tak okre.
Tanî rma ka kexitaw so roowo po kir̂wan̂he kiin̂e me nasî.
Amn̂e marha kir̂wan̂he kiin̂e me nas hara,
kah yaka tîtosom me kexirî ke so hara.
Ero wa kiin̂e me xa nasî Kaan wara kehtopo komo poko kekaritotopo komo.
9-10 Yaaro xa tan wîîkes awya,
ponaro xa kehtopo tan wekatîmyas awya.
Kaan pona enîn̂e kîwyam.
Waipînî ro Mîkî Kaan.
Kukurunpen̂e marha Mîkî miyan komo kurunpen̂e rma.
Cewetîn̂e komo nukurunpesî xa tak.
Ero yipu yekatîmrî poko cekaricexe xa.
Tooto komo ya kîwîrîyakacho komo rma tînîmyasî ekatîmtome.
Ero wa taxe.
11 Omtapotacho poko panatanmeko iitono komo.
Ero wa xa men ehcoko,
kasko yîwya so.
12 Kar̂pamxan me rma ka masî.
Rikomo warahra tko esenpoko.
Rikomo wa mak awesenpetaw awanwekyaxe men okwe anpanatanmekrî komo.
Kir̂wan̂he mak esenpoko apoko pohnîmtome so Kaan pona enîn̂e komo.
Kir̂wan poko mak amtapotakî,
kir̂wan̂he ciino rin̂e me marha esko,
etîxatî me marha esko,
tahwore marha esko,
Kaan pona enîn̂e me marha esko.
Kicicitho pokono me exihra ro mak esko.
Ero wa xa esenpoko iitono komo ya apoko pohnîmtome so.
13 Taa,
on wara wîîkes hara awya,
yarî men kmokyas amn̂e awenso.
Omomokrî poko Kaan Karitan yîmtapotareko emapona Kaan xîkrî komo n̂entarî me.
Ahworeno rin̂e me marha esko,
panatanmekno rin̂e me marha esko Kaanî mtpotarî poko.
14 Tîmtapotarî yekatîmn̂e me awir̂akn̂e ham Kaan.
Tîmtapotarî ke rma ero warai me awir̂akn̂e.
Kaanî mtapotarî yekatîmn̂e me tak masî Cimocu,
ketken̂e Kaan mîn yenîn̂e komo.
Ameretîyahsîyataw ero wa ketken̂e.
Ero ke ekatîmn̂e me roro esko.
15 Omtapotarî ponaro esko,
ewetîn̂e me xa tak esko.
Ero wa awexitaw,
Takîhso tak n̂ehtîke ham Cimocu,
kexe tak anpanatanmekrî komo.
16 Kir̂wan̂he awehtopo ponaro men esko,
Kaanî mtapotarî yaw roro marha esko.
Ero wara roro awexitaw kir̂wanhe awir̂asî Kaan okre.
Anpanatanmekrî komo marha kir̂wan̂he n̂iir̂as okre.
Ero ke ero wa esko.