Amna Poko Amtapotacoko, Kesî Pawru
3
Taa,
on wara mak tak wîîkes awya so oyakno komo,
amna poko amtapotacoko Kaan yakro.
On wara kacoko yîwya,
Apa kah yawno,
amtapotarî yekatîmso cexe Pawru komo mîk hak cheka.
Ero ke miyan komo rma cirko n̂examro mtapotarî yentan̂e me.
Tpoxwe xa entan̂e me cirko.
Tpoxwe amna n̂encekn̂e ero wa xa marha meyeno komo cirko hara,
tpoxwe entan̂e me hara,
kacoko ha.
2 Pawru komo yukurunpeko Apa,
kacoko marha amna poko.
Amna waihka xe naxe okwe kicicitho komo,
wara ro mak kan̂e komo.
Kaan pona enîn̂e pîn me naxe anarî komo okwe.
Ero ke ero wa men kacoko amna poko.
3 Kponarono xa Mîk Kporin komo,
yîtwen̂ekarîntanî ro mak Mîkî kpoko so.
Noro rma awir̂axe so tpona enîhkan̂e pînî ro me.
Akurunpexe so marha Kicicitho nîwîrîmarî mera ro mak awehtome so.
Ero wa awir̂axe so Kporin komo.
4 On wara kes amna apoko so,
Kporin komo rma awir̂axe so amna mtapotarî yewetîn̂e me miya roro.
Ero ke ero wa maxe oroto,
ero wara rma maxe amn̂e miya roro,
kes amna.
5 On wara marha wîîkes awya so,
Kîîxatî ro xa Mîk Kaan,
kan̂e me awiri xe so wasî Kporin komo ya.
Miya roro ahwokan me marha awiri xe so wasî yîwya Kristu wara rma.
Ero wa awiri xe so wasî Kporin komo ya.
Cetapickapore Nasî
6 On wara tak amna kes hara awya so oyakno komo,
pahxa apanatanmekyatken̂e so amna takîhso awehtopo komo poko.
Cetapickapore nasî,
wara kyam mak exihra mak cexpore nasi,
kekn̂e amna awya so.
Anarimaw awakno komo na nai iito anarme cehsom,
ero wa kacho yewetîn̂e pîn.
Exitaw na noro yipu yakrono me exihra ehcoko.
Yaaro kes amna,
Kporin komo Xesus Kristu yanme ha.
7 Amna rma meen̂atken̂e achew so amna exitaw.
Ero ke amna mak yukukmacoko.
Iito cexitaw amna kir̂wan̂he mak amna xakn̂e,
akpîn me mak exihra.
Ero wa xa marha ehcoko amyamro hara.
8 On wara amna xakn̂e iito,
epethîmra ahsîra ro mak amna xakn̂e tînahrî.
Amna mak n̂etapickekn̂e roro.
Katpanaw amna n̂etapickekn̂e,
kosope marha.
Cetapickachonho yepetho pona mak amna nahsîyakn̂e tînahrî yepetho.
Apurantanka xera so amna xakn̂e,
Onahrî ek ha anahrî komo poi,
ka xera amna xakn̂e.
9 Anmîthîrî komo yahsîyataw ketaw ha re amna nahrî yepetho,
kir̂wan̂he rma n̂eexirî ha re ero wara.
Ahsîra rma tko amna xakn̂e.
Ero wa cetapickapore nai ham,
Pawru wara rma,
kachome awya so.
10 On wara marha amna kekn̂e awya so iito amna exitaw,
etapickara ro mak na natu awakno komo anarimaw.
Ero wa exitaw so eseresmara ro mak n̂ehcowpe,
kekn̂e amna awya so.
11 On wara kacho amna n̂encesî apoko so,
Nuwun̂watu mak anarî komo,
etapickara ro mak okwe,
kacho.
Tapota makî tî nakîhcetu kica.
Ero wa awakrono komo yehtopo amna n̂encesî.
12 On wara amna kesî noro yipu komo ya,
Etapickacoko tak anahrî komo yepetho yahsîtome tak awya so.
Okwe okwe,
kahra ehcoko awetapickacho komo poko,
kes amna yîwya so.
Yaaro xa tan kes amna.
Kporin komo Xesus Kristu yanme rma ero wa kes amna yîwya so.
13 Taa,
kir̂wan̂he roro mak ehcoko amyamro oyakno komo.
Pokahnî me mak ehcoko ero wara awehtopo komo poko.
Ero wa kacho on amna mewresî karita.
14 Amna nmewretho yewetîn̂e pîn exitaw iito noro etacicoko yakentaw.
Noro yipu yakrono me exihra tak ehcoko yîhyapamnotome.
Ero wa ehcoko noro yipu komo poko.
15 Yîîxatîmnokara rma tko ehcoko noro yipu komo.
Yîtwermacoko mak awakno komo yakro mîmtapowaxe ero wara rma.
Yîmtapotarî Yîtîhkacho
16 Taa,
on wara mak tak wîîkes awya so,
ahwokan me awiri xe so wasî Kporin komo ya.
Ero wa kiin̂e ro Mîk Kporin komo.
Ahce wa so na awexitaw so ahwokan me awiri xe so wasî yîwya.
Awakrono komo me roro marha Noro yexi xe wasî,
Kporin komo.
Ero wa exi xe wasî.
17 Pawru ow ha.
Oyamorî ke rma tan mewresî okaritan yîtîhkacho mak.
Ero wara roro mewresî okaritan yîtîhkacho,
okaritan me entome awya so.
Encoko xe onmewretho.
18 Awakronoma xe so wasî Kporin komo Xesus Kristu ya.
Amen.