Cerewrem Yînîmn̂e Me Esko
2
On wara wîîkes hara awya okopuci,
Kristu Xesus yakrono me kexirî ke so kwakrexe so tak Kaan.
Kar̂pe kiitopo komo ke kwakrexe so.
Ero ke ero wa awakrecho ponaro ro esko karpe awehtome.
2 Kaanî mtapotarî yekatîmtoponho owya mencekn̂e roro.
Mer̂pono pîn komo n̂entarî me wekatîmyakn̂e,
ero rma tak ekatîmko amoro hara takîhsom komo n̂entarî me hara.
Ero wa ekatîmko noro yipu komo ya anarî komo panatanmekn̂e me ehtome so n̂examro ero poko xa marha.
3 On wara marha esko,
awesemetanmetopo yînîmn̂e me esko ahwokan me ro mak.
Xesus Kristu sowtatun amoro.
Ero ke Noro sowtatun mexan me esko.
4 On wara natu sowtatu komo etar̂maxi tîcetaw so,
cemyawno komo poko esemyarîton me ro mak naxe.
Taan̂e komo ponaro mak n̂axe,
tawake ehtome so n̂examro tpoko so.
5 On wara natu tkaritî yukukman̂e kom hara,
cetkukmetaw so cenîn̂e komo mtapotacho yaw roro mak n̂ekaricexe.
Ero yaw rorohra cekaricetaw so tarokorî yahsîra rma naxe okwe.
Ero wa naxe.
6 On wara natu mararî pokono kom hara,
tînatîrî yepetache n̂examro rma ka nahyatu eperîrî yihcirî me.
7 On wara wîîkes awya,
omtapotarî ponaro men esko.
Kporin komo rma takîhso entan̂e me awir̂asî.
8 On wara marha wîîkes awya,
Xesus Kristu pakachonho ponaro esko.
Tapi pen yepamtho Mîk xakn̂e.
Waipuche tak pakekn̂e hara waihxapu komo chewnonho.
Ero wa Noro yehtoponho rma wekatîmyasî akir̂wamano ritopo me.
9 Ero yipu yekatîmrî ke owya oyemetanmekyaxe ooxatî pîn komo.
Kicicitho me oyen̂irî ke yîwya so ero wa oriyaxe.
Oyapomiyaxe meero thakwa kuripara ke.
Kaanî mtapotarî tko nasî yimihnî me ro mak.
10 Ero ke ahce wa na oriyataw yîwya so ahwokara rma wasî.
Kaan nmen̂ekatho komo pînînke ero yipu wînîmyasî rma takir̂wamaxmu me ehtome so.
Xesus Kristu yakrono me exirî ke so tak kir̂wanî ro me cehsom me naxe miya rorono me.
Ero wa ehtome so oyemetanmecho wînîmyasî.
Ero wa was ha.
11 Yaarono xa tan on wara kacho,
Xesus yakro rma waihxapu me kexitaw so Noro yakrono me tak tîtpakexe hara amn̂e,
kacho.
12 Yaarono marha tan on wara kacho hara,
Kesemetanmecho yînîmn̂e me kexitaw so Xesus yakro,
Noro yakro xa marha taxe amn̂e kayaritomo me hara.
Pîra,
Xesus yakrono pîn ow ha,
kan̂e me exitaw so anarî komo,
ero wa xa marha men kesî noro yipu komo poko hara,
Oyakrono pîn mîk ha,
kesî Xesus poko so,
kacho.
13 Yaarono marha tan on wara kacho rma,
Anarimaw Noro pona cenîhkayasî n̂he okwe.
Ero wa kexitaw so anarme kahra rma nasî Kaan kpoko so kemîknon̂e pînî ro me exirî ke.
Oyakrono pînî ro mak mîkro,
kahra ro mak nasî kpoko so,
Oyakrono me kahsîyasî,
kan̂enho.
Ero wa nasî Kaan kpoko so.
Yaarono xa mîn ero wa kacho mko.
Takîhso Ekatîmko Kaanî Mtapotarî
14 Ero yipu n̂encexe rma re Kaan xîkrî komo.
Kasko xa hara tko yîwya so.
On wara marha kasko yîwya so,
Kîmtapotarî men̂ekacho poko mak eseseikura ehcoko.
Kporin komo yanme tan wîîkesî.
Kakîhren̂e pîn mak mîn kica keseseyutopo.
Kentan̂e komo tîwîrîmexe mak kica ero yipu poko kexitaw so.
15 Yuwun̂ura ro mak Kaan yanton me esko tawake ehtome Noro apoko,
yîhyapamnî me awehtome.
Takîhso men ehcamhokakî Kaanî mtapotarî poko yaarono me exirî ke.
Ero pokono on ha,
ero pokono reha mîn hara,
kasko.
16 Anarimaw iito na natu ero pîntho poko tîmtapotaxmu komo,
Kaanî mtapotarî warai pîn poko kica.
Ero ke yîmtapotarî komo entara ro mak men esko.
Kaan ponarora kiin̂e men mîn kica ero yipu.
17 Erekî warai mak mîn yîmtapotarî komo,
Mîk hak pokono me n̂etakpayas okwe.
Ero wara tîmtapotaxmu me naxe Imenew komo,
Piretu kom ha.
18 Yaarono ponaronho rma mîkyam okwe.
N̂etowyatken̂e takî tko,
ero ke tak anarme kexe.
On wara kexe,
Pahxa rma mexe paketken̂e okwe waihxapunhîrî komo,
kexe kica.
Ero wa karî ke Xesus pona n̂enîhkayaxe anarî komo.
19 Kaanî mtapotarî tko nasî towîhnî me ro mak.
Mapata wara nasî emacakanî ro wara xa,
On wara kacho ke mewrexapu mîn mapata,
Tîmxîkrî komo ponaro cehsom Mîk ha Kporin komo,
esewkukmara ro mak nasî poko so,
kacho.
Anarî nasî on wara kacho hara,
Kaan xîkrî me awesekatîmîche so kicicitho pokohra ro mak tak ehcoko ha,
kacho.
Ero ke ero wa kacho ponaro xa cexpore nasî.
20 On wara wîîkesî ero wa kehtopo poko,
tahrem wara tas ha re.
Anarimaw mîîmo nai porin.
Ero yipu yaw nai tahremu mko yaake,
anarmerpa ciixapu komo.
Anarî nasî ooru ciixapu,
anarî nasî prata ciixapu hara,
anarî nasî weewe enporixapu hara,
anarî nasî er̂mo kahxapu hara.
Mîn hak yen me marha nas ero yipu mko.
Kir̂wan yen me nas anarî,
kicicitho yen me nas anarî hara.
21 Ero ke kicicitho yen warai pîn me mak cexpore nasî.
Yusmumra mak cexpore nasî.
Ero wa kexitaw so kir̂wan yen me mak tak taxe.
Kporin komo ponaro xa cehsom me marha tak taxe.
Ero ke,
kir̂wan tan tahrem okre,
poko oyehtopo mexan,
kan̂e wara nasî Noro kpoko so.
Kakronomexe so marha kir̂wan pokono me kehtome so,
Mîn hak warai pokono me.
Ero wa kiir̂axe so Kaan kicicitho yen warai pîn me kexitaw so.
22 Taa,
on wara marha wîîkes awya,
twerî men esko apohkacho poko.
Mîn hak poko n̂epohkexe kar̂pamxan komo,
emasî komo marha.
Ero wa apohkacho yai cemahcisom wa xa esko amoro.
Takîhso awehtopo ponaro xa matko esko ha,
Kaan pona enîn̂e me awehtopo poko marha,
etîxatî me awehtopo poko marha,
cereporem me awehtopo poko marha.
Ero wa awehtopo ponaro xa esko.
Ero wara rma naxe anarî komo,
Kaan ponarono komo.
Noro xatî me mak cexi xe naxe,
kicicitho pîn me mak.
Ero ke noro yipu komo yakrono me esko.
23 Ero pîntho poko mak n̂eseseyukyaxe anarî komo reha.
Noro yipu komo yakro eseseikura ro mak esko amoro.
Ero yipu poko kesencetaw so cetanwesom me mak men cehtîkexe kica.
24 Cetanwesom me exihra ro mak esko Kporin komo yanton me awexirî ke.
Kir̂wan̂he mak ceyukpore nasî miyan komo rma.
Panatanmekno rin̂e me marha cexpore nasî.
Pahkî expokan me marha cexpore nasî.
25 Awanwekn̂e komo meero panatanmeko iyopono komo warahra.
Ero wa panatanmekyataw awya yîropotarî komo tak na nakname Kaan cehtoponhîrî komo poxunkachome tak ha.
Ero wa exitaw so,
Yaaro rma nîîke ham Kaan,
kexe tak.
26 Ero ke tpakaxmu wara tak naxe okre.
Satanasî xkan yawnonho mîkyam.
Satanas nahsîtho komo mîkyam okwe.
Cewetîn̂e me ehtome so thakwa n̂examro pen nahsîyasî noro okwe.
Yîhyai n̂etowyaxe Kaanî mtapotarî yentarî ke yîwya so.
Ero wa naxe okre.