Citu Yakanînho, Pawru Karitan
Citu
1
Taa,
on okaritan an̂enîrî.
Pawru ow ha.
On warai ow,
Kaan yanton makî reha ow.
Xesus Kristu nantomatho ha.
Kristu nasî kakir̂waman̂e me,
kacho yekatîmn̂e ow.
Noro pona enîn̂e me naxe Kaanî nmen̂ekatho komo.
Yaaro ham,
kexe Kaanî mtapotarî poko.
Ero ke Kaan yanme cehsom me xa naxe ero wa kan̂e komo.
2 Waipînî ro me cehtopo komo ponaro naxe noro yipu komo.
Pahxa rma tî ero wa kiitopo poko nîmtapowakn̂e Kaan.
Cemarontanî ro Mîkî Kaan,
Noro yipu rma tî on wara kekn̂e,
Waipînî ro me tak ciino wiir̂as amn̂e,
kekn̂e tî.
Roowo exihra ro mak exitaw ero wa kekn̂e.
3 Amn̂e tak ero wa kiitopo me xa takî tî xakn̂e.
Ero ke tak tîmtapotarî yekatîmtopo poko oyantomekn̂e Kaan.
Kakir̂waman̂e komo Mîkî Kaan,
Noro rma oyantomekn̂e.
4 Citu amoro omumuru xa.
Xesus ponarono re kîîwî.
Ero ke Kaan ya awakre xe wasî,
Kîîm komo ya ha.
Apînîn yaw xa exi xe marha wasî.
Cereporem me marha awiri xe wasî yîwya.
Ero wa xa marha awiri xe wasî Kporin komo Xesus Kristu ya hara.
Ero wa awiri xe wasî.
Kaan Mîn Yenîn̂e Me Cirko Iitono Komo
5 On wara wîîkes awya,
Kreta po knomyakn̂e Kaan xîkrî komo yakîhretîkachome mîn hak poko,
camkî ehtopo mko poko.
Kaan mîn yenîn̂e komo men̂ekachome marha awya knomyakn̂e iito.
Ero ke Kaan mîn yenîn̂e komo tak cirko mîn hak ewto pono kom ha,
wîîkekn̂e awya.
Ero ke ero poko men esko iito.
6 On warai komo mak cirpore nasî Kaan mîn yenîn̂e me,
kir̂wan komo mak,
Kicicitho mîkro,
kacho pîn komo,
cewn̂e cehsom yipici marha.
Kaan ponarono me yîmxîkrî komo yehtopo marha enko.
Tweeno pîn komo mîkyam,
wara ro mak kan̂e komo kica,
kacho me exitaw yîmxîkrî komo,
noro yipu komo cirihra cexpore nasî.
7 Kaan xîkrî komo yenîn̂e komo mîkyam Kaan mîn yenîn̂e komo.
Ero ke,
Kicicitho mîkro kica,
kacho pînî ro mak cirpore nasî ero warai me,
On warai komo marha tmen̂ekapore nasî,
tanme ro mak esehtînopîn marha,
apehceme etîrwonmekîn marha,
kawaxiyem pokono ro pîn marha,
ketapan̂e pîn marha,
puranta poko epohkan marha,
ero warai komo mak cirpore nasî Kaan mîn yenîn̂e me.
8 On warai komo marha tmen̂ekapore nasî,
pawana ponarono,
kir̂wanî mok xatî me cehsom marha,
takîhso cesehtînosom marha,
etîme re ciino rin̂e me cehsom,
Kaan ponaro cehsom ro,
mîn hak poko wakpamtîkan marha,
9 etowîn me tpanatanmetoponhîrî ponarono marha.
Yaarono xa mîn kpanatanmetopo,
ero yipu ponarono mak cirpore nasî Kaan mîn yenîn̂e me takîhso panatanmekno ciitome tak yîwya so,
Kaanî mtapotarî yanmekn̂e komo panatanmetome.
Takîhso panatanmekrî ke iyopo so nîmtapowasî.
Ero ke noro yipu komo mak cirpore nasî Kaan mîn yenîn̂e me.
Iitono Komo Yîtwermakî, Kesî Pawru
10 Mer̂pora men naxe cetanwesom komo okwe.
Ero pîntho poko tîmtapotaxmu komo mîkyam,
yaarono pîn yekatîmn̂e komo marha.
Cetanpikapore men nasî,
kan̂e komo xa naxe ero wa okwe.
11 Ero warai komo tîtîtmamnopore nasî.
Anarmen poko panatanmekno rin̂e komo mîkyam okwe.
Ero yipu poko panatanmekno cirihra ro mak cexpore nasî.
Anarî men ponarono me mak n̂iir̂axe tînpanatanmekrî komo,
kîrkomo,
yipici komo,
yîmxîkrî komo marha.
Tupurantan yahsîtome mak ero wa panatanmekno n̂iir̂axe okwe.
Cemaro me mak nîmtapowaxe kica ahsîtome.
12 Weronomano rin̂e tî xakn̂e iito poyino komo rma.
On wara tî kekn̂e,
Cemarontaxmu ro mak mîkyam kica Kreta pono komo.
Kicicitho mak mîkyam,
kamara warai.
Tîyopo so ceseresmaxmu marha mîkyam,
tuwun̂urem kom ha,
kekn̂e tî.
Ero wa tî kekn̂e tpoyino komo poko rma.
13 Yaaro rma kekn̂e n̂examro poko.
Ero ke cerewre iitono komo yîtwermakî kir̂wan̂he ehtome so,
Kaanî mtapotarî ponaro ehtome so etowîn me ro mak.
14 On wara kasko yîwya so,
Xutew pen komo nakîhcetken̂e cekatîmsom tohnawno mak kica.
Ero yipu ponarora ro mak ehcoko.
Tooto ya apanatanmetopo komo ponarora marha ehcoko.
Yaarono yahsîpînkan̂e komo mîkyam ero wa kan̂e komo kica,
kasko yîwya so.
15 Kicicitho ponarono pîn me kexitaw so reha kir̂wan me re tîhtînoyaxe kaamo komo,
wooto komo,
miyan komo rma kir̂wan me re tîhtînoyaxe.
Ero warahra reha naxe kicicitho ponarono komo,
Kaan ponarono pîn kom ha.
Miyanî mko rma kicicme n̂een̂axe.
Kicicitho me mak n̂esehtînoyaxe kica.
Ero ke,
On wara wai ham kir̂wan̂he oyehtome,
kahra thakwa naxe okwe.
16 Kaan ponarono amna okre,
kexe rma ha re.
Kaan ponarono pîn me tko n̂esenpexe ahce na poko cexitaw so.
Kicicitho me ro mak naxe noro pîntho wara mak kica.
Kaan yanwekn̂e me marha naxe.
Kir̂wan pokono pîn me thakwa naxe kica.
Ero wara naxe kicicitho ponarono komo.