Kaan Karitan Yekatîmn̂e Me Roro Esko
4
Ero ke kpanatanmekyasî Kaanî mtapotarî yekatîmtopo poko.
Kaan n̂entarî me rma tan kpanatanmekyasî,
Xesus Kristu n̂entarî me marha.
Xesusu rma en̂ekano n̂iir̂as amn̂e tmokuche hara.
Waipîn komo n̂en̂ekesî,
waixapunhîrî komo marha.
Kayaritomo me xa cesenpoche ero wa en̂ekano n̂iir̂asî.
Ero wa Noro mokyas amn̂e.
Noro yipu yanme rma on wara wîîkes awya,
2 Kaanî mtapotarî ekatîmko roro.
Ero yekatîmtopo ponaro men esko.
Ekatîmtopo me exitaw ekatîmko,
ekatîmtopo pîn me exitaw marha.
Yîhcamhokano cirko,
yîtwermano marha.
Panatanmekno rin̂e me marha esko.
Ero yipu poko ro mak esko.
Camkî awentan̂e komo eihra ro mak esko.
Kaanî mtapotarî mak ekatîmtîkakî n̂he yîwya so.
Ero poko roro esko.
3 On wara tko naxe tooto komo amn̂e,
yaarono poko tpanatanmekn̂e komo yenta xera ro mak tak naxe okwe.
Tanme ro mak men̂ekexe tpanatanmekn̂e komo.
Okre,
on̂entarî mexe n̂examro n̂ekatîmyaxe okre,
kexe anarî komo poko.
Noro yipu komo mak n̂epamnoyaxe mer̂pora tpanatanmekn̂e komo.
4 Ero wa naxe amn̂e okwe tooto komo.
Yaarono yenta xera ro mak tak naxe okwe.
Tohnawno yenta xe mak naxe,
poritomo pen komo mtapotachonho makî.
Ero wa naxe amn̂e.
5 Ahce wa so na exitaw so anarî komo ponaro men esko.
On wara marha esko,
awesemetanmekyataw amn̂e yînîmn̂e me mak esko.
Xesus ya kakir̂wamacho yekatîmn̂e me marha esko Noro yakrono pîn komo ya.
Tîmtapotarî yekatîmn̂e me wa awir̂akn̂e Kaan.
Ero ke ero poko esko kir̂wan̂he xa.
Ero wa esko.
N̂eexi Tak Oyetar̂macho Satanas Yakro, Kesî Pawru
6 On wara tak was ow ha,
owtotopo pahnoke tak nasî roowo poi.
Okamxukutho tak cesî amn̂e Kaan ya tîmsom me.
7 Satanas yakro ketar̂mekn̂e kir̂wan̂he.
Kar̂pe cemahcisom wara wîxakn̂e,
N̂eexi,
kacho pona roro.
Kakir̂waman̂e me Kristu yehtopo ponaro ro mak wîxakn̂e etowîn me ro mak.
Ero wa ehxapu ow ha.
8 Ero ke tak oyarokorî nasî tîmtoso onahsîrî amn̂e.
Kir̂wan̂he mîxakn̂e ham okre,
kacho rma tî mîn aroko.
Ero yipu tak nîmyas owya amn̂e.
Yaaro kepeman̂e Mîk Kporin komo,
Noro rma tak oyarokorî nîmyas amn̂e kepemacho ro po.
Owya mak tîmîhra nasî aroko.
Anarî komo ya marha nîmyasî,
Xesus moku xatî ro komo ya ahnoro.
Ero warai komo ya nîmyasî.
Mîn Hak Pokono Tan
9 Taa,
on wara wîîkes hara awya,
yohno cma re mîmokyasî oyenso.
Porohkan me cma re mîmokyasî.
10 Onomyatken̂e thakwa okwe oyakrononho komo.
Temas onomyakn̂e roowo pono poko cepohkarî ke mak okwe.
Miya cekn̂e Tesaronika pona.
Kresence marha cekn̂e Karasia pona hara.
Citu marha cekn̂e Tawmasia pona hara.
Ero wa cetîketken̂e oyakrononho komo okwe.
11 Rukas makî reha nasî tan oyakro.
Ero ke Mahkus eeko awakro amokyataw.
Kir̂wan̂he wîhtînoyasî noro oyakronoman̂e me Kaanî mtapotarî yekatîmrî poko.
12 Cikiku reha wen̂epekn̂e Epesu pona.
13 Troace po wînomyakn̂e oponontho Kahpu yaw.
Cwotu yimaw tamrusom mîn oponon.
Ero cma re mekyasî amokyataw.
Okaritantho marha cma re mekyasî.
Kaan Karitan xa ekî xe was awya.
Ero yipu mko yekî xe was awya.
14-15 On wara marha wîîkes awya,
kicicme xa nasî Arexantre,
kobre pokono.
Oyemetanmekn̂enho xa mîk noro.
Ero ke oyepanîyasî tak amn̂e Kporin komo.
Kicicme noro n̂iir̂asî Kaan kicicme oritoponho yaw roro rma.
Amna mtapotarî yanwekn̂enho ro mak noro okwe.
Ero ke twerî men esko noro poko.
16 Yihcirî me ka owcetaw kayaritomo yaka esen̂ekaposo,
omtapotarî yakronoman̂e exihra ro mak xakn̂e okwe.
Onomtîketken̂e thakwa mak ahnoro okwe oyakrononho komo.
On wara tko wîîkesî Kaan ya,
Ero wara ehtoponhîrî komo cma re mîhcamnoyasî Apa,
wîîkesî.
17 Kporin komo rma tko oyakronomekn̂e.
Noro rma okaricekn̂e.
Kamara imo mtawno wa wîxakn̂e.
Noro tko okurunpekn̂e.
Ero wa okurunpekn̂e Xesus ya kakir̂wamacho yekatîmtîkachome tak Xenciu komo ya.
18 Miya roro okurunpes amn̂e Kporin komo ahce wa so na ori xe exitaw so kicicitho komo.
Kah yaka oyanîmtopo pona roro okurunpesî,
kayaritomo me cesenpotopo pona roro ha.
Ero wa oriyasî.
Ero ke kir̂wan̂he Noro yehtopo nasî cekatîmpore roro nasî.
Amen.
19 Taa,
ow cma re mekatîmyasî Priska ya,
Akwira komo ya.
Pawru tî nai aponaro so,
kasko yîwya so.
Ero wa xa marha ow ekatîmko Onesiporu ya hara,
yîhyawno komo ya marha.
20 Erastu n̂etînomye Korintu po.
Tropimu marha wînomye Miretu po hara.
Namotoyakn̂e noro iito.
21 Twotme exihra ka exitaw amoku xe wasî.
Amohtopo ponaro xa men esko.
Ewburu tî nai aponaro,
Prutenci marha,
Rinu marha,
Krawcia marha.
Ahnoro tî natu aponaro tantono komo,
kakno kom ha.
22 Awekatî yecehto xe wasî Kporin komo ya.
Awakronoma xe marha wasî yîwya.
Amen.
Ero wa mak wîîkes awya.