Taa,

on wara wîîkes hara awya,

amn̂e tak Xesus mohtopo pahnoke exitaw eraspeto ro mak tak naxe tooto komo kopi.

2 On warai me tak naxe,

tîîxatî me rma naxe,

puranta xatî me marha,

Ow xa takîhsom,

kan̂e me marha,

cehcoyoponkaxmu me marha,

Kaan yîwîrîyakan̂e me marha,

tîîm komo yewetîn̂e pîn me marha,

tînocwan komo yewetîn̂e pîn me marha.

Ero wa xa ham okre,

kan̂e pîn me marha naxe twakren̂enhîrî komo ya,

kicicitho pokono me marha naxe.

3 Etîxatî pîn me marha naxe,

cemetanmetoponhîrî komo yîhcamnon̂e pîn me marha naxe,

tohnaw tîmtapotaxmu me marha naxe etpoko.

Mîn hak poko twakpamsom me marha naxe,

apehceme cetîrwonmesom me marha naxe,

kir̂wan komo yîwîrîyakan̂e me marha naxe okwe.

4-5 Kwaparî komo nar̂marî me kekanîn̂e me marha naxe,

tanme ro mak cexi xatî me marha,

Noro pîntho mak amoro kica,

kan̂e me marha.

Keseman̂itopo ponarono me mak naxe,

Kaan xatî pîn me okwe.

Kaan pokono wara rma re kyam n̂esenpexe,

ewetîn̂e pîn me ha tko okwe.

Ero wa so tak naxe tooto komo amn̂e.

Ero ke noro yipu komo yakrono me exihra esko amoro.

6-7 Noro yipu komo n̂ewomyaxe tooto komo mîn yaka wooxam komo panatanmetome.

Kir̂wan me n̂esenpexe cewomtome so yîhyaka so.

Apehceme ceserepokaxmu komo n̂een̂axe tînpanatanmekrî komo me.

Kicicme ehxapu ow ha kica,

kan̂e komo n̂een̂axe,

mîn hak poko cepohkaxmu komo kica.

Tpanatanmetopo komo yentan̂e roro cma re mîkyam noro yipu komo wooxam kom ha.

Yaarono yîhtînon̂e pîn me rma tko naxe okwe.

Ero warai wooxam komo n̂een̂axe tînpanatanmekrî me so.

8 Pahxa Moises pen nanwekyatken̂e Xanes,

Xambres komo.

Ero wa xa marha naxe n̂examro hara anarmen poko apanatanmekn̂e kom ha.

Yaarono yanwekn̂e me naxe okwe.

Kicicitho ponarono thakwa mak mîkyam,

Kaan ya kakir̂wamacho ponarono pînî ro mak okwe.

Noro yipu komo mîkyam okwe anarmen poko panatanmekno rin̂e komo.

9 Yohno makî tko panatanmekno n̂iir̂axe.

Amn̂e tak camkîno me ehtopo komo n̂esenpesî miyan komo ya rma,

Moises yanwekn̂enho pen komo yehtoponho n̂esenpekn̂e ero wara rma okwe.

10 On wara tko mîxakn̂e amoro reha,

owya panatanmekno ritoponho yaw roro mak mîxakn̂e,

takîhso oyehtopo marha meen̂akn̂e.

Kaanî mtapotarî yekatîmrî poko mak wîxakn̂e awero ro,

Kaan pona enîn̂e me oyehtopo marha meen̂akn̂e,

expokan me oyehtopo marha,

etîxatî me oyehtopo marha,

ahwokan me oyehtopo marha,

11 Ooxatî pîn komo ya oyemetanmetoponho marha meen̂akn̂e,

owîrîyakacho marha yîwya so,

ero wa oyehtoponho meen̂akn̂e.

Ero wa oyemetanmekyatken̂e Anciokia pono komo,

Ikon̂u pono komo marha,

Rista pono komo marha.

Ero wa oyemetanmetopo wînîmyakn̂e.

Okurunpen̂e me roro tko xakn̂e Kporin komo.

12 Ero wara rma taxe ahnoro Xesus Kristu yakrono komo.

Cemetanmesom me thakwa taxe Kaan ponarono me xa kexi xe kexitaw so.

13 Kicicme xa tak n̂ehtîkexe amn̂e kicicitho komo reha,

cemaro me panatanmekno rin̂e komo marha.

Cemaronwaxe roro kica,

cemaro marha n̂ewehcaxe hara kica.

Ero wa mak naxe noro yipu komo amn̂e okwe.

14 On wara mak esko amoro reha,

omtapotarî mencekn̂e,

ero rma mewehcakn̂e okre.

Yaarono mîn ham,

mîîkekn̂e entache awya.

Ero ke ero ponaro rma men esko miya roro kir̂wan̂he oyehtoponho yenîrî ke awya,

Noro yipu mîk opanatanmekn̂enho,

karî ke awya.

15 On wara marha mîxakn̂e,

mehxa ro amrenai ro rma mencekn̂e Kaan Karitan.

Ero yipu yentarî ke awya awakir̂waman̂e me mîhtînoyakn̂e Xesus Kristu ha.

Ero ke ero wa kacho ponaro rma esko.

16 Kaan nmewrepotho xa mîn Kaan Karitan ahnoro.

On warai Mîkî Kaan,

kacho poko kpanatanmekn̂e me nasî.

Ken̂ekan̂e me marha nasî,

kîtwerman̂e me marha,

takîhso kehtopo poko kpanatanmekn̂e me marha nasî.

Ero yipu mîn Kaan Karitan okre.

17 Ero wa nasî Kaan Karitan takîhso kehtîkachome so,

Kaan yanton komo.

Ero ponaro xa kexitaw so esemer̂wera taxe kir̂wan̂he ciino ritopo poko.

Ero wa taxe Kaan Karitan ponaro kexitaw so.

Ero ke ero ponaro esko.