Ero ke on wara wîîkes hara awya so oyakno komo,

mer̂pora ro mak xatken̂e ham noro yipu pen komo,

Kaan pona enîn̂e pen komo.

Yîchewno wara ro mak taxe.

Ero ke cekaritocerî xa tak cemahcitopo poko cetkukmaxmu komo wara.

Anarimaw Kaan ponarora kirmexpon̂e poko na tatu.

Ero yipu nasî kawsîretopo wara,

ero ke tahsîpînkapore nasî.

Kicicme kehtopo komo marha tahsîpînkacerî,

apehceme kar̂man̂e me cehsom.

Ero wa cehceri karpe cemahcisom wara kehtome so tak kesamarî ro yaw.

Pokahnî me mak cehcerî miya roro.

Ero wa cehcerî.

2 Xesus pona enîn̂e me xa cehcerî.

Noro rma nasî Kaan pona enîn̂e me kiin̂e.

Noro marha nasî kakîhren̂e komo me hara Kaan pona entopo poko.

On wara xakn̂e Xesus,

tahwotacho ponaro xa tî xakn̂e,

Oyakrono komo poko kahwowasî xa tak amn̂e,

kekn̂e.

Ero ke mak tpanaxkem po twaihtopo nînîmyakn̂e.

Tîwîrîyakacho marha nînîmyakn̂e.

Ero yinhîrî tak n̂eremekn̂e Kaan yapon mîtwo kaari n̂ixa.

Iito tak nasî oroto.

Ero wa nasî Xesus.

3 Ero ke awesemetanmekyataw so Xesus mak yîhtînocoko.

Kicicitho komo n̂emetanmekîtho xa Mîk xakn̂e Xesus okwe,

kacoko pokahnî me awehtome so,

ahwokan me marha awehtome so.

4 Kicicme kehtoponhîrî komo yakro awetar̂macho komo pokono rma re amyamro.

Tkamxutaxi ro tko etar̂mara rma maxe.

5 Kaanî mtapotachonho mîhcamnoce ham okwe,

tîmxîkrî yan wara kakn̂e awya so,

ero wa yîmtapotachonhîrî.

On wara kesî,

Okopuci komo,

Aporin komo rma Mîk apanarexe so.

Ero wa apanaretaw yîwîrîyakara ro mak ehcoko.

Atwermexe so marha anarimaw.

Ero wa awir̂ataw so ahwokara marha ehcoko.

6 Yiixe cehtopo komo panaren̂e Mîkî Kporin komo.

Ahnoro tîmxîkrî komo panaresî,

tînahsîthîrî kom ha,

kesî Kaan.

Ero wa kachonho mîhcamnoce ham okwe.

7 Ero ke on wara wîîkes awya so,

apanaretaw so Kaan ya ahwokatîkara ro mak ehcoko.

Yînîmcoko mak.

Tîmxîkrî me oyen̂a ham Kaan,

kacoko mak.

Ahce wa katî matu amyamro amxîkrî komo poko?

Panarera katî mat ha?

Mîpanarexe rma.

Ero wa xa marha Kaan apanarexe so hara.

8 Ahnoro tîmxîkrî komo panaren̂e Mîkî Kaan.

Apanarera so exitaw anarî xîkrî me mak maxe Kaan xîkrî pîn me okwe.

9 Pahxa rikomo me ka kexitaw so kîîm komo kpanaretken̂e so kapu.

Ero ke n̂examro ponaro tîxatken̂e.

Soroso xa kekatî komo Yîîm cewetpore nasî.

Noro yewehcataw kîwya so kar̂pe tak kiir̂axe so.

10 Yohno makî reha kpanaretken̂e so kîîm komo.

Tanme ro so makî reha nîhtînoyatken̂e kpanarecho komo kir̂wan̂he kpor̂mamtome so.

Kaanî reha kpanarexe so kakir̂wamachome so xa tak.

Ero wa kpanarexe so twarai me rma kiitome so,

kir̂wanî ro me kehtome so Noro wara xa marha.

Ero wa kiitome so kpanarexe so.

11 Kahwotacho pîn me rma thakwa ka nasî kpanarecho komo.

N̂erewasî thakwa oko.

Takîhsom me tko kiir̂axe so amn̂e.

Cereporem me marha kiir̂axe so.

Ero wa kiir̂axe so ero yipu.

12 Ero ke apowaixapu wa exitaw so iitono komo karihtocoko n̂he.

Osokmukar̂pera exitaw anarî kom hara n̂examro marha karihtocoko.

13 Awesamarî komo capahnoren̂e wa marha ehcoko ehrokara awehtome so.

Naxe men yîhrepun warai me cehsom komo.

Noro yipu komo eseper̂anto xera taxe,

epîrkan me mak exi xe so taxe.

Noro yipu komo akronomacoko epîrkan me ehtome so.

Ero wa ehcoko.

14 On wara marha ehcoko,

tawake mak esenpocoko roro tooto komo ya miyan komo ya rma.

Kir̂wanî ro me marha ehcoko.

Kir̂wanî ro me exihra kexitaw so Kporin komo yenîhra men taxe okwe.

15 Apoyino komo ponaro marha ehcoko.

Kaan ya twakrecho komo ponarora na natu anarimaw okwe.

Ero ke ahworecoko Kaan poko.

On wara na natu noro yipu komo anarimaw,

tooto komo mtapotarî yerewton̂e me na nat okwe.

Ero wa ehtopo komo nasî cekyekyem micin wara mak oko.

Kicicme kiin̂e me natîkwas okwe.

Mer̂pono pîn komo kiciciren̂e me men nai okwe anarimaw.

Ero ke ero wa ehxapu komo ponaro men ehcoko.

16 Yîtwermano ciicoko wooxam poko epohkara ehtome so kîrkomo,

epohkara marha ehtome so wooxam komo kîîrî poko hara.

Esau pen warahra ehtome so marha yîtwermacoko.

Noro pen tî xakn̂e twen̂ekarî mak okwe Kaan poko.

Kaanî nwakrerî me xa tî ka xakn̂e noro takno potutho me cexirî ke.

Amoro tak esko Kaan nwakrerî me oyemtaka hara,

kekn̂e tko tî takno ya.

Tootî yepetho me cik mak ero wa kekn̂e,

cewn̂e ro mak tonosom yepetho me cik mak okwe.

17 Amn̂e tak Kaan nwakrerî me rma cexi xe tî re xakn̂e hara.

Kaan nwakrerî me xa tak ow cirko Apa,

kekn̂e tîîm ya.

Cerewre ro makî tî ero wa kekn̂e,

nîwracekn̂e ro makî tî.

Pîra takî tî xakn̂e okwe.

Kaan nwakrerî me xa tî cirihra rma tî xakn̂e yîîm.

Ero wa tî xakn̂e Esau pen okwe.

Ero wa noro pen yehtoponho rma mencexe.

18 On wara marha wîîkes awya so,

îîpî yaka mokuhra maxe amyamro reha,

toopu me cehsom yaka.

On wara tî xatken̂e kporin pen komo,

îîpî yamrinaka tî n̂esenmekyatken̂e.

Ero yimaw takî tî îîpî n̂etahsîyakn̂e wehto ke oco.

Awarpape marha tî xakn̂e îîpî meretîrî.

Tuuna yewru warai marha n̂esenpekn̂e cicwiyem.

Nocowonakn̂e marha tî ero yimaw kar̂pe ro mak.

19 Tuu kacho marha tî n̂encetken̂e ero yimaw.

Kaan marha tî nîmtapowakn̂e yîn̂entarî komo me.

Eraspeto ro makî tî n̂encetken̂e Kaanî mtapotarî.

N̂ex ha kopi.

Enta xera ro mak nas amna yîmtapotarî,

ketken̂e takî tî entan̂e komo.

20 Yukurumîkno me ro makî tî n̂encetken̂e Kaanî mtapotarî,

tîtwermacho komo,

tîyopono me tî n̂encetken̂e.

On wara tî kekn̂e Kaan ero yimaw,

Xiya mokuhra ro mak men ehcoko îh pona.

Wokpa watoche tooto ya noro pen waihkacoko toh ke.

Waiwî ke twocoko anarimaw.

Awoh komo meero wacetaw xiya,

waihkacoko,

kekn̂e tî Kaan yîwya so.

21 Moises pen meero tî n̂eraswakn̂e thakwa îîpî yenîrî ke.

On wara tî kekn̂e,

Keraswasî ro mak kopi.

Kîtatanasî ro mak kopi,

kekn̂e tî.

Ero yipu tî n̂een̂atken̂e pahxan pen komo.

Pîra reha maxe amyamro.

Ero yipu yaka mokuhra maxe amyamro reha.

22 Siaw Yîpîn pona mohxapu amyamro reha.

Xerusaren pona xa mîmohce,

kah yawno pona.

Kaan yewton xa mîn,

waipînî ro yewton.

Ero yipu pona mohxapu amyamro.

Ancu komo yaka mohxapu marha amyamro mer̂pono pîn komo yaka.

Tahwore n̂esenmekyaxe iito ancu komo.

Ero yipu komo yaka mohxapu amyamro.

23 Kaan xîkrî komo yaka mohxapu marha amyamro esenmexapu komo yaka.

Poturme ewruxapu komo mîkyam esenmexapu komo,

Kaan mîn me ciixapu komo mîkyam.

N̂examro yosotî nasî tmewreso kah yaw.

Kaan yaka mohxapu marha amyamro.

Ken̂ekan̂e Mîkî Kaan miyan komo yen̂ekan̂e rma.

Noro yipu yaka mohxapu amyamro.

Kir̂wan komo yekatî yaka mohxapu marha amyamro,

akir̂wamatîkaxapu komo yaka.

24 Xesus yaka mohxapu marha amyamro.

Kaan ya kakir̂wamacho komo yekatîmn̂e Mîkî Noro yaka mohxapu amyamro.

Yihcirî me n̂ekatîmyakn̂e Kaan ero warai pîn tak n̂ekatîmyasî Xesus.

Xesus kamxukutho ke caramaxapu komo marha amyamro.

Kir̂wan̂he nasî Xesus kamxukutho,

Abew pen nîmîtho yopo.

Kwakrecho komo yentamexpotopo reha mîn Xesus kamxukutho reha.

Pahxan pen komo warai pînî reha amyamro.

25 Ero ke Kaanî mtapotarî yanwekîra ro mak men ehcoko.

Kaan yanwekn̂enho komo mikyam xatken̂e okwe pahxan pen komo.

Noro yipu komo kurunpetopo exihra ro mak xakn̂e kopi.

Waihyatken̂e thakwa makî.

Roowo po mak nîmtapowakn̂e ero wa yîmtapotarî nanwekyatken̂e.

Soroso xa tak kîwyam twaihkaxmu me taxe kah yawno mtapotarî yanwekyataw kîwya so.

Kukurunpetopo komo exihra ro mak nasî ero wa kexitaw so kopi.

26 Pahxa tî roowo n̂esewsîyakn̂e Kaanî mtapotarî yanme.

Amn̂e tak roowo pen tî n̂ewsîya xa hara Kaan.

On wara kekn̂e,

Roowo tak wewsîyas hara men amn̂e,

cewn̂e ro xa tak.

Kaapu meero wewsîyas ero yimaw,

kekn̂e tî.

27 On wara kapore nasî,

Cewn̂e ro xa tak wewsîyasî,

kachonho poko,

Ewsîxapu komo tak n̂ehcamnoyasî ero yimaw akîhtoxapunhîrî kaxi thakwa,

kapore nasî.

Ero yipu komo yehcamnopuche ehcamnopînî ro mko mak tak n̂etîmcesî rma,

kapore marha nasî.

28 Ero ke kayaritomo me tak kiir̂axe so Kaan amn̂e ar̂manî ro me.

Ero ke,

ow akronomakî Apa kirwanhe mak awanton me oyehtome,

tîtkacerî Kaan ya.

On wara marha tîtkacerî yîwya,

Kir̂wan̂he mai ham Apa,

ero wa amna miir̂a ham okre,

tîtkacerî.

Ero wa tahwotacerî Kaan poko.

Kyopono me rma tko Kaan tîhtînocerî,

twerî kehtopo me marha.

29 Yukurumîkno Mîkî Kaan,

ponaro kehtopo kom ha.

Wehto warai mak Mîk ha,

akn̂ino rîn̂e ro mak oco.

Noro yipu xa Mîkî Kaan.