Taa,

on wara wîîkes hara awya so,

on wara nasî Kaan pona entopo kîwya so,

yîwya kwakrecho komo yihcitopo rma mîn ha.

Enîhnî yenîn̂e me kiitopo marha mîn ha.

2 On wara tî xatken̂e pahxan pen komo,

Kaan pona tî n̂een̂atken̂e.

Ero ke,

Kir̂wan̂he ween̂asî n̂examro,

kekn̂e tî Kaan n̂examro poko.

3 Kaan pona een̂ataw kîwya so on wara marha tîtkexe akîhtono ritoponho poko,

roowo nakîhcekn̂e Kaan pahxa tîmtapotarî ke mak,

kaamo marha,

nuun̂i marha,

xir̂ko marha,

ahnoro mak nakîhcekn̂e Kaan tîmtapotarî ke mak,

tîtkexe.

Enîhnî ke rma Kaan nakîhcekn̂e censomu mko,

tîtkexe.

Ero wa tîtkexe Kaan pona een̂ataw kîwya so.

4 Ero wa tî xakn̂e Abew pen ha,

Kaan pona tî n̂een̂akn̂e.

Ero wa cexirî ke kir̂wan tî nakn̂iyakn̂e Kaan ya tîmsom.

Ero pîntho makî reha nakn̂iyakn̂e Kain pen.

Ero ke on wara tî kekn̂e Kaan,

Kir̂wan mîk Abew,

kir̂wan̂he marha ween̂asî yînmîthîrî,

kekn̂e.

Tpona enîrî ke mak ero wa kekn̂e noro poko.

Ero wa exirî ke tîmtapotaxmu wara rma nasî Abew pen waihxapu rma.

5 Kaan pona enîn̂e me marha tî xakn̂e Enoke pen hara.

Ero warai me exirî ke kah yaka tak Kaan naar̂akn̂e.

Waipîra rma tî naar̂akn̂e.

Ero yinhîrî noro pen yenîhra takî tî xatken̂e poyinonhîrî komo kah yaka arîrî ke Kaan ya.

Roowo po rma ka exitaw,

kir̂wan̂he keen̂asî okre,

kesî Kaan noro poko.

Ero wa tî xakn̂e Enoke pen.

6 Kaan pona enîhra kexitaw so kir̂wan̂he keen̂asî okre,

kahra ro mak nasî Kaan kpoko so.

Ero ke on wara kan̂e komo mak naxe Kaan yaka tîtosom me,

Nasî xa ha Kaan.

Yaaro xa Noro yepor̂ataw kîwya so,

kakronoman̂e me n̂esenpesî kîwya so,

kan̂e komo mak.

Ero ke Kaan pona enîn̂e me kexitaw so mak kir̂wan̂he keenaxe so Noro.

7 Ero wara xa marha tî xakn̂e Noe pen hara,

Kaan pona tî n̂een̂akn̂e noro pen hara.

On wara tî Kaan kekn̂e yîwya,

Roowo pen tak nukmetîkes amn̂e,

kekn̂e tî yîwya.

Ero wa tî kekn̂e yîwya tuuna yukmacho yesenpora ka exitaw.

Wara rma yukmacho pona n̂eraswakn̂e Noe.

Ero ke takî tî kanawa imo nakîhcekn̂e tîhyawno komo kurunpetome.

Ero wa exirî ke on wara kan̂e wara xakn̂e noro pen roowo poko hakno komo ya,

Kicicme xa maxe okwe,

kan̂e wara xakn̂e.

Ero wa xakn̂e Kaan pona enîrî ke tîwya.

Ero ke kir̂wan me takî tî noro pen n̂een̂akn̂e Kaan.

Ahnoro tpona enîn̂e komo Kaan n̂een̂asî kir̂wan me.

Ero wa xa marha Noe pen n̂een̂akn̂e hara.

Ero wa tî xakn̂e Noe.

8 Kaan pona enîn̂e me marha tî xakn̂e Abraaw pen hara.

Ero ke Kaanî mtapotarî takî tî n̂ewehcakn̂e.

On wara tî Kaan kekn̂e yîwya,

Miya etoko anarî rowon pona.

Arowon me onîmrî mîn.

Ero ke iina etok ha,

kekn̂e tî yîwya.

Ero ke takî tî cekn̂e noro pen tohnawno wara.

Ahtono na mîn orowon me Kaan nîmrî?

Kekn̂e makî tî Ero wa kan̂e rma tî cekn̂e.

9 Cepatakache tak iitono ro me takî tî xakn̂e ero po.

On men wîmyas awya so amn̂e,

kachonho rma tî mîn xakn̂e roowo.

Anarî ro komo chew makî tî n̂enmayakn̂e.

Ero wa tî xakn̂e noro pen Kaan pona enîrî ke mak.

Roona warai makî tî xakn̂e yîmîn iito.

Ero yipu yaw marha tî xakn̂e Isake pen hara,

Xako pen marha.

N̂examro ya marha tî Kaan kekn̂e,

On wîmyas amn̂e awya so arowon komo me,

kekn̂e,

Abraw pen ya kekn̂e ero wa xa marha.

Iito xatken̂e n̂examro.

10 Cerepore rma tî xakn̂e Abraaw pen iito.

On wara ti kekn̂e,

Amn̂e emacakanî ro tak Kaan n̂enpesî oyewton,

tînirithîrî rma,

kekn̂e.

Ero yipu ponaro tî xakn̂e Abraaw pen.

11 Taa,

Sara pen marha tî xakn̂e Kaan pona enîn̂e me hara,

Abraaw pen pic ha.

Nocwakomotho me thakwa tî xakn̂e noro pen ero yimaw.

Noro yipu rma tko Kaan karihcekn̂e yîmxîtachome tak.

Ero wa tî Kaan n̂iir̂akn̂e tpona enîrî ke mak yîwya.

On wara tî kekn̂e Saara pen tîhnaw,

Kemîknon̂e pînî ro mak Mîk Kaan.

Amxîkrî wîmyasî,

kekn̂e owya.

Ero ke nîmyasî wara ha,

kekn̂e tî.

Ero wa karî ke mak Kaan karihcekn̂e.

12 Ero ke Abraaw pen takî tî n̂epamyakn̂e,

cewn̂anînhîrî rma.

Waixapu warai rma mîk xakn̂e,

wara rma n̂epamyakn̂e mer̂pora cehso ro epamthîrî.

Xir̂ko nasî mer̂pora kah yawno,

axawa marha nasî mer̂pora tuuna yecihtarino,

ero wicakî tak xatken̂e Abraaw pen yepamtho komo,

mer̂pora ro mak.

Ero wa xakn̂e Abraaw pen.

13 Ero wa tî xatken̂e n̂examro pen,

Kaan pona enîn̂e me tî xatken̂e okre miya roro twaihtopo komo pona roro.

Kwakrexe so amn̂e,

kachonho yahsîra rma tî waihyatken̂e okwe.

Ero ponaro rma tko tî xatken̂e.

Kaan nîmrî yenîn̂e wa makî tî xatken̂e mooxeno wara.

Tahwore tî xatken̂e Kaan ya twakrecho komo ponaro xa cexirî ke so.

Ahsîn̂e wara rma xatken̂e.

On wara kan̂e me marha tî xatken̂e,

Roowo pono ro pîn ow ha.

Anarî pona tîtosom mak ow,

kan̂e me tî xatken̂e.

14 On wara naxe ero wa kan̂e komo,

Oyekenî ro pona owtotopo ponaro mak wasî,

kan̂e wara naxe.

15 Cekenhîrî komo pînîn yaw rma cexitaw so ketaw ha re Abraaw komo n̂etîramacerî hara re iina xa marha.

16 Kir̂wan xe xa matko tî xatken̂e ceken komo,

kah yawno xe.

Ero warai xe exirî ke so,

On wara kesî Kaan pko so,

N̂examro Porin Ow ha,

kesî.

Yîhyapamra ro mak Ero wa kesî.

N̂examro yewton marha n̂iir̂akn̂e.

Ero wa tî nai Kaan noro yipu komo poko.

17 On wara marha tî xakn̂e Abraaw pen,

noro pen tî nukukmekn̂e Kaan,

Opona xa n̂een̂a ham,

kachome tîwya.

Kaan pona rma tî n̂een̂akn̂e ero yimaw.

Isake penî rma tî nîmyakn̂e Kaan ya.

Ero ke noro pen tî waihka xe xakn̂e Kaan yanme.

Kaanî mtapotachonho rma n̂encekn̂e Abraaw pen,

Kepamnoyas amn̂e,

kacho.

Ero wa kacho yentan̂enho rma tumumuru waihka xe xakn̂e cewn̂anî rma.

18 On wara tî ka kekn̂e Kaan Abraaw pen ya,

Isake yepamtho komo xa naxe,

Abraaw yepamtho komo mîkyam,

kacho me,

kekn̂e yîwya.

19 Ero ke on wara takî tî kekn̂e Abraaw pen,

Waixapunhîrî yenpakan̂e rma Mîk Kaan,

Ero ke omumuru waihkache owya Noro rma tak n̂enpakes hara,

kekn̂e.

Omumuru rma Kaan nîm hara waixapunhîrî rma,

kan̂e wara rma xakn̂e ha re.

Ero wa tî xakn̂e Abraaw pen.

20 Taa,

Kaan pona xa marha tî n̂een̂akn̂e Isake pen hara.

Ero ke tumumuru komo yakro tî nîmtapowakn̂e.

On wara awepamthîrî komo wakres Kaan amn̂e,

kekn̂e tî Xako pen ya,

Esaw pen ya marha.

Ero wa tî kekn̂e Isake tumumuru komo ya.

21 Kaan pona xa marha tî n̂een̂akn̂e Xako pen hara.

Ero ke Xose mumuru komo ya tî kekn̂e,

On wara awepamthîrî komo wakresî Kaan amn̂e kekn̂e yîwya so.

Twaihîrî me rma tî ero wa kekn̂e.

Tamoyin ke makî tî n̂ecececekn̂e.

Kir̂wan̂he xa Kaan nai ham okre,

kekn̂e marha ero yimaw.

Ero wa tî xakn̂e Xako pen.

22 Kaan pona xa marha tî n̂een̂akn̂e Xose pen hara.

Ero ke twaihtopo pahnoke on wara xakn̂e,

Exitu poi Ixaw Yana komo totopo poko tî nîmtapowakn̂e.

Oyocho men aacoko amn̂e awcetaw so,

kekn̂e marha tî.

Ero wa tî kekn̂e Xose pen.

23 Taa,

Kaan pona xa marha tî n̂een̂atken̂e Moises yîîm pen kom hara.

Ero ke tîmxîkrî komo n̂eyamyatken̂e Moises mren ciki.

Ewruche rma tî n̂eyamyatken̂e kir̂wan me enîrî ke.

Iito ciki tî xakn̂e ceyamso 3 nuun̂i mak.

Kayaritomo mtapotachonho pona tî erasîra xatken̂e n̂examro.

Ero wa tî xatken̂e.

24 Taa,

Kaan pona xa marha tî n̂een̂akn̂e Moises pen hara.

Ero ke on wara takî tî kekn̂e cetîtîkache,

Paraw yemsîrî mrerî mîkro,

kacho me oyexi xera ro mak tak wasî.

25 Cemetanmesom me xa matko oyexi xe wasî Kaan yanan komo yakro.

Kicicitho poko oyesepotanmekî xera wasî.

Yohno mak kerepotanmekn̂e mîn kicicitho kica.

26 Kristu yakrono me oyexi xe tak wasî,

Noro poyero tîwîrîyakaxmu me rma.

Cepethîkem me rma tko ween̂asî ero yanme owîrîyakacho,

kekn̂e tî Moises pen.

Puranta rma re xakn̂e iito Exitu po,

mer̂pono pînî rma re.

Cepethîkem me xa matko tî nîhtînoyakn̂e tîwîrîyakacho Kristu poyero,

Exitu pono komo yemyawno yopono ro me.

27 Kaan pona enîrî ke marha Exitu poi takî tî cekn̂e Moises pen.

Kayaritomo pona tî erasîra xakn̂e.

Nîrwona men opoko kopi,

kahra tî xakn̂e.

Kaan yenîn̂e wara makî tî xakn̂e,

enîhnî yenîn̂e wara.

Ero ke cesemetanmetopo nînîmyakn̂e miya roro.

Ero wa xakn̂e Moises pen.

28 Kaan pona enîrî ke marha Watono Ritopo me eseresmacho komo tî n̂iir̂akn̂e.

Weronomano marha tî n̂iir̂akn̂e poturme ewruxapu komo waihkacho poko.

Oper̂a xîkrî kamxukutho ke carahcara kacoko amumuru komo waihkara ehtome poturme ewruxapu pen kekn̂e tî Ixaw Yana komo ya.

Ero wa tî kekn̂e Moises pen.

29 Kaan pona xa marha n̂een̂atken̂e Ixaw Yana kom hara.

Ero ke tî tuuna wacetken̂e,

Cucurem Yewku,

kacho.

Yarinho yari mak wacetken̂e.

N̂examro wenatho yaw takî tî tîto xe so xatken̂e Exipsiu kom hara.

Pîra reha tî xatken̂e.

N̂enor̂atken̂e thakwa makî tî n̂examro penî reha.

30 Kaan pona enîrî ke marha Ixaw Yana komo ya Xer̂ko wacantho tak n̂emacakekn̂e.

7 kaamo napomrikyatken̂e n̂examro emacakachome tak.

Ero wa tî xatken̂e Ixaw Yana komo.

31 Kaan pona xa marha tî n̂een̂akn̂e Haabe pen hara.

Kîîrî pohkan̂e ro me tî xakn̂e kica noro.

Kaan pona tko tî n̂een̂akn̂e hara.

Ero ke Ixaw Yana komo n̂eyamyakn̂e tîmîn yaka.

Ero ke Kaan yewetîn̂e pînînho pen komo waparî me tmokyataw so noro penî reha waihkara tî xatken̂e.

Ero wa tî xakn̂e Haabe pen.

32 Taa,

onok yehtoponho tak wekatîmya hara awya so?

Miya rma nai anarî pen komo yehtoponho hara,

ekatîmtîkarî yopo.

Xiteaw pen tî xakn̂e hara,

Barake pen hara tî,

Sansaw pen hara tî,

Xehte pen hara tî,

Tapi pen hara tî,

Samuew pen hara tî,

weronomano rin̂e pen kom hara tî.

33 On wara tî xatken̂e n̂examro pen hara Kaan pona enîrî ke mak tîwya so,

kayaritomo pen komo tî nar̂metken̂e anarî komo.

Kir̂wan̂he ciino rin̂e me tî xatken̂e anarî kom hara.

Kaan nakronomarî me tî xatken̂e anarî kom hara yîmtapotarî ponaro cexirî ke so.

Kamara imo mtarî tî nahruyatken̂e anarî kom hara eseskara ehtome.

34 Ecakîra marha tî xatken̂e wehto cheka ar̂maxapu komo rma oco.

Waapa komo tî mokyatken̂e anarî komo wece kacipara imo ke amaxi.

N̂emahciyatken̂e tko n̂examro hara.

Kar̂penînhîrî komo marha tî xatken̂e kar̂pe hara.

Erasîn me ro makî tî n̂ehtîketken̂e anarî kom hara ar̂mano riyataw.

Waapa me tî mokyatken̂e anarî yana komo anarimaw.

Noro yipu komo rma tko tî n̂en̂epetken̂e anarî kom hara.

35 Wooxam komo marha tî n̂een̂atken̂e Kaan pona tîmxîkîthîrî pen komo pakachome hara.

Nahsîyatken̂e xa hara tîmxîkrî komo waihxapunhîrî komo rma.

On wara tî xatken̂e anarî komo,

Kaan pona enîn̂enhîrî komo rma,

tukurunpen̂e komo ponarora makî tî xatken̂e,

cemetanmetopo komo nînîmyatken̂e makî.

Ero wa tî xatken̂e kir̂wan̂he xa tak cehtome so amn̂e tpakache so hara waixapunhîrî.

36 Anarî pen komo poko tî n̂etaporetken̂e okwe Kaan xatî pîn komo,

nîhyokyatken̂e marha oco.

Anarî pen komo tî napomiyatken̂e hara kanawa mici warai ke okwe,

nahruyatken̂e marha.

37 Anarî pen komo tî n̂etapetken̂e toh ke oko.

Anarî pen komo tî nîhkocetken̂e sahsa ke hara oko.

Anarî pen komo pohketken̂e kicicitho poko.

Anarî pen komo thakwa tî waihketken̂e kacipara imo ke hara oko.

Anarî komo reha tî n̂esemetanmekyatken̂e ro mak okwe.

Oper̂a picho makî tî namruyatken̂e tponon komo me,

kabra picho marha tî.

Ero yaw makî tî n̂etar̂atken̂e n̂examro pen.

Yînapumra makî tî xatken̂e okwe.

Emetanmexapu me xatken̂e okwe,

erepexapu me marha okwe.

38 Ekemra thakwa makî tî xatken̂e anarî kom hara.

Pohnîntari makî tî n̂etar̂atken̂e okwe.

Îh pore marha tî n̂etar̂atken̂e anarimaw.

Kamara yewtatho yaw so n̂enmayatken̂e,

ahtoxapu yaw so marha tî.

Ero wa tî xatken̂e okwe anarî komo.

Noro yipu komo yeken mexehra ro mak xakn̂e ontho roowotho.

39 Kir̂wan komo mîkyam okre,

kacho me tî xatken̂e n̂examro pen Kaan ya.

Noro pona enîrî ke mak yîwya so ero wa kacho me xatken̂e yîwya.

Ero ke,

Kakronomexe so amn̂e,

kekn̂e tî Kaan yîwya so.

Waihyatken̂e rma tko tî n̂examro pen ero wa kacho yaw roro akronomara rma ka exitaw Kaan.

40 Kîwyamu reha taxe yînakronomarî me rma.

Oroto rma kakirwamatîka xe xakn̂e.

N̂examro penî rma re nakir̂wametîkes amn̂e kakro ro so mak ha tko.

Kîywanokara nasî n̂examro yakir̂wamacho.

Ero wa kiir̂axe so Kaan.