On warai pokono mîn xakn̂e Moises penî nmewretho,

iyokuthîrî komo pun yakn̂itopo pokono.

Ero yipu nîmyatken̂e roro yicimn̂ipuntaxera.

Kaan mîn yaka n̂ekyatken̂e akn̂iposo.

Noro yipu komo yakir̂wamacho komo pînî rma tko mîn xakn̂e ero yipu mko.

Kakir̂waman̂e kuknon mak mîn ero yipu tîmtoponho.

Kakirwaman̂e xa tak mokyas amn̂e,

kacho makî reha mîn xakn̂e.

2 Ero yipu yekn̂e komo takir̂wamatîkaxi exitaw so ketaw ha re ahce wa re n̂ehcerî awya so?

Tookuthîrî komo pun yakn̂ipîra takî re n̂ehcerî.

Takir̂wamaxi cexiri ke so,

Kicicitho ow ha kica,

kahra takî re n̂ehcerî.

3 Oyehtoponho rma nas okwe etowra,

kacho ponaro ciitopo rma mîn xakn̂e emapona,

yicimn̂ipuntaxera iyokuthîrî komo waihkachonho.

4 Kicicme kehtoponhîrî komo yîhcamnon̂e pînî rma thakwa mîn bui kamxukutho,

boce kamxukutho marha.

5 Ero ke on wara kekn̂e Kristu roowo pona tmokyataw,

Apa,

takn̂isom komo xera mîxakn̂e ham,

ahce na komo xera marha mîxakn̂e ham awya tîmsom.

Opun xa matko makîhcekn̂e onîmrî awya.

6 Takn̂itîkaxmu rma re nîmyatken̂e Ixaw Yana komo,

tookuthîrî marha waihketken̂e kicicme cehtoponhîrî komo yahrutopo me.

Poxumra tko meen̂akn̂e ham ero yipu.

7 Ero ke on wara tak wîîkai awya,

Apa,

Kaan xa Amoro.

Awanme ciino riso wa kmokye oona.

Ero wa kacho rma nasî tmewreso opoko akaritan yaw ha,

kekn̂e Kristu.

8 On wara cokorî ka kekn̂e,

anarmerpanî mko nîmyatken̂e Ixaw Yana komo awya Apa,

Moises penî nmewretho yaw roro rma,

tokuthîrî komo pun nîmyatken̂e,

ahce na komo marha nîmyatken̂e,

kicicme cehtopo komo yahrutopo marha nîmyatken̂e.

Ero yipu xera mîxakn̂e ham Apa,

poxumra mak meen̂akn̂e ham,

kekn̂e ha ka.

9 Ero wa kache on wara takî tî kekn̂e hara,

Apa,

awanme ciino riso mak kmokye oona,

kekn̂e takî tî.

Ero wa kekn̂e Kristu Tîîm ya.

Ero wa karî ke Moises penî nmewretho yanme ciino cirihra tak nasî Kaan.

Anarî ro tak n̂ekatîmyakn̂e hara kakir̂wamacho komo.

10 Ero wa Tîîm n̂ewehcakn̂e Xesus Kristu.

Ero wa ewetîrî ke kakir̂wamatîkan̂e me tak nas okre.

Tupunu rma waihkapekn̂e Noro ero wa kiitome so.

Cewn̂e ro mak waihyakn̂e Noro reha kakir̂wamatîkan̂e me cehtome.

11 On wara reha tî natu tîmsom pokono komo,

cemyarîrî komo poko roro naxe Kaan mîn yaw cececetoso.

Enmar̂atîxera nakn̂iyaxe Kaan ya tîmsom.

Ero re mak nakn̂iyaxe emapona.

Kicicme kehtoponhîrî komo yîhcamnotopo pînî rma tko mîn ero yipu yakn̂itopo okwe.

12 Ero warahra reha xakn̂e Xesus.

Cewn̂e ro makî reha kicicme tooto yehtopo yepetho me n̂etwaikapekn̂e.

Epemache takî tî n̂eremekn̂e Kaan panaka kaari n̂ixa.

Ero wa xakn̂e Xesus.

13 Iito makî ka nasî.

Amn̂e tak yiixatî pîn komo nar̂mesî Kaan.

Noro napikrî wara ro mak tak n̂iir̂asî.

14 Ero wa xakn̂e Xesus,

Cewn̂e ro mak n̂etwaikapekn̂e.

Twairî ke tak kakir̂wamatîkan̂e me xakn̂e.

Miya rorono me kakir̂wamexe so,

Kaan ponarono me ciisom kom ha.

15-16 Kir̂wanî ro Yekatî marha ero wa kiitopo n̂ekatîmyakn̂e.

On wara ka kekn̂e.

Amn̂e n̂he tak anarî wekatîmyas hara n̂examro wakretopo hara owya,

kesî Kporin komo.

On wara kacho mîn wakreno ritopo komo,

Yîropotaka so tak wiir̂asî owya panatanmecho komo,

Mewrexapu wara rma wiir̂asî esehtînotopo komo yaka marha ponaro xa ehtome so,

kacho marha mîn wakretopo komo,

kesî.

Ero wa kesî Kporin komo,

kekn̂e Kir̂wanî ro Yekatî.

17 Ero wa kan̂enho on wara tak kes hara Noro rma,

Ero yimaw tak kicicme n̂examro yehtoponho wîhcamnoyasî,

oyanwekn̂e me ehtoponhîrî kom ha.

Ero wa ehtoponhîrî komo ponarora ro mak tak wasî miya roro,

kes hara Kporin komo.

Ero wa kekn̂e Kir̂wanî ro Yekatî.

18 Ero ke kicicme kehtoponhîrî komo yîhcamnorî ke tak Kaan ya on wara kahra tak nasî Noro,

Kicicme awehtoponhîrî komo yahrutopo me awoh komo pun akn̂icoko rma,

kahra nasî.

Ero wa kahra ro mak tak nasî.

19 Ero ke oyakno komo,

Kaan yekenî ro yaka cewomsom me tak taxe.

Erasîra tak tîhcexe iina Xesus kamxukutho ponaro kexirî ke so mak.

20 Anarî me tak nasî Kaan yaka kewomtopo komo oroto.

Karitî ponaro tak tîhcexe Xesus ponaro.

Ero ke poropîra taxe kîwyam reha Kaan yekenî ro yahruru pona.

Kaan yaka roro xa tak cewomyaxe.

Xesus pun ya tan wîîkesî,

Kaan yekenî ro yahruru,

kacho ha.

21 Kaan yaka cewomsomu rma Mîk Xesus.

Kponarono komo rma Mîk ha.

Kaan mîn yenîn̂e me rma nasî Noro.

22 Noro yipu ponaro kexirî ke so Kaan yaka roro xa tak tîtocerî tahwore.

Oyencesî rma wa Kaan,

Noro pona enîrî ke owya,

tîtkacerî.

On wara taxe,

Noro kamxukutho ke caramaxapu wa nasî kropotarî komo.

Ero ke,

Kicicitho tko na ow,

kahra tak taxe.

Tuuna ke korokaxapu wa marha nasî kupun komo,

kir̂wan ke korokaxapu wa okre.

Ero wa kexirî ke so mak Kaan yaka xa tîtocerî erasîn me okre.

23 Xesus pona enîn̂e me esekatîmxapu kîwyam.

Ero ke Noro ponaro rma cehcerî miya roro etowîn me ro mak.

Kakir̂waman̂e ma re Mîk Xesus,

kan̂e pîn me ro mak cehcerî.

Kemîknon̂e pînî ro mak Mîk Xesus,

tîmtapotachonhîrî poko ehn̂anî ro mak ha.

24 Kakrono komo ponaro marha cehcerî.

On wara cehcerî n̂examro poko,

Yiixe so cehcerî,

takronomacerî marha.

Ero wa cehcerî kpoko so pohnîmtome so n̂examro hara,

ero wa xa marha ehtome so.

25 Kaan mîn yaka cesenmecerî marha.

Apohana,

esenmekîra tak na wai,

kan̂e pîn me.

Esenmekîra tak natu anarî komo okwe.

N̂examro warahra reha ehcoko amyamro.

Xesus mohtopo tak men n̂epahnokesî.

Ero ke kpoyino komo tahworecerî.

Cesenmecerî n̂he tahwore kehtome so Kaan poko,

tîtkacerî yîwya so.

Ero wa cehcerî.

26 On wara tko naxe anarî komo,

kicicme rma naxe kica yaarono yentan̂enho.

Tanme ro so mak kicicme naxe.

Ero wara exitaw so anarî exihra thakwa nas okwe Kaan ya tîmsom kicicme ehtoponhîrî komo yepetho xa hara.

27 On wara naxe ero wa cehsom komo,

Kicicme oyehtopo tak men Kaan n̂epemesî kopi,

kexe.

Nîrwonasî tak men kopi Noro opoko,

kexe marha.

Wehto imo chew men was amn̂e oco.

Noro xatî pîn komo yakn̂itopo tî mîn wehto imo oco.

Noro yipu komo yakro rma iito was amn̂e kopi,

kexe thakwa okwe.

Ero wa cehtopo ponaro mak naxe.

28 Moises pen nmewretho yanwekn̂enho komo twaihkaxmu me xatken̂e.

Yîpînîn yawra ro mak n̂etapetken̂e noro yipu komo.

Kicicme ehtoponhîrî komo yenîn̂enho mtapotarî yanme mak n̂etapetken̂e.

Asak na xakn̂e enîn̂enhîrî komo,

osorwaw na anarimaw.

Noro yipu komo mtapotarî yanme n̂etapetken̂e.

Ero wa xatken̂e pahxan pen komo okwe.

29 Soroso xa cemetanmesom me thakwa naxe Kaan Mumuru yîwîrîyakan̂e kom hara.

Noro yapikn̂e wara ro mak naxe noro yipu komo okwe.

Noro kamxukutho yîwîrîyakan̂e marha mîkyam,

takir̂wamacho komo yîwîrîyakan̂e rma.

Yaaro xa Kaanî mtapotachonho yentamexpotopo rma mîn Xesus kamxukutho.

On wara kekn̂e Kaan,

Kakir̂wametîkexe so amn̂e.

Yaaro xa ero wa kacho yentamexpotopo rma mîn Xesus kamxukutho.

Ero yipu rma n̂een̂axe ero pîntho me mak okwe.

Kwakren̂e komo Yekatî yîwîrîyakacho rma mîn ero wa ehtopo komo.

Ero wa cehsom komo naxe Kaan n̂emetanmekrî me.

30 Ero wa ciin̂e me rma wa Kaan tîhtînoyaxe.

On wara kekn̂e Noro tpoko rma,

Cesepansom ro xa Ow ha.

Owî rma kicicme cehsom komo wepemesî,

kekn̂e.

On wara marha kekn̂e,

Aporin komo Ow ha.

Oyanan komo yen̂ekan̂e ro marha Ow ha,

kekn̂e.

Ero wa kekn̂e Kporin komo.

31 Ero ke cerahtîmpore men nasî kopi.

Waipînî ro mak Mîk Kaan.

Noro yipu yîrwonataw kpoko so cerahtîmpore tak men nasî kopi.

Ero wa cexpore nasî.

32 On wara mîxatken̂e amyamro reha,

weeyu pono wara tak mîxatken̂e okre Xesus ya kakir̂wamacho komo yentarî ke awya so.

Ero yinhîrî awemetanmekyatken̂e so tak okwe Kaan xatî pîn komo.

Miya xe ro mak awemetanmekyatken̂e so okwe.

33 On wara awir̂atken̂e so,

awîrîyaketken̂e so yakentaw.

Awemetanmekyatken̂e so marha okwe.

Anarimaw so ero wara awir̂atken̂e so emetanmexapu komo yakrono me awexirî komo poyero.

34 Kahrutopo yawno pen komo pînîn yaw so rma tko mîxatken̂e.

Awemyawnonhîrî komo yarîche tooto komo ya tahwore rma mîxatken̂e.

Naacowpe rma,

mîîketken̂e mak.

Kah yaw nasî oyemyawno kir̂wan xa tak,

ehcamnopînî ro mak,

mîîketken̂e marha.

35 Ero ke Kaan pona rma encoko ahwokara rma.

Noro pona een̂ataw rma awya so mer̂pono pîn tak mahsîyaxe amn̂e awepethîrî kom ha.

36 Ahwokan me ro mak cexpore nasî.

Kaan yewetîn̂e me awexitaw so pahkî ahwokan me,

Noro nîmrî rma tak mahsîyaxe amn̂e.

Awepethîrî komo rma wîmyas awya so,

kesî Noro.

Ero ke ero wa kacho yaw rorono rma wa mahsîyaxe amn̂e.

37 On wara kesî Kaan,

Mokyasî rma wa tmohsom.

Pahnoke tak nasî Noro mohtopo.

Ecmamra wa nasî.

38 Akir̂wamaxapu komo amyamro.

Ero ke opona cenpore roro nasî ahce wa na awehtome so.

Opona enîhketaw awya so ahwora men was apoko so okwe,

kesî.

Ero wa kesî Kaan.

39 Xesus pona enîhkan̂e pînî reha tko kîwyam.

N̂ehcamnoyaxe thakwa mak okwe Noro pona enîhkan̂e pen kom ha.

Kaan pona enîn̂e komo reha kîwyam miya roro.

Kropotarî komo yakir̂wamachome so Noro pona ceen̂axe.

Ero wa taxe.