On wara wîîkes hara awya so,

pahxa apanatanmetoponhîrî komo poko rma kîmtapowasî.

On wara ehcoko Kaan ya tîmsom poko,

kacho mîn xakn̂e.

Kaan mîn tak ciicoko on wara xa,

kacho marha mîn xakn̂e.

2 Ero ke Kaan mîn takî tî n̂iir̂atken̂e n̂examro.

On warai tî n̂iir̂atken̂e,

metataw tî xakn̂e poono,

ahruru ha.

Potai rma tak xakn̂e amtakpo,

Kaan mîn,

kacho rma.

Ero yaw tî xakn̂e weeyu,

cecehkem ha.

Cuure yapon marha tî xakn̂e ero yaw.

Ero po tî xakn̂e Kaan ya tîmsom,

cuure.

3 Mîîmo rakataw tî xakn̂e poono hara,

wahkotono ritopo.

Mehxa tî xakn̂e amtakpo hara.

Kaan yekenî ro,

kacho ha.

4 Iito tî xakn̂e kotoporem yakn̂itopo.

Ooru tî mîn xakn̂e.

Iito marha xakn̂e yamata ooru ke yîmkarinomaxapu.

Ero yaw tî xakn̂e tahrem,

ooru rma.

Maana ke tarkem tî mîn xakn̂e tahrem.

Yamata yaw marha tî xakn̂e Araw yamoyintho,

atîkrontaxapu.

Toopu enporixapu marha tî xakn̂e yaw.

Ero poko tmewreso tî xakn̂e Kaanî mtapotarî.

5 Yamata yahruru tî xakn̂e,

Kîpînîn Yaw Kaan Yehtopo,

kacho.

Ero kanahtaw xakn̂e kerubin me akîhtoxapu.

Kaan weyuru yahrun̂e ro tî mîn xakn̂e kerubin.

Ero yipu mko tko ekatîmtîkara wasî tan awya so.

6 Ero wa Kaan mîn n̂iir̂atken̂e.

Ciitîkache takî tî n̂ewomyatken̂e tîmsom pokono komo,

potaino yaka makî tî cetken̂e.

Emapona roro tî n̂ewomyatken̂e iina.

Weeyu potuhtoso tî n̂ewomyatken̂e,

kotoporem yakn̂iso marha tî,

cuure yetakaxi marha,

Kaan mîn yawno ro.

7 Mehxan yaka reha Kaan yaka cewomsom makî tî n̂ewomyakn̂e cewn̂e.

Cewn̂e ro so makî tî n̂ewomyakn̂e cimn̂ipu po roro.

Iina tîcetaw kamxuku naar̂akn̂e.

Kamxuku ken̂ehra tohra ro makî tî xakn̂e iina.

Kaan yamatan takî tî caramekn̂e kicicme cehtoponhîrî yahrutopo me.

Kicicme tpoyino komo yehtoponho yahrutopo me marha tî ero wa caramekn̂e.

Anarimaw so kicicme xatken̂e twen̂ekano me mak okwe.

Ero wara ehtoponhîrî komo yahrutome caramekn̂e Kaan yamatan.

Ero wa xakn̂e Kaan yaka cewomsom.

Noro mak n̂ewomyakn̂e iina.

8 On wara kacho mîn xakn̂e ero wa ewomtopo,

kesî Kaan Yekatî.

Kaan yaka roro xa ewomra ka maxe okwe,

on exitaw rma ka Kaan mîn,

kacho tî mîn xakn̂e,

kesî.

9 N̂examro pen panatanmecho mak mîn xakn̂e Kaan mîn ahnoro.

Ero yaw rma re Kaan ya tîmsom poko xatken̂e.

Okno pun marha nakn̂iyatken̂e.

Kir̂wan̂he xa kropotarî cirihra rma nasî ero yipu tîmtopo Kaan ya.

10 Kaan ya tîmsomu rma re n̂ekyatken̂e n̂examro.

Erewsî n̂ekyatken̂e,

wooku marha.

Ero pîntho mak mîn ero yipu mko.

Ero yipu yekyataw n̂ekoroketken̂e ha kir̂wan̂he cehtome so tîmyataw.

Mîn hak pokono n̂ewehcatken̂e,

pore mak akir̂wamacho kom ha.

Ero yipu poko thakwa makî ka xatken̂e kakir̂wamatopo mera ka exitaw.

Ero wa tî ka xatken̂e.

11 Ero yinhîrî tak Kristu tak mokye hara,

Kaan yaka cewomsom me xa tak.

Kaan ya kwakrecho komo yenpon̂e me marha mokyakn̂e.

Kaan mîn yaka takî tî n̂ewomyakn̂e anarî yaka,

porinî ro yaka.

Kir̂wanî ro mîn,

tooto yamorî ke cirihnî,

roowo pono pîn ha.

Ero yaka n̂ewomyakn̂e Kristu.

12 Kaan yekenî ro yaka xa tî Noro n̂ewomyakn̂e eroromerono me.

Iina cewomyataw boce kamxukutho yarîhra tî xakn̂e.

Paaka xîkîtho kamxukutho yarîhra marha tî xakn̂e.

Tkamxukuthîrî rma xa matko naar̂akn̂e iina Kaan yaka.

Ero yipu pona kepemetken̂e so kowtome so tak.

Eroromerono me kowyatken̂e so.

13 On wara xatken̂e pahxan pen komo reha,

bui kamxukutho ke mak kicicme ehxapu carametken̂e,

boce kamxukutho ke amarimaw.

Anarimaw paaka pun nakn̂iyatken̂e woosî pun.

Noro yipu wemronho sararametken̂e mîn hak pore.

Ero wa kicicme ehxapunhîrî komo nakir̂wametken̂e ha re yupun komo mak ha tko.

14 Miya xe xa tko kakir̂wametîkexe so tak Kristu kamxukutho reha.

Kaan ya tak Noro n̂etîmyakn̂e twaihkaxmu me.

Kicicme exihnî Mîk xakn̂e.

Noro yipu rma n̂etîmyakn̂e yîwya Kaan yekatî yanme,

ehcamnopînî ro yanme ha.

Noro nakir̂wamatho me kexirî ke so tak,

Kicicitho rma tko na ow,

kahra tak taxe.

Pahxa ero pîntho poko roro mîxatken̂e awakir̂wamacho komo yîhtînorî ke tak awya so.

Ero yipu ponarora tak tasî.

Kaan ya xa matko tak cetantomapexe,

waipînî ro ya ha.

Ero wa taxe kropotarî korokan̂e me exirî ke Kristu.

15 Ero wa cexirî ke kakir̂wamacho yekatîmn̂e me xa nasî Kristu.

Twaihtopo ke kakir̂wamacho komo n̂ekatîmyasî.

Moises penî nmewretho pokono komo yakir̂wamacho marha n̂ekatîmyasî.

N̂examro yepeman̂e me meero waihyakn̂e,

kicicme cehtoponhîrî komo yewetîn̂e mera tak ehtome so.

Ero wara n̂examro yepemarî ke tak anarî ro tak Kaan n̂ekatîmyasî kîwya so,

Kwakrexe so amn̂e,

kacho tak.

Ehcamnopînî ro mîn ero wa yîmtapotachonhîrî.

Ero ke ero wa kacho yaw roro Kaan wakresî tînan̂ikîthîrî komo ahnoro.

16-17 On wara naxe cemyawnoyem komo,

waipîra ka cexitaw so cemyawno yahsîn̂e n̂etahcaxe.

Moso men oyemyawnonho tak nahsîyas amn̂e owaipuche,

kacho mewrexe karita yaka.

Ero ke mewren̂enhîrî waipuche tak emyawnonhîrî tak nahsîyasî noro pen n̂etacitho.

Waipîra ka exitaw osom ahsîra thakwa nasî yîn̂etacithîrî.

Noro tak waihye ha,

kacho yentache mak waixa pen yemyawnonho tak nahsîyasî.

18 Ero ke yihcithîrî yentache ka Moises pen ya,

okno kamxukutho ke caramano n̂iir̂akn̂e.

Moises pen.

Caramarî ke mak tak Kaanî mtapotarî n̂ecir̂akn̂e yîn̂ewetîrî komo me.

19 On wara tî xakn̂e Moises pen,

Ixaw Yana komo panatanmetopo n̂ekatîmtîkekn̂e yîwya so.

Ekatîmtîkache tak paaka xîkîtho kamxukekn̂e tutum yaka,

boce marha kamxukekn̂e.

Tuuna ke tak nîhsekn̂e.

Oper̂a pocitho marha nahsîyakn̂e yucurexapu,

isopu yarî marha.

Ero yipu ke tak karita caramekn̂e kamxuku ke,

Kaanî mtapotarî mewrexapu ha.

Tpoyino komo marha caramekn̂e ahnoro.

20 On wara tî kekn̂e Moises pen caramano rirî me,

On men kookuthîrî komo kamxukutho Kaanî mtapotarî ponaro xa awehtopo komo.

On men ewetîcoko miya roro,

kachonho rma tan Kaan ya,

kekn̂e tî yîwya so.

21 Ero yinhîrî okno kamxukutho yakwenho ke rma Kaan mîn tak caramekn̂e hara Moises pen.

Kaan mîn yawno marha caramekn̂e.

22 Ero wa mîn hak mak nakir̂wametken̂e n̂examro pen ahnoro ha re.

Tpanatanmetopo yaw roro rma ahce na nakir̂wametken̂e kamxuku ke.

Ero wara rma nas oroto.

Kamxuku ke mak kicicme kehtoponhîrî komo n̂ehcamnoyasî ahnoro ha re.

Ehcamnopîra thakwa nasî kehtoponhîrî komo waihxapu pen kamxukutho tohra exitaw.

Ero wa mak nasî.

23 Ero wa nakir̂wametken̂e Kaan mîntho,

pahxanînhîrî ha.

Kah yawno kuknon makî tko tî mîn xakn̂e Kaan mîntho.

Iitono kuknon marha mîn xakn̂e ero yawno mko hara.

Ero ke okno kamxukutho ke kyam mak nakir̂wametken̂e ero yipu.

Pîra reha nasî kah yawno mko ha.

Kir̂wan ke xa mak n̂etakir̂wamesî ero yipu,

okno kamxukutho ken̂ehra tak ha.

24 On wara marha xakn̂e Kristu,

tooto n̂iritho yaka mak ewomra tî xakn̂e Noro reha.

Kaan mînî rma re mîn xakn̂e tooto n̂iritho Kaan mînî ro kuknon mak ha tko.

Kah yaka xa cekn̂e Kristu reha,

Kaan mîn ro yaka xa tak.

Iito tak nasî oroto Kaan mîtwo kukurunpen̂e komo me.

25 Roowo pono komo warahra reha nasî Kristu.

On wara xatken̂e Kaan yaka cewomsom komo Ixaw Yana kom ha,

emapona tî n̂ewomyatken̂e Kaan yekenî ro yaka,

yicimn̂ipuntaxera tî.

Iina tîcetaw so okno kamxukutho naar̂atken̂e roro.

Ero warahra xakn̂e Kristu reha kah yaka tîcetaw.

Emapona roro tkamxukuthîrî yarîhra tî xakn̂e Noro reha Kaan yaka.

26 Emapona tkamxukuthîrî yaan̂e me exitaw ketaw ha re emapona marha re n̂etwaikaporî okwe.

Mehxa ro n̂etwaikaporî roro ha re roowo yakîhtotoponho n̂ixa ro.

Cewn̂e ro makî tko mokyakn̂e Kristu etwaikaposo.

On wara rma kehtopo komo yenatîtopo pahnoke tak mokyakn̂e.

Twaihkaxmu me n̂etîmyakn̂e kicicme kehtoponhîrî komo yîhcamnotome.

Ero wa Kristu mokyakn̂e.

27 On warai me kiir̂atken̂e so Kaan tooto komo ahnoro,

cewn̂e ro mak twaihsom me kiir̂atken̂e so thakwa.

Ero yinhîrî ken̂ekacho me tak nasî.

Ero wa thakwa kiir̂atken̂e so tooto komo ahnoro.

28 Ero ke cewn̂e ro mak n̂etwaikapekn̂e Kristu hara mer̂pono pîn komo yehtoponho yîhcamnotome.

Mokyasî xa hara tko wa amn̂e.

Tpona tak kicicme kehtoponhîrî komo cirihra tak nasî ero yimaw.

Tmohtopo ponarono komo yakir̂wamatîkaxi xa matko mokyas ha.

Ero wa kiiso wa mokyasî.