Taa,

Kaan yaka cewomsom me Xesus yehtopo wekatmo.

Ero ke on wara tîtkexe Noro poko,

nasî xa tak Kaan yaka cewomsom.

Noro yakro tîmtapotaxmu me nasî kpoko so.

Ceremaxi nasî kah yaw,

Kaan panaw,

kaari n̂ixa.

Kayaritomo xa Mîkî Kaan,

yîtîhkarî xa,

Noro yipu panaw ceremaxi nasî,

tîtkexe.

2 Iito nasî Noro oroto Kaan mîn yenîrî poko.

Kaan mînî ro xa mîn yîn̂enîrî,

Kporin komo n̂iritho ha,

tooto n̂iritho pîn.

3 On wara naxe Kaan yaka cewomsom komo,

tooto komo nîmrî pokono me naxe,

tooto komo yehtoponho yahrutopo pokono me marha naxe.

Ero yipu pokono me naxe Kaan yaka cewomsom komo.

Ero ke tînîmrî xe marha xakn̂e Xesus hara.

4 Roowo pono me mak exitaw ketaw ha re,

Kaan yaka cewomsom me exihra re nasî Noro.

Naxe rma re roowo pono komo Kaan ya tîmsom pokono ro komo.

Moises pen nmewretho yaw rorono komo rma mîkyam.

5 Kaan mîn yawno pokono komo rma re mîkyam kah yawno kuknon pokono mak ha tko.

Ero wa xakn̂e Kaan mîn yin̂irithîrî komo,

kah yawno kuknon me mak xakn̂e.

Moises pen ya Kaan n̂irpekn̂e.

Ero wara cirpetaw on wara tî kekn̂e Kaan yîwya,

Omîn kuknon wenpoi awya îh po awexitaw,

ero yaw roro men cirko ahnoro mak,

anarme cirihra ro mak esko,

kekn̂e tî Kaan yîwya.

Ero ke ero yaw roro rma tî n̂iir̂akn̂e noro pen.

6 Ero ke yin̂irithîrî yaw tak Repi yepamtho komo xatken̂e tîmsom pokono me,

Kaan yaka cewomsom me marha.

Xesus reha nasî Kaan yaka cewomsom me xa tak okre.

Kaan ya kwakrecho yekatîmn̂e me marha re xatken̂e Repi yepamtho komo.

Xesus n̂ekatîmrî reha nasî kir̂wan̂he xa tak pahxa ekatîmxapu yopo.

7 Ehn̂ara kehtopo me exitaw ketaw ha re pahxa ekatîmxapu anarî ro tak ekatîmra n̂exirî ha re kehn̂acho pîn tak hara.

8 Kicicme naxe okwe,

kekn̂e tko Kaan Ixaw Yana komo poko.

Ero ke on wara kekn̂e yîwya so,

Aporin komo Ow ha.

Ero ke on wara wîîkes awya so,

amn̂e tak anarî ro wekatîmyas hara awya so awakrecho kom ha.

Ixaw Yana komo ya wekatîmyasî,

Xuta yepamtho komo ya marha.

9 Pahxa wekatîmyakn̂e aporin pen komo ya n̂examro pen wakrechonho cma ha re.

Exitu poi aano riyataw owya wekatîmyakn̂e.

Aporî komo poko ahsîyatawno wara n̂examro waar̂akn̂e ero yimaw.

Omtapotarî yewetîra tko xatken̂e okwe.

Ero ke n̂examro pen ponarono pîn wara tak wîxakn̂e,

kesî Kporin komo.

10 On wara marha kesî Noro,

Pahkî n̂he exiche tak on wara wîîkes hara Ixaw Yana komo ya wakrecho komo poko,

Amn̂e tak owya tpanatanmetopo komo ponarono me xa tak wiir̂asî.

Yîropotaka so rma omtapotarî mewresî.

Ponaro n̂examro yehtopo me tak wasî ero yimaw.

Oyanan me marha tak naxe.

11 Tîmîtwono komo panatanmekîra tak naxe ero yimaw,

takno komo panatanmekîra marha naxe.

Kporin komo ponaro tak ehcoko,

kahra naxe yîwya so.

Oponarono me rma naxe ero yimaw ahnoro mak.

Cemyawnoyem komo ero wa naxe,

emyawnomnî komo marha.

12 Yîpînîn yaw so rma wasî,

kicicme ehxapu komo pînîn yaw rma.

Wîhcamnoyasî mak tak kicicme ehtoponhîrî komo,

oyanwetoponho marha yîwya so,

kekn̂e marha tî Kaan yîwya so.

Ero wa tî kekn̂e Kaan Ixaw Yana komo ya.

13 Ero wa anarmen tak Kaan n̂ekatîmyakn̂e kwakrecho kom hara.

Ero ke ero yipu ponaro mak tak taxe.

Ponaro kehtopo mera tak nasî pahxa ekatîmxapu reha.

N̂ehcamnoyasî thakwa mak ero wa kachonho reha pahxantho me exirî ke.

Ero wa nasî pahxa ekatîmxapu.