On warai mîk xakn̂e Mewkiseteke,

Saren pono komo kayaritomon tî mîk xakn̂e.

Kaan yaka cewomsom marha tî mîk xakn̂e Noro.

Yîtîhkathîrî xa Mîkî Kaan,

Noro yipu yaka rma cewomsom me xakn̂e noro,

Mewkiseteke.

Noro yipu tî Abraaw pen n̂epor̂akn̂e esama yaw.

Abraaw tî mokyakn̂e hara kayaritomo pen komo yar̂man̂enho.

Ceseporîche so takî tî Abraaw wakrepekn̂e Kaan ya.

Ero wa tî xakn̂e Mewkiseteke Abraaw poko.

2 Ero yimaw tînar̂mathîrî pen komo yemyawnonho poi tak ti cisimu wicakî nîmyakn̂e Mewkiseteke ya.

On wara kacho tî mîn,

Mewkiseteke,

kacho,

Kir̂wanî ro mîk kayaritomo,

kacho tî.

Taa,

on wara kacho tî mîn hara,

Sarem pono kayaritomon mîk ha kayaritomo,

kacho,

eserepokan me kiin̂e mîk ha kayaritomo,

kacho takî.

Ero wa kacho tî mîn Noro yosotî.

3 Yîmîhnî tî Mîk xakn̂e,

yînocwamnî marha.

Porimnî ro marha tî Mîk xakn̂e.

Ewrunu ro Mîk xakn̂e,

waipînî ro marha tî.

Kaan yaka cewomsom me nasî miya roro etowîn me,

Kaan Mumuru wa xa marha.

4 Kyopono rma Mîk xakn̂e Mewkiseteke.

Enko xe,

cisimu wicakî nîmyakn̂e yîwya kporin pen,

Abraaw pen ha.

Tînarmathîrî komo yemyawnonho poi rma tak ero yipu nimyakn̂e Noro ya.

5 Ero wa xa marha naxe Repi yepamtho kom hara oroto,

Kaan ya tîmsom pokono me naxe,

Kaan yaka cewomsom me ciisom me marha naxe.

Cisimu tahsîpore nasî tooto komo n̂ekîtho poi,

kesî Moises penî mtapotachonho noro yipu komo poko.

Akno komo rma mîkyam tîmsom yekn̂e,

noro yipu komo n̂ekitho poi rma nahsîyatken̂e.

Abraaw yepamtho me xa marha naxe,

wara rma cisimu tahsîpore nasî yîn̂ekîthîrî komo poi,

kesi.

6 Anarî ro reha tî mîk xakn̂e Mewkiseteke reha,

Repi yepamtho pînî reha.

Noro yipu rma cisimu nahsîyakn̂e Abraaw pen nîmîtho.

Ero yimaw marha Abraaw wakrepekn̂e Kaan ya.

Kaanî mtapotarî yentan̂enho rma mîk xakn̂e Abraaw,

Kwakresî xa amn̂e,

kacho yentan̂enho ha.

Noro yipu rma wakrepekn̂e Kaan ya.

Ero wa xakn̂e Mewkiseteke.

7 Ero ke,

Abraaw pen yopono me xakn̂e ham Mewkiseteke,

tîtkexe.

Kwakrepora thakwa reha naxe kîxawyakan komo reha,

ero ke ero wa tîtkexe.

8 Twaihsom me mak naxe Repi yepamtho komo reha,

cisimu yahsîn̂e komo rma.

Waipînî ro reha tî mîk Mewkiseteke reha,

cisimu yahsîn̂e hara.

9-10 On wara marha xakn̂e Repi pen,

n̂examro porin pen ha,

Mewkiseteke ya cisimu tîmn̂e wara rma xakn̂e noro hara.

Pahxa Abraaw pen yakro esepor̂ataw Mewkiseteke Repi xakn̂e tporin pun yaw rma ka,

Abraaw pun yaw ha.

Ero ke Mewkiseteke ya tîmn̂e wara rma xakn̂e tporin pun yaw rma cexirî ke.

Cisimu yahsîn̂e me rma re xakn̂e Repi pen.

Noro yipu rma tko cisimu nîmyakn̂e hara Mewkiseteke ya hara.

Ero wa tî xakn̂e Repi pen.

11 On wara wîîkesî Repi yepamtho komo poko,

kpanatanmetopo rma re n̂ekatîmyakn̂e Kaan n̂examro exitaw tîmsom pokono me.

Ero ke ahce kacho anarî n̂etahcakn̂e hara Kaan tîhyaka cewomsom me?

mîîket ha na.

Akir̂wamano rin̂e me exihra rma thakwa xatken̂e Repi yepamtho komo.

Ero ke Mewkiseteke retawno n̂etahcakn̂e hara,

Araw yepamtho pîn tak ha.

Noro yipu tak n̂etahcakn̂e Kaan tîhyaka cewomsom me.

12 Ero ke Noro yipu yetacirî ke Kaan yaka cewomsom me,

on wara marha tîtkesî,

towso tak nai ham Moises nmewretho Kaan yaka cewomsom pokono.

Anarmen tak nai ham kpanatanmetopo hara ero pokono.

13-14 Anarî ro poko rma kesî Kaan Karitan,

Mewkiseteke retawno,

kacho ha.

Kporin komo poko rma ero wa kesî.

Anarî yepamtho makî Mîk xakn̂e,

Repi yepamtho pîn ha.

Xuta yepamtho reha Mîk xakn̂e.

Noro yipu komo reha exihra ro makî tî xatken̂e Kaan yaka cewomsom me.

Ero pokono me naxe amn̂e,

kahra ro mak wa xakn̂e Moises pen Xuta yepamtho komo poko.

Noro yipu rma tko Kaan n̂iir̂akn̂e tîhyaka cewomsom me,

Xuta yepamtho rma.

15-16 Yaaro mîîke ham,

kapore xa tak nasî anarî ro yesenporî ke Kaan yaka cewomsom me,

Mewkiseteke retawno me cehsom yesenporî ke ha.

Repi yepamtho komo mak naxe Kaan yaka cewomsom me,

kachonho yanmera ro mak tak nasî Noro reha ero pokono me.

Waipînî ro me cexirî ke xa matko ero poko nasî.

17 On wara kesî Kaan Karitan ero poko,

Ohyaka cewomsom me tak kiir̂asî miya roro etowîn me ro mak.

Mewkiseteke retawno me kiir̂asî ero pokono me,

kesî.

18 Kar̂pen wara thakwa xakn̂e Moises penî nmewretho kakir̂waman̂e pîn me mak.

Ero ke towso tak nasî yîmtapotachonhîrî ero pokono ha.

19 Akir̂wamano cirihra ro mak xakn̂e Moises pen nmewretho.

Ero ke anarî ro tak Kaan n̂entamexpekn̂e kakir̂wamacho xa tak okre.

Kaan yaka roro kaan̂e tak mîn okre.

20-21 On wara Kaan nîmtapowakn̂e Repi komo ciir̂ataw tîhyaka cewomsom me,

pataw makî tî nîmtapowakn̂e,

yaaro tîmtapotarî yentamexpotopo tî etacira xakn̂e.

Ero warahra tak nîmtapowakn̂e Xesus ciir̂ataw tîhyaka cewomsom me hara.

On wara reha tî Kaan kekn̂e yîwya,

Aporin Ow ha.

Yaaro xa tan wîîkesî cemarontan me ro mak.

Ohyaka cewomsom me tak kiir̂asî,

wîîkesî.

Anarme kahra ro mak was amn̂e ero poko.

Ero wa masî miya roro towhnî me ro mak,

wîîkesî,

kekn̂e.

22 Ero wa karî ke,

Yaaro ham,

Xesus pona mak tak cenpore nai kakir̂wamatîkan̂e komo pona xa tak.

Moises pen n̂etacitho komo yopono ro Mîk ham,

tîtkexe.

23 On wara reha tî xatken̂e Kaan yaka cewomsom pen komo,

yaake tî xatken̂e.

Eroromero ero pokono me exihra thakwa xatken̂e twaihîrî komo ke okwe.

24 Xesusu reha nasî waipîn me ro mak.

Ero ke miya roro tak nasî Kaan yaka cewomsom me.

Etowînî ro me nas okre.

25 Ero ke on wara tak nai Noro Kaan yaka tmoku xatî komo poko,

tpona enîn̂e me exitaw so noro yipu komo nakir̂wametîkesî miya rorono me okre.

Ero wa nasî waipînî ro me cexirî ke.

Ero ke marha miya roro tîmtapotaxmu me tak nasî Kaan yakro kpoko so.

26 Ero pokono Mîk Xesus.

Kaan yaka cewomsom Mîk ha,

kakronoman̂e xa tak okre.

Kaan ponarono mak Mîk ha.

Kicicme exihnî ro marha Mîkî,

kicicitho ken̂arî pîn marha,

kicicitho komo yakrono pîn marha.

Kah yawno komo yopono me ciixapu marha Mîk ha.

Noro yipu Mîk ha Xesus.

27 Repi yepamtho komo warahra reha nasî Xesus.

Kaan yaka cewomsom me rma re xatken̂e n̂examro.

Enmar̂atîxera tîmsom nakn̂iyatken̂e kicicme cehtoponhîrî komo yahrutopo me.

Ero yipu yakn̂ipuche tak tooto komo yehtoponho yahrutopo tak nakn̂iyatken̂e hara.

Enmar̂atîxera Ero yipu nakn̂iyatken̂e.

Ero warahra xakn̂e Xesus reha.

Cewn̂e ro mak n̂etîmyakn̂e Noro reha.

N̂etwaikapekn̂e rma ahnoro tooto komo yehtoponho yepetho me xa tak.

28 Kar̂pen komo makî reha ka xatken̂e Kaan yaka cewomsom me ciiso Moises pen nmewretho yanme.

Moises penî nmewretho mahyaw takî tko Kaan nîmtapowakn̂e xa hara.

Yaaro tîmtapotarî yentamexpotopo n̂etahcakn̂e ero yimaw.

Ero wa tîmtaporî ke Tumumuru rma tak n̂iir̂akn̂e tîhyaka cewomsom me hara.

Ero ke miya roro tak nasî Xesus Kaan yaka cewomsom me roro.

Kir̂wanî ro me nasî Noro miya rorono me okre.

Ero wa nasî Noro.