Kicicme Xa Naxe Kaanî Mtapotarî Yahsîpînkan̂e Komo
6
Taa,
on wara wîîkes hara awya so,
pahxa ka cencetken̂e Kristu poko kpanatanmetopo.
Yihcitopo mak mîn cencetken̂e.
Ero ponaro mak kexitaw so mîîmo mapatan ciin̂e wa mak taxe.
Mîîmo mapatan ciriche kîwya so ero yipu xa hara cirihra tasî.
Mapata warai rma mîn yihcirî me kn̂entathîrî komo,
ero ke ero yipu xa hara cirihra cehcerî.
On wara kacho mîn kn̂entathîrî komo,
Ero pîntho poko awehtoponhîrî ahsîpînkacoko akariton̂e pîn me exirî ke,
kacho.
Kaan pona xa cenpore nasî,
kacho marha cencetken̂e.
2 Cemicpore nasî,
kacho marha,
tooto meretîyahsîcoko kacho marha.
Tîtpakexe hara amn̂e waixapu komo chewnonho,
kacho marha,
Wehto imo ywaw naxe amn̂e eroromero anarî komo okwe,
kacho marha.
Ero wa kacho ka cencetken̂e.
Ero ke yuhnarino poko n̂he xa tak cehcamhokacerî Kaanî mtapotarî poko.
3 Ehn̂ara rma cehcamhokexe miyan poko rma kîhcamhoketaw Kaan ya.
Ero wa taxe.
4 Taa,
on wara naxe anarî komo okwe,
Xesus ya kakir̂wamacho ka n̂encexe.
Kaan ya n̂etakir̂wamapexe rma ha re,
nukukmexe kyam mak ero wa cehtopo.
Kir̂wanî ro Yekatî mtapotarî marha n̂encexe ha re.
5 Tpoxwe marha ka n̂encexe Kaanî mtapotarî.
Amn̂e tak karitî me xa Kaan n̂esenpesî amn̂e,
kayaritomo ro me xa,
kacho marha tpoxwe n̂encexe.
6 Ero wa ehxapunhîrî tko on wara tak naxe anarî komo okwe,
Kaanî mtapotarî tak poxunkexe hara okwe.
Ero wara exitaw so kicicme cehtoponhîrî komo poxunkara thakwa naxe xa hara okwe.
Kaan Mumuru yamowon̂e wara xa hara naxe okwe.
Noro yîwîrîyakan̂e me marha tak naxe tooto komo n̂entarî me rma okwe.
Ero wa naxe okwe.
7 On wara nasî roowo.
Anarî nai ewtî mexan me.
Ero yipu pona tak mokyasî tuuna emapona.
Ero wa mokyataw n̂eer̂asî roro tak roowo cukmape exirî ke.
Ero yipu pono tak n̂eperwas okre naatî ciin̂enhîrî nahrî me.
Ero yipu tak poxuretîkesî Kaan,
naatî yewtî me xa tak ehtome.
8 Anarî nasî roowo hara,
cekyekyem yewtî hara kica.
Ero ke ero yipu tak na nîwîrîmetîke Kaan.
Takn̂isom me mak nas amn̂e peen,
yiipononhîrî.
Ero wa nasî roowo.
9 Anarî komo poko mak ero wa amna kesî,
oyakno komo.
Ero warahra reha awen̂axe so amna,
poxumnîtho warahra.
Kaan nakir̂wamatho me reha awen̂axe so amna.
Cepetaxmu wara reha maxe awakir̂wamarî komo ke yiwya.
10 Kaan xîkrî komo yakronoman̂enho amyamro.
Makronomexe rma oroto.
Ero wa tpoxwe tak Noro yosotî menpexe tooto komo ya okre.
Kaan xe awexirî ke so mak ero wa maxe.
Kir̂wan̂he awehtopo komo yenîn̂e pîn me exihra nasî Kaan.
Ero ke awekaritotopo komo poko yîtwen̂ekarîntara nasî Noro.
11 Ero wara roro awexi xe so nas amna miya roro awaitopo komo pona roro.
Ero wara roro awexitaw so,
Yaaro rma Kaan xîkrî xa ow ham,
mîîkexe miya roro.
12 Yuwun̂ura ro mak awexi xe so nas amna.
Kaan pona enîn̂e komo me xa naxe anarî komo.
N̂examro wara xa marha awexi xe so nas amna.
Pahkî ro mak noro yipu komo n̂een̂axe Kaan pona,
yînîmrî yahsîtome takî,
Ero yipu wîmyasî amn̂e awya so,
kachonho ha.
Ero ke ero wa xa marha awexi xe so nas amna.
Yaaro Xa Kekn̂e Kaan Kwakrecho Komo Yekatîmyataw
13-14 On wara tî kekn̂e Kaan Abraaw pen ya,
Kakronomesî amn̂e Abraaw,
awepamrî komo wepamnoyasî ro mak,
kekn̂e tî yîwya.
Yaarono me xa tîmtapotarî yentamexpo xe xakn̂e Abraaw ya.
Iyopono exihra tko xakn̂e cetacisom,
ero ke kyopono ro me cehtopo rma n̂etahcakn̂e yaaro xa tîmtapotarî yentacho me.
Ero wa xakn̂e Kaan.
15 Ero wa kacho yentache Abraaw pen ya pahkî ro makî tî tumumuru yewrutopo momokyakn̂e.
Pahkî exiche tak yîmxîkrî ciki tak n̂ewruyakn̂e Kaanî mtapotarî yaw roro rma.
Ero wa tî xakn̂e Abraaw pen.
16 On wara naxe tooto komo,
ahce na yekatîmyataw tîyopono tak n̂etahcaxe yaaro xa tîmtapotarî komo yentamexpotome.
Noro yipu yetaciche anwekîra tak naxe entan̂e komo.
Ero wa ham,
kexe mak tak.
17 Ero ke ero wara rma tîmtapotarî n̂entamexpekn̂e Kaan kîwya so hara,
Kwakrexe so amn̂e,
kacho.
Cemarontan me ro mak ero wa kekn̂e.
Kyopono ro me cehtopo n̂etahcakn̂e marha yaarono me xa ero wa kacho yentamexpotome.
18 Ero ke asakî nasî yaarono me tîmtapotarî yentamexpotopo Kaan ya.
Kahworetome so ero wa tîmtapotarî n̂entamexpekn̂e.
Kicicitho yai emahcixapu warai kîwyam Noro yaka.
Kwakrexe so amn̂e,
kacho ponarono marha kîwyam.
Cemarontan me exirî ke Noro,
Yaaro ham,
ero wara rma kiir̂atu so ham Kaan amn̂e okre,
tîtkexe tahwore xa.
19 Ero ke Kaan ya kwakrecho komo ponaro xa taxe,
ahwokara ro mak.
Apohana,
kwakretu so ha na Kaan,
kacho mera ro mak nasî.
Kemîknotopo pînî ro mak mîn Kaanî mtapotarî.
Ero wa kacho ponaro kexirî ke so Kaan yaka roro cewomsom me taxe.
Noro yahruru mkai tîhcexe yîhyaka xa tak.
20 Xesus ka cekn̂e iina kîywapu so kpoko so tîmtapotachome Kaan yakro.
Noro yaka cewomsom me rma nasî Xesus oroto.
Miya roro mak nasî ero warai me roro.
Mewkiseteke wa xa marha nasî.
Noro yipu Mîk Xesus.