On Wara Naxe Kaan Yaka Cewomsom Komo
5
On wara wîîkes hara awya so Kaan yaka cewomsom komo poko,
tooto rma mîkyam Kaan yaka cewomsom komo.
Noro yipu komo rma Kaan n̂iir̂asî tooto komo mtapotarî mahriman̂e me tîn̂entarî ha.
Tîmsom pokono me marha n̂iir̂asî,
kicicme kehtopo komo yahrutopo yakn̂in̂e me marha.
Ero yipu pokono me tooto komo n̂iir̂asî Kaan.
2 On wara marha natu Kaan yaka cewomsom komo,
camkîno komo pînîn yaw meero natu,
tacixapu warai komo pînîn yaw marha.
Ero warai komo pînîn yaw natu kar̂pen kaxi xa marha thakwa.
3 Kicicme tooto komo yehtoponho yahrutopo rma nîmyaxe.
Kicicme cehtopo komo yahrutopo meero nîmyaxe.
4 On wara marha naxe Kaan yaka cewomsom komo,
Ero pokono me ecirira thakwa naxe tanme ro so mak,
tpoyino komo yopono me ecirira.
Kaan xa men̂ekesî ero yipu pokono me ciisom komo.
Ero wa xakn̂e Araw.
Kaan nmen̂ekatho mîk xakn̂e tanme ro mak ecirira xakn̂e.
Mewkiseteke Retawno Me Nasî Kristu
5 Ero ke Kristu meero tanme ro mak ecirira xakn̂e ero yipu me.
Kaan yaka cewomsom me kecir̂asî kir̂wanî ro me oyexirî ke,
kahra tî xakn̂e.
Kaan xa matko kekn̂e yîwya,
Omumuru xa Amoro.
Oroto tak ero warai me kirî ha,
kekn̂e.
6 On wara marha Kaan kekn̂e yîwya,
Ohyaka cewomsom me masî miya roro etowîn me ro mak.
Mewkiseteke retawno me masî ero pokono me,
kekn̂e yîwya.
Ero wa Kaan kekn̂e Xesus ya.
7 On wara tî xakn̂e Xesus tupunthîrî yaw ka cexitaw,
Kaan yakro tî nîmtapowakn̂e.
On wara tî kekn̂e,
Apa,
waipîra cma re Ow miir̂asî,
kekn̂e tî Kaan ya.
Cerewre ro makî tî kekn̂e,
nîwracekn̂e marha.
Ero wa yîmtapowataw Kaan n̂encekn̂e,
Noro ponarono me xa exirî ke.
8 Kaan Mumuru rma Mîk Xesus.
Noro yipu rma cemetanmetopo nînîmyakn̂e.
Ero yipu yînîmrî ke Kaan yewetîtopo tak nîhtînoyakn̂e.
9 Kaan yewetîtopo ponaro xa tak n̂ehtîkekn̂e.
Ero ke tak cewetîn̂e komo yakir̂waman̂e me xakn̂e hara.
Eromerono me kakir̂wamexe so okre.
10 Noro yipu Kaan n̂iir̂akn̂e tîhyaka cewomsom me.
Mewkiseteke retawno me ero warai me n̂iir̂akn̂e.
Ero warai me Kristu n̂iir̂akn̂e Kaan.
Kaanî Mtapotarî Tîhtînotîkacerî N̂he
11 Taa,
miya rma nas amna n̂ekatîmrî Mewkiseteke yehtoponho.
Ekatîmtîkara mak nas amna awya so ke so panahnî me n̂he awexirî ke so Kaanî mtapotarî poko okwe.
12 Pahxa Kaanî mtapotarî yentan̂enho cma re amyamro.
Panatanmekno rin̂e me takî re mehcerî oroto.
Ero warahra tko maxe okwe.
Tpanatanmesom me mak maxe xa hara okwe.
Pahxa ka mencetken̂e Kaanî mtapotarî yihcirî me centaxmu,
ero poko tpanatanmesom me xa hara maxe.
Moomo pokono wa mak mat ham ke.
Wooto yonon̂e pîn wara ka maxe okwe.
13 On wara naxe moomo pokono me cehsom,
rikomo me cik mak naxe okwe.
Ero ke Kaanî mtapotarî yentan̂e pîn me thakwa naxe.
Kir̂wan̂he kehtopo komo pokono mîn Kaanî mtapotarî.
Camkî mak naxe ero yipu poko.
14 Etîtîkaxapu me kexitaw reha wooto yonon̂e me tak tasî.
Kicicitho mîn kica,
kir̂wanî reha mîn hara,
kacho poko takîhyasî ponaro ro kexirî ke so.
Ero wa tasî.