Ero ke on wara wîîkes awya so,

Kaan nîmtapowasî rma re cepokaretopo pona kaatopo komo poko.

Ero ke twerî men ehcoko poropîra awehtome so,

iina roro awtotome so.

2 Kaan ya kakir̂wamacho komo cencexe kîwyam n̂examro pen wa xa marha.

Kaanî mtapotarî rma re n̂encetken̂e,

Iina roro kaar̂axe so,

kacho.

Porohyatken̂e tko tîn̂entathîrî komo yanwekrî ke okwe.

Ero wa Kaanî mtapotarî nanwekyatken̂e n̂examro pen.

3 On wara reha taxe yîmtapotarî yanwekn̂e pîn komo,

Kaan yakro cepokarexe okre.

On wara mak kekn̂e Kaan tporohsom komo poko,

On wara wîîkai n̂examro poko,

Yaaro xa tan wîîkesî cemarontan me,

oyepokaretopo pona mokuhra men naxe okwe,

wîîkai.

Orwon me ero wa wîîkai,

kekn̂e.

Ero wa Kaan nîmtapowakn̂e n̂examro pen yepokaretopo poko.

Pahxa rma n̂epokarekn̂e Noro roowo yakîhtotîkache.

Wara rma n̂examro pen yepokaretopo poko tak nîmtapowakn̂e hara.

4 Ero poko rma kesî Kaan Karitan on wara,

7-înhîrî kaamo po tak Kaan n̂epokarekn̂e.

Ero po n̂epokarekn̂e mer̂pono pîn yakîhton̂enho,

kesî.

Ero wa kacho Kaan mewrepekn̂e.

5 Ero wa kacho yakro marha on wara kacho mewrepekn̂e hara,

Oyepokaretopo pona mokuhra ro mak men naxe okwe,

nîîke.

Ero wa Kaan nîmtapowakn̂e kepokaretopo komo poko.

6 Ero ke on wara tîhtînopore nasî,

kepokaretopo pona cexe anarî komo mak.

Pahxan pen komo ya rma re kekn̂e Kaan,

Iina roro kaar̂axe so,

kekn̂e yîwya so.

Iina roro tko epatakara xatken̂e n̂examro pen Kaanî mtapotarî yanwekrî ke thakwa okwe.

7 Ero ke ero yinhîrî anarî tak Kaan nukuknomekn̂e hara kepokaretopo kom hara.

Pahkî exiche mak ero yipu nukuknomekn̂e.

Tapi pen ya tî mewrepekn̂e,

On wara kacho tî mewrepekn̂e yîwya ero yimawno poko,

Oroto Kaanî mtapotarî yencetaw awya so ceipuru wara aropotarî komo cirihra ehcoko,

kacho mewrepekn̂e.

Ero wa Kaan n̂etahcakn̂e anarî kepokaretopo kom hara.

8 Ahce wa tko xakn̂e Xoswe hara?

Tmaywen komo yepokaretopo yenpora rma xakn̂e ham noro.

Enpetaw ketaw ha re anarî etacira n̂exirî kepokaretopo komo xa hara.

9 Ero ke kepokaretopo komo rma nai ham Kaan yanan komo yepokaretopo ha.

10 On wara taxe Kaan yepokaretopo pona kepetakache so,

ahce na poko ekaritora tak taxe.

Ekaritora tak xakn̂e Kaan,

nîtîhkekn̂e mak.

Ero wa xa marha taxe kîwyam hara.

11 Ero ke Kaan yepokaretopo pona awepatakacho komo ponaro xa men ehcoko ehn̂ara ro mak.

Anarimaw na Kaanî mtapotarî manwekyatu kporin pen komo wara rma.

Ero wa awexitaw so epatakara rma maxe n̂examro pen wara rma hara okwe.

12 On warai xa mîn Kaanî mtapotarî,

waipînî ro xa mîn,

karitî marha mîn.

Kacipara warai marha mîn.

Tîyoke rma re nasî kacipara ececokan ha.

Tîyoke xa tko nasî Kaanî mtapotarî ero yopo.

Kropotaka roro kparaxkan̂e mîn ha.

Xehxan wara n̂iir̂asî kesehtînotopo komo.

Mehxan wara n̂iir̂asî kekatî kom hara.

Kyochîrî yaka roro kparaxkan̂e wara marha nasî.

Xehxa kyochîrî yetahsîtopo ciin̂e wara nasî.

Mehxa tak yarîthîrî ciin̂e wara nas hara.

On warai marha mîn Kaanî mtapotarî,

Ero poko cesehtînosom amoro ha,

kan̂e mîn Kaanî mtapotarî kîwya so.

On yipu xatî xa amoro ha,

kan̂e warai marha mîn kîwya so.

Ero wa kan̂e mîn Kaanî mtapotarî kîwya so.

13 Noro n̂enîhtorî me eyamxapu exihra ro mak nasî Kaan ya.

Kir̂wantaw mak nasî ahnoro yîwya.

Kenîn̂e ro xa Mîk Kaan.

Noro yipu ya rma cesekatîmyaxe amn̂e kopi.

Ero wa nasî Noro.

14 Taa,

Xesus poko tak kîmtapowas hara.

Pahxa Kaan yaka cewomsom komo xatken̂e.

N̂examro pen warai Mîk Xesus,

n̂examro pen yopono ro makî tko.

Kaapu mko wacekn̂e Noro Kaan yaka roro xa cewomtome.

Kaan mumuru xa mîk Xesus.

Noro pona enîn̂e me cesekatîmyatken̂e.

Ero ke Noro ponaro rma cehcerî etowra ro mak.

15 Ero warai xa Mîkî Xesus,

Kaan yaka cewomsom ha.

Ero ke kpoko so nîmtapowasî Noro yakro.

Kîpînîn yawra katî nai Noro?

Kîpînîn yawno xa matko Mîk ha.

Ahce na poko cehn̂axmu me kexitaw so kîpînîn yaw so xa nasî.

Anarimaw kicicitho poko kukukmexe so Satanas.

Ero wa xa marha Xesus nukukmekn̂e hara.

Miyan poko rma n̂etkukmapekn̂e Noro kukukmacho komo warai ke so rma.

Kicicme exihra rma tko xakn̂e.

Ero wa xakn̂e Xesus.

16 Ero ke Kaan yakro tîmtapotacerî erasîra ro mak.

Kayaritomo Mîkî Kaan,

ero ke taponî ro po ceremaxi nasî kah yaw.

Kwakren̂e komo rma tko Mîk Noro.

Ero ke yîhyaka roro tîtosom wara cehcerî akro kîmtapotachome so.

Kîpînîn yaw nasî Noro,

ero ke kakronomexe so okre ahce na poko kîmtapowataw so.

Ero ke ero wa cehcerî.