On wara marha wîîkes awya so oyakno komo,

Kaan nakir̂wamatho komo amyamro.

Kah yawno me awitome so amen̂eketken̂e so Noro.

Ero ke Xesus poko rma kîmtapowasî awakro so.

On warai Mîkî Kristu Xesus.

Kaan nantomatho Mîkî.

Tîhyaka cewomsom me ciixapu marha Mîk ha.

Noro pona enîn̂e ow ha,

kan̂e komo kîwyam Noro poko.

2 Moises pen wara rma re xakn̂e Xesus.

Kaanî mtapotarî n̂ewehcakn̂e roro Moises pen Kaan yanan komo panatanmetopo poko.

Ero wa xa marha cen̂epen̂enhîrî mtapotarî n̂ewehcakn̂e roro Xesus hara.

3 Takîhsom me cekaiporesom Mîk Xesus Moises yopo.

Mîîmo exitaw kir̂wan,

ceserepokesî rma re ero poko.

Ciin̂enhîrî poko xa tko ceserepoketîkexe.

Ero ke Xesus poko ceserepoketîkexe Moises yopo.

4 Tanme ro mak ecirira ro mak nasî mîîmo.

Ciin̂e mak n̂iir̂asî.

Ero wa xa marha nasî ahce na komo ahnoro,

tanme ro mak etakîtora xakn̂e.

Kaan xa Mîk miyan komo yakîhton̂enho rma.

5 Kaan yanton me xakn̂e Moises pen Ixaw Yana komo panatanmekrî poko.

Yuwun̂ura ro mak xakn̂e ero poko.

On wara tak ciino wiir̂asî,

kesî Kaan amn̂e,

kacho poko n̂examro panatanmekyakn̂e.

Ero wa Kaan yanton me xakn̂e Moises pen.

Ixaw Yana komo yenîn̂e me xakn̂e Kaan mîn yenîn̂e wara rma.

6 Kaan mumuru reha Mîkî Kristu.

Noro yipu tak nasî tîmîn yenîn̂e me rma.

Noro mînî rma kîwyam,

Kristu n̂enîrî ha.

Ero warai me taxe Kaan pona enîn̂e me roro kexitaw so.

On wara marha cexpore nasî,

Kir̂wan̂he xa tak oritîkesî Kaan amn̂e,

kapore nasî.

Ero wa kacho poko tahwore roro cexpore nasî miya roro kwaihtopo komo pona roro.

Ero wa kexitaw so yîmîn me taxe.

Ero wa taxe.

7-8 Ero ke on wara kesî Kir̂wanî ro Yekatî kîwya so,

Oroto Kaanî mtapotarî yencetaw awya so anwekîra ro mak men ehcoko.

Aporin pen komo warahra tak ehcoko amyamro reha.

Oyanwekyatken̂e ro mak n̂examro pen okwe.

Axawa imo pore waar̂akn̂e yukukmachome owya oponaro ehtopo komo poko.

Ero yimaw oyanwekyatke okwe.

9 Okukmetken̂e kica orwonmetopo poko iito cexitaw so.

On wara ketken̂e,

Kakro so ma re nai Kaan?

ketken̂e kica.

Emapona roro wakronomekn̂e iito cexitaw so.

Ero wa oyehtopo n̂een̂atken̂e pahkî,

40 cimnipu wicakî.

Wara rma ero wa okukmetken̂e.

10 Ero ke n̂examro pen poko kîrwonakn̂e.

On wara tak wîîkekn̂e poko so,

Ooxatîmnokexe roro mak okwe.

Twen̂ekarî mak nat ham okwe ahce wa na oyehtopo poko,

wîîkekn̂e poko so.

11 Ero wa exirî komo poyero kîrwonakn̂e poko so.

On wara marha wîîkekn̂e n̂examro pen poko,

Yaaro tan wîîkesî cemarontan me ro mak,

Oyepokaretopo pona men mokuhra ro mak naxe okwe,

wîîkekn̂e.

Ero wa kesî Kir̂wanî ro Yekatî kîwya so.

12 Ero ke men kweronomexe so oyakno komo.

Kicicme na nai aropotarî komo anarimaw,

Kaan yewetîn̂e pîn me okwe.

Noro poko meponarononket ha na okwe.

Waipînî ro Mîk Kaan.

Ero ke Noro yipu ponaro ro men ehcoko.

13 On wara xa ehcoko,

apoyino komo ahworecoko Kaan poko.

Oroto rma ahworecoko enmamnopîra.

Kemîknon̂e mak mîn okwe kicicme kehtopo.

Kropotarî komo ceipamnon̂e mîn okwe ero poko kexitaw so.

14 Pahxa ka Kristu pona ceen̂atken̂e tahwore xa.

Oyakirwaman̂e Mîk ham Kristu okre,

tîtketken̂e Noro yahsîn̂enho rma ha ka.

Ero wara roro kexitaw so kwaihtopo pona roro Kristu rma nasî kecehton̂e me roro okre.

15 Entacoko xa yîmtapotarî on wara kacho,

Oroto Kaanî mtapotarî yencetaw awya so ceipuru wara aropotarî komo cirihra ro mak ehcoko.

Ero wa tîropotarî komo n̂iir̂atken̂e aporin pen komo pahxa.

Kaan yanwekyataw.

N̂examro pen warahra ehcoko amyamro reha,

kesî Kaan Yekatî kîwya so.

16 Onoke warainhîrî pen komo xa mîkyam xatken̂e Kaanî mtapotarî yanwekn̂enho pen komo,

tîn̂entathîrî yanwekn̂enho pen kom ha?

Moises narîtho komo rma re mîkyam xatken̂e anwekn̂e kom ha,

Exitu poi yînarîthîrî kom ha.

17 Onoke warainhîrî pen komo mîkyam xatken̂e Kaanî rwonmekn̂enho kom hara?

Pahkî nîrwonakn̂e poko so,

40 cimn̂ipu wicakî.

Onok warai komo mîkyam xatken̂e?

Kicicme ehxapu komo mîkyam xatken̂e kica.

Ero ke waihyatken̂e okwe n̂examro pen axawa imo po rma.

Noro yipu komo poko nîrwonakn̂e Kaan.

18 Onoke warai pen komo marha mîkyam Kaan nporohkatho komo?

Onok warai pen komo poko kekn̂e Noro on wara,

Oyepokaretopo pona mokuhnî me ro mak naxe okwe,

kekn̂e onoke warai komo poko ha?

Tanwekn̂enhîrî komo poko ero wa kekn̂e okwe.

19 Ero wa tî xatken̂e n̂examro pen okwe.

Kaan yepokaretopo pona tohra tî xatken̂e Kaan pona enîhra cexirî ke so mak okwe.

Ero wa tî xatken̂e.