Taa,

ero wa kacho cencetken̂e,

Ero ke kn̂entathîrî ponaro xa cexpore nasî.

Ponarora kexitaw so cemoxenorexe men okwe Kaan yai.

2 Pahxa kpanatanmetopo n̂ekatîmyatken̂e ancu komo.

Ero yipu tak Moises pen n̂ekatîmyakn̂e kporin pen komo ya hara.

Yîmtapotarî tko tî ewetîra xatken̂e okwe.

Ero ke tî n̂esemetanmekyatken̂e kicicme cehtoponhîrî yepetho me.

Emapona tî n̂esemetanmekyatken̂e ewetîra cexirî ke roro so.

Yaaro thakwa ero wa xatken̂e kicicme exirî ke so.

3 Soroso xa tak kîwyam cesemetanmekyaxe ro mak okwe Kaan ya kakir̂wamacho komo ponarora kexitaw so.

Yihcirî me ka Kporin komo rma n̂ekatîmyakn̂e kakir̂wamacho komo.

Noro mtapotarî yentan̂enho komo tak n̂ekatîmyatken̂e kîwya so hara.

Kporin komo mtapotachonho yaw roro rma n̂ekatîmyatken̂e kîwya so.

4 Cirihnî marha Kaan n̂irpekn̂e yîwya so,

keserepokacho komo xa.

Yaaro kan̂e komo mîkyam ham,

kachome kîwya so ero yipu n̂irpekn̂e yîwya so.

Ero wa cirihnî n̂iir̂atken̂e anarmerpa so.

On wara marha xatken̂e Kaan yekatî yanme,

anarî ro mtapotarî yaro tîmtapotaxmu me xatken̂e anarimaw so.

On wara tî ciino n̂iir̂a Kaan amn̂e,

kan̂e me marha xatken̂e anarimaw so hara.

Tanme ro mak ero wa n̂examro n̂iir̂akn̂e Kaan Yekatî.

Ero wa xatken̂e yaaro xa entachome yîmtapotarî komo kîwya so.

5 Taa,

on wara kacho poko nîmtapowas amna,

Amn̂e takî tî roowo nakîhce hara Kaan,

kacho poko amna kesî.

Ero yipu yakîhtoche tak ancu komo cirihra ro mak nasî ero pono komo kayaritomon me.

6 Ero yipu poko rma kekn̂e Kaan Karitan mewren̂enho.

On wara kekn̂e,

Keserepokesî apoko Apa.

Tooto ponaro wahraitho ponaro rma.

Tooto yepamrî cik mak amna.

Wara rma amna mecehcesî.

Ahce wa amna yexiri ke ero wa mai amna poko?

7-8 Ancu komo xawyakan me kyam mak tooto miir̂akn̂e.

Kir̂wan me xa tko miir̂akn̂e,

cekaiporesom me marha.

Anakîhtothîrî yenîn̂e me marha miir̂akn̂e.

Ahnoro roowo pono mko miir̂akn̂e tooto yewetîn̂e me.

Ero wa miir̂akn̂e Apa,

kekn̂e Kaan Karitan mewren̂enho.

Ero wara rma ciino n̂iir̂asî Kaan amn̂e.

Ero ke tooto yewetîn̂e me tak nas amn̂e roowo pono mko ahnoro,

ewetîn̂e pîn exihra ro mak nas amn̂e.

Ero wa ciitopo tko enîhra rma ka tasî.

9 Xesusu rma tko wa ceen̂axe.

On wara xakn̂e Noro,

ancu komo xawyaka ciixapu me ka xakn̂e yohno mak.

Ero warai me n̂ewruyakn̂e twaihtome ahnoro tooto komo yepetho me.

Noro waihkapekn̂e Kaan kwakretopo komo me.

Kir̂wanî ro me rma tko Xesus ceen̂asî,

cekaiporesom me xa.

Ero wa Xesus ceen̂asî.

10 Yaaro rma cerewîmsom me Xesus n̂iir̂akn̂e Kaan.

Miyan komo yakîhton̂enho rma Mîkî Kaan.

Tahworetopo mîn nakîhcekn̂e.

Noro yipu rma Xesusu pen n̂erepekn̂e.

Mer̂pono pîn tîmxîkrî komo yakir̂wamatîka xe xakn̂e kir̂wanî ro me cehso ro okre.

Ero ke yaaro rma n̂examro yakir̂waman̂e n̂erepekn̂e.

11 Ero ke noro re rma kîwyam Xesus yakro.

Kakir̂waman̂e Mîk ha Xesus.

Yînakir̂wamarî makî reha kîwyam.

Noro yipu rma noro re me rma taxe Xesus yakro.

Ero ke,

Oyakno komo moxam,

kesî Xesus kpoko so,

kîwîrîyakara ro mak nasî.

12 On wara tî Kaan kekn̂e pahxa,

Amn̂e awosotî wekatîmyasî oyakno komo ya.

Kewanomesî marha kir̂wan̂he xa awehtopo poko,

mer̂pono pîn komo n̂entarî me kewanomesî,

kekn̂e tî.

13 On wara marha tî kekn̂e,

Noro pona ween̂as Owî,

kekn̂e tî.

On wara tî kekn̂e xa hara,

Tan wasî omxîkrî komo yakro.

Kaan nîmîtho moxam okre,

kekn̂e tî.

Ero wa tî nîmtapowakn̂e Xesus noro re me kexirî komo poko.

14 On warai kîwyam Kaan xîkrî komo,

tuhn̂em kîwyam,

kamxuku ken̂arî marha.

Ero ke ero warai me xa marha tak n̂etpuncekn̂e Noro hara twaihtome.

Kwaihkan̂e komo yîhcamnotome kr̂a tak twaipu xe xakn̂e,

Ciabu yîhcamnotome ha.

15 Tooto pen komo yowtome marha twaipu xe xakn̂e Xesus.

Worokyam yewetîra oyexitaw owaikesî kopi,

kexe tooto komo.

Miya roro ero wa kexe twaihtopo komo pona roro.

Ero wa kan̂e komo yowtome wa Xesus waihyakn̂e.

16 Ancu komo yukurunpera reha nasî Xesus,

Abraaw yepamtho komo mak nukurunpesî.

17 Ero ke takno komo wa xa marha cexi xe xakn̂e Xesus.

Twaipu xe meero xakn̂e n̂examro wa xa marha.

Ero wa cexi xe xakn̂e Kaan yaka cewomsom me cehtome tak.

Takno komo yukurunperî poko tîmtapota xe xakn̂e Noro yakro.

Kîpînîn yawno me xa cexi xe marha xakn̂e,

N̂ehcowpe kr̂a mak,

kan̂e pîn me mak.

Ero wa cexi xe xakn̂e kicicme tooto komo yehtoponho yepemachome.

18 N̂esemetanmekyakn̂e Xesus,

Satanas marha Noro nukukmekn̂e kicicitho poko.

Ero yipu nînîmyakn̂e kecehton̂e me cehtome kicicitho poko Satanas ya kukukmetaw so hara.

Ero wa xakn̂e Xesus.