Etîme Re Ciino Rin̂e Me Mak Ehcoko
2
On wara wîîkes hara awya so oyakno komo,
Kir̂wanî ro Mîk Kporin komo Xesus Kristu.
Noro ponarono xa amyamro okre.
On wara tko na matu anarimaw,
anarî komo ponaro xa na matu,
anarî komo ponarora n̂he na mat hara okwe.
Ero warahra mak ehcoko.
2 On wara na matu awesenmekyataw so Kaan mîn yaka.
Anarî na mokya ooru ke tamoyeknakem,
tpononporem xa.
Taa,
anarî tak na mokya hara emyawnomnî thakwa mak okwe,
pononpontho thakwa mak okwe.
3 On wara na matu ero yimaw,
tawake xa na matu tpononporem poko.
Oona xa eremakî kir̂wan pona,
mîîket ha na yîwya.
Ero wa kahra na matu emyawnomnî ya.
Mîîna kyam mak ececetoko amoro,
mîîketu thakwa na noro yipu ya hara okwe.
Xiya kyam erematamko ohtarî mîtkoso mak,
mîîketu na anarimaw yîwya.
4 Ero wa awexitaw so etîme re ciino rin̂e pîn me mak maxe okwe.
En̂ekano rin̂e me xa na mecir̂axe kica.
Kicicme cesehtînosom me mak mat ham kica.
5 Yaaro tan wîîkes awya so oyakno komo,
emyawnomnî komo xa matko Kaan men̂ekekn̂e tpona enîn̂e me cehsom me.
N̂examro n̂iir̂asî cemyawnoyem me xa tpona entopo ke.
Kayaritomo me marha n̂examro n̂iir̂asî Kaan amn̂e.
Kayaritomo me tak kiir̂axe so amn̂e ooxatî me awexitaw so,
kekn̂e Kaan pahxa.
Ero ke kayaritomo me tak noro yipu komo n̂iir̂as amn̂e tîmtapotachonhîrî yaw roro rma.
Ero wa emyawnomnî komo n̂iir̂asî.
6 Ero warahra reha maxe amyamro emyawnomnî komo poko okwe,
mîwîrîyakexe mak kica.
Ahce wa natu cemyawnoyem komo apoko so hara?
Awemetanmekn̂e komo me mak naxe okwe noro yipu komo.
Awen̂ekapon̂e me so marha naxe okwe en̂ekano rin̂e komo ya.
7 Kporin komo yosotî poko mesosocexe,
kîkayaritomon yosotî poko ha.
Noro yosotî rma nîwîrîyakexe okwe.
Ero wa mak naxe cemyawnoyem komo.
8 On wara kesî kîkayaritomon komo mtapotarî,
Kaan Karitan yaw mewrexapu,
Apoyino komo xe ehcoko etîxe rma maxe ero wa xa marha yiixe ehcoko,
kesî.
Ero ke ero wa kachonho yewehcataw roro awya so kir̂wan̂he tak maxe okre.
9 Etîme re ciino rin̂e mera awexitaw so reha kicicme maxe okwe,
cen̂ekaxmu me thakwa tak maxe ero wa kachonho yanwekrî ke awya so.
10 On wara na natu anarî komo Moises pen nmewretho poko,
Ewetîtîkan̂e me na natu.
Cewn̂e cik mak na wacetu ewetîra rma.
Ero wa cexitaw so ahnoro Moises pen nmewretho yanwetîkan̂e me rma naxe okwe.
11 On wara kekn̂e Kaan,
Apici yai ro exihra ro mak ehcoko.
Aan̂o yai ro exihra ro mak ehcoko wooxam kom hara,
kekn̂e.
On wara kekn̂e hara Noro rma,
Waihkano cirihra ehcoko,
kekn̂e.
Ero wa kacho mewrepekn̂e kpanatanmetopo komo.
Ero ke apici yai ro exihra rma na matu,
waihkano tko na miir̂at hara okwe.
Ero wa awexitaw so kpanatanmetopo komo yanwekn̂e me rma maxe okwe.
12 Kîmhokan̂e wara mîn kpanatanmetopo.
Ero ke ero yaw roro mak ehcoko.
Ero yaw roro marha amtapotacoko,
Owya apanatanmetopo komo yewetîn̂e me mai ham,
kachome Kaan awya so amn̂e.
13 On wara nasî Kaan kpoko so,
tooto komo pînîn yawra kexitaw so ero wa xa marha nasî Noro kpoko so hara,
kîpînîn yawra so marha ken̂ekexe so amn̂e.
Kîpînîn yawno komo rma tko Mîk Kaan.
Ero ke cen̂ekaxmu me kehtoponhîrî yar̂man̂e me nas okre.
Kir̂wan̂he Ciino Rin̂e Me Cexpore Nasî
14 On wara marha wîîkesî awya so oyakno komo,
Kaan pona enîn̂e ow ha,
mîîket ha na.
Ero wa kan̂e rma kir̂wan̂he ciino rin̂e pîn me na mat okwe.
Kakir̂waman̂e ma re mîn ero warai Kaan pona entopo kîwya so?
15 Awakno komo na mokya ahyaka so,
awepeka komo na mokya anarimaw.
Pononpora ro mak na natu,
yînapumra marha na.
16 Tawakem wara rma na re mesenpetu noro yipu ya.
Taa,
etok hara kir̂wan̂he,
mîîketu mak na yîwya so.
Komsîmra awto xe was ha,
yîromamra marha awto xe wasî,
mîîketu marha na yîwya so.
Yiixe xa ehtopo komo tko na tîmîhra rma mat okwe.
Kir̂wan̂he ma re nai tawake amtapotarî komo noro yipu wakren̂e pîn me rma awexitaw so?
17 Ero wa xa marha taxe,
Kaan pona enîn̂e ow ha,
kan̂e komo.
Kir̂wan̂he ciino rîn̂e pîn me rma kexitaw so waixapu me mak nasî Kaan pona entopo kîwya so okwe.
18 On wara na ketu anarî komo awya so,
Kaan pona enîn̂e ow ha,
kan̂e amoro.
Owî reha wasî kir̂wan̂he ciino rin̂e me.
Kaan pona enîn̂e me awehtopo enpoko owya kir̂wan̂he ciino rin̂e pînî rma.
Owî reha wenpesî Kaan pona enîn̂e me oyehtopo kir̂wan̂he ciino rin̂e me oyehtopo ke xa,
ketu na awya so.
19 On wara kan̂e re amyamro,
Cewn̂e mak nasî Kaan,
kan̂e.
Kir̂wan̂he rma re nasî ero wara kacho awya so.
Worokyam meero tko ero wa kan̂e me naxe.
Tatanaxe mak cerahtîmrî ke so Kaan pona.
Ero wa naxe worokyamu rma.
20 Camkî mak maxe okwe.
On wara kacho rma mencexe ha re,
Kir̂wan̂he ciino rin̂e pîn me awexitaw so,
waixapu me mak nasî Kaan pona enîn̂e me awehtopo komo,
kacho.
Onok yanme xa mîhtînoyatu ero wara?
mîîketu mak na.
21 Ero ke on wara wîîkesî,
Abraaw pen tî xakn̂e kporin pen kom ha,
akir̂wamaxapu me takî tî xakn̂e kir̂wan̂he ciino rîrî ke tîwya.
Tumumuru tî nîmyakn̂e Kaan ya twaihkaxmu me.
Tîmsom yakn̂itopo pona tî nîmyakn̂e.
Ero ke akir̂wamaxapu me takî tî xakn̂e.
22 Kaan pona enîn̂e me rma tî xakn̂e noro pen.
Kaan marha tî n̂ewehcakn̂e tumumuru waihkacho poko.
Ero ke Kaan pona entopo yîhrematîkacho xakn̂e Noro mtapotarî yewetîtopo hara.
23 Ero ke Kaan Karitan yaw roro rma xakn̂e Abraaw pen.
On wara kesî noro pen poko,
Kaan pona n̂een̂akn̂e Abraaw pen.
Ero ke,
Kir̂wan me tak ween̂asî Abraaw,
kekn̂e tî Kaan noro pen poko,
kesî.
Kaan yakrono ro mîk ha,
kacho me marha tî xakn̂e Abraaw pen.
24 Ero ke ero wa xa marha taxe kîwyam hara,
Kaan pona enîn̂e me kexitaw so yîmtapotarî yewetîn̂e rma,
Kir̂wan mîk ham,
kesî tak Kaan kpoko so.
Kaan pona enîn̂e me mak kexitaw so,
yîmtapotarî yewetîn̂e pîn me rma,
Kir̂wan mîk ham,
kahra nasî Kaan kpoko so okwe.
25 Ero wa xa marha xakn̂e Haabe pen hara.
Kîîrî pohkan̂e ro tî mîk xakn̂e wooxam.
Noro yipu rma tko Ixaw Yana komo n̂en̂epetho komo n̂ermonoyakn̂e.
Ero yinhîrî tak n̂examro n̂en̂epekn̂e hara anarî esama yaw.
Ero wa exirî ke,
Kir̂wan mîk ham,
kekn̂e marha noro poko hara.
Ero wa xakn̂e kir̂wan̂he ciino rirî ke okre.
26 Kupun komo wara rma nasî Kaan pona entopo kîwya so.
Enko xe ka,
kekatî exihra exitaw kupunthîrî yaw twaihso thakwa nas okwe.
Ero wa xa marha nasî Kaan pona entopo kîwya so.
Yîmtapotarî yewetîn̂e pîn me kexitaw so waixapu me mak nas okwe Kaan ponaro kehtopo komo.
Ero wa nas okwe.