Cerewrem Xa Mîn Kîmtapotarî Komo Okwe
3
On wara wîîkes hara awya so oyakno komo,
yaake exihra ehcoko panatanmekno rin̂e me.
On wara kacho ponaro cexpore nasî,
Kicicme kexitaw so panatanmekno rin̂e rma Kaan n̂en̂ekarî me xa tak taxe anarî komo yopo,
kacho ponaro cexpore nasî.
2 Ahnoro rma taxe cehrokaxmu wara okwe.
Anarmerpa nasî kehrokacho komo warai.
Kîmtapotarî komo xa nasî kar̂mamexpon̂e me.
Ahto katî nai kir̂wan̂he roro tîmtapotaxmu awya so?
Noro yipu exitaw ketaw ha re kicicme exihra nasî cewru ke hara,
tamorî ke marha,
tupun ke ahnoro kicicme exihra ro mak nasî.
Kir̂wanî ro me xa taxe kicicme yîmtapotanî ro me kexitaw so.
3 On wara tko cicir̂axe kawaru,
yîmtaka cicir̂axe petayetkacho,
kor̂macho cik ha.
Ero poko tak ciki tîtkexe.
Kewehcaxe so tak kawaru porinî rma,
n̂esewkor̂mesî kanme so.
4 Ero wa xa marha nasî kanawa hara,
yukwawno ha.
Porin xa mîn anarî mko kanawa Ero yipu naar̂asî ocowo.
Karitî xa mîn ocowo kanawa yan̂e.
Kanawa yaw tko nasî kor̂macho wahrai cik mak.
Ero yipu ke rma kanawa kor̂mesî aan̂e.
Pona tîtotopo wece kor̂mesî.
5 Ero wa xa marha nasî kun̂uru kom hara.
Wahra rma re nasî kun̂uru komo.
Ero yipu rma tko iyoponkano rin̂e me nîmtapowasî kica.
On wara nasî wehto,
wahrainhîrî rma wehto n̂esenmamyasî mer̂pora comota pen yakn̂itîkacho me.
6 Wehto wara rma nasî kun̂uru kom hara.
Wehto imo poyinonho rma mîn n̂etahsîyasî kun̂uru poko.
Kupun komo me rma nasî.
Wara rma ahnoro kupun komo yakn̂in̂e wa nasî.
Miyan komo yakn̂in̂e wara rma nas oco.
Ahnoro kehtopo komo meero nîwîrîmes okwe.
Ero wa xa nas okwe kun̂uru komo.
7 On warai marha mîn kun̂uru komo,
kamara warai kopi.
Kamara rma n̂enpamnoyaxe anarî komo tok me,
mayamnî me ha re.
Ero wa xa marha n̂enpamnoyaxe poroto komo,
waaro komo,
okoyi komo,
yukwawno komo marha.
Noro yipu komo reha n̂enpamnoyaxe anarî komo tok me.
8 Kun̂uru komo reha nasî enpamnopîn me ro mak okwe.
Tmayan̂em me thakwa mak nas okwe.
Exponî ro mak mîn kun̂uru kica,
kicicme cexi xatî.
Okoyi yokumuru ken̂arî warai mak mîn kun̂uru komo mer̂pono pîn ken̂arî warai ha.
Yohno kwaihkan̂e ro mak mîn ha kun̂uru komo okwe.
9 On wara tîtkexe kun̂uru komo ke,
Kir̂wan̂he mai ham Apa,
tîtkexe Kîîm komo Kaan ya.
Amn̂e tak tooto yîwîrîmacho poko tîmtapowaxe hara okwe ero ke rma.
Ero wa tîmtapowaxe tooto komo poko Kaan warai me akîhtoxapu komo poko rma okwe.
10 Ero re yari mak tîmtapowaxe anarmerpa so.
Wakreno ritopo poko tîmtapowaxe,
yîwîrîmano ritopo poko marha kica.
Ero wa kahra ro mak cexpore nas okwe oyakno komo.
11 Ahce wa nai tuuna pîtho awya so?
Kir̂wan mokyataw tuuna cîmîkno ma re mokya awya so ero re yari rma?
Pîra ro mak.
12 Ahce wa nai hara naatî awya so oyakno komo?
Piiku yepu exitaw asetona me katî n̂eperwa awya so.
Pîra ro mak.
Uupa yatî exitaw hara piiku me katî n̂eperwa hara awya so?
Pîra marha okyo.
Ero wa xa marha nasî tuuna pîtho hara,
ero re yari mokuhra ro mak nasî kir̂wan tuuna,
yîmîtî ken̂arî marha.
Takîhso Cehcerî Kah Yawno Ke Mak Kesehtînotopo Ke
13 On wara wîîkes hara awya so,
takîhso na mesehtînoyatu,
yuhnari yîhtînon̂e me marha na mat ha.
Ero warai me awesehtînoyataw so kir̂wan̂he ciino rîn̂e me mak ehcoko.
Ero wa ehcoko takîhsom me awesenpotome so,
awanmerono mera ro mak awesenpotome so marha.
14 Ero warahra na matu anarimaw so anarî komo na meen̂atu awewresawno me kica,
poturme awexi xe marha na matu kica.
Ero wa awexitaw so,
Ow xa n̂ero ayopono ha,
kahra ro mak ehcoko anarî ya.
Yaarono yanwekn̂e pîn me ehcoko.
15 Anarî yopono me awesehtînoyataw so takîhsom wara rma na matu.
Kah yaino pînî tko mîn takîhso awehtopo komo.
Tooto poko tpohnîmsom me mak maxe okwe.
Tooto pun ponaro mak maxe kica.
Worokyam ponaro marha maxe okwe.
16 On wara tak maxe amn̂e okwe esewresaw awesen̂ataw so,
poturme awexi xe so marha na matu.
Ero wa awexitaw so kicicme ro mak tak mehtîkexe okwe.
Wara ro mak tak mehtîkexe okwe.
Miyan poko rma tak mehtîkexe kicicitho poko kica.
17 On wara xa yo taxe takîhso kexitaw so kah yaino ke kakîhretopo ke,
yihcirî me ka kicicitho me kexi xera so ro mak taxe.
Ero wa ehxapu tak on wara marha taxe,
tawakem me kexi xe so taxe mîk hak poko.
Erewîn me tîmtapotaxmu me marha taxe,
cesewetîsom me marha,
cesemetanmesom komo pînîn yawno me marha,
wakreno rin̂e me marha,
etîme re tooto ponarono me marha,
kir̂wan̂he cesenposom wara exihra taxe tohnaw.
Ero wa taxe takîhso kexitaw so kah yaino ke kakîhretopo ke.
18 Tawakem me roro kexitaw so mîk hak poko naatî ciin̂e wa taxe.
Ero yinhîrî tak kn̂irithîrî nasî cepetaxmu wa hara.
Takîhso kehtopo me tak n̂eperwasî.
Ero wa taxe tawakem me roro kexitaw so.