Mîn Hak Poko Kpanatanmetopo
4
On wara wîîkes hara awya so oyakno komo,
ahce wa awexirî ke so etpoko metar̂met okwe?
Meseseyukyaxe marha okwe.
On wara maxe,
mîn hak poko mak mepohkexe.
Aropotaw so cetar̂maxmu wara rma nasî ero wa awehtopo kom okwe.
2 Erepora ro mak maxe awemyawno komo xe.
Waihkano meero miir̂axe okwe,
anarî komo yemyawno poko mepohkexe kica.
Yiixe awehtopo komo yahsîra rma maxe okwe.
On wara awexirî ke so ahsîra maxe.
On xe cma re was Apa,
kahra maxe Kaan ya.
Ero ke ahsîra thakwa maxe,
3 Mîîkexe rma re yîwya anarimaw.
Ahsîra rma tko maxe okwe on poyero,
awanme ro so mîîkexe awesewakomachome so mak.
Ero wa maxe okwe.
4 On wara marha wîîkes awya so,
apici komo yaino wara maxe kica,
aan̂o komo yaino wara marha maxe wooxam kom hara.
On wara kacho ponarora matu ke,
roowo pono ro komo poko kpohnataw Kaan xatî pîn me thakwa tasî,
kacho?
Ero ke roowo pono ro komo poko tpohnîmsom me awexitaw so Kaan xatî pîn me thakwa maxe okwe.
5 Ero yipu poko rma kesî Kaan Karitan.
On wara kesî,
Kropotaw nasî Kaan Yekatî kewyoman̂e me xa nasî Noro,
kesî.
Tohnaw ma re nîîke Kaan Karitan ero wara awya so?
6 Kwakretîkan̂e xa Mîkî Kaan.
Ero ke on wara kesî Kaan Karitan,
Anarî komo yopono me cesehtînosom komo reha n̂ehn̂anmekyasî Kaan.
Anarî komo xawyakan mak ow ha,
kan̂e komo reha nakronomesî,
kesî.
Ero wa kesî Kaan Karitan.
7 Ero ke Kaan ya tak etîmcoko Noro yanton me.
Ciabu yen̂epen̂e me ehcoko totohme tak ahyai so.
8 Kaan mîtkoso n̂he tak amohcoko amîtkoso n̂he tak mohtome Noro hara.
Cesemokaxmu wa tak ehcoko amyamro kicicitho pokono komo.
Kaan ya aropotarî komo marha korokapocoko amyamro hara yarpa cesehtînosom kom hara.
9 Ahwokacoko,
awratacoko marha,
Okwe okwe,
kacoko ha.
Ero wa kacoko amyamro cewresomînhîrî komo,
tahwotaxmunhîrî kom ha.
10 Kicicme weexi Apa okwe,
kacoko Kporin komo ya.
Ero wa ketaw awya so takîhsom me n̂he tak awenpexe so hara Noro.
11 On wara marha wîîkes awya so oyakno komo,
etpoko yîmtapotara tak men ehcoko.
Kicicitho noro kica,
ketaw awya so awakno komo poko,
Kaan ya apanatanmetopo komo yîwîrîyakan̂e me mak maxe okwe.
Ewetîn̂e pîn me maxe.
Kicicitho mak mîn ham Kaan ya kpanatanmetopo komo,
kan̂e wa mak maxe okwe.
12 Kaan mak kpanaatanmetopo mewrepekn̂e pahxa.
Noro rma nasî yukurunpeno rin̂e me.
Noro marha nasî yîhcamnono rin̂e me hara.
Ero ke ahce kacho on wara mîîketu amyamro hara apoyino komo ya,
Kicicitho amoro kica,
mîîket ha?
13 Taa,
on wara wîîkes hara awya so,
anarî poko hara,
on wara kan̂e amyamro,
Oroto amna cesî iina ewto imo pona,
pahxaxa na anarimaw.
Iito tak nas amna cewn̂e cimn̂ipu.
Amna warawanwasî iito tupurantan yahsîtome,
kan̂e amyamro.
14 Ahce kacho ero wa mîîket ha?
Ahce poko na matu pahxaxa,
ahna na mîîcetu?
Ahce wa thakwa na matu ero yimaw?
Yîhtînopîra ro mak maxe okwe.
On warai mak kîwyam,
kaweresî warai mak ha.
Yohnono mak mîn kaweresî.
Amn̂e tak n̂ehcamnoyas hara.
Ero warai xa marha kîwyam hara yohnono marha.
Amn̂e tak cehcamnoyaxe kîwyam hara.
15 Ero ke on wara xa matko kapore nasî,
Yiixe exitaw Kporin komo waipîra wasî ero poko oyehtome amn̂e.
Ero yinhîrî anarî poko cma re was hara,
kapore mak nasî.
16 Ero wa kan̂e pîn amyamro okwe.
On wara xa matko mîîkexe,
Kir̂wan̂he oyemyawno ciin̂e ow ha okre,
mîîkexe awanme rono komo wara so rma okwe.
Kicicme nasî kica ero wa kacho awya so okwe.
17 Ero ke on wara wîîkes awya so,
Anarimaw so on wara mîîketu,
N̂esemer̂wexe n̂examro.
Takronomapore nasî,
twakrepore marha na,
mîîketu.
Ero yinhîrî akronomara rma na matu,
wakrera marha na.
Kicicme men nas okwe Kaan ya ero wara awehtopo komo.
Ero ke ero wa wîîkesî.