Taa,

Kaanî mtapotarî yanme mak mewruyatken̂e Noro xîkrî me.

Ero ke on wara tak ehcoko,

kicicme awehtoponhîrî komo ahsîpînkacoko ahnoro.

Etîxera awehtoponhîrî komo ahsîpînkacoko,

acemaronthîrî komo marha ahsîpînkacoko.

Tohnaw esenpora marha ehcoko,

ayopono komo xatî pîn me exihra marha ehcoko,

etwîrîyakara marha ehcoko.

Ero wara awehtoponhîrî komo tak ahsîpînkacoko.

2 Ewruxan wara tak ehcoko moomo xatî wara.

Awekatî komo wokru wara rma nasî Kaanî mtapotarî.

Ero ke ero yipu xe ehcoko,

anarî ro mtapotarî xera mak.

Rikomo pormamyasî moomo yeer̂ataw,

ero ke ero wa xa marha ehcoko Kaanî mtapotarî poko hara tpormamsom wara tak ehtome awekatî komo.

3 Kir̂wan Mîk ham Kporin komo okre,

mîîketkene rma na Noro poko.

Tpoxwem wara na mîhtînoyatken̂e Noro.

Ero ke yîmtapotarî poko tak ehcoko moomo yeen̂e wa tak.

4 On wara marha nasî Kporin komo,

toopu wa nasî karitî wa.

Noro yipu xera xatken̂e tooto komo okwe,

mîîmo me cirihnî me n̂een̂atken̂e.

Tîmîn me ciisom me rma tko Kaan nîhtînoyakn̂e.

Tîpîn̂e ro mak n̂een̂akn̂e okre.

5 Ero ke Noro yaka tmohsom me awexitaw so toopu wara xa marha maxe amyamro hara,

karitî wara xa marha.

Kaan Yekatî mîn me ciisom amyamro toopu wa.

Kaan ya tîmsom pokono me marha maxe.

Kekatî komo nîmrî reha mîmyaxe.

Kir̂wan̂he Kaan n̂een̂asî anîmrî komo Xesus Kristu yakrono ro me awexirî ke so.

Ero warai amyamro.

6 On wara kes hara Kaan Karitan toopu poko hara,

On wara wîîkes awya so,

mîîmo peyecepu me xa toopu wiir̂asî,

Siaw pono peyecepu.

Onmen̂ekatho mîn toopu,

tîpîn̂em xa.

Ero ke Noro ponaro awexitaw so ehn̂an me tak awir̂axe so Kaan okre,

kesî.

7-8 Ero ke Noro ponaro awexitaw so tîpîn̂em me xa meen̂axe.

Ero wa maxe amyamro reha.

Anarî me reha naxe Noro yewetîn̂e pîn komo.

On wara kesî Kaan Karitan n̂examro poko,

Toopu xakne mîîmo me ciisomu cma ha re.

Kicicme tko n̂een̂atken̂e mîîmo ciin̂e komo,

mîîmo me cirihnî me.

Noro rma tko Kaan n̂iir̂akn̂e mîîmo peyecepu me,

kesî,

On wara marha kesî Kaan Karitan,

cetanwesom komo yîhrokacho mak mîn oko toopu,

epîrkacho komo mak okwe,

kesî.

Ero wa cehrokaxmu me naxe Kaanî mtapotarî yewetîn̂e pîn me cexirî ke so.

Kaanî rma ero wa n̂iir̂asî noro yipu kom okwe.

Ero warai reha mîkyam.

9 Ero warai pînî reha amyamro ha.

Kaan nmen̂ekatho komo reha amyamro.

Tîyanan me amen̂eketken̂e so.

Tîhyaka cewomsom me marha amen̂eketken̂e so,

kayaritomo me marha awir̂atkene so.

Tmaywen me marha awir̂atken̂e so,

tponaro cehsom me xa okre.

Ero warai me amen̂eketken̂e so Kaan kir̂wanî ro me cehtopo yekatîmn̂e me tak awehtome so.

Awarpanawnonhîrî komo amyamro.

Tweyuru pona tak awan̂ikyatken̂e so okre.

10 Pahxa noro re mera mîxatken̂e okwe.

Oroto tak Kaan yanan me re tak maxe okre.

Pahxa apînîn yawno komo warahra xakn̂e Kaan okwe.

Oroto tak apînîn yawno me so tak nas okre.

Ero wa tak nasî Kaan apoko so.

11 Oyakno komo cik amyamro okwe.

On wara wîîkes awya so,

tantono ro pîn amyamro.

Pawana mak amyamro.

Ero ke kicicitho xe awehtoponhîrî komo yewetîra kr̂a tak ehcoko.

Awekatî komo men nîwîrîmes okwe ero yipu yewehcataw awya so.

12 Xenciu komo chewno mak amyamro,

awîrîyakan̂e komo chewno ha.

Kicicitho mîkyam kica,

kexe apoko so.

Ero ke n̂examro wero ro rma kir̂wan̂he roro ehcoko.

Ero wa awexitaw so kir̂wan̂he tak Kaan nîhtînoyaxe awîrîyakan̂enhîrî komo rma.

On wara kexe amn̂e pahxaro en̂ekano ritopo po,

Yaaro ham,

kir̂wan̂he nai Kaan ham n̂examro yakir̂waman̂enho,

kexe tak ero yimaw.

Ero wa tak kexe apoko so.

13-14 Ero ke on wara wîîkes awya so,

kayaritomo komo ewetîcoko,

yîtîhkathîrî kom ha.

Kopenato komo marha ewetîcoko.

Yîtîhkathîrî maywen komo rma mîkyam kopenato komo.

Yînantomathîrî komo mîkyam kicicitho komo panaretopo poko,

kir̂wan komo yahworetopo poko marha.

Ero warai poko kopenato komo nantomexe yîtîhkathîrî komo.

Ero ke ahnoro rma ewetîcoko.

15 Ero wa awexi xe so tî nai Kaan awîrîyakan̂e komo yîtîtmamnotome.

Camkîno komo mak mîkyam kica akpîra cesehtînosom kom ha.

N̂examro yîtîtmamnopu xe tî nai Kaan kir̂wan̂he roro awehtopo komo ke mak.

16 Awanme ro cehsomu rma re amyamro,

tooto yantonî ro pîn.

Emetanmekno ciin̂e me tko exihra ehcoko.

Tooto yanton pîn ow ha,

ero ke kr̂a emetanmekno rma wiir̂asî yiixe oyexitaw,

kane pîn me mak ehcoko.

Kaan yanton me mak ehcoko.

17 On wara marha ehcoko,

ahnoro tooto komo ponaro ehcoko.

Awakno komo xe xa ehcoko.

Kaan poko twerî ehcoko.

An̂ewetîrî komo me marha kayaritomo encoko.

Ero wa xa ehcoko.

18 Taa,

anto me cehsom komo,

awakro so mak tan kîmtapowas hara.

On wara wîîkes awya so,

awosom komo ewetîcoko roro.

Ponaro so xa ehcoko.

Ero wa ehcoko kir̂wan komo poko,

tawakem komo poko ha.

Ero wa xa marha ehcoko tîrwon̂em komo poko hara.

Ero wa ehcoko awosom komo poko.

19 Anarimaw tohnaw mak na awemetanmekyatu so awosom komo,

kicicme awehtopo komo yanmera ro mak.

Ero wa awir̂ataw so tahwore rma ehcoko Kaan yanme rma.

Kir̂wan̂he maxe ero wa awexitaw so.

20 On wara tko na matu anarimaw kicicme awehtopo komo yanme rma na apanaretu so.

Yaaro rma ero yipu mînîmyaxe ahwokan me.

Awanme ro so thakwa maxe tpanaresom me.

Anarimaw na tohnaw mak awemetanmekyatu so hara,

kir̂wan̂he awehtopo komo yanme rma kica.

Ero yipu marha tînîmpore nasî ahwokan me hara.

Kir̂wan̂he Kaan awen̂axe so ero wa awexitaw so okre.

21 Ero warai me rma wa awan̂ikyatken̂e so Kaan,

Enko,

Kristu meero marha xakn̂e emetanmexapu me kakir̂wamachome so.

Cemetanmetopo rma nînîmyakn̂e Noro wara xa marha awehtome so amyamro hara.

22 On warai Mîk xakn̂e Kristu,

kicicme exihnî ro mak Mîk xakn̂e.

Cemarontanî ro marha Mîk xakn̂e.

23 Noro yîwîrîyaketaw yiixatî pîn komo ya nîtîtmamyakn̂e makî tî.

Yîhyokyataw marha yîwya so,

Kesepanîyasî men amn̂e Ow hara,

kahra ro makî tî xakn̂e.

On wara makî tî kekn̂e Xesus,

Yaaro xa kepanîn̂e Mîk Kaan.

Ero ke Noro pona mak ween̂asî,

kekn̂e makî tî.

24 Weewe pona woxapu me Noro pen waihyataw kicicme kehtoponhîrî komo nahsîyakn̂e tupun pona rma.

Tîwyan me rma nahsîyakn̂e.

Ero wa nahsîyakn̂e waixapu me tak kehtome so kicicme kehtopo poko.

Kir̂wan̂he kehtome so xa matko ero wa xakn̂e okwe.

Tîhyotopo ke rma kakir̂wametken̂e so.

Ero wa mak kakir̂wametken̂e so Xesus.

25 Tacixaputho wa mak mîxatken̂e okwe.

Okno tahcasî oper̂a,

ero wa xa marha mîtahcatken̂e amyamro okwe.

Ero warahra tak maxe oroto.

Awosom komo yaka tak mîmokyatken̂e hara okre,

aropotarî komo yenîn̂e yaka ha.

Ero wa mîmokyatken̂e okre.