Taa,

wooxam komo,

awya so tan wîîkes hara on wara,

aan̂o komo yewetîn̂e me xa ehcoko.

Ero wa awexitaw so kir̂wan̂he tak aan̂o komo awen̂axe so.

Anarimaw na Kaanî mtapotarî yewetîn̂e pîn komo yakro matu.

Kaan pona enîn̂e me rma tak na natu noro yipu komo tpanatanmetopo ken̂ehra rma.

Kir̂wan̂he awehtopo komo yenîrî ke mak ero wa natu.

2 On wara marha ketu apoko so kir̂wan̂he awexitaw so,

Tweeno me nai ham opici,

tîyopono me marha oyen̂a ham,

ketu apoko so aan̂o komo.

Ero ke Kaan pona tak na n̂een̂atu ero wara awenîrî ke so.

3 On wara marha ehcoko,

poore mak etakir̂wamara ehcoko on warai ke,

anarmerpa so ahpoci komo ciitopo ke,

ooru ke aporenomacho komo ke anarimaw,

kir̂wan aponon komo yamrutopo ke anarimaw,

cepethîkem yamrutopo ke xa.

Poore mak kir̂wan̂he awesenpotopo komo mîn ero yipu mko.

4 Enîhnî ke xa matko eporenomacoko,

aropotawno komo ke mak.

On warai mîn aweporenomacho komo,

etîrwonmekîra awehtopo komo,

keyuhtîkara awehtopo komo marha.

Atpînî ro mak mîn ero yipu aweporenomacho kom ha.

Cepethîkem xa mîn ero wa awehtopo komo Kaan ya.

5 Ero warai ke rma anarî komo n̂eporenometken̂e,

pahxan pen wooxam komo.

Kir̂wan komo mak ero wa xatken̂e,

Kaan pona enîn̂e komo xa,

ciin̂o yewetîn̂e kom ha.

6 Ero wa tî xakn̂e Sara pen.

Abraaw pen yewetîn̂e me tî xakn̂e.

Oyantoman̂e mîkro,

kekn̂e tî noro ciin̂o poko rma.

Ero ke Sara pen warai me marha maxe amyamro hara kir̂wan̂he awexitaw so,

erasîn me awexitaw so marha.

Ero ke ero wa xa ehcoko.

7 Taa,

iin̂o komo,

on wara wîîkes awya so hara,

takîhso mak ehcoko apici komo poko etîhyawno me awexirî ke so.

Kar̂pera n̂he naxe wooxam komo.

Ero ke ponaro ehcoko.

On wara kacoko,

Cihye oyexirî ke mak owakresî Kaan omxîkrî ke.

Ero ke kir̂wan̂he ciri xe was opici,

kacoko.

Ero wa xa ehcoko apici komo poko kir̂wan̂he amtapotachome so tak Kaan yakro.

Ero wa ehcoko.

8 On wara marha wîîkes awya so,

yohno mak tak kîmtapowas awakro so.

On wara ehcoko ahnoro mak,

kîrkomo,

wooxam komo marha,

iito re yîhtînon̂e me mak ehcoko.

Etpînîn yaw marha ehcoko.

Etîxe marha ehcoko awakno komo xe maxe ero wa xa marha apoyino komo xe ehcoko.

Cesemetanmesom komo pînîn yaw marha ehcoko.

Ayopono wara encoko apoyino komo.

9 Awemetanmekn̂e komo poko esepanpîra ro mak ehcoko.

Awîrîyakan̂e komo poko marha esepanpîra ehcoko.

Kaanî nakronomarî me awexi xe so wasî,

kacoko xa matko yîwya so.

Ero wa kan̂e me wa awan̂ikyatken̂e so Kaan.

Ero wa ketaw awya so Kaanî nakronomarî me tak maxe amyamro hara.

10 On wara rma kesî Kaan Karitan ero yipu poko,

Pahkî waipîn me awexi xe so na mat ha.

Tahworem me roro awexi xe so marha na mat ha.

Ero ke on wara cexpore nasî ero warai me awehtome so,

kicicitho me yîmtapotan me ro mak cexpore nasî,

cemarontan me marha.

11 Kicicme awehtoponhîrî komo tahsîpînkapore marha nasî.

Kir̂wan̂he mak cexpore nasî etpoko.

Tawake mak cexpore nasî mîk hak poko.

Mîk hak tawakeretopo ponaro xa cexpore marha nasî.

Ero wa cexpore nasî pahkî waipîn me awehtome so,

tahwore roro marha awehtome so.

12 On wara nasî Kporin komo,

kir̂wan komo n̂een̂asî roro.

Yîmtapotarî komo marha n̂encesî takro yîmtapowataw.

Ero wa nasî kir̂wan komo poko reha.

Ero warahra reha nasî kicicitho pokono komo poko.

Noro yipu komo yîwîrîman̂e me nasî Kporin komo.

Ero wa nasî Noro.

Ero ke kir̂wan̂he mak ehcoko,

kesî.

Ero wa kesî Kaan Karitan.

13 On wara marha wîîkes awya so,

kir̂wan̂he roro awexitaw so tooto komo poko onoke ma re awemetanmekn̂e komo me nat hara?

14 Anarimaw so tko na awemetanmekyatu so rma aaxatî pîn komo kir̂wan̂he awexirî komo yanme rma okwe.

Ero wa awir̂ataw so tawake rma ehcoko.

Kaan ya awakrecho komo rma mîn.

Erasîra marha ehcoko aweraspen̂e komo wara yîmtapowataw so.

Ahce wa na oriyatu kopi?

kahra ro mak ehcoko.

15 On wara xa ehcoko,

Kristu mak encoko Aporin komo me Noro mak cewn̂e.

On wara na ket anarî komo awya so,

Ahce ponaro awexirî ke tahwore mai?

ketu na awya so.

Ero wa ketaw awya so esekatîmcoko tak ponaro awehtopo komo poko.

Oroto rma tko yîhtînocoko eyuhtopo komo pohcirwara eyuhtome tak amn̂e awya so.

16 Kir̂wan̂he roro mak ehcoko Kristu yakrono me awexirî ke so.

Ero wara rma awexitaw so tko anarî komo na awîrîyaketu so anarimaw.

Kicicitho mikro,

ketu rma na apoko so.

Ero ke kicicme awehtopo komo yîhtînoyataw na awya so,

ekatîmcoko Kaan ya exihra ro mak ehtome.

Ero wa ehcoko yîhyapamtome tak awîrîyakan̂enhîrî komo.

17 Anarimaw cemetanmesom me awexi xe so rma na nai Kaan.

Kir̂wan̂he awehtopo komo yanme rma na awemetanmekyatu so tooto komo.

Kir̂wan̂he rma maxe ero wara awexitaw so.

Kir̂wan̂he exihra tko maxe kicicme awehtopo komo yanme awesemetanmekyataw so.

18 Kristu meero n̂esemetanmekyakn̂e kir̂wanî rma okwe.

Kicicme kehtoponhîrî komo yepemachome n̂esemetanmekyakn̂e,

Kaan yaka kaatome so.

Waihketken̂e meero okwe tooto komo,

yupun mak ha tko.

Kaan Yekatî rma n̂enpakekn̂e hara.

19 Kaan Yekatî yanme marha Kristu cekn̂e ahruxapu pen komo yekatîtho cheka.

N̂examro ya takî tî n̂ekatîmyakn̂e Kaanî mtapotarî.

20 Kaan yewetîn̂e pînînhîrî komo tî mîkyam xatken̂e.

Pahkî rma tko ka kicicme ehtopo komo nînîmyakn̂e Kaan kanawa yakîhtorî poko exitaw Noe.

Noe komo yukurunpetopo tî mîn xakn̂e kanawa.

8 makî tî n̂etkurunpetken̂e kanawa yaw.

Tuuna chew rma n̂etkurunpetken̂e.

Ero wa tî xatken̂e n̂examro pen.

21 Noe pen komo wara rma taxe kîwyam hara.

Kîwyam marha cetakir̂wamexe tuuna kwaka kemicirî ke so.

Kupun yusmuntho yetowtopo ya kahra tan wasî.

Kropotawno komo korokacho ya xa tan wîîkesî,

Kaan yanwetopo ken̂ehra kiitopo komo ya ha.

Xesus Kristu pakarî ke ero wara kiir̂axe so.

22 Kah yaka takî tî cekn̂e Noro tpakache.

Iito tak nasî ceremaxi Kaan mîtwo kaari n̂ixa.

Ancu komo tak Kaan n̂iir̂akn̂e Noro yewetîn̂e me.

Ancu yantoman̂e komo ero wara n̂iir̂akn̂e,

ahnoro kah yawno komo marha ero wa n̂iir̂akn̂e,

yukurumîkno kom ha.

Noro yipu komo tak naxe Xesus yewetîn̂e me.

Ero wa Kaan n̂iir̂akn̂e noro yipu komo.