Mîn Hak Poko Kpanatanmetopo
4
Ero ke on wara wîîkes hara awya so,
on wara tî xakn̂e Kristu,
tuhn̂em me cexirî ke tak.
Cesemetanmecho nînîmyakn̂e kîpînîn ke so.
Ero ke Noro wara xa marha esehtînocoko amyamro hara.
On wara kacoko,
Ero wa xa marha na kesemetanmekya hara,
kacoko.
On wara taxe kupun yemetanmecho yînîmn̂enho,
kicicme kehtoponhîrî komo tahsîpînkexe tak.
2 Ero ke kicicitho xera n̂he tak taxe.
Tooto komo yepohkacho poko epohkan me tak taxe.
Kaan yanme mak tak kexi xe so taxe miya roro kwaihtopo komo pona roro.
3 Pahkî ro mak tîxatken̂e Xenciu komo yewetîn̂e me mak okwe.
On warainhîrî kîwyam,
tweeno pînînhîrî kîwyam,
kicicitho poko cepohkaxmunhîrî,
twenîmsomînhîrî,
wara ro mak kan̂enho,
wok pokononho,
ciixaputho pokononho,
ero warainhîrî mak kîwyam kica.
Pahkî tîxatken̂e ero yipu poko okwe.
Ero ke n̂eexi tak ero yipu poko kehtoponhîrî komo,
4 Ero yipu pokohra tak maxe oroto.
Ero ke n̂eserepokexe tak apoko so ero yipu pokono komo.
Ahce kacho on pokohra matu amna yakro kica?
kexe tak awya so.
Wara ro mak kan̂e komo mîkyam.
Twara so xa marha awexi xe so tî natu.
Ero ke awîrîyakexe so ero warai mera tak awexirî ke so.
5 Ero pokononho komo men n̂enekesî amn̂e Ken̂ekan̂e ro komo.
Karitî komo n̂en̂ekesî,
waihxapu pen komo marha.
6 Ero ke waixa pen komo meero n̂encetken̂e Kaan ya kakir̂wamacho komo,
tuhn̂em komo wara rma ehtome so.
Etîme re mak kepemexe so Kaan,
waihxapu pen komo,
waipîn komo marha.
Ero ke marha Kaan ponaro tak naxe waihxapu pen komo,
Xesus yewetîn̂enho kom ha.
Ero wa naxe Kaan Yekatî exirî ke yîropotaw so.
Ero wa naxe.
7 Taa,
pahnoke tak men nasî ahce na yehcamnotopo ahnoro.
Ero ke awero ro so men amtapotacoko Kaan yakro.
Ahce na poko yîtwen̂ekarîntara ehcoko amtapowataw so.
Ero wa ehcoko.
8 On wara xa ehcoko kir̂wan̂he xa tak awehtome so,
etîxe xa ehcoko yaaro xa.
Etîxe xa kexitaw so kicicme tooto komo yehtoponho yakpan̂e pîn me mak taxe.
Mer̂pono pînî rma exitaw kicicme ehtoponhîrî ero yipu yakpara mak taxe.
Ero wa taxe etîxatî me kexitaw so.
9 On wara marha ehcoko,
pawana komo yetarî enpocoko.
Mohcow pawana okwe.
Kewrucpexe so mak kica,
kahra ro mak ehcoko.
10 On wara kiir̂atken̂e so Kaan,
anarmerpan pokono ro me kiir̂atken̂e so.
Kwakretken̂e so mak ero yipu ke.
Ero ke awyanî ro poko ehcoko akronomano ciitome.
Ero wa awexitaw so Kaan yanton mexan me maxe okre.
Noro ya kwakrecho komo yekamn̂e wara maxe okre.
11 Ero ke Kaanî mtapotarî yekatîmn̂e me awexitaw so on wara kacoko,
Kaanî mtapotarî xa tan wekatîmyas awya so,
kacoko mak.
Akronomano rin̂e me awexitaw so reha on wara kacoko hara,
Kaan makî cma oyakîrekn̂e onî yipu poko,
kacoko marha.
Ero wa ehcoko ahce na poko awexitaw so,
Kir̂wan̂he xa Kaan nai ham okre,
kachome tak tooto komo awenîrî ke so.
Xesus Kristu pona enîrî ke awya so mak ero wa awen̂axe so.
Ero ke kir̂wanî ro Mîk ham,
kapore nasî Noro poko.
Kayaritomo ro xa Mîk Noro,
kapore marha nasî.
Miya roro ero wa kapore nasî Xesus Kristu poko yîtîhkan me ro mak.
Amen.
12 Taa,
on wara wîîkes hara awya so oyakno komo,
mesemetanmekyaxe rma amn̂e okwe.
Cerewrem xa mîn awesemetanmetopo komo okwe,
wehto warai mak oco.
Akukmacho komo makî tko mîn.
Ero ke eserepokatîkara mak ehcoko ero yipu poko.
Okwe,
ahce kacho on warai ke kesemetanmekya,
kahra ro mak ehcoko.
13 Ahwotacoko xa matko ero wa awesemetanmekyataw so.
On wara mak kacoko,
Kristu wara rma tan wasî cesemetanmesom me,
kacoko mak.
Tahwore rma ero yipu yînîmyataw awya so mahwowaxe xa tak amn̂e Kristu mokyataw kir̂wanî ro me.
14 Anarimaw awîrîyaketu so na tooto komo Kristu yakrono me awexirî ke so mak.
Ero poyero mak awîrîyaketaw so Kaanî nwakrerî me rma maxe okre.
Kaan Yekatî nasî awakronoman̂e komo me,
Kir̂wanî ro Yekat ha.
Kicicme ro mak nîmtapowaxe n̂examro reha Noro poko.
Kir̂wanî ro Mîk ha,
mîîkexe amyamro reha.
Ero ke tahwore rma maxe awîrîyaketaw so.
15 Ero warahra men maxe okwe kicicme awehtoponhîrî komo yanme rma awemetanmekyataw so.
Ero ke tooto waparî me exihra men ehcoko,
cen̂epan̂em me exihra marha ehcoko,
emetanmekno rin̂e me exihra marha ehcoko,
Kopi,
on wara nasî noro kopi,
kan̂e me exihra marha ehcoko.
Ero wa so exihra ro mak ehcoko.
16 Kristu yakrono me awexirî komo poyero makî tko awemetanmekyataw so ahwokara rma ehcoko.
Kir̂wan̂he Kaan nai ham okre.
Noro yanme rma on wara wai ham,
kacoko mak.
Ero wa kacoko awemetanmekyataw so.
17 Oroto ka nasî Kaan mîn warai me cehsom komo panaretopo me.
Ero warai komo poko Noro n̂ihciyasî panareno ritopo.
Anarî komo reha Kaanî mtapotarî nanwekyaxe okwe,
kakir̂wamacho pokono.
Ero ke ahce wa xa tak natu noro yipu kom hara kopi epemano ritopo me exitaw hara?
18 On wara kesî Kaan Karitan,
N̂esemetanmekyaxe rma ha re kir̂wan komo.
Ero ke ahce wa tak natu Kaan ponarono pîn kom hara kopi?
Miya xe xa tak naxe Kaan n̂emetanmekrî me kopi,
kesî.
19 Anarimaw Kaan yanme rma mesemetanmekyaxe.
Ero wa awexitaw so on wara kacoko,
Kaan pona mak ween̂asî.
Noro rma okurunpesî.
Kakîhton̂enhîrî komo Mîkî,
kemîknon̂e pînî ro mak ha.
Ero ke kir̂wan poko rma wasî,
kacoko.
Ero wa xa kacoko.