On wara wîîkes hara awya so,

Kaan mîn yenîn̂e komo amyamro.

Noro yipu xa marha ow hara.

On warai marha ow ha,

Kristu yemetanmetoponho yenîn̂enho ow ha.

Kir̂wanî ro me esenpotoponhîrî yenîn̂enho marha ow.

Ero warai me esenpotopo ween̂asî xa hara amn̂e,

kir̂wanî ro me xa hara.

Noro yehtopo yenînenho ow.

2 Ero ke on wara wîîkes awya so,

oper̂a warai mîkyam Kaan xîkrî komo,

yîchew so maxe,

n̂examro.

N̂examro yenîrî poko ehcoko.

On wara kahra ehcoko,

Kaan xîkrî yenîn̂e me orice thakwa okwe,

kahra ehcoko.

Opurantan yahsîtome mak enîn̂e me wasî,

kahra marha ehcoko.

Tahwore mak ehcoko Kaan xîkrî komo yenîrî poko.

3 On wara marha kahra ehcoko an̂enîrî kokmo me ciixapu komo poko,

Kaan xîkrî komo kayaritomon xa ow ha,

kahra ehcoko.

Kir̂wan̂he makî tko esenpocoko yîwya so apoko so tak pohnîmtome so.

4 Ero wara roro awexitaw so awarokorî komo warai tak mahsîyaxe amn̂e Kaan xîkrî komo Yenîn̂e ro mokyataw ha.

Kir̂wanî ro mîn anahsîrî komo,

ehcamnopînî ro mak ha.

Ero yipu mahsîyaxe.

5 Taa,

amyamro hara poritomo me exihnî komo ka,

on wara wîîkes awya so hara,

poritomo komo mtapotarî yewetîn̂e me ehcoko.

Cesewetîsom me ehcoko etpoko.

Ahnoro rma ero wa ehcoko,

poritomo komo meero.

Anarî komo xawyakan me marha esehtînocoko.

On wara kesî Kaan Karitan,

Anarî komo yopo cesehtînosom komo yehn̂anmekn̂e me nasî Kaan.

Anarî komo xawyakan me cesehtînosom komo reha nakronomesî,

kesî.

6 Ero ke Kaan mamawno me ro mak esehtînocoko.

Kaan xa tko yîhtînocoko karitî ro me tak,

ayopono komo me xa.

Ero warai me awesehtînopuche so takîhsom me rma tak awenpexe so hara Kaan amn̂e ero wa awitopo komo me exitaw tak.

7 Ahce na poko awesewrucpetaw so Kaan pona tak eserepotanmecoko.

Oponarono rma Mîk Kaan,

kacoko cerepore awehtome so.

8 On wara marha ehcoko,

twerî ehcoko.

Awar̂ma xe so men nasî Ciabu.

Reaw wara n̂etar̂asî miya so keporîrî komo poko.

Kpoko so expora ro mak nasî,

keska xatî wara.

Mayanasî ro mak kopi reaw wara rma.

9 Noro men en̂epecoko Xesus pona entopo ke awya so.

Awesemetanmekyataw so on wara mak kacoko,

On wara xa marha naxe oyakno kom hara miyan komo rma roowo poko hakno komo,

kacoko mak ha.

Ero wa kacoko.

10 Taa,

kwakren̂e komo xa Mîk Kaan,

miyan komo ke rma kwakrene kom ha.

Awan̂ikn̂enhîrî komo rma Mîk Kaan tînakir̂wamarî me.

Miya roro kakir̂wamexe so Xesus Kristu yawno ro me kexirî ke so.

Mesemetanmekyaxe rma ka okwe.

Ero yinhîrî tak awakir̂wamexe so xa tak okre.

Kicicitho ken̂arî pînî ro me tak awir̂axe so,

emacakan me ro mak marha,

karitî me marha,

mîk hak poko pohnîmnî me marha.

Ero wara tak awir̂axe so.

11 Ero ke on wara kapore nasî Kaan ya,

Kir̂wanî ro xa Amoro ham Apa,

kayaritomo xa Amoro,

kapore nasî.

Ero wa kapore nasî miya roro,

N̂eexi tak,

kacho mera ro mak.

Amen.

12 Taa,

tan nasî Siwpanu oyakro.

Kakno komo me xa ween̂asî noro kpoko so eponarononkanî ro me mak.

Noro ya tan mewrepo omtapotarî an̂enîrî komo.

Wahra mak tan mewrepo yîwya,

awahworetopo komo mak.

On wara kacho tan mewrew,

Kaan ya kwakrecho komo xa mîn,

ponaro maxe ero.

Anarî ya kwakrecho pînî ro mak ha.

Ero ponaro rma tî matu etowîn me,

kacho mak tan mewrew an̂enîrî komo.

13 On wara marha wîîkes awya so,

aponaro so tî natu tantono komo Babiron̂a pono komo.

Kir̂wan̂he rma mat iito?

kexe awya so.

Kaan nmen̂ekatho komo moxam awarai komo rma.

Omumuru marha tî nai aponaro so,

Mahkus ha.

Ero wa tî natu tantono komo aponaro so.

14 Aweseporîche so tak esewcokacoko etpînîn yawno me.

On wara mak wîîkes awya so,

Kristu Xesus yakrono ro komo ya,

ahwokan me mak awexi xe so wasî.

Amen.