On wara wîîkes hara awya so oyakno komo,

on okaritan mewresî ahyakan komo.

Pahxa apanatanmetopo komo mewrekn̂e,

ero poko rma mewresî xa hara tan.

Kir̂wan poko cesehtînosom amyamro.

Wara rma an̂entathîrî komo poko rma kpanatanmekyaxe so xa hara.

2 Pahxa mencetken̂e weronomano rin̂e pen komo mtapotarî,

Kaan yantonî ro komo mtapotarî ha.

Amna ya apanatanmetoponhîrî komo marha mencetken̂e.

Kporin komo nantomatho amna,

kakir̂waman̂e komo nantomatho ha.

Noro yipu amna apanatanmekyatken̂e so.

Ero ponaro xa awexi xe so nas amna.

3 Yihcirî me ka on wara wîîkes awya so,

Xesus mohtopo pahnoke exitaw amn̂e Kaan yanwekn̂e komo tak mokyaxe acheka so.

Tupun komo yepohkacho ponaro mak naxe.

Ero poko roro naxe okwe.

4 On wara kexe,

Ahto nai hara,

Kmokyasî,

kmokyasî,

kan̂enho awya so?

Pahxa rma kporin pen komo waihtoponho n̂ixa ro rma ero wara roro mexe nasî roowo,

kaapu,

tooto komo,

ahnoro mak.

Anarî me exihra ro mak nasî akîhtotoponhîrî n̂ixa ro rma.

Ahto ma re nai tmohsom hara awya so?

kexe mak okwe.

Ero wa kexe okwe.

5 Twen̂ekarî mak naxe on wara kacho poko,

Pahxa Kaan nakîhcekn̂e kaapu,

roowo marha.

Tîmtapotarî ke rma nakîhcekn̂e.

Akîhtoche on wara xakn̂e roowo,

yîraconhîrî tî xakn̂e turpe,

yîraconhîrî tî xakn̂e hara tukmaxi.

Ero wa akîhtotoponhîrî poko naxe twen̂ekarî tanme ro so rma kica.

6 Noro mtapotarî yanme rma nukmetîkekn̂e takî tî ero yimawnonho roowo pen ahnoro.

Yiipononhîrî pen komo tak n̂enor̂atken̂e ahnoro okwe.

7 Noro mtapotarî yanme marha nasî rma ka kaapu mko,

roowo marha.

Noro rma ka nîmcesî akn̂itome amn̂e.

Amn̂e tak Kaan ponarono pîn komo yen̂ekacho me tak n̂enmayasî.

N̂examro pen tak nîhcamnoyasî Kaan.

Ero yimaw tak roowo n̂ecakyasî,

kaapu marha.

8 On wara tko wîîkes awya so oyakno komo,

kwarahra so nasî Kaan.

On wara nasî Noro,

pahkîno wa nasî yîwya cewn̂e kaamo rma.

1.000 cimn̂ipu wara rma nasî yîwya okyo cewn̂e kaamo rma.

On wara marha nas hara,

yohnono wara rma nasî yîwya pahkîno hara.

Cewn̂e kaamo wara mak nasî yîwya 1.000 cimn̂ipu hara okyo.

Ero wa Kaan yehtopo ponaro rma ehcoko.

9 Ero ke ecmamra rma nasî Kporin komo tîmtapotachonhîrî poko,

Kmokyas hara amn̂e,

kachonho poko.

Cecmamsom wa mak nasî anarî komo ya mak.

Tooto komo pînîn yaw tko nasî Kaan.

Cewn̂an waipu xera rma nasî.

Kicicme ehtoponhîrî komo poxunka xe mak nasî yîwya so ahnoro.

Ero ke mokuhra ka nasî.

10 N̂enmayasî rma men wa ha amn̂e roowo yakn̂itopo Kporin komo ya,

kaapu yakn̂itopo marha.

Cen̂epan̂em mokyasî kosope esehtînopîn me,

ero wara rma n̂enmayas amn̂e.

Ero po tak kaapu pen n̂ehcamnoyas okwe.

Kpanaikoton̂e me n̂ehcamnoyas oko.

Kah yawnonhîrî marha nuxukrapamayasî ocoro xa exirî ke.

Roowo pen n̂ecakyasî,

yiipononhîrî pen marha n̂ecakyas ahnoro mak.

11 Ero wa tak n̂ecakyasî ahnoro makî.

Ero ke ahce wa xa cexpore nai awya so?

Kir̂wan poko mak cexpore nasî,

Kaan ponaro mak cexpore nasî.

12 Kaan kamon me enmacho ponaro marha ehcoko.

Ero me enmacho yerekanmekn̂e me n̂he marha ehcoko.

Ero po tak kaapu penî mko n̂ecakyas okwe wehto ke,

porinî ro ke oco.

Ahnoro mak nuxukrapamtîkesî ro mak ocoro xa cexirî ke oco.

13 On wara tko tî kekn̂e Kaan,

Yaxan tak wakîhces amn̂e kaapu hara.

Roowo marha wakîhcesî yaxan hara.

Kir̂wan komo yeken me mak tak wakîhcesî,

kekn̂e.

Ero ke ero yimaw tîmtapotachonhîrî yaw roro rma tak nakîhces ha.

14 Ero ke oyakno komo,

ero yipu ponaro awexirî ke so on wara tak ehcoko,

Tahworem me awehtopo komo ponaro xa ehcoko.

Esmuren me marha ehcoko,

Kicicme maxe kica,

kacho mera ro mak tak awehtome so.

Ero wa ehcoko kir̂wan̂he awentome so Xesus amn̂e tmokyataw.

15 On warai me marha Kporin komo yîhtînocoko,

pahkî ka kicicitho komo nînîmyasî.

Yîpînîn yaw so ka nasî.

Akir̂wama xe so mak nasî waipîra ehtome so.

Ero wa nasî Kporin komo.

Ero wa Noro yehtopo poko mewrekn̂e kakno kom hara,

Pawru.

Kaanî rma ero yipu n̂ekatîmyakn̂e yîwya mewretome.

Ero ke tak mewrekn̂e an̂enîrî komo me.

16 Yaake nasî Pawru karitan an̂enîrî komo.

Kaan ya kakir̂wamacho komo poko roro mewrekn̂e.

Yuhnari tko nasî Pawru nmewretho anarimaw so.

Ero yipu naknamexe mak kica anarî komo.

Etwîrîmacho komo me nas okwe ero wa aknamacho.

Pawru nmewretho mko naknamexe,

anarî komo nmewretho marha okwe.

Yaarono mera tak n̂iir̂axe Kaan karitanînhîrî rma okwe.

Camkîno komo mak mîkyam ero wa aknaman̂e komo.

Ero pîntho poko tpohnîmsom me mak naxe kica.

Ero wa Kaan Karitan naknamexe noro yipu komo okwe.

17 Noro yipu komo yehtopo mencetken̂e amyamro pahxa rma.

Ero ke noro yipu komo poko men twerî ehcoko.

Yîmtapotarî komo yewehcataw awya so Kaan pona tak men menîhkayaxe okwe.

Mewehcatu tak na okwe,

anarmen poko apanatanmekn̂e komo.

Kicicitho komo mîkyam kica ero wa apanatanmekn̂e komo.

Noro yipu poko twerî ehcoko.

18 On wara xa matko ehcoko,

ehcamhokatîkacoko n̂he Kaan ya kwakrecho komo poko.

Miyan poko rma ehcamhokacoko ahce wa so na Xesus Kristu yehtopo poko.

Kporin komo Mîk Noro,

kakir̂waman̂e xa.

On wara wîîkesî Noro poko,

Kir̂wanî ro xa Mîkî.

Ero wara kapore nasî Noro poko oroto,

miya roro.

Yîtîhkan me ro mak ero wa kapore nasî,

wîîkesî.

Amen.