Roowo Pono Ro Komo Yopono Me Taxe Kaan Pona Enîrî Ke Mak Kîwya So
5
On wara marha wîîkes awya so,
Kristu xa Mîk Xesus,
kacho ponaro kexitaw so Kaan xîkrî me taxe.
Taa,
Yîîm xe kexitaw so yîmxîkrî komo xe marha taxe hara.
2 Ero ke Kaan xe cexpore nasî,
Noro ya kpanatanmetopo cewetpore marha nasî.
Ero wa kexitaw so,
Kaan xîkrî komo xatî ow ham,
tîtkexe tak.
3 On wara taxe Kaan xe kexitaw so,
Noro ya kpanatanmetopo komo cewehcaxe.
Kir̂wan mîn Kaan ya kpanatanmetopo,
kpokaren̂e pîn me nasî.
4 Ahnoro Kaan xîkrî komo naxe roowo pono ro komo yopono me.
Kîwya so Kaan pona entopo xa nasî iyopono me so kiin̂e me.
5 Ahce wa kan̂e komo xa natu roowo pono ro mko yopono me ha?
Kaan Mumuru xa Mîk ham Xesus,
kan̂e komo xa naxe ero yipu yopono me.
Ero ke ero wa kapore nasî Xesus poko.
6 Roowo pona mohxapu Mîk Xesus,
Kaan yanme mohxapu xa.
Ero ke ero warai me cesenpotome tuuna kwaka n̂emihcakn̂e,
n̂ekamxukekn̂e marha.
Kir̂wanî ro Yekatî rma ero warai me n̂ekatîmyasî kîwya so yaarono me cexirî ke.
7 Osorwaw rma tko nasî kah yawno komo,
ero warai me re ekatîmn̂e komo,
Yîîm,
Kaanî mtapotarî me cehsom,
Kir̂wanî ro Yekatî.
Noro re me cehsomu rma mîkyam.
8 Osorwaw marha nasî roowo pono kom hara,
ero warai me re ekatîmn̂e kom hara,
Kaan Yekatî,
tuuna,
Noro kamxukutho,
ero wa.
Iito re cesehtînosom me naxe noro yipu komo.
9 Ero ke yîn̂ekatîmîthîrî ponaro cexpore nasî.
Tooto mtapotarî rma re cewehcaxe tîn̂enîthîrî yekatîmyataw kîwya so.
Tooto yopono ro takî tko Mîk Kaan.
Ero ke yîmtapotarî xa cewetpore nasî,
Yumumuru pokono ha.
10 Ero wa kacho ponaro rma taxe Kaan Mumuru pona enîn̂e me kexitaw so,
Kaan Mumuru xa Mîk ham Xesus,
kacho ponaro taxe.
Anarî komo reha Kaanî mtapotarî nanwekyaxe okwe,
Tumumuru poko yîmtapotarî ha.
Cemaronwasî mak Kaan kica,
kan̂e wa mak naxe ero wa kacho yanwekyataw okwe.
11 On wara kesî Kaan kîwya so,
Waipîn me awehtopo komo wîmye awya so.
Omumuru ponarono komo ya ero yipu wîmyasî,
kesî.
12 Ero ke Kaan Mumuru exitaw kropotaw so waipîn me tak taxe.
Kaan Mumuru exihra exitaw kropotaw so waipîn me exihra rma taxe okwe.
Ero wa taxe.
13 Taa,
Kaan Mumuru yosotî pona enîn̂e komo amyamro.
Ero ke on mewresî an̂enîrî komo,
Waipînî ro me wai ham,
kachome tak awya so.
Miya xe xa tak Kaan pona enîn̂e me awehtome so marha tan on mewresî karita.
14 On warai me marha Kaan tîhtînoyaxe,
kîmtapotarî yentan̂e me tîhtînoyaxe.
On xe cma re was Apa,
ketaw kîwya so kencexe so.
Noro yanme ketaw mak kîwya so kencexe so.
Ero wa kentan̂e me Kaan tîhtînoyaxe.
15 Ero ke,
Omtapotarî n̂enta ham,
ketaw kîwya so on wara marha tîtkexe,
Wahsî ham,
On xe cma re wasî Apa,
kachonho owya,
tîtkexe ha.
Ero wa tîtkexe.
16 Taa,
on poko kîmtapowas hara awakro so,
Kicicme takno yehtopo na n̂een̂a awakrono komo.
Kwaihkacho pîn poko na nai anarimaw.
Ero ke tîmtapotapore nasî noro poko Kaan yakro.
Noro yipu tak kar̂pe Kaan n̂iir̂asî amtapotarî komo yanme.
Kwaihkan̂e poko exitaw reha okwe,
Noro poko tîmtapotapore nasî,
kahra tak wasî noro yipu poko okwe.
17 Anarmerpan me nasî kir̂wan pîn me kehtopo komo.
Kicicme nasî Kaan ya ahnoro rma kicicme kehtopo kom ha.
Anarî tko nai ha re kicicme kehtopo komo,
kwaihkan̂e pînî rma.
18 On wara naxe Kaan xîkrî komo,
kicicme cehtopo komo poko roro exihra naxe.
Kukurunpen̂e ponaro ro xa matko naxe noro yipu komo.
Kicicitho nîwîrîmarî me exihra ro mak naxe.
19 Kaan yanme cehsom kiwyam ham,
tîtkexe yaaro rma.
Ero warai mera reha tîhtînoyaxe tooto komo,
roowo poko hakno komo.
Kicicitho yanton me thakwa naxe okwe n̂examro reha.
20 On wara kan̂e me marha taxe,
Kaan Mumuru xa mokye oona takîhso kiin̂e.
Ero wa kiir̂axe so,
Kaanî rma Mîk Yaarono,
kachome kîwya so.
Noro yakrono ro me taxe.
Yumumuru Xesus Kristu yakrono ro me marha taxe,
yaarono yakrono ro me hara.
Kaanî rma Mîk hara Yumumuru.
Ponaro kehtopo ro Mîk Noro,
yaarono xa.
Waipînî ro me kiin̂e Mîk Noro.
21 Taa,
on wara mak tak wîîkes awya so okopuci komo,
anarî ro komo cirihra men ehcoko ponaro awehtopo ro komo me.
Ero wa mak wîîkes awya so.
Amen.