Ero yimaw mer̂pono pîn komo xatken̂e iito Xesus yaka mohxapu komo.

Pahkî tî xatken̂e Noro yakro.

Yînapumra so tko tî xatken̂e okwe.

Ero ke tînpanatanmekrî komo takî tî nan̂ikyakn̂e Xesus.

2 On wara tî kekn̂e yîwya so,

Moxam pînîn yaw was okwe.

Osorwaw ro n̂enmace tan ohyaw.

Yînahrî komo exihra tak nas okwe.

3 Eseresmara rma en̂epe xera so wasî yîmîn komo yaka.

Ero wa en̂epetaw owya n̂ekar̂ketu men okwe esama yaw rma.

Meyeno komo moxam anarî komo,

kekn̂e tî Xesus yîwya so.

4 Okyo,

ketken̂e tî yînpanatanmekrî komo yîwya.

Ahtono ma re ceen̂at okwe iyuru komo?

Tan thakwa taxe pohnîntaw okwe,

ketken̂e tî.

5 Atararo tko nai cuure ahyaw so?

kekn̂e tî Xesus yîwya so.

7 mak nas okwe,

ketken̂e tî yînpanatanmekrî komo.

6 Ero ke takî tî eremanmekno n̂iir̂akn̂e Xesus roowo pona.

Ero yinhîrî cuure nanîmyakn̂e 7 mko ha.

Kaan yakro tî ka nîmtapowakn̂e cuure poko,

Kir̂wan̂he nas on amna yuru Apa,

anmîthîrî,

kekn̂e.

Ero wa kache poikekn̂e takî tî.

Tînpanatanmekrî komo ya takî tî nîmyakn̂e.

N̂examro takî tî n̂ekamyatken̂e tooto komo iyuru.

7 Ootî cik marha tî xakn̂e yîhyaw so asakî mak,

wahrai komo cik mak okwe.

Ero poko cik marha tî Xesus nîmtapowakn̂e Kaan yakro.

Ero yinhirî takî tî tînpanatanmekrî komo ya tî nîmyakn̂e hara.

Ehe,

on marha ekamcoko hara,

kekn̂e tî yîwya so.

8 Ero ke n̂eseresmetken̂e taki tî tooto komo tmaxmitaxi ro.

Ero yinhîrî takî tî kahxapu yaka so etîmtoxapunhîrî namekyatken̂e hara yînpanatanmekrî komo.

7 tî xakn̂e een,

porinî rma tî.

Ero wicakî tî namekyatken̂e etîmtoxapu.

9 4.000 tî mîkyam xatken̂e ceseresmaxmu komo.

Eseresmache so takî tî n̂examro n̂en̂epekn̂e Xesus totohme so hara.

10 Toche so rma tak kanawa yaka takî tî n̂esenkayakn̂e Xesus,

yînpanatanmekrî komo marha.

Tawmanuta pona takî tî cetken̂e.

Ero wa tî cetken̂e.

11 Ero yinhîrî tak Parisew komo makîrha takî tî mokyatken̂e Xesus yaka.

Noro yakro tî nîmtapowatken̂e anwekn̂e me kica.

On wara tî ketken̂e yîwya,

Apa,

cirihnî ika cirko amna wero ro,

Kah yawno yanmen ham Moso,

kachome tak amna apoko,

ketken̂e tî yîwya.

Xesus yukukma xe makî tî wa xatken̂e kica.

12 Ero ke Xesus takî tî n̂ehsesakn̂e xa hara pokaxapu wara ro mak.

Ahwora xakn̂e tîropotaw.

On wara tî kekn̂e yîwya so,

Ahce kacho kah yawno yanme oyehtopo kuknon yenî xe matu amyamro,

apoyino komo marha?

Yaaro tan wîîkes awya so,

ero warai me oyehtopo kuknon yenpora ro mak nasî Kaan awya so,

kekn̂e tî yîwya so.

13 Ero yinhîrî tak yîhyai so takî tî cekn̂e Xesus.

Kanawa yaka takî tî n̂esenkayakn̂e hara.

Eeco pona tî cekn̂e tînpanatanmekrî komo yakro.

14 Ero yinhîrî kanawa yaw tîcetaw so,

poramra thakwa tî cetken̂e okwe.

Cewn̂e cik makî tî xakn̂e cuure yîhyaw so.

Twen̂ekarî makî tî xatken̂e yînpanatanmekrî komo tuuru komo poko.

15 Ero yimaw on wara tî kekn̂e Xesus yîwya so,

Kicicitho ke men tuuru komo wahrututpamnoyaxe Parisew komo,

Eroces marha.

Ero ke ero yipu pokohra ro mak men ehcoko amyamro reha,

kekn̂e tî yîwya so.

16 Ero wa kacho yentache on wara tî n̂esencetken̂e yînpanatanmekrî komo.

Ahce kacho ero wa nîîke kiwya so?

Poramra kexirî ke so kyam na mîn nîîke ha,

ketken̂e tî.

17 Esentacho komo rma tko tî nîhtînoyakn̂e Xesus.

Ero ke on wara tî kekn̂e yîwya so,

Ahce kacho poramra awexirî komo poko mesencet ha?

Camkî rma ma mat okwe,

omtapotari yentan̂e mera ma mat okwe?

Ceipuru wara rma ma nai ke aropotarî komo?

kekn̂e tî.

18 Cewkemu cma re amyamro.

Ahce kacho enîhra mat okwe?

Tpanakem marha cma re amyamro.

Ahce kacho entara mat okwe?

Ahce kacho twen̂ekarî mat ha an̂enîthîrî komo poko?

19 Pahxa 5 cuure mak poikekn̂e 5.000 komo yuru me.

Ero yinhîrî atararo een marîhcatken̂e akwenhîrî ke awya so?

kekn̂e tî yîwya so.

12 een ha,

ketken̂e tî n̂examro.

20 Taa,

7 cuure marha poikekn̂e hara 4.000 komo yuru me hara.

Ero yimaw marha etîmtoxapu mamekyatken̂e hara kahxapu komo yaka,

porin komo yaka rma.

Atararo tak xakn̂e een ero yimaw hara?

kekn̂e tî yîwya so.

7 een hara,

ketken̂e tî n̂examro.

21 Ahce kacho ero yipu poko camkî rma mat okwe?

kekn̂e tî Xesus yîwya so.

Ero wa tî kekn̂e.

22 Ero yinhîrî takî Becsaita pona takî tî nawomyakn̂e Xesus.

Iito exitaw ewuhnî tî n̂ekyatken̂e iitono komo Xesus yaka.

Moso poko cma re teme mîîkesî,

ketken̂e tî yîwya.

23 Ero ke ewuhnî takî tî naar̂akn̂e Xesus amorî poko.

Ewto poi tî naar̂akn̂e moro na mak.

Ero yinhîrî takî tî n̂etakwakn̂e noro yewru pore.

Teme kekn̂e marha tî ewru poko.

Meen̂a tak ha re?

kekn̂e tî Xesus yîwya.

24 N̂esewyar̂akn̂e takî tî.

On wara tî kekn̂e,

Tooto cma re tan ween̂asî.

Weewe wara makî tko ween̂asî cetarisom wara ha re,

kekn̂e tî.

25 Ero yinhîrî teme kekn̂e xa hara noro yewru poko.

Ero yinhîrî takî tî tooto wece n̂een̂akn̂e xa hara ewuhnînhîrî.

Kir̂wan̂he takî tî n̂een̂akn̂e ahnoro mak okre.

26 On wara tko tî kekn̂e hara Xesus,

Amîn yaka mak etok hara.

Ewto pona tohra esko.

Iitono komo ya ekatîmra ro mak esko,

kekn̂e tî yîwya.

Ero wa tî kekn̂e Xesus yîwya.

27 Ero yinhîrî tak miya n̂he takî tî cekn̂e Xesus Sesareia Piripe pona.

Tînpanatanmekrî komo yakro rma tî cetken̂e.

Yaake nai iito ewto ciki,

iitono mko pona tî cetken̂e.

Esama yaw rma ka cetaw so on wara tî kekn̂e Xesus tînpanatanmekrî komo ya,

Onoke warai me kyam ohtînoyatu tooto kom ha?

kekn̂e tî yîwya so.

28 Xuaw Bacista Mîk owya,

ketu anarî komo apoko,

ketken̂e tî yîwya.

Erias Mîk ha owya,

ketu anarî kom hara apoko.

Weronoman̂enho pen komo poyino na Mîk owya,

ketu anarî kom hara apoko,

ketken̂e tî Xesus ya.

29 Taa,

amyamro hara,

ahce wa mîîketu amyamro hara opoko?

kekn̂e tî Xesus yîwya so.

Kristu xa Amoro ha,

kekn̂e takî tî Petru yîwya.

30 Taa,

ero wa oyehtopo ekatîmra ro mak men ehcoko,

kekn̂e tî Xesus yîwya so.

Ero wa tî kekn̂e.

31 Ero yinhîrî tak on wara tî kekn̂e hara Xesus tînpanatanmekrî komo ya,

Emapona n̂esemetanmekyas amn̂e okwe Tooto me Ewruxapu.

Yiixera ro mak tak n̂ehtîkexe Xutew poritomon komo,

tîmsom pokono yenîn̂e komo marha,

Xutew panatanmetopo mewren̂e komo marha.

Ero ke tak Noro pen waihkexe.

Amn̂e tko pakes hara osorwaw ro enmapuche,

kekn̂e tî.

32 Ero wa tî kekn̂e Xesus,

kir̂wantaw tî n̂ekatîmyakn̂e twaihtopo.

Ero ke anana n̂he takî tî Noro naar̂akn̂e Petru anarî komo yai.

On wara tî kekn̂e yîwya,

Ero wa kahra ro mak esko Apa,

kekn̂e tî.

33 Ero yipu yentache n̂esewkor̂mekn̂e takî tî Xesus.

Tînpanatanmekrî komo wece tî n̂een̂akn̂e.

Ero wa cexiche on wara tî kekn̂e Petru ya,

Omkai kr̂a etok ha amoro Satanas.

Kaan yanmen ponarora ro mak mai ham.

Tooto yanmen ponaro mak mai ham okwe,

kekn̂e tî yîwya.

Ero wa tî kekn̂e Xesus Petru ya.

34 Taa,

iitono komo takî tî nan̂ikyakn̂e Xesus,

tînpanatanmekrî komo marha.

On wara tî kekn̂e yîwya so,

Owenari roro amoku xe awexitaw so yiixe awehtoponhîrî komo tak yîpînînkacoko.

Anarîrî ro komo marha anîmcoko tpanaxkem.

Ero wa awexitaw so tak oyakro amohcoko.

35 On wara na natu anarimaw owenari tmohsom me cexi xatî komo,

Yiixe xa cehtopo komo yîpînînkara rma na natu.

Ero wa cexitaw so nahsîpînkexe rma thakwa amn̂e okwe.

Anarimaw na nîpînînketu rma ooxe cexirî ke so mak,

owya akir̂wamano ritopo yekatîmtome marha.

Ero wa exitaw so reha yîhyaw so rma tak nasî yîpînîn yaw cehtopo komo okre.

36 Ahce wa nai tooto ahnoro roowo pono yahsîtîkache,

tawake ma re nai noro yipu cehcamnosom me mak exitaw ekatî?

Pîra thakwa okwe,

tawake exihra ro mak nas okwe.

37 Ahce ma re tooto yekatî yepetho yecenarîno me nai awya so?

Pîra ro mak okwe.

38 Anarimaw na mîhyapamyatu oyakrono me awesekatîm xera so.

Omtapotarî yekatîm xera marha na matu ahyapamrî ke so.

Kicicme rma re naxe apoyino komo.

Cipici komo yai cetowsom me marha naxe kica.

Noro yipu komo chew na mîhyapamyatu okwe.

Ero wa awexitaw so Tooto me Ewruxapu makîrha tak nîhyapamyasî amn̂e takrono me awetaci xera so hara.

Kir̂wanî ro me n̂esenpesî Noro tmokyataw oona hara amn̂e.

Apapa wara xa marha n̂esenpesî kir̂wan me xa tak.

Kir̂wanî ro komo yakro marha mokyasî ancu komo yakro.

Ero yimaw Noro nîhyapamyas hara.

Oyakrono komo moxam,

ka xera nasî apoko so hara,

kekn̂e tî Xesus yîwya so.

Ero wa tî kekn̂e.