1-2 Taa,

ero yinhîrî takî tî Xesusu yaka mokyatken̂e Parisew komo,

Xerusaren pono komo.

Xutew panatanmetopo mewren̂e komo yakro rma tî mokyatken̂e.

Xesusu npanatanmekrî komo takî tî n̂een̂atken̂e,

Kicicme tî n̂een̂atken̂e esemokara rma eseresmarî komo.

3 Ero wa eseresmara ro mak naxe Parisew komo reha.

Tporin pen komo mtapotachonho yaw roro rma n̂esemokexe n̂examro,

on wara esemokacoko,

kachonho yaw roro.

Ero wara esemokara cexitaw so ka eseresmara ro mak naxe.

Ero wa xa marha naxe Xutew komo ahnoro.

4 Kwarawantacho yai tmokuche so eseresmara ro mak naxe esemokara ka cexitaw so.

Miya rma nai n̂examro porin pen komo mtapotachonho yîn̂ewetîrî komo.

On wara ketken̂e,

On wara men tackorokapore nasî parakwe,

tahrem marha.

Er̂mo kahxapu marha nasî tackorokapore,

kuripara ciixapu marha.

Awapon komo meero korokapore nasî,

aweseremacho komo,

ketken̂e tî.

Ero wa kachonho yaw roro rma naxe.

5 Ero ke Xesus yakro takî tî n̂esencetken̂e Parisew komo,

Xutew panatanmetopo mewren̂e komo marha.

On wara tî ketken̂e yîwya,

Ahce kacho poritomo penî mtapotachonho yewetîra natu hara anpanatanmekrî komo?

Esemokara rma n̂eseresmexe kica,

ketken̂e tî yîwya.

6 Yîmtaka so tko tî Xesus n̂eyukyakn̂e hara on wara.

Kir̂wan wa cesenposom komo mak amyamro tohnaw ro mak kica,

Yaaro xa kekn̂e Isaias pen apoko so.

On wara kacho mewrekn̂e,

Oponarono wara mak nîmtapowaxe moxam tohnaw ro mak kica.

Ooxera ro mak naxe okwe.

7 Oporinî ro xa Amoro,

kexe ha re owya tohnaw mak kica.

Tooto mtapotarî poko mak n̂epanatanmekyaxe kica,

kekn̂e tî Isaias pen.

Ero wara kekn̂e Isaias pen apoko so.

8 Kaan ya apanatanmetopo komo mahsîpînkexe kica.

Poritomotho penî mtapotachonho ponaro xa matko maxe kica.

Parakwe komo mackorokexe,

kuupu komo marha.

Miya rma nai yîmtapotachonhîrî komo an̂ewetîrî komo.

9 Kaanî mtapotarî reha manwekyaxe kica aporitomon pen komo mtapotarî yewetîtome mak awya so.

10 On wara xa matko kekn̂e Moises pen apanatanmetopo komo,

Ayopono me so encoko aamo komo,

anocwan kom marha.

Twaihkapore kr̂a nasî tîîm yeremkan̂e,

tînocwan yeremkan̂e marha,

kekn̂e Moises pen,

kekn̂e tî Xesus yîwya so.

11 On wara reha maxe aamo komo ya tîmsomu poko,

anocwan komo ya tîmsomu poko marha.

Koban tan ha,

mîîketu makî tko na ero poko.

Kaan ya tîmsom on,

kacho tî mîn,

Koban,

kacho ha.

12 Ero wa ketaw tak awya so,

aamo komo ya tîmîhra ro mak tak ehcoko,

anocwan komo marha,

mîîkexe reha kica amyamro.

Ero wa panatanmekno miir̂axe kica.

13 Ero wa Kaanî mtapotarî yewetîra maxe kica aporin pen komo mtapotachonho yewetîtome mak awya so.

Miya rma nasî ahce na poko amtapotarî komo,

Kaan yanwetopo rma awya so.

Ero wara maxe kica,

kekn̂e tî.

Ero wa tî kekn̂e Xesus Parisew komo ya,

Xutew panatanmetopo mewren̂e komo ya marha.

14 Ero yinhîrî takî tî tooto komo nan̂ikyakn̂e xa hara Xesus.

Mer̂pono pîn komo tî mîkyam xatken̂e.

On wara tî kekn̂e yîwya so,

Takîhso men entacoko omtapotarî.

15 Akiciciren̂e komo mera nasî amtaka so ciixapu reha.

Pîra ro mak.

Amtai so cepatakaxmu makî reha nasî akiciciren̂e komo me xa tak ha.

16 Entan̂e me awexitaw so entacoko,

kekn̂e tî.

Ero wa tî kekn̂e Xesus tîhyaka mohxapu komo ya.

17 Ero yinhîrî takî tî yîhyai so cekn̂e hara Xesus.

Iitono mîn yaka n̂ewomyakn̂e.

Ero yimaw tak on wara ketken̂e yînpanatanmekrî komo yîwya,

Ahce wai poko kyam wa mîîka ha?

ketken̂e tî yîwya.

18 On wara tî Noro n̂eyukyakn̂e,

Camkî ma matu amyamro meero okwe?

Akiciciren̂e mera nasî anahrî komo amtaka so ciixapu ha.

Ero yipu poko camkî ma mat okwe?

19 Awekatî yaka tohra ro mak nasî anahrî komo.

Awethîrî komo yaka makî reha cesî.

Ero yinhîrî roowo pona tak ces hara,

kekn̂e Xesus.

Ero wa kekn̂e Xesus kikiciciren̂e poko.

Ero wa karî ke kir̂wan̂he tak nasî erewsî ahnoro.

20 On yipu xa matko nasî kicicme awin̂e komo,

aropotai so cepaatakaxmu xa.

21 On warai mokyasî tooto komo ropotai,

kicicitho poko esehtînotopo komo,

twayamnu poko ehtopo komo,

mîk hak wooxam poko ehtopo komo,

waihkano ritopo komo,

22 en̂epan komo,

tpoyino yemyawnano poko epohkacho komo,

emetanmekno ritopo ehtopo komo,

emîknono ritopo komo,

twerîhra ehtopo komo,

tîyopono xatî pîn komo,

Kaan poko kicicitho me yîmtapotacho komo,

Ow xa takîhsom,

kan̂e me ehtopo komo,

warai makno me ehtopo komo.

23 Ero wa tooto komo yehtopo mokyasî yîropotai so kica.

Ero wa ehtopo komo xa nasî kicicme ciin̂e me okwe,

kekn̂e tî.

Ero wa tî kekn̂e Xesus yîwya so.

24 Taa,

ero yinhîrî anana takî tî cekn̂e Xesus.

Miya takî tî cekn̂e Ciru rowon pona,

Siton rowon pona marha.

Iitono mîn yaka takî tî n̂ewomyakn̂e.

Tooto wen̂ekarî makî tî cewom xe xakn̂e.

Pîra ham okwe.

Eseyamnî me thakwa tî xakn̂e okwe.

25 Mîîmo yaka ewomche rma wooxam takî tî mokyakn̂e yîhyaka.

Worokyam tî xakn̂e noro yemsîrî ropotaw.

Xesus yekaci tî n̂encekn̂e yîson.

Ero ke tî mokyakn̂e yîhyaka.

Noro yamrinaka tî n̂eremekn̂e.

26 Kreku komo tko tî mîk xakn̂e wooxam,

Siropen̂isia po ewruxapunhîrî tî.

On wara tî kekn̂e noro Xesus ya,

Apa,

worokyamu cma re men̂epesî oyemsîrî ropotai,

kekn̂e tî yîwya.

Emapona tî ero wa kekn̂e.

27 On wara makî tî n̂eyukyakn̂e Xesus,

Rikomo komo cokorî ka n̂eseresmacowpe.

Rikomo komo iyurkara cexpore nasî xapari xîkrî yuru me ar̂machome hara,

kekn̂e tî yîwya.

28 Yaaro mîîkes Apa,

kekn̂e tî wooxam yîwya.

Rikomo yuru pupuntho rma tko nokyaxe xapari xîkrî komo payu yapon makatawno komo,

kekn̂e tî yîwya.

29 On wara tî n̂eyukyakn̂e Xesus,

Ero wa oyeyukrî ke awya etok hara.

N̂epataka tak worokyam awemsîrî ropotai,

kekn̂e tî Xesus yîwya.

30 Ero ke takî tî cekn̂e hara wooxam tîmîn yaka hara.

Iito n̂een̂akn̂e cemsîrî tîrapo kama po.

Worokyam ken̂ehra takî tî xakn̂e okre.

Ero wa tî xakn̂e.

31 Ero wa xakn̂e Xesusu Ciru rowon po cexitaw,

Siton rowon po cexitaw marha.

En̂exa takî tî cekn̂e hara Tekaporis pore.

Karireia n̂ikithon yecihtaka roro tî cekn̂e.

32 Iito exitaw takî panahnî takî tî n̂ekyatken̂e iitono komo Xesus yaka.

Esentan me tîmtapotaxmu marha tî mîk xakn̂e okwe.

On wara tî ketken̂e Xesus ya,

Moso cma re mahsîyasî awamorî ke kir̂wan̂he tak ehtome,

ketken̂e tî ekn̂enhîrî komo Xesus ya.

33 Ero ke anana n̂he takî tî panahnî naar̂akn̂e Xesus esenmexapu komo yai.

Iito takî tî tamorî numunukyakn̂e Xesus noro panarî yaka.

Ero yinhîrî takî tî kucpi kekn̂e tamorî pona.

Teme kekn̂e takî tî yun̂uru pona hara.

34 Kahsî takî tî n̂een̂akn̂e Xesus.

N̂ehsesakn̂e takî tî pokaxapu wara.

Eepata,

kekn̂e takî tî.

Etahrunkakî,

kacho rma tî mîn,

Eepata,

kacho.

Ero wa tî kekn̂e Xesus.

35 Ero wa kache rma tak tpanake xakn̂e okre.

Kir̂wan̂he marha tî xakn̂e yun̂uru hara.

Kir̂wan̂he takî tî nîmtapowakn̂e okre.

36 Ero yinhîrî on wara tî kekn̂e Xesus iitono komo ya,

Moso yakir̂wamachonho ekatîmra ro mak men ehcoko tooto komo ya,

kekn̂e tî yîwya so.

Emapona tî kekn̂e ero wa yîwya so.

N̂ekatîmyatken̂e rma tî okwe miyan komo ya rma.

37 N̂eserepoketken̂e ro makî tî enîn̂enhîrî komo.

On wara tî ketken̂e Xesus poko,

Ahce na poko exitaw Noro kir̂wan̂he ro mak n̂iir̂as okre.

Enko,

panahnî meero kentan̂e me n̂iir̂as okre.

Yîmtapotan marha n̂iir̂asî tîmtapotaxmu me hara okre,

ketken̂e tî.

Ero wa tî ketken̂e Xesus poko.