Ero yinhîrî takî tî Xesus cekn̂e cekenhîrî pona hara.

Noro wenari tî cetken̂e yînpanatanmekrî komo.

2 Iito takî tî xakn̂e Xesus sabatu po.

Ero ke Xutew komo yesenmetopo yaka takî tî cekn̂e.

Panatanmekno tî n̂iir̂akn̂e iito.

Mer̂pora tî xatken̂e entan̂e komo.

Xesusu mtapotarî poko tî n̂eserepoketken̂e n̂examro.

On wara tî ketken̂e,

Ahce wa Moso nîmtapowa takîhso hara kopi?

Onoke xa nîhcamhokekn̂e ero wara yîmtapotachome?

Cirihnî meero n̂iir̂asî kopi tamorî ke mak.

3 Sahsamaxapu pokono ro mak mexe Moso ha ta.

Maria mrerî mak Moso ha.

Akno komo marha naxe,

Ciaku,

Xose,

Xutas,

Simaw.

Ero wa naxe akno kom ha.

Tan marha naxe epeka kom hara,

ketken̂e tî Xesus poko.

Centaporera ro makî tî n̂encetken̂e yîmtapotarî.

4 Ero ke on wara tî kekn̂e Xesus yîwya so hara,

Ahna so na cetaw weronomano rin̂e yîmtapotarî ponarono komo rma naxe iito so.

Ceken pona cetaw reha exihra tak naxe okwe yîmtapotarî ponarono komo.

Tîyananî komo chew cexitaw marha exihra naxe.

Yîmîn yawno komo marha ponarora naxe hara,

kekn̂e tî Xesus yîwya so.

5 Ero ke cirihnî cirihra tî xakn̂e Xesus iito.

Tamotosom komo rma tko tî re meretîyahsîyakn̂e kar̂pe ehtome so hara.

Asakî makî tko tî nakir̂wamekn̂e.

6 N̂eserepokekn̂e tî Xesus iitono komo poko,

cewetîn̂e pîn me exirî komo poko.

Ero wa tî xatken̂e Nasare pono komo.

Taa,

ero yinhîrî Xesus takî tî cekn̂e anarî mko pona hara ewto pona.

Panatanmekno rirî me tî cekn̂e.

7 Ero yimaw takî tî 12 komo nan̂ikyakn̂e Xesus.

Mokuche so n̂examro takî tî n̂en̂epekn̂e hara tooto komo cheka hara.

Taknoi so tî n̂en̂epekn̂e.

En̂eperî me tak kicicitho yekatî yen̂epen̂e me takî tî ciino n̂iir̂akn̂e.

8 On wara marha tî kekn̂e yîwya so,

Emyarîra n̂he etocoko.

Awamoyin komo mak aacoko.

Aporan komo arîhra rma ehcoko,

akumixin komo marha.

Apurantan komo marha arîhra ehcoko een yaw.

Ero yipu arîhra ehcoko,

kekn̂e tî yîwya so.

9 Tîhtake rma re etocoko.

Asakî aponon komo yamrura tko ehcoko.

10 Onok mîn yaka na awewomuche so iito mak enmacoko n̂examro yaw ero po ka awexitaw so.

11 Anarî ewto pona awtoche tak na awetarî komo yenpora natu.

Awentara so marha na natu.

Ero wa exitaw so ero ewto poi tak etocoko hara.

Awcetaw so ehtapupunkacoko tak kicicme exirî komo yîhtînomexpotopo yîwya so.

Yaaro tan wîîkes awya so,

Kaan men nîrwonasî iitono komo poko amn̂e en̂ekano ritopo me exitaw.

Sotoma pononho pen komo poko rma re nîrwonasî,

Komoha pononho pen komo poko marha nîrwonasî.

Awentan̂e pîn komo poko tak nîrwonîmtîkesî ro mak,

kekn̂e Xesus.

12 Ero ke cetken̂e takî tî 12 komo tooto komo chere ro.

Kicicme awehtoponhîrî komo tak men poxunkacoko ha,

ketken̂e roro tî centan̂e komo ya.

13 Worokyam marha tî n̂en̂epetken̂e mer̂pono pîn komo ropotai so.

Tamotosom komo marha tî nîhkapetken̂e mer̂pono pîn komo xa marha.

Kar̂pe takî tî xatken̂e hara yîhkapexapunhîrî komo.

Ero wa tî xatken̂e.

14 Taa,

ero yimaw takî tî Xesus yekaci n̂encetken̂e miyan komo rma.

Kayaritomo meero tî n̂encekn̂e Xesus yekaci,

Eroces.

On wara tî kekn̂e,

Xuaw Bacista rma Mîk owya.

Pakai haram kopi waixapunhîrî.

Ero ke wa cirihnî n̂iir̂a,

kekn̂e tî Eroces.

15 Eriasî tko na Mîkî,

ketken̂e reha tî anarî kom hara.

Weronomano rin̂e xa mokyasî amn̂e,

kacho na Mîkî,

ketken̂e tî anarî kom hara.

Pahxa tî xatken̂e kweronoman̂e pen komo,

n̂examro warai tko na Mîk owya,

ketken̂e tî anarî kom hara.

16 Ero warahra reha tî kekn̂e Eroces.

Pîra,

Xuaw rma mexe Mîk ha.

Onpîmkototho rma mexe Mîk ha.

Pakai haram kopi,

kekn̂e tî Eroces.

Ero wa tî kekn̂e Xesus poko.

17 On wara tî xakn̂e Eroces pahxa ha kapu,

Xuaw pen tî nahsîpekn̂e tmaywen komo ya.

Nahrupekn̂e marha tî okwe.

Erocias yanme makî tî noro pen nahrupekn̂e.

Eroces yakno cinho tî mîk xakn̂e Erocias,

Piripe cinho ha.

Noro rma tî nahsîyakn̂e Eroces cipici me.

18 Ero ke ero poko tî Eroces nîtwermekn̂e Xuaw.

Awakno cinho ahsîra ro mak ehcoko,

kesî kpanatanmetopo,

kekn̂e tî yîwya.

19 Ero wa karî ke Xuaw xatî pîn me ro makî tî xakn̂e Erocias.

Noro pen waihkapo xe tî re xakn̂e.

N̂ehn̂ekn̂e makî tko ka.

20 Xuaw tî nukurunpekn̂e Eroces.

N̂eraswakn̂e tî Xuaw pona kir̂wanî ro me enîrî ke,

Kaan ponarono me enîrî ke marha.

Noro mtapotarî tî n̂encekn̂e roro Eroces.

Tawake tî n̂encekn̂e.

N̂ewehcakn̂e rma ha tî re yîmtapotarî miyan pokono rma ha re.

Ero wa tî xakn̂e Eroces Xuaw poko.

21 Taa,

ero yinhîrî ehn̂ara Erocias yehtopo me tak n̂enmayakn̂e hara.

Eroces yewrutoponho tî mîn xakn̂e kaamo.

Ero po tak Karireia pono komo yahwotacho tî n̂iir̂akn̂e Eroces,

eseresmacho kom ha.

Antomano rin̂e komo tî nan̂ikyakn̂e tmaywen kom ha.

Sowtatu yantoman̂e komo marha tî nan̂ikyakn̂e,

poritomo komo marha tî.

Karireia pono komo mîkyam nan̂ikyakn̂e.

Ero warai komo tî nan̂ikyakn̂e Eroces eseresmachome so.

22 Ero yinhîrî takî tî,

eseresmetaw so Erocias yemsîrî mokyakn̂e manîmso.

Emasî mîk xakn̂e.

Kir̂wan̂he ro makî tî noro manîmtopo n̂een̂akn̂e Eroces,

eseresmayem komo marha tî.

Ero ke on wara takî tî kekn̂e Eroces yîwya,

Ahce xe kyam mai ha okopuci?

Ahce na xe awexitaw wîmyas awya,

kekn̂e tî.

23 Orowon raconho meero wîmyas awya yiixe awexitaw.

Yaarono pîn me omtapowataw owaikapo xe kr̂a tak wasî Kaan ya,

kekn̂e tî.

Ero wa tî kekn̂e Eroces emasî ya.

24 Ero ke yîhyai so takî tî cekn̂e emasî tîson yaka.

Ahce kyam wetahca yeme?

kekn̂e tî tîson ya.

Xuaw Bacista pîtho kr̂a etacko ha,

kekn̂e tî yîson okwe.

25 Ero ke takî tî emasî cekn̂e hara kayaritomo yaka,

yohno tî cekn̂e.

Xuaw Bacista pîtho cma re mîmyas owya oroto xa paayu yaw,

kekn̂e tî Eroces ya okwe.

26 Ero ke nahwokekn̂e xa takî tî Eroces.

Anwekîra thakwa tko tî xakn̂e,

Yaaro xa tan wîîkesî Kaan n̂entarî me,

karî ke.

Ceseresmayem komo ponaro marha tî xakn̂e.

Ero ke anwekî xera tî xakn̂e.

27 Ero ke takî tî waihkan̂e n̂en̂epekn̂e Eroces.

Xuaw pîtho ehta xiya,

kekn̂e tî yîwya.

Ero ke takî tî cekn̂e waihkan̂e kahrutopo yaka.

Iito rma takî tî Xuaw pen nîpîmkocekn̂e okwe.

28 Yîhtîpîthîrî takî tî n̂ekyakn̂e paayu yaw.

Nîmyakn̂e tî emasî ya.

Emasî takî tî naar̂akn̂e tîson yaka hara.

Ero wa tî xatken̂e okwe.

29 Ero yinhîrî tak Xuaw pen waihtoponho yentache yînpanatanmekrî komo takî tî mokyatken̂e okoputhîrî wece.

Naar̂atken̂e takî tî ahrutome.

Ero wa tî xakn̂e Xuaw Bacista pen.

30 Ero yinhîrî tak tî 12 komo mokyatken̂e hara Xesus yaka yînantomarî komo.

N̂esekatîmyatken̂e takî tî yîwya,

tooto chere tîtotoponhîrî komo tî n̂ekatîmyatken̂e,

tîwya so panatanmekno ritoponho marha tî n̂ekatîmyatken̂e yîwya.

31 On wara tî xatken̂e Xesus komo ero yimaw,

cemyarke xa tî xatken̂e.

Xesus yenso tî mokyatken̂e tooto komo.

Toche so hara anarî komo mokyatken̂e hara.

Noro yipu komo yakro tî nîmtapowatken̂e ceseresmarî komo yarohra thakwa.

Ero ke on wara tî kekn̂e Xesus 12 komo ya,

Kaikatko tak pohnîntaka epokareso,

kekn̂e tî yîwya so.

32 Ero ke kanawa yaw takî tî cetken̂e Xesus komo pohnîntaka,

cewyaro n̂he cehtome so cma ha re.

33 Torî komo tko tî n̂een̂atken̂e tooto komo.

Noro Mîk ces ha,

ketken̂e tî.

Ero ke Xesus yesamaka takî tî cetken̂e mer̂pono pîn komo.

Îh pore makî tî cetken̂e mîk hak pono komo.

Kar̂pe so tî cetken̂e.

Ero ke Xesus komo tî nîyoponketken̂e.

34 Ero yinhîrî takî tî Xesus nawomyakn̂e ecitaka.

Iito takî tî tooto pen n̂een̂akn̂e hara.

Yîpînîn yaw so rma tko tî xakn̂e Xesus.

Opera komo wara tî n̂een̂akn̂e okwe osomumnî wara thakwa okwe.

Ero ke n̂examro takî tî panatanmekyakn̂e mîn hak poko.

35 Kokon̂i xa tak tî Xesus yaka cetken̂e yînpanatanmekrî komo.

On wara tî ketken̂e yîwya,

Apa,

kokmamyasî tak okwe.

Tan thakwa taxe okwe pohnîntaw.

36 Ero ke moxam tak en̂epeko mararî yosom komo yaka totohme so tînahrî komo yaponso,

ewto pona so marha totohme so,

ketken̂e tî yîwya.

37 Amyamro xa matko yînahmacoko ha ke,

kekn̂e tko tî Xesus yîwya so.

Okyo,

ketken̂e tî yînpanatanmekrî komo yîwya.

Amna ma re cee iyuru komo yaponso.

200 tenariw wicakno pona ma re amna nahsîya cuure awya?

ketken̂e tî yîwya.

38 On wara tko tî kekn̂e Xesus,

Atararo tan nai awru komo?

Entatko ika,

kekn̂e tî.

Enîche tak yîwya so n̂ekatîmyatken̂e yîwya.

5 mak nasî cuure okwe.

Ootî cik marha nasî 2 mak,

ketken̂e tî Xesus ya.

39 Ero ke on wara tî kekn̂e Xesus yîwya so,

Eremanmekno tak ciicoko cuupu pona.

Tpomxe so mak eremanmekno ciicoko,

kekn̂e tî.

40 Ero ke takî tî n̂eremetken̂e tooto komo.

Xehxa 50 tî n̂eremetken̂e.

Mehxa tî n̂eremetken̂e 100 hara.

Miya rma ero wa so n̂eremetken̂e.

41 Ero wa eremache so tak Xesus takî tî nanîmyakn̂e cuure 5 ha.

Ootî marha tî nanîmyakn̂e 2 ha.

Anmîche kahsî takî tî n̂een̂akn̂e.

Kaan yakro tî nîmtapowakn̂e.

Apa,

kir̂wan̂he cirko amna yuru,

amna yotî marha,

amna karihton̂e me cirko,

kekn̂e tî Kaan ya.

Ero wa kache cuure takî tî poikekn̂e.

Tînpanatanmekrî komo ya tî n̂ekampekn̂e tooto komo yuru.

Ootî marha tî nukwaikekn̂e 2 hara.

Ero marha tî n̂ekampekn̂e yîwya so tooto komo yotî.

Ero wa tî erewusmano n̂iir̂akn̂e Xesus.

42 Ero ke iitono komo tî n̂eseresmetken̂e tmaxmitaxi ro.

43 Eseresmache so n̂etîmcekn̂e rma cuure,

ootî marha.

Ero ke kahxapu yaka takî tî namekyatken̂e hara yînpanatanmekrî komo.

12 een yaka tî namekyatken̂e copoyi cehso ro.

44 Mer̂pono pîn tî ero wa n̂eseresmetken̂e.

5.000 tî xatken̂e okyo kîrkomo yukuknomacho mak.

Ero wa tî xatken̂e.

45 Taa,

ero wa erewusmano riche yohno rma tî on wara kekn̂e Xesus tînpanatanmekrî komo ya,

Kanawa yaka tak esenkacoko.

Eeco pona etocoko Becsaita pona.

Tan ka was Owî reha.

Esenmexapu komo ka wen̂epesî,

kekn̂e tî yîwya so.

46 Taa,

n̂examro yen̂epetîkache îh pona tî cekn̂e Xesus Kaan yakro yîmtapotaxi.

47 Amn̂e tak kokmamyataw tuuna rakataw rma tî xatken̂e yînpanatanmekrî komo kanawa yaw.

Xesus reha tî xakn̂e cewn̂e ecihtaw.

48 En̂exa rma tî Xesus n̂een̂akn̂e tînpanatanmekrî komo.

Ekaritorî komo tî n̂een̂akn̂e kweikwei karî poko.

Kar̂pe thakwa tî nocowonakn̂e yîramanîn̂e komo me okwe.

Ero yimaw tko yîhyaka so tî cekn̂e Xesus kapikara paketaw.

Tuuna ratari tî n̂etapikyakn̂e okyo.

Mamrikn̂e komo wara tko tî Xesus cekn̂e.

49 Tuuna ratari mokrî tî n̂een̂atken̂e yînpanatanmekrî komo.

Tooto pen yekatînho wara tî n̂een̂atken̂e kopi.

Ero ke n̂emtaraketken̂e tî cerahtîmrî ke so.

50 Ahnoro rma tî Xesus n̂een̂atken̂e.

Ero ke tî n̂eraswatken̂e ro mak kopi.

Yohno rma tko tî Xesus nîmtapowakn̂e akro so.

On wara tî kekn̂e,

Tahwore ehcoko.

Owî rma Ow ha.

Erasîra ehcoko,

kekn̂e tî yîwya so.

51 Ero yinhîrî iyotaka so takî tî n̂esenkayakn̂e Xesus.

Ero yimaw rma takî tî,

tîî,

nîtîtîn̂ekn̂e tak ocowo.

Ero ke n̂eserepoketken̂e xa takî tî yînpanatanmekrî komo tîyopo so.

52 Cuure yuhnaretoponho ponarora rma tî xatken̂e okwe.

Ceipuru wara xakn̂e okwe yîropotarî komo.

Ero wa tî xatken̂e.

53 Ero yinhîrî ecihtaka takî tî cetken̂e,

Xen̂esare pona tî.

Iito takî tî tîkanawarî komo n̂imiyatken̂e.

54 Iina takî tî nawomyatken̂e.

Awomche so rma ketken̂e takî tî.

Xesusu Mîkro ham,

ketken̂e takî tî iitono komo.

55 Ero ke miya so takî tî cetken̂e tamotosom komo wece.

Noro yipu komo tî n̂ekyatken̂e Xesus yaka.

Tapoye so rma tî n̂ekyatken̂e.

Mînto nai Xesus,

kacho yencetaw iina tî n̂ekyatken̂e tamotosom komo.

56 Ahna so na Xesus cetaw tamotosom komo tî n̂ekyatken̂e yîhyaka.

Ewto mko pona epatakache roro tî n̂ekyatken̂e,

ewto imo pona epatakache marha tî,

cewyarono komo yaka marha tî,

ero wa toche iitono komo takî tî n̂ekyatken̂e tamotosom komo yîhyaka.

Twarawantaxmu roron pona tî n̂iir̂atken̂e.

On wara tî ketken̂e Xesus ya,

Aponon perî makî cma re mapepesî moxam ya,

ketken̂e tî yîwya.

Apeche tak kir̂wan̂he takî tî xatken̂e ahnoro okre.

Ero wa tî xatken̂e.