Ero yinhîrî tak on wara tî kekn̂e hara Xesus yîwya so,

On wara men wîîkes awya so,

kayaritomo me xa tak Kaan n̂esenpesî amn̂e.

Kar̂pe xa cehtopo n̂enpesî.

Ero wa Kaan yesenpotopo meen̂axe amyamro rma anarî komo mak.

Waipîra ka awexitaw so meen̂axe,

kekn̂e tî Xesus yîwya so.

2 Ero yinhîrî 6 ro enmapuche tak tînpanatanmekrî komo takî tî naar̂akn̂e Xesus.

Taixa makî tî naar̂akn̂e,

Petru,

Ciaku,

Xuaw,

ero wa mak.

Akrono komo yai ro mak naar̂akn̂e îh pona,

kawno pona.

Iito exitaw so anarme ro mak takî tî xakn̂e Xesus Petru komo wero ro.

3 Tîroromutwe ro mak takî tî xakn̂e Xesus ponon oco.

Roowo pono komo numuturetho yopo ro mak tî xakn̂e,

tumutwe xa tak okre.

4 Ero yimaw Erias takî tî n̂esenpekn̂e iito,

Moises marha.

Xesus yakro tî nîmtapowatken̂e.

5 Ero ke on wara tî Petru kekn̂e Xesus ya,

Apa,

keken mexe nasî on okre.

Ero ke mîîmo cma re amna n̂iir̂asî osorwaw.

Amîn,

Moises mîn,

Erias mîn,

ero wa cma re amna n̂iir̂asî amîn komo,

kekn̂e tî Petru yîwya.

6 Ahce wa na kapore nai?

kekn̂e makî tî Petru.

N̂eraswatken̂e ro makî tî Petru komo.

7 Ero yinhîrî takî tî kaweresî n̂examro nahruyakn̂e.

Kaweresî chewno mtapotarî marha tî n̂esencekn̂e.

Omumuru cik Moso okwe.

Yîmtapotarî men entacoko,

kekn̂e tî.

Ero wa tî kekn̂e kaweresî chewno.

8 Ero yinhîrî tak tîhra rma Petru komo takî tî n̂esewyar̂atken̂e.

Moises komo yenîhra takî tî xatken̂e.

Xesus makî tî n̂een̂atken̂e iito takro so.

Ero wa tî xatken̂e.

9 Ero yinhîrî tak îîpî takî tî n̂enîhcetken̂e hara.

Enîhcetaw on wara tî kekn̂e Xesus Petru komo ya,

Kir̂wan̂he ro mak tak kesenpo oroto awero ro so.

Ero wa oyesenpotoponho tko ka ekatîmra ro mak men ehcoko.

Amn̂e mak,

Tooto me Ewruxapu waihyasî,

ero yinhirî tak pakes hara.

Ero yimaw makî tak ekatîmcoko,

kekn̂e tî yîwya so.

10 Ero ke ekatîmra thakwa tî xatken̂e.

N̂examro re rma tko tî n̂esencetken̂e Xesusu mtapotachonho poko.

Ahce warai ya wa nîîke hara kopi,

Kwaihyasî,

kpakes hara,

kes?

ketken̂e tî n̂examro re mak.

11 Ero yinhîrî takî tî on wara tî ketken̂e Xesus ya,

Ai Apa,

on wara kexe Xutew panatanmetopo mewren̂e komo,

Yihciri me ka Erias mokyas hara amn̂e,

ketu kopi.

Ahce kacho ero wa ketu?

ketken̂e tî Xesus ya.

12 Ai ha,

kekn̂e takî tî Xesus yîwya so,

yaaro rma wa kexe.

Eriasî rma ka mokyasî yihcirî me ha kapu.

Akir̂wamano riso mokyasî.

On wara kacho rma nasî tmewreso Tooto me Ewruxapu poko,

Noro pen tak n̂emetanmekyaxe ro mak tooto kom okwe.

Noro pîntho wara ro mak n̂iir̂axe okwe,

kesî.

Ero wa kesî Kaan Karitan Noro poko.

13 On wara tko wîîkes awya so,

Eriasî rma mokye pahxa.

Noro pen n̂emetanmekyatken̂e okwe tanme ro so mak.

Ero wa kesî Kaan Karitan noro poko hara,

kekn̂e.

Ero wa tî kekn̂e Xesus Petru komo ya.

14 Ero yinhîrî takî tînpanatanmekrî komo yaka takî tî mokyakn̂e hara Xesus.

Iito takî tî n̂een̂atken̂e tooto komo mer̂pono pîn.

N̂examro chew rma xatken̂e yînpanatanmekrî komo.

Iito marha tî n̂een̂atken̂e Xutew panatanmetopo mewren̂e komo.

Xesusu npanatanmekrî komo yakro tî n̂eseseyukyatken̂e.

Ero wa tî xatken̂e.

15 Xesus yenîche tak yîwya so Noro poko takî tî n̂eserepoketken̂e xa.

Yîhyaka tî cetken̂e kar̂pe.

Mîmoko hara Apa?

ketken̂e tî yîwya.

16 Ero yinhîrî on wara tî kekn̂e Xesus Xutew panatanmetopo mewren̂e komo ya,

Ahce poko meseseyucow?

kekn̂e tî yîwya so.

17 Iito xakn̂e anarî hara mer̂pono pîn komo chew.

Noro tî Xesus n̂eyukyakn̂e.

On wara tî kekn̂e yiwya,

Apa,

ahyaka cma re weekî moso omumuru.

Worokyam ken̂e nasî kopi yîmtapotanî ro ken̂e.

18 Emapona omumuru nahsîyasî,

nar̂mesî thakwa roowo pona oko.

Ero yinhîrî tak omumuru nîmtawakronwasî,

nîyokrececenwasî marha okwe,

n̂etatmunukyasî marha.

Ero wa thakwa omumuru n̂iir̂asî worokyam.

Wenpo cma re anpanatanmekrî komo ya en̂epetome yîwya so.

N̂ehn̂acow mak ha tko okwe,

en̂epera rma n̂ehcow okwe,

kekn̂e tî yîwya.

19 Ahce okwe,

kekn̂e tî Xesus.

Kaan pona enîn̂e pîn komo ro mak amyamro okwe.

Atî wicakî pahkî na wai tan ahyaw so?

Atî wicakî pahkî na ero wa awehtopo komo wînîmya okwe?

Ek ha amumuru ohyaka,

kekn̂e tî.

20 Ero ke Xesus yaka takî tî n̂ekyatken̂e.

Noro yenîche tak rikomo ya noro pen takî tî nîrohnonmekyakn̂e xa hara worokyam.

Roowo pona tî n̂epîrkekn̂e.

N̂ehmamekn̂e thakwa makî tî okwe.

Nîmtawakronwakn̂e marha tî kica.

21 Atî wicakî pahkî nai moso worokyam nahsîrî me?

kekn̂e tî Xesus yîîm ya.

Mehxa ro thakwa.

Yîmrenai rono tan okwe,

kekn̂e tî yîîm.

22 Anarimaw so wehto ywaka nar̂mes oco.

Tuuna kwaka marha nar̂mes anarimaw so.

Emapona ero wa nar̂mesî waihkachome.

Ehn̂ara awexitaw Amoro hara amna pînîn yaw cma re masî.

Amna cma re makronomesî,

kekn̂e tî yîîm Xesus ya.

23 On wara tî kekn̂e hara Xesus yîwya.

Opona enîn̂e me awexitaw kir̂wan̂he tak nas hara amumuru.

Ahce na poko ehn̂ara ro mak naxe opona enîn̂e komo,

kekn̂e tî yîîm ya.

24 Yohno rma tî n̂eyukyakn̂e xa hara yîîm,

Apona xa ween̂as Apa.

Miya xe n̂he tak apona enîn̂e me ow ciitîkak ha,

kekn̂e tî yîîm Xesus ya.

Tîwrataro rma tî kekn̂e.

25 Taa,

ero yimaw takî mer̂pono pîn komo takî tî mohtîketken̂e Xesus yaka.

Kar̂pe tî mokyatken̂e.

N̂examro yenîche takî tî worokyam n̂eeyakn̂e Xesus.

On wara tî kekn̂e,

Yîmtapotan,

panahnî,

ero warai amoro kica worokyam.

Rikomo ropotai kr̂a tak etok ha.

Iina xa marha ewomra ro mak men esko hara,

kekn̂e tî Xesus yîwya.

26 Ero ke takî tî n̂emtarakekn̂e worokyam.

Rikomo tî nîrohnonmekyakn̂e xa hara miya xe xa tak oko.

Ero yinhîrî,

krei,

n̂etowyakn̂e takî tî.

Worokyam toche waixapu wara takî tî xakn̂e rikomo pen.

Waipo xa thakwa tak ham okwe,

ketken̂e mer̂pono pîn komo.

27 Rikomo tko tî nanîmyakn̂e Xesus amorî poko.

Piiri tak tî nawomyakn̂e tîrohsomînhîrî.

Ero wa tî xakn̂e.

28 Ero yinhîrî tak iitono mîn yaka takî tî n̂ewomyakn̂e Xesus tooto komo yai.

Iito exitaw Noro yakro takî tî n̂esencetken̂e yînpanatanmekrî komo.

Ahce kacho amna reha n̂ehn̂a kica noro yen̂eperî poko ha?

ketken̂e tî yîwya.

29 On wara tî kekn̂e Xesus yîwya so,

Cehn̂axi cen̂epesom ro mak mîk noro yipu komo worokyam.

Kaan yakro amtapowataw so rma tko,

pahkî eseresmara awexitaw so marha ero yimaw mak tak n̂epatakesî noro yipu,

kekn̂e tî.

Ero wa tî kekn̂e Xesus tînpanatanmekrî komo ya.

30 Taa,

ero yinhîrî en̂exa takî tî cetken̂e Xesus komo.

Esama yaw tî cetken̂e Karireia pore.

En̂epa me makî tîto xe tî xakn̂e Xesus.

31 Cetaw so tî tînpanatanmekrî komo panatanmekyakn̂e.

On wara tî kekn̂e yîwya so,

On wara men Tooto me Ewruxapu n̂iir̂axe amn̂e yiixatî pîn komo,

nahsîpexe tooto komo ya.

N̂examro tak Noro pen waihkexe.

Waixapunhîrî tko pakes hara osorwaw ro enmapuche,

kekn̂e tî yîwya so.

32 Camkî makî tî n̂encetken̂e ero wa kacho.

Ahce wai poko wa mîîka ha?

kahra tko xatken̂e yîwya.

Nukurunanîyatken̂e makî tî.

Ero wa tî xatken̂e.

33 Ero yinhîrî tak Kapanaun pona takî tî n̂epatakekn̂e Xesus.

Mîîmo yaw cexitaw tak on wara tî kekn̂e tînpanatanmekrî komo ya,

Ahce poko meseseyucow esama yaw kmokyataw so ha?

kekn̂e tî.

34 Tîî,

ketken̂e makî tî.

Eikura ro makî tî xatken̂e.

Ow xa yo ayopono komo,

kacho poko tî n̂eseseyukyatken̂e kica esama yaw.

35 Ero ke Xesus takî tî n̂eremekn̂e.

Oona ka eremacoko,

kekn̂e tî 12 komo ya.

On wara tî kekn̂e yîwya so,

Aano rin̂e me awexi xe awexitaw so mapitawno me xa matko ehcoko,

awakrono komo yanton me mak ehcoko,

kekn̂e tî yîwya so.

36-37 Ero yinhîrî rikomo takî tî n̂ekyakn̂e Xesus yîcheka so.

Cenaka tî nanîmyakn̂e.

On wara tî kekn̂e Xesus yîwya so,

Moso warai xe ehcoko rikomo xe.

Oyakrono me awexirî ke so mak yiixe ehcoko.

Moso warai xe awexitaw so ooxatî me marha maxe.

Ooxatî me awexitaw so ooxatî me mak exihra maxe.

Oyen̂epen̂enho xatî me marha maxe.

Ero wa maxe rikomo xe awexitaw so,

kekn̂e tî Xesus yîwya so.

Ero wa tî kekn̂e.

38 Ero yinhîrî tak Xuaw tî nîmtapowakn̂e Xesus yakro.

On wara tî kekn̂e yîwya,

Apa,

mînto amna n̂enwo worokyam yen̂eperî pokono,

kakro so mokuhnî ro kica.

Awosotî yanme rma worokyam n̂en̂epew.

Ero wa kahra ro mak esko,

nîîka amna yîwya kakrono pîn me exirî ke kica,

kekn̂e tî Xesus ya.

39 Pîra,

kape rma,

kekn̂e tî Xesus yîwya.

On wara naxe cirihnî ciin̂e komo,

Oyosotî yanme ciir̂ataw owîrîyakara mak naxe yohno rma hara.

40 Kanwekn̂e pîn me exitaw so tooto komo kakrono me rma wa naxe ha,

kekn̂e tî Xesus yîwya.

41 On wara marha wîîkes awya so,

kekn̂e marha tî Xesus yîwya so,

Tuuna ke na awokpetu so anarî komo oyosotî ponaro awexirî ke so,

Kristu yakrono me awexirî ke so mak.

Ero ke ero yepetho tak nîmyasî Kaan amn̂e yîwya awokpatoponhîrî komo yepetho ha.

Yîtwen̂ekarîntara ro mak wa nasî Kaan ero yipu yepetho poko,

kekn̂e tî.

Ero wa tî kekn̂e Xesus yîwya so.

42 Ero yinhîrî takî tî tînpanatanmekrî komo panatanmekyakn̂e xa hara Xesus.

On wara tî kekn̂e yîwya so,

Yaake naxe rikomo komo opona enîn̂e komo.

Noro yipu komo yîhrokan̂e warai me rma naxe okwe anarî komo.

N̂esemetanmekyaxe ro mak tak amn̂e yîhrokan̂enhîrî komo okwe.

Wara n̂he re naxe noro yipu komo tuuna imo kwaka cetar̂metaw so,

toh ke cexenawnoi,

kekn̂e tî.

Ero wa tî kekn̂e tînpanatanmekrî komo ya.

43 On wara marha tî kekn̂e yîwya so,

Kicicme na matu awamorî komo yanme kica.

Ero wa awexitaw so awamothîrî komo kr̂a yîhkotocoko.

Mesemetanmekyaxe rma re eecome tamoke awexitaw so miya roro.

Miya xe xa tak mesemetanmekyaxe ececoka tamoke rma awetar̂metaw so wehto imo cheka,

eseikanî ro cheka oco.

44 Iitono komo yakrî waipîra ro mak nas okwe.

Eseikan me marha nasî wehto iitono ha.

45 Anarimaw na kicicme na matu ahtarî komo yanme hara kica.

Ero wa awexitaw so ahtathîrî komo kr̂a yîhkotocoko.

Mesemetanmekyaxe rma re eecome tîhtake awexitaw so miya roro.

Miya xe xa tak mesemetanmekyaxe ececoka tîhtake rma awetar̂mache so wehto imo cheka eseikanî ro cheka oco.

46 Iitono komo yakrî waipîra ro mak nas okwe.

Eseikan me marha nasî wehto iitono ha.

47 Anarimaw na kicicme na matu awewru komo yanme kica.

Ero wa awexitaw so awewthîrî komo kra towcoko.

Kaan maywen me rma maxe ero wa ehxapu.

Mesemetanmekyaxe rma re eecome mak cewke awexirî ke so Miya xe xa tak mesemetanmekyaxe ececoka cewke rma awetar̂metaw so wehto imo ywaka oco.

48 Iitono komo yakrî waipîra ro mak nas okwe.

Eseikan me marha nasî wehto iitono.

49 Wehto men sararanasî apona so amn̂e yîmîtî wara.

50 Kir̂wan̂he nai yîmîtî okre.

Epoxunkache tko ahce ke thakwa re tîtpoxure hara okwe knahrî?

Pîra ro mak okwe.

Ero ke yîmîtî ken̂arî wara xa ehcoko amyamro.

Etpoko tawake marha ehcoko,

kekn̂e tî.

Ero wa tî kekn̂e Xesus yîwya so.