Taa,

ero yinhîri tak Xesus cekn̂e hara Kaan mîn yai.

Ero yimaw rma yîhyaka cetken̂e yînpanatanmekrî komo.

On wara ketken̂e yîwya,

Kir̂wan tan Apa okre Kaan mîn,

yîmîtwono marha mîîmo mko.

Enko xe ka Apa,

ketken̂e yîwya.

2 On wara tak Xesus n̂eyukyakn̂e hara,

Onî mko meen̂atu ahnoro?

Yaaro men tan wîîkes awya so,

amn̂e onî mko n̂ixketîkexe waapa exihra ro mak cehso ro.

Toh pen meero etîmtora ro mak nasî etîmkawnonhîrî ar̂matîkarî ke yîwya so.

Ero wa men nas amn̂e okwe,

kekn̂e yîwya so.

3 Ero yinhîrî tak Xesus cekn̂e Oripera Yîpîn pona.

Iina tak n̂eremekn̂e.

Iito exitaw tak yîhyaka cetken̂e yînpanatanmekrî komo.

Anarî komo yai ro mak n̂esencetken̂e Noro yakro.

Apa,

ketken̂e yîwya,

ahcemaw xa Kaan mîn pen n̂ixket ha?

Ahce warai tak Kaan n̂enpe amn̂e amna ya amohtopo kuknon ha?

Ahce warai tak Noro n̂enpe on wara rma amna yehtopo yenatîtopo kuknon me marha?

ketken̂e yîwya.

4 On wara Xesus n̂eyukyakn̂e,

Awewkukman̂e komo mokyaxe amn̂e.

Esewkukmapora ehcoko noro yipu komo ya.

5 Mer̂pono pîn komo men mokyaxe amn̂e,

oowara cesetacisom komo.

Kristu ow ha,

kan̂e komo mîkyam kica.

Mer̂pono pîn komo n̂ewkukmexe ero wa karî ke kica.

6 On wara kacho tak mencexe amn̂e,

N̂etwexe okwe meyeno komo,

cetwo xe takî tî natu anarî kom hara kopi,

kacho mencexe.

Ero yipu poko eserepokatîkara ehcoko.

Ero wara rma ka naxe mîn hak pono komo.

Eromanhîrî yimawno pînî rma tko ka mîn ero yipu mencexe.

7 Ero wara rma ka naxe mîn hak pono komo,

kayaritomo komo marha,

etpoko cetar̂maxmu me rma n̂ehtîkexe.

Taa,

on wara marha naxe anarî kom hara miyan komo rma,

rooma me n̂ehtîkexe okwe,

eper̂a yaw so marha n̂ehtîkexe.

Roowo marha n̂esewsîyasî mînto mînto wara okwe.

Ero wa ka nasî.

8 Awahwokacho komo yihcitopo makî tko mîn ero yipu mko.

Pahnoke exitaw wooxam yewrutopo n̂ihciyasî erewîmtopo,

ero wa awehtopo komo rma ka mîn.

9 Ero yimaw marha aaxatî pîn komo awemetanmekyaxe so okwe.

Awaikexe so marha.

Aaxera so tak n̂ehtîkexe okwe mîk hak rowon pono komo.

Oyosotî ponaro awexirî ke so mak aaxera so naxe.

10 Ooxatîmnokexe tak anarî komo mer̂pono pîn okwe.

Etîxatînhîrî komo marha tak tpoyino komo n̂en̂ekapexe porisia komo ya.

N̂etîxatîmnokexe marha tak okwe.

11 Tohnawno yekatîmn̂e komo tak naxe mer̂pono pîn Kaanî mtapotarî yekatîmn̂e tî re.

N̂examro tak n̂ewkukmexe mer̂pono pîn kom okwe.

12 Cetanwesom komo tak n̂epamtîkexe okwe.

Noro yipu komo yenîrî ke ooxati pîn wara tak n̂ehtîkexe mer̂pono pîn komo okwe.

13 Ooxatî me roro rma tko naxe anarî kom hara ooxatîmnokara ro mak.

Noro yipu komo reha nukurunpesî Apapa.

14 Taa,

roowo poko hakno komo chere ro ka cexe oyakrono komo,

Tmaywen me kiri xe so xa nai Kaan okre,

kacho yekatîmso.

Mîk hak rowon pono komo ya n̂ekatîmyaxe miyan komo ya,

roowo poko hakno komo ya rma.

Ero wa ekatîmtîkache tak eromanhîrî yenmacho me tak nasî.

15-16 Ero yimaw weronomano rin̂enho pen n̂ekatîmîtho tak meen̂axe,

Tan̂iew pen n̂ekatîmîtho.

Tmewreso rma nasî yîmtapotarî Kaan karitan yaw,

Ero ke takîhso men encoko.

On wara kacho mîn mewrexapu,

Amn̂e tak kicicitho ro mak meen̂axe Kaan mîn yaw rma kica,

awîrîman̂e komo ro mak mîk noro,

kekn̂e Tan̂iew pen,

Ero ke on wara wîîkesî Xuteia pono komo ya,

noro yipu yenîche tak awya so amn̂e emahcicoko ro mak tak îh pona so.

17 Mîîmo meretwo na matu ero yimaw.

Ero wa awexitaw so amîn yaka ewomra ro mak tak ehcoko awemyawno komo ka.

N̂expe ro mak.

18 Mararî po awexitaw so marha amîn yaka tohra mak ehcoko aponon komo ka.

N̂expe ro mak.

19 Ero yimaw tarkem pen komo n̂esemetanmekyaxe ro mak okwe.

Ero wa xa marha naxe cenarkem komo pen hara okwe.

20 Ero yimawno poko amtapotacoko Kaan yakro awemacitopo komo poko.

On wara kacoko yîwya,

Apa kah yawno,

amna waparî ekmexpora cma re masî cwotu yimaw,

amna yepokaretopo po marha,

kacoko yîwya.

21 Ero yimaw tooto komo yesemetanmetopo me xa tak nas okwe.

Ero yipu esemetanmetopo exihra ro mak xakn̂e mehxa ro,

roowo yakîhtotoponho n̂ixa ro.

Amn̂e xa hara ero yipu xa marha exihra tak nas hara emetanmekno ritopo.

22 Pahkîno mera n̂he tko Kaan nukuknomekn̂e ero yipu.

Pahkîno me rma yukuknometaw ketaw ha re waihtîkexe re tooto pen ahnoro okwe.

Tînmen̂ekathîrî komo pînîn yaw tko tî nai Kaan.

Ero ke pahkîno mera n̂he tak nukuknomekn̂e,

kekn̂e Xesus.

Ero wa kekn̂e tînpanatanmekrî komo ya.

23 On wara marha kekn̂e Xesus tînpanatanmekrî komo ya,

Ero yimaw on wara kexe anarî komo awya so,

Moso ha Kristu,

kexe.

Mîkro xa Kristu,

kexe anarimaw hara.

Ero wa kan̂e komo mtapotarî ponarora ro mak men ehcoko.

24 Kristu ow ha,

kexe rma re anarî komo ero yimaw.

Weronomano rin̂e ow ha,

kexe marha anarî kom hara.

Tohnaw mak ero wa kexe kica.

Cirihnî mko rma re n̂iir̂axe awero ro so,

cirihnî ro xa.

Aweserepokacho komo xa n̂enpexe.

Ero yipu mko n̂enpexe ewkukmano ritohme.

Kaanî nmen̂ekatho komo yewkukma xe meero naxe okwe.

Ewetîn̂e pîn me tko naxe noro yipu komo.

25 Taa,

kweronomacow so tak ha.

Ero wa men nas amn̂e,

wîîka awya so.

Ero ke ero yipu ponaro men ehcoko.

26 Kristu poko kexe anarî komo xa hara amn̂e,

Mînto xa nai Kristu,

meye nasî pohnîntaw makî,

kexe.

Ero wa ketaw awya so enso tohra ro mak ehcoko.

Mînto nasî Kristu mîîmo yamtakpon yaw atumnawno yaw mak,

ketaw awya so,

ewetîra marha ehcoko.

27 On wara xa mokyasî Noro,

Tooto me Ewruxapu,

pepe kacho wa mak mokyasî.

Mooxe ro mak n̂esenpesî pepe kacho.

Resce n̂ixa ro kesî anarimaw miya roro oesce yaka roro hara.

Ero wa xa marha n̂esenpesî Noro hara tmokyataw hara oona.

28 Okoputho exitaw ahto ha na,

iina rma n̂esenmekyaxe kwacinama komo,

kurum komo marha,

kekn̂e Xesus.

Ero wa kekn̂e.

29 On wara marha kekn̂e Xesus,

Taa,

roowo pono komo yesemetanmetopo komo yenatîche tak,

on wara nasî kaamo,

n̂ewxîrîyasî tak okwe.

Nuun̂i marha kweipora nasî.

Xir̂ko pen marha tak n̂etowyasî.

Anarî me ro mak tak n̂ehtîkesî kaapu ero yimaw.

30 Ero yimaw tak n̂esenpesî Tooto me Ewruxapu kuknon kah yaw.

Noro mokrî n̂een̂axe ahnoro tribu komo,

roowo poko hakno komo.

Kaapu smun chere mokyasî.

Karitî me mokyasî,

kir̂wanî ro me marha.

Noro yeen̂ataw tak nîwracexe thakwa ahnoro roowo pono komo.

31 Tancun komo tak Noro n̂en̂epesî tînmen̂ekathîrî komo ka.

Ero yimaw tuu kacho n̂esencesî.

Noro nmen̂ekatho komo n̂enmkyaxe ahnoro mak.

Mehxa mehxa wara n̂ekyaxe tanhamyan komo rma,

kekn̂e.

Ero wa kekn̂e Xesus tînpanatanmekrî komo ya.

32 On wara marha kekn̂e Xesus yîwya so,

Taa,

anarî pokono warai tak wekatîmyas awya so apanatanmetopo komo rma.

Piiku yepu pokono tan wekatîmyas hara.

On wara nasî piiku yepu,

perem kiririn tak n̂ehkuwasî,

yar̂kwetkuru marha n̂etahkesî.

On wara mîîkexe ero yipu yenîche,

Pahnoke tak nai ham katpan,

mîîkexe.

33 Ero wa xa marha nasî Noro mohtopo hara.

Roowo pono komo yesemetanmetopo poko kweronomacow so,

ero yipu yeen̂ataw tak awya so on wara men kacoko,

Pahnoke tak nai ham Noro mohtopo hara okre,

kacoko.

34 Yaaro tan wîîkes awya so,

waihtîkara rma ka exitaw awepamthîrî komo ero wa naxe roowo pono komo,

wekatmo awya so,

ero wa.

Ahnoro on̂ekatîmîtho yaw roro wa naxe.

35 Kaapu reha n̂ehcamnoyasi amn̂e.

Roowo pen marha n̂ehcamnoyasî.

Omtapotarî reha nasî ehcamnopîn me ro mak,

kekn̂e Xesus,

Ero wa kekn̂e.

36 On wara marha kekn̂e Xesus,

Omohtopo xa yîhtînopîra maxe amyamro tooto ha.

Ero po tak Kristu mokyasî,

kahra thakwa naxe.

Mînto xa kaamo mokyasî,

kahra marha maxe.

Ancu komo meero yîhtînopîra naxe kah yawno kom ha,

Ow meero yîhtînopîra wasî Kaan mumuru rma.

Apapa makî reha nîhtînoyasî oona omohtopo xa.

37-39 Ero wara rma xatken̂e pahxan pen komo,

Noe poyinonho pen komo,

roowo yukmatîkacho ponarora ro mak xatken̂e.

Cemyawno komo poko mak xatken̂e.

N̂eseresmetken̂e,

wok n̂eer̂atken̂e,

cipici komo nahsîyatken̂e,

wooxam komo marha ciin̂o nahsîyatken̂e.

Ero poko roro xatken̂e.

Kanawa imo yaka Noe yesenkacho pona roro ero wa xatken̂e.

Ero wa exitaw so rma tuuna imo tak mokyakn̂e yukmano ritopo okwe.

Ero yimaw tak n̂examro pen n̂enoritîketken̂e ahnoro ro mak okwe.

Ero wa xa marha nas amn̂e oona Tooto me Ewruxapu mohtopo hara.

40 On wara naxe roowo pono komo ero yimaw,

kîîrî komo naxe mararî po,

asakî.

Ero yimaw anarî pen tak n̂ehcamnoyas okwe.

Iito rma nasî akrononhîrî.

41 Asakî wooxam komo naxe hara puruma yakihtopo poko.

Poku,

anarî pen tak n̂ehcamnoyas okwe.

Iito rma nas akrononhîrî hara.

Ero wa naxe amn̂e Noro mokyataw hara.

42 Ero ke Noro mohtopo ponaro xa men ehcoko.

Yîtwen̂ekarîntara ro mak men ehcoko.

Ero wa ehcoko Aporin komo mohtopo xa yîhtînopîra awexirî ke so.

43 Ahce wa nai cen̂epan̂em?

Ero yimaw xa mokyasî cen̂epan̂em,

kahra thakwa nasî mîîmo yosom.

Ero wa ketaw cma ha re momokyasî tak tîmîn yewyomachome.

44 Ero ke Tooto me Ewruxapu mohtopo ponaro xa ehcoko ha.

Ero warahra awexitaw so awekatkexe so men.

Ponarora awexitaw so rma mokyasî,

kekn̂e Xesus tînpanatanmekrî komo ya.

Ero wa kekn̂e.

45-46 On wara marha kekn̂e yîwya so,

Oyanton komo rma amyamro.

On wara naxe tooto yanton komo reha,

takîhso na nai anarî,

tosom yewetîn̂e me roro na nai.

Ero wa exirî ke tîhyawno komo yenîrî poko nantomesî osom,

yînahmacho komo poko.

Yînahrî komo tîmko amoro yînahmacho me exitaw roro,

kesî yîwya.

Ero poko nantomesî.

Tawake xa nasî noro yipu tosomu mtapotarî yewehcataw roro.

Osom mokyataw hara ero poko rma nasî anton.

Ero wa nasî.

47 Yaaro tan wîîkes awya so,

noro yipu tak n̂iir̂asî osom ahnoro cemyawno yenîn̂e me.

Ero wa n̂iir̂asî tanton.

48 Kicicme tko na nai yînantomathîrî anarimaw.

On wara na nîîke,

Pahkî ro mak nai Apapa okwe.

Momoku thakwa ha re,

nîîke.

49 Ero ke takrono komo tak na nîhyokya.

Twenîmsom komo yakro marha na n̂eseresme,

kawaxiyem na n̂eer̂a akro so.

50 Ero wa exitaw osom mokyasî noro ponarora ro mak exitaw.

Mînto kaamo xa na mokya apapa,

kahra ro mak exitaw mokyasî.

51 Ero ke osom mokuche tanton pen namesî ro mak oko.

Tohnaw cesenposom komo yakrono me kr̂a n̂en̂epesî.

Nîwracexe okwe iitono komo,

nîyokrececenwaxe marha okwe,

kekn̂e Xesus.

Ero wa kekn̂e tînpanatanmekrî komo ya.