Taa,

ero yinhîrî tak anarî pokono warai n̂ekatîmyakn̂e xa hara Xesus,

On wara kekn̂e,

On wara naxe kah yawno maywen komo,

emasî komo wa naxe.

Pahxa xakn̂e cipitaxmu.

Ero yimaw marha emasî komo xatken̂e iin̂omnî kom ha.

10 mîkyam xatken̂e,

yipitacho pokono yakronoman̂e komo.

Ero ke cipitaxmu yakro esepotpona cetken̂e.

Kosope yipitarî ke tweike so xatken̂e.

2 On warai mîkyam xatken̂e emasî komo,

5 xatken̂e takîhso cesehtînosom komo,

5 xatken̂e hara wara mak cesehtînosom komo mak okwe.

3-4 Tpotuhtoso xakn̂e n̂examro weyuru ahnoro.

Katî yarîhra tko xatken̂e warai makno komo tweyuru komo yewohkachen.

Takîhsom komo reha naar̂atken̂e katî tweyuru komo yewohkachen.

5 Taa,

cipitaxmu momokyatken̂e emasî komo.

N̂ecmamyakn̂e makî tko noro.

Ero ke nîwînîkyatken̂e tak emasî komo.

6 Amn̂e rakataw ro tak cipitaxmu yekahton̂e mtapotarî tak n̂esencekn̂e.

Eei,

mokyasî tak ha cipitaxmu ha,

amohcoko tak noro yakro tîtosom kom ha,

kacho n̂esencekn̂e.

Kar̂pe xa kekn̂e.

7 Ero ke paketken̂e emasî komo.

Tweyuru komo tak potuhkocetken̂e kir̂wan̂he weipotome.

8 Ero yimaw on wara ketken̂e warai makno komo takîhso cesehtînosom komo ya,

Amna weyuru katî n̂he thakwa tîmcoko.

N̂eseikesî mak okwe amna weyuru,

ketken̂e yîwya so.

9 Apohana okwe,

ketken̂e takîhsom kom hara,

aweyuru komo katî tîmyataw awya so amna weyuru marha men n̂ewohke hara okwe.

Kwarawantacho yaka xa matko etocoko awyanî ro komo yaponso,

ketken̂e yîwya so.

10 Taa,

katî yaponso toche so cipitaxmu tak mokyakn̂e.

Ero ke takîhsom komo tak cetken̂e noro yakro.

Yipitacho yenso mohxapu komo yaka tak n̂ewomyatken̂e.

Ewomuche so tak metata nahruyatken̂e cipitaxmu yanton komo.

11 Amn̂e tak mokyatken̂e hara emasî komo katî yaponso toxapunhîrî komo.

Metata mkai mak n̂ecececetken̂e.

En̂exa tak cipitaxmu yakro nîmtapowatken̂e.

On wara ketken̂e yîwya,

Ai Apa,

amna marha cma re tmoku xa nasî ahyaka.

Ero ke cma re metata mahrunkes amna yaka,

ketken̂e yîwya.

12 On wara tko cipitaxmu n̂eyukyakn̂e,

On wara wîîkes awya so,

Ohyaka tmohsom me ahtînopîra so was okwe,

kekn̂e warai makno komo ya.

Ero wa kekn̂e okwe.

13 Ero ke on wara kekn̂e Xesus tînpanatanmekrî komo ya.

Omohtopo ponaro xa men ehcoko.

Ero po men mokyasî,

mînto kaamo xa,

kacho esentara ro mak nas okwe.

Ero ke omohtopo ponaro mak ehcoko roro,

kekn̂e hara Xesus tînpanatanmekrî komo ya.

Ero wa kekn̂e.

14 Taa,

ero yinhîrî tak anarî pokono warai n̂ekatîmyakn̂e xa hara Xesus,

On wara kekn̂e,

On wara marha nasî kah yawno maywen komo yehtopo,

kayaritomo wara nasî.

Pahxa xakn̂e kayaritomo.

Miya tak noro cekn̂e anarî komo rowon pona.

Tîtorî me tanton komo nan̂ikyakn̂e.

Tupurantan tak nîmyakn̂e yîwya so tîramansom me mak.

15 Anarî ya nîmyakn̂e 5 tarentu.

Anarî ya nîmyakn̂e 2 tarentu hara.

Anarî ya nîmyakn̂e 1 tarentu mak.

Ero wa n̂ekamyakn̂e tupurantan.

Takîhsom me cehsom ya mer̂pora nîmyakn̂e.

Camkîno me cehsom ya wahra n̂hema nîmyakn̂e.

Puranta tîmîche tak miya cekn̂e kayaritomo mooxe.

16 Taa,

on wara xakn̂e 5 tarentu yahsîn̂enho,

tînahsîthîrî poko warawanwakn̂e.

Ero poko warawantarî ke tak n̂epamnoyakn̂e puranta.

Pahkî warawantache 5 tarentu tak nahsîyakn̂e xa hara kayaritomo nîmîtho yepamnotopo hara.

17 Ero wa xa marha xakn̂e 2 tarentu yahsîn̂enho hara.

Kayaritomo purantan n̂epamnoyakn̂e hara.

2 tarentu xa hara nahsîyakn̂e kayaritomo nîmîtho yepamnotopo hara.

18 Ero warahra tko xakn̂e 1 tarentu yahsîn̂enho reha.

Noro reha cekn̂e ewtarî yahtoso.

Ero yaka n̂eyamyakn̂e kayaritomo purantan roowo cheka mak okwe.

19 Taa,

pahkî exiche mokyakn̂e hara kayaritomo.

Tmokuche hara tanton komo tak nan̂ikyakn̂e.

N̂examro tak n̂esekatîmyatken̂e yupurantan poko twarawantachonhîrî komo poko.

20 Yihcirî me 5 tarentu yahsîn̂enho n̂enpekn̂e tînahsîthîrî,

ero n̂epamkatho marha.

Enko xe Apa,

kekn̂e kayaritomo ya,

5 tarentu mîmyakn̂e owya.

Ero wicakî xa marha tak wahsîyakn̂e hara okre,

kekn̂e tî yîwya.

21 On wara n̂eyukyakn̂e kayaritomo,

Takîhso mai ham okre,

oyewetîn̂e me mehxe ham okre.

Asak man ke kemyarîcekn̂e.

Ero poko mîxakn̂e takîhso ham.

Ero ke mer̂pono pîn yenîn̂e me tak kiir̂as hara.

Amoko tak ahwotaxi oyakro,

kekn̂e yîwya.

Ero wa kekn̂e kayaritomo takîhsom ya.

22 Ero yinhîrî 2 tarentu yahsîn̂enho tak n̂enpekn̂e tînahsîthîrî hara.

On wara tak kekn̂e noro hara kayaritomo ya,

Apa,

on ha apurantan hara.

2 tarentu ke ow memyarîcekn̂e.

Ero tak wepamnoyakn̂e hara.

Enko xe,

2 tarentu nas hara epamnotopo ha,

kekn̂e yîwya.

23 On wara kayaritomo n̂eyukyakn̂e,

Takîhso mai ham okre,

oyewetîn̂e me mehxe ham okre.

Asak man ke ka kemyarîcekn̂e.

Ero poko mîxakn̂e takîhso ham.

Ero ke mer̂pono pîn yenîn̂e me tak kiir̂as hara.

Amoko tak ahwotaxi oyakro,

kekn̂e marha yîwya.

Ero wa kekn̂e kayaritomo ponan ya hara.

24 Ero yinhîrî 1 tarentu yahsîn̂enho tak n̂enpekn̂e tînahsîthîrî hara.

Kayaritomo nîmîtho mak n̂enpekn̂e noro reha.

On wara kekn̂e kayaritomo ya,

Apa,

on hara apurantan.

On wara keen̂as amoro,

yukurumîkno me xa keen̂asî kopi.

Anarî komo natîrî yîhkan̂e wa xa keen̂asî,

an̂irithîrî pîn yeperîrî potun̂e wa marha.

25 Ero ke keraswakn̂e apona.

Ewtarî wahcekn̂e owî reha,

apurantanthîrî yeyamtome ero yaka.

On hara apurantanthîrî,

mîmyakn̂e erotho rma tan ha,

kekn̂e kayaritomo ya.

26 On wara tak n̂eyukyakn̂e kayaritomo yîmtaka hara,

Kicicitho ro mak amoro ham kica,

tuwun̂urem ro makî.

Anarî komo natîrî yîhkan̂e me ow mîhtînoyakn̂e ham,

on̂iritho pîn yeperîrî potun̂e me ham.

27 Ero ke opurantan poko twarawantapore n̂ehxe ha re epamnotome hara.

Ero wa awarawantache ketaw ha re opurantan n̂epamkatho meero wahsîrî ha re oroto.

Kicicme mîxakn̂e ham okwe amoro reha,

kekn̂e yîwya.

28 Ero yinhîrî on wara kekn̂e kayaritomo anarî komo ya,

tanton komo ya,

Moso n̂ekîtho ahsîcoko hara 1 tarentu rma.

Anarî ya tak tîmcoko hara 5 tarentu yahsîn̂enho ya ha,

kekn̂e kayaritomo.

29 Ero wa xa marha awir̂axe so Kaan,

mer̂pora exitaw Kaan nîmîtho ahyaw so ero rma tak Noro nîhremes hara mer̂pora xa tak ehtome ahyaw so.

Wahra mak exitaw reha ahyaw so eronhîrî rma ciki nowyasî Kaan ahyai so,

kekn̂e.

30 On wara tak kesî Kaan tanton komo ya,

Miya tak aacoko moso oyantonînho.

Akpîra mak nas okwe.

Awarpanaka tak aacoko.

Iito tak nîwraces amn̂e.

Nîyokrececenwasî marha cerewîmrî ke oko,

kekn̂e.

Ero wa kekn̂e Xesus tînpanatanmekrî komo ya.

31 On wara tak kekn̂e hara Xesus amna ya,

anarî poko amna weronomekn̂e hara,

amn̂e tak Tooto me Ewruxapu mokyas hara.

Tîroromutwe xa tak mokyasî.

Noro yanton komo marha mokyaxe akro ancu komo,

kir̂wanî ro komo.

Ero yimaw tak n̂eremesî kayaritomo yapon pona.

Tîroromutwe xa tak n̂esenpes iito.

32 Ero yimaw mîk hak rowon pono komo tak n̂enmekyasî ahnoro ro mak.

Yîcherenonkano tak n̂iir̂asî.

Okno yosom nîcherenonkesî tooku,

kootu n̂iir̂asî xiya n̂he,

oper̂a n̂iir̂asî miya n̂he hara,

ero wa xa marha yîcherenonkano n̂iir̂asî Tooto me Ewruxapu.

33 Xehxa oper̂a warai komo n̂iir̂asî kaari n̂ixa.

Mehxa kootu warai komo n̂iir̂as hara poowa n̂ixa hara.

34 Ero wa ciitîkache on wara kesî Kayaritomo,

kaari n̂ixan komo ya cokorî ka kesî,

Amohcoko tak amyamro.

Apapa nakronomatho amyamro reha.

Kayaritomo me tak ehcoko oyakro.

Pahxa rma Apapa ahtînoyatken̂e so kayaritomo me.

Roowo yakîhtoponhîrî n̂ixa ro rma ero warai me ahtînoyatken̂e so.

Ero ke amohcoko tak ha,

kesî yîwya so.

35 On wara mîxatken̂e opoko okre,

oromanataw Ow mînahmetken̂e.

Owokru xe oyexitaw Ow mîwokpetken̂e hara.

Kmokyakn̂e acheka so apoyino pînî rma.

Ero wa oyexitaw oyetarî menpetken̂e.

36 Pononpora oyexitaw Ow mîpononcetken̂e.

Oyenso mîmokyatken̂e okoh me oyexitaw,

kahrutopo yaw oyexitaw marha.

Ero wa Ow mîwakretken̂e.

Ero ke Apapa yewton pona tak amohcoko,

kesî.

Ero wa kesî xehxan komo ya mak,

kaari n̂ixan komo ya.

37 Ero yimaw on wara tak kexe kir̂wan komo yîwya hara,

Apa,

ahcemaw wa amna anahmekn̂e rooma poko awexitaw?

Ahcemaw wa amna awokpekn̂e awokru xe awexitaw ha?

38 Ahcemaw wa awetarî amna n̂enpekn̂e hara awya amna cheka amokuche ha?

Ahcemaw wa apononmekn̂e amna pononpora awexitaw?

39 Ahcemaw wa awenso amna mokyakn̂e okoh me awexitaw,

kahrutopo yaw awexitaw marha,

kexe takîhsom komo owya.

40 Ero yimaw on wara kesî Kayaritomo yîwya so,

Yaaro tan wîîkes awya so,

moxam xa makronometken̂e oyanan kom ha.

Oyakronomachonho rma mîn xakn̂e moxam yakronomachonho awya so,

kesî tak yîwya so kaari n̂ixan komo ya.

41 Ero yinhîrî on wara kesî poowa n̂ixan komo ya hara,

Etocoko amyamro reha,

Kaan nîwîrîmarî komo mak amyamro reha.

Ero ke etocoko miya wehto imo cheka,

eseikanî ro cheka.

Ciabu yeken me ciixapu mîn wehto imo,

noro yancun komo yeken me marha.

Iina rma etocoko amyamro meero okwe,

kesî yîwya so.

42 On wara reha mîxatken̂e opoko amyamro reha,

onahmara thakwa mîxatken̂e okwe rooma poko oyexitaw.

Owokpara marha mîxatken̂e owokru xe oyexitaw.

43 Oyetarî yenpora mîîxatken̂e okwe acheka so omokuche.

Oponon tîmîhra marha mîxatken̂e pononpora oyexitaw.

Oyenso mokuhra marha mîxatken̂e okoh me oyexitaw kahrutopo yaw oyexitaw marha,

wîîkesî tak yîwya so.

44 On wara n̂examro oyeyukyaxe hara,

Apa,

ahcemaw wa amna awen̂akn̂e ha rooma poko awexirî,

awokru xe awexirî marha,

amna poyino pîn me awexirî marha,

pononpora awexirî marha,

okoh me awexirî marha,

kahrutopo yaw awexirî marha?

Ahcemaw wa ero warai me awen̂akn̂e amna awakrera rma?

kexe hara yîwya.

45 On wara kes hara yîwya so Kayaritomo,

Yaaro tan wîîkes awya so,

moxam yakronomara mîxatken̂e okwe oyanan komo.

Oyakronomara awehtopo komo rma mîn moxam yakronomara awehtoponhîrî komo,

kesî.

46 Ero yinhîrî wehto imo cheka thakwa cexe n̂examro kicicme cehtoponhîrî komo yanme.

Eroromero iito naxe okwe.

Kir̂wan komo reha naxe waipînî ro me.

Kir̂wan po reha naxe eroromero,

kekn̂e.

Ero wa kekn̂e Xesus tînpanatanmekrî komo ya.