Ero yinhîrî tak Xesus nîmtapowakn̂e xa hara twenari mohxapu komo yakro.

Mer̂pono pîn komo mîkyam xatken̂e.

Tînpanatanmekrî komo yakro marha nîmtapowakn̂e.

On wara kekn̂e,

2 Pahxa ka xakn̂e Moises pen apanatanmekn̂e komo me.

Oroto tak apanatanmetopo mewren̂e komo tak naxe hara yîhretawno me hara.

Parisew komo marha naxe yîhretawno me hara.

3 Ero ke yîmtapotarî komo rma ewetîcoko.

N̂examro warahra ro maki tko ehcoko.

Tîmtapotachonhîrî komo yewetîn̂e pînî rma mîkyam kica.

4 Tawsîn̂em yaatopo poko awantoman̂e komo wara naxe.

Tawsîn̂em ke tîmkawnoyem wara xa awir̂axe so okwe.

Amotarî komo pona ero yipu ciin̂e wara naxe.

On poko ehcoko,

kexe.

Pokohra rma tko naxe n̂examro hara kica.

Tamoyaran ke meero awakronomara rma naxe ero yipu poko,

cewn̂an ke cik meero okwe,

kekn̂e Xesus yîwya so.

5 On wara marha naxe n̂examro,

ahce na poko cexitaw so tooto n̂enîrî me mak naxe ero poko kica.

Tperî poko n̂imiyaxe Kaan Karitan yen ciki,

tukukmaxmu yen ha.

Taporî mîtî poko marha ero yipu n̂imiyaxe,

porinî n̂he tak.

Kaw marha n̂iir̂axe tponon komo makpoci.

Ero wa so naxe tooto n̂enîrî me mak kica.

6 Tpoyino komo yakro ceseresmetaw so poturme cehsom yapon pona mak cerema xe so naxe kica.

Xutew yesenmetopo yaw cexitaw so marha enmekno rin̂e komo yapon pona cerema xe so naxe kica.

7 Yakentaw cexitaw so kwarawantacho yaw iitono komo mtapotarî ponaro xa naxe,

Ai,

tan mai kpanatanmekn̂e okre,

kacho ponaro.

Habi,

ketaw tooto komo yîwya so tpoxwe ro mak n̂encexe ero wa cetacitopo kica.

8 Ero warahra ehcoko amyamro reha.

Habi kacho poko esetacpora ro mak ehcoko.

Cewn̂e mak nas apanatanmekn̂e ro komo,

Kristu ha.

Etakno re xa maxe amyamro.

9 Apa,

kacho poko etacira marha ehcoko roowo pono komo.

Cewn̂e mak nas Aamo komo,

kah yawno mak ha.

10 Kpanatanmekn̂e,

kacho poko marha esetacpora ehcoko.

Cewn̂e mak nas apanatanmekn̂e komo,

Kristu mak ha.

11 On wara maxe amyamro amn̂e,

ayopono me cehsom komo tak naxe amn̂e awanton komo me rma.

12 Kyopono xa n̂e ro ow ha,

kan̂e me awexitaw so,

kyopono pîntho me rma tak awenpexe so hara Kaan amn̂e.

Emamaw re me makî reha awecir̂ataw so anarî komo yopono me xa matko awenpexe so Kaan amn̂e.

Ero wa Kaan awenpexe so,

kekn̂e Xesus yîwya so mer̂pono pîn komo ya.

13 On wara marha kekn̂e Xesus,

Xutew panatanmetopo mewren̂e komo,

Parisew komo marha,

awakro so kîmtapowasî,

Metwîrîmexe ro mak amn̂e okwe.

Kir̂wan wara cesenposom amyamro tohnaw ro mak kica.

Kaan maywen me cexi xatî komo porohkan̂e mak amyamro okwe.

Kaan maywen me exihra rma maxe amyamro.

Anarî komo porohkan̂e me marha maxe Kaan maywen me exporono komo rma.

14 Awakro so kîmtapowasî rma Xutew panatanmetopo mewren̂e komo,

Parisew komo marha,

Metwîrîmexe ro mak amn̂e okwe.

Kir̂wan wara cesenposom amyamro tohnaw ro mak kica.

Iin̂o waihxapu mînkan̂e komo amyamro ecin̂onkaxapu mînkan̂e rma okwe.

Yîmînkache so tak mîmtapowaxe pahkî Kaan yakro kir̂wan wa awesenpotome so mak kica.

Ero wa awexirî ke so Kaan nîrwonasî ro mak tak amn̂e apoko so.

15 Awakro so kîmtapowasî rma Xutew panatanmetopo mewren̂e komo,

Parisew komo marha.

Metwîrîmexe ro mak amn̂e okwe,

wîîkesî xa hara awya so.

Kir̂wan wara cesenposom amyamro tohnaw ro mak kica.

Mooxe ro mak mîîcexe anarimaw so awewetîn̂e komo me ciino riso.

Roowo pore mîîcexe,

anarimaw tuuna kwaw mîîcexe hara cewn̂an wece rma.

Awewetîn̂e me xa exitaw tak noro pen miir̂axe wehto imo ywaka tîtosom me hara okwe.

Ayopono komo me xa matko tak nasî iina tîtosom me xa tak okwe.

16 Metwîrîmexe ro mak amn̂e okwe.

Aano rin̂e rma re amyamro.

Ewuhnî wa makî tko maxe okwe.

On wara mîîkexe okwe anpanatanmekrî komo ya,

Kaan mîn yetahcataw amtapotarî komo yewetîtopo me,

kicicme exihra rma maxe amtapotachonhîrî yaw roro exihra awexitaw so.

Ooru yetahcataw reha awya so Kaan mîn yawno,

amtapotachonhirî yaw roro rma men cexpore nasî,

mîîkexe.

17 Akpîra cesehtînosom ro mak amyamro ham okwe,

ewuhnîtho warai ro mak ha.

Tîpîn̂emu rma re mîn ooru Kaan mîn yawno me exirî ke mak.

Kaan mîn xa matko nasî tîpîn̂e xa tak.

18 On wara marha mîîkexe amyamro okwe,

Anarimaw Kaan ya tîmsom yakn̂itopo na metahcatu amtapotarî komo yewetîtopo me hara.

Ero pîntho makî tko mîn tîmsom yakn̂itopo.

Ero ke kicicme exihra rma maxe amtapotachonhîrî yaw roro exihra awexitaw so,

mîîkexe.

Tîmsom yakn̂itopo pono yetahcataw reha awya so,

Kaan ya tîmsom,

ero yipu yetacitopo yanme tak amtapotachonhîrî yaw roro cexpore men nasî,

mîîkexe kica.

19 Akpîra cesehtînosom ro mak amyamro okwe,

ewuhnîtho warai ro mak ha.

Tîpîn̂emu rma re mîn Kaan ya tîmsom.

Tîpîn̂em xa mîn ero yipu yakn̂itopo reha Kaan ya tîmsom yakn̂itopo me cexirî ke.

Ero ke tîpîn̂em me xa marha nasî ero pono Kaan ya tîmsom yakn̂itopo po exirî ke mak.

20 Ero ke yaaro tan wîîkes awya so,

Kaan ya tîmsom yakn̂itopo yetahcataw awya so,

ero pono mko yetacin̂e me marha maxe amtapotarî komo yewetîtopo ha.

21 Ero wa xa marha nasî Kaan mîn yetacitopo hara awya so.

Yaaro tan wîîkes awya so.

Kaan mîn yetahcataw awya so,

Kaan mîn yawno yetacin̂e me xa marha maxe amtapotarî yewetîtopo me hara.

22 Anarimaw kaapu na metahcat hara amtapotarî komo yewetîtopo me.

Ero wa kan̂e me awexitaw so Kaan yapon yetacin̂e me rma maxe,

ero po ceremaxmu yetacin̂e me marha.

Ero wa maxe mîn hak yetacin̂e me awexitaw so amtapotarî komo yewetîtopo me,

kekn̂e Xesus yîwya so.

23 Metwîrîmexe ro mak amn̂e okwe Xutew panatanmetopo mewren̂e komo,

Parisew komo marha,

wîîkesî xa hara awya so.

Kir̂wan wara cesenposom amyamro tohnaw ro mak kica.

Awotî komo yain raconho rma re mîmyaxe Kaan ya,

anahrî komo poxuretopo raconho marha.

Ero yipu tîmpore rma nasî.

Anarî xa tko nas hara kpanatanmetopo hara ponaro awehtopo komo me cehsom xa takî.

On wara kesî ero hara,

Takîhso ehcoko miyan komo poko rma,

ahwokaxapu komo pînîn yaw ehcoko,

Kaan pona encoko,

kesî marha.

Ero ke ero wa kacho xa marha cewetpore nasî.

24 Aano rin̂e rma re amyamro ewuhnî me cehsom ha tko okwe.

Werewereci town̂e wa maxe awokru komo kwawnonho.

Kameru town̂e pîn wara rma tko maxe.

Ermomn̂e wara rma maxe okyo.

Ero yipu amyamro okwe.

25 Ero wara rma wîîkesî xa hara awya so Xutew panatanmetopo mewren̂e komo,

Parisew komo marha.

Metwîrîmexe ro mak amn̂e okwe.

Kir̂wan wa mak cesenposom komo amyamro tohnaw ro mak kica.

Paayu korokan̂e wara rma re maxe,

parakwe korokan̂e wara marha.

Yîmkari korokan̂e wara mak maxe okwe.

Poore mak metakir̂wamexe.

Aropotaw so rma tko yupurantamnî komo yemyawnonkacho ponaro xa tak maxe kica,

awesewakomacho komo ponaro marha kica.

Ero wa maxe aropotaw so kica.

26 Ewuhnî warai ro mak amyamro ham kica Parisew komo.

Yai xa ka korokacoko ha ke paayu,

parakwe kom ha.

Ero wa ackorokacoko kir̂wan̂he tak ehtome yîmkarî meero.

Ero wa xa ehcoko ha ke.

27 Metwîrîmexe ro mak amn̂e okwe,

wîîkesî xa hara awya so.

Xutew panatanmetopo mewren̂e komo,

Parisew komo marha,

awya so wîîkesî.

Kir̂wan wara cesenposom amyamro tohnaw ro mak kica.

Waixa pen yahrutopo wara rma maxe.

On wara n̂examro pen yananînho n̂iir̂axe ahrutoponhîrî komo,

nîmînmexe,

numuturexe marha okre.

Ero ke kir̂wan̂he n̂esenpesî yîmkari mak.

Kicicme ro mak tko nasî kica atumnaw.

Tooto yocho nas atumnaw,

anarmerpan marha nas iito kicicitho mko.

Ero wara xa marha maxe amyamro hara okwe.

28 Kir̂wan wara rma re mesenpexe poore mak ha tko kica,

tooto ya mak ha.

Aropotarî komo nasî copoyem wara tohnaw ro mak awesenpotopo ke,

kanwekn̂e me awehtopo komo ke marha kica.

29 Ero wara rma wîîkesî xa hara awya so,

Xutew panatanmetopo mewren̂e komo,

Parisew komo marha,

metwîrîmexe ro mak okwe,

mîîkesî.

Kir̂wan wara rma re mesenpexe tohnaw ro mak kica.

Aweronoman̂enhîrî pen komo yocho yahrutopo miir̂axe kir̂wanî mko.

Kir̂wan pen komo yocho yahrutopo mîporokucexe marha.

30 On wara mîîkexe,

Pahxa kporin pen komo tî waihketken̂e tweronoman̂e pen komo okwe.

Ero yimaw kexitaw so kîwyam ketaw ha re n̂examro pen waihkan̂enho komo yakronomara cehcerî ha re kîwyam reha,

mîîkexe.

31 Wara rma n̂examro pen wapatho yepamtho me rma mesekatîmyaxe,

Kporin pen komo,

karî ke rma awya so.

32 Ero ke aporin pen komo yehtoponho yaw roro rma tak ehtîkacoko.

33 Okoyi warai ro mak amyamro.

Okoyi yepamtho mak amyamro.

Wehto imo ywaka tîtosom mak amyamro porohkan me ro thakwa mak okwe.

34 Ero ke ahyaka so tak wen̂epesî xa hara amn̂e aweronoman̂e komo,

takîhsom komo marha,

apanatanmekn̂e komo marha.

Ero yipu komo wen̂epesî ahyaka so amn̂e.

N̂examro tak metapexe hara okwe anarî pen komo.

Mamowexe marha anarî pen kom hara.

Anarî pen komo mîhyokyaxe awesenmetopo komo yaw rma okwe.

Miya so mîîcexe mîn hak ewto mko pona noro yipu komo yemetanmeso okwe.

35 Ero wa maxe amn̂e apona so tak ecitome pahxan pen komo waihkachonho ahnoro rma,

roowo poko hakno pen komo.

Mehxa ro kir̂wan pen komo waihketken̂e yiixatî pîn komo okwe.

Abew pen ka waihketken̂e,

kir̂wan pen.

Kokon̂oro n̂he tak Sakarias pen tak mîwaiketken̂e amyamro hara,

Barakias mumutho pen ha.

Kaan mîn mîtwo rma mîwaiketken̂e,

tîmsom yakn̂itopo mîtwo marha,

iyotaw mak.

Ahnoro noro yipu komo waihkachonho tak n̂ecir̂as apona so amn̂e.

36 Yaaro men tan wîîkes awya so n̂examro pen n̂epanîyasî Kaan amn̂e awemetanmetopo komo ke,

awepamthîrî komo yemetanmetopo ke marha,

kekn̂e Xesus yîwya so.

Ero wa kekn̂e Xutew panatanmetopo mewren̂e komo ya,

Parisew komo ya marha.

37 Ero yinhîrî on wara kekn̂e hara Xesus iitono komo ya hara,

Ai Xerusaren pono komo,

Xerusaren pono komo,

awya so tan wîîkesî.

Aweronoman̂e komo waparî amyamro ham okwe.

Ahyaka so Kaan n̂en̂epetho komo metapexe mak okwe toh ke.

Emapona roro awenmekî xe so cma re wîxakn̂e ohyaka akurunpetome so.

Kapikara yon nan̂ikyasî tîmxîkrî taporî mamaka,

ero wara roro cma re awenmekî xe so wîxakn̂e ohyaka.

Ohyaka tko amoku xera ro mak mîxatken̂e okwe.

38 Ero ke yarîhra ro mak tak nasî amînthîrî komo amn̂e okwe.

39 On wara wîîkes awya so,

ahyai so tak kîwcesî.

Owtoche oyenîra ro mak tak maxe pahkî okwe.

Amn̂e mak Ow meen̂axe hara.

Ero yimaw,

oyen̂ataw xa hara on wara tak mîîkexe opoko,

Kir̂wanî ro Mîkro Xesus,

Kporin komo yanme tmohsom ha,

mîîkexe opoko ero yimaw.

Ero wa mak wîîkes awya so,

kekn̂e Xesus yîwya so Xerusaren pono komo ya.

Ero wa kekn̂e.