Ero yinhîrî anarî pokono wara xa hara n̂ekatîmyakn̂e Xesus iitono komo ya.

2 On wara kekn̂e,

On wara nasî kayaritomo me Kaan yehtopo,

Pahxa kayaritomo xakn̂e on wara,

erewusmano n̂iir̂akn̂e tumumuru pitacho yimawno.

3 Erewsî ciitîkache tak on wara kekn̂e kayaritomo tanton komo ya,

Weronomaxapu komo tak an̂ihtatko eseresmaxi mohtome so,

kekn̂e yîwya so.

Ero ke cetken̂e tak an̂ihso.

Tmoku xera so xatken̂e okwe.

4 Ero yinhîrî anarî komo n̂en̂epekn̂e xa hara kayaritomo,

tanton komo xa hara.

On wara kekn̂e tîn̂en̂eperî komo ya,

On wara kacoko yîwya so,

Ciiso tî nai kwokru komo,

knahrî komo marha.

Tookuthîrî tî paraxka paaka,

kar̂pamxan marha tupurukyemînhîrî okre.

Yupunthîrî tî kan̂porew kir̂wan̂he okre.

Ero ke amohcoko takî ha tî eseresmaxi omumuru pitacho yimawno yahso,

kacoko men yîwya so,

kekn̂e kayaritomo tîn̂en̂eperî komo ya.

Ero ke yîmtapotarî tak n̂ekatîmyatken̂e thakwa cma ha re yîwya so.

5 Pîra rma okwe.

Ewetîra ro makî xatken̂e.

Anarî wece makî cetken̂e okwe.

Anarî cekn̂e tmararîn pona.

Anarî cekn̂e warawantax hara.

6 Anarî komo tî kayaritomo yanton pen komo nahsîyatken̂e.

N̂examro pen nîhyokyatken̂e.

Anarî pen komo tî n̂etapetken̂e ro mak okwe.

Ero wa thakwa n̂iir̂atken̂e kayaritomo yanton pen komo,

tan̂ikn̂enhîrî pen komo.

7 Ero yipu yentache kayaritomo tak nîrwonakn̂e.

Sowtatu komo tak n̂en̂epekn̂e hara tanton pen komo yepanîn̂e.

Ero ke tak n̂examro pen wapatho komo tak waihketken̂e.

Ewtonthîrî komo marha nakn̂iyatken̂e.

Ero wa ciino n̂iir̂atken̂e kayaritomo yanme rma.

8 Taa,

ero yinhîrî on wara kekn̂e xa hara kayaritomo tanton komo ya xa hara,

Iime ciiso nasî omumuru pitacho.

Kicicme tko n̂ehcow onan̂ikpotho komo.

Tmohsom mera xatken̂e ham noro yipu komo.

9 Ero ke miya so tak etocoko hara esama yaw so.

Mîk hak mak an̂ihtatko eseresmachome so,

kekn̂e.

10 Ero ke esama yaw so tak cetken̂e kayaritomo yanton komo.

Tîn̂enîthîrî komo n̂ekyatken̂e tak ahnoro.

Kir̂wan komo n̂ekyatken̂e,

kicicitho komo meero.

Ero ke tawronohkatîkaxi tak xakn̂e kayaritomo mîn.

Mer̂pora tak xatken̂e ceseresmaxmu komo.

11 Ero yimaw tak kayaritomo cekn̂e ceseresmaxmu komo yenso.

Iito n̂een̂akn̂e anarî,

akro so mohxapu hara.

Noro ponon xakn̂e anarme.

Kipitacho yaka kmohtopo yawhra xakn̂e okwe.

12 Ero ke on wara kekn̂e kayaritomo yîwya,

Oyakno,

ahce kacho ero yipu yaw mîmoko hara oona?

Kipitacho yaka kmohtopo pîn mîn aponon kica,

kekn̂e yîwya.

Ero wa kacho yentache tak nîtîtmamyakn̂e mak ero yipu yaw mohxapu.

Eikura thakwa xakn̂e.

13 Ero yinhîrî on wara kekn̂e kayaritomo tanton komo ya,

Moso apomicoko,

yîhromicoko marha.

Miya kr̂a tak ar̂macoko awarpanaka.

Iitono komo tak nîwracexe okwe,

nîyokrececenwaxe marha cerewîmrî ke so oko,

kekn̂e kayaritomo tanton komo ya,

kekn̂e Xesus.

Ero warai n̂ekatîmyakn̂e Xesus yîwya so.

14 On wara kekn̂e xa hara Xesus yîwya so,

Mer̂pora ro makî cma re naxe Kaan nan̂ikîtho komo.

Asak makî tko naxe okwe men̂ekaxapu komo reha,

kekn̂e Xesus yîwya so.

Ero wa kekn̂e Parisew komo ya,

tîmsom pokono yenîn̂e komo ya marha.

15 Ero yinhîrî tak mîîmo yai n̂epataketken̂e hara Parisew komo.

N̂esencetken̂e Xesus poko.

On wara tî ketken̂e,

Ahce wa Noro cewkukmetu kr̂a kicicme yîmtapotachome tak,

kayaritomo ya ahsîpotome tak ha?

ketken̂e.

16 Ero ke tînpanatanmekrî komo takî tî n̂en̂epetken̂e Xesus yaka.

Eroces ponarono komo yakro rma tî n̂en̂epetken̂e.

Taa,

on wara ketken̂e en̂epexapu komo yîwya,

Apa,

yaarono me tîmtapotaxmu Amoro.

Yaarono me xa amna mîpanatanmekya Kaan yanme kehtopo poko.

Tooto yanme mak amna panatanmekîra ro mak mai ham.

Tooto pona yukurunanpîra marha mai ham.

17 Ero ke on wara amna kes awya,

ahce wa amna nai awya?

Puranta amna nîmya Sesa ya?

Tîmîhra katî amna nai yîwya?

ketken̂e Xesus ya.

18 Tukukmacho me rma tko tî Xesus nîhtînoyakn̂e yîmtapotarî komo.

Ero ke on wara kekn̂e yîwya so,

Kir̂wan wa cesenposom komo mak amyamro kica.

Ahce kacho Ow mukukmetu kica?

19 Exepeyu ka ehcoko ha ke on̂enîrî,

kayaritomo ya tîmsom,

kekn̂e yîwya so.

Ero ke exepeyu tak n̂enpetken̂e yîwya.

20 On wara kekn̂e Xesus yîwya so,

Onoke kuknon on exepeyu pokono?

Onoke yosot hara tan exepeyu poko mewrexapu hara,

kekn̂e yîwya so.

21 Sesa kuknon tî mîn ha.

Noro yosotî marha mîn mewrexapu,

ketken̂e Xesus ya.

Ero ke on wara kekn̂e Xesus yîwya so,

Sesa ya rma tîmcoko yin̂irpothîrî.

Kaan n̂iritho marha tîmcoko yîwya hara,

kekn̂e yîwya so.

22 Ero ke n̂eserepoketken̂e ro mak tak n̂examro.

Xesus yai tak cetken̂e hara.

Ero wa xatken̂e Parisew npanatanmekrî komo.

23 Taa,

ero kaamo po rma tak Satusew komo mokyatken̂e hara Xesus yaka.

On wara kan̂e komo mîkyam Satusew komo,

Pakahra ro mak tasî kwaipuche,

kan̂e komo mîkyam.

N̂examro makîrha tak n̂esencetken̂e Xesus yakro.

On wara ketken̂e yîwya,

24 Apa,

on wara kekn̂e Moises pen amna ya,

Apoyinonhîrî komo na waihya anarimaw yîmxîkîra rma.

Ero wa waipuche,

yihcinhîrî rma nahsîpe aknonhîrî hara.

Yihcinhîrî tak nîmxîkîcesî taknonhîrî pen xîkrî me rma,

kekn̂e amna ya.

25 Taa,

pahxa xatken̂e amna poyino.

6 xatken̂e noro yakno,

ero ke 7 xatken̂e kîîrî re.

Amn̂e tak potuthîrî n̂ipiwakn̂e.

Ero yinhîrî tak noro pen waihyakn̂e okwe yîmxîkîra rma.

Ero ke yihcinhîrî tak nahsîyakn̂e aknonhîrî hara,

ponanînhîrî rma.

26 Amn̂e noro pen makîrha waihyakn̂e hara okwe yîmxîkîra rma.

Ero ke ponanînhîrî xa hara nahsîyakn̂e yihcinhîrî.

Ero wara roro xatken̂e okwe 7-nhîrî pona roro.

27 Mah yaka so yihcinhîrî komo tak waihyakn̂e hara okwe.

28 Taa,

amn̂e waixapunhîrî komo pakache onoke pici me tak nai wooxam awya?

Ahnoro rma noro nahsîyatken̂e cipici me so,

7 rma okyo,

ketken̂e.

Ero wa ketken̂e Satusew komo Xesus ya.

29 On wara tko Xesus n̂eyukyakn̂e hara,

Camkî mak maxe okwe Kaan Karitan yîhtînopîra awexirî ke so,

kar̂pe xa Kaan yehtopo yîhtînopîra awexirî ke so marha.

30 Anarî me mak reha naxe waixapunhîrî komo amn̂e tpakache so hara.

Cipici komo yahsîra tak naxe ero yimaw.

Wooxam komo marha naxe ciin̂o yahsîra.

Ero wa naxe ancu komo,

kah yawno komo.

Ero wa xa marha naxe pakaxapu ero yimaw hara.

31 On wara marha tko wîîkes awya so,

waixapunhîrî komo pakacho pokono rma enîhra matu Kaan Karitan?

32 On wara kekn̂e Kaan awya so,

Ponaro Abraaw yehtopo Ow ha,

ponaro Isake yehtopo marha,

ponaro Xako yehtopo marha,

Noro yipu Ow ha,

kekn̂e awya so.

Taa,

ponaro waixa pen komo yehtopo pîn Mîk Kaan.

Ponaro waipîn komo yehtopo makî reha Mîk ha ke,

kekn̂e Xesus yîwya so.

Ero wa kekn̂e Xesus Satusew komo ya reha.

33 Ero wa kacho n̂encetken̂e tooto komo mer̂pono pîn komo.

Ero ke tak n̂eserepoketken̂e ro mak yîmtapotarî poko.

Ero wa xatken̂e.

34 Taa,

nîtîtmamyatken̂e mak tak Satusew komo ero wa kacho yentarî ke.

Ero wa Satusew komo yentarî ke Parisew komo ya,

n̂examro makîrha tak mokyatken̂e xa hara Xesus yaka.

35 Anarî xakn̂e n̂examro yakrono,

Moises nmewretho pokono ro.

Noro tak Xesusu mtapotarî yenta xe xakn̂e hara yukukmachome mak.

Ahce wa kyam oyeyukya?

kekn̂e makî tî.

On wara kekn̂e noro Xesus ya,

36 Apa,

mer̂pora nas amna panatanmetopo mîn hak pokono.

Ahce wa kacho xa mîn amna panatanmetopo xa tak anarî yopono?

kekn̂e Xesus ya.

37-38 On wara Xesus n̂eyukyakn̂e hara,

On wara kacho xa mîn apanatanmetopo komo xa tak anarî yopono,

Ponaro awehtopo komo xa Mîk Kporin komo.

Ero ke Noro xe mak ehcoko.

Yaaro xa yiixe ehcoko,

tîpîn̂e xa encoko.

Ponaro xa ehcoko marha,

anarî ponarora,

kacho xa mîn apanatanmetopo komo xa tak.

39 Ponan nas hara ero yipu xa marha,

On wara kacho hara,

Amîtwono komo xe ehcoko etîxe rma maxe ero wa xa marha,

kacho.

40 2 mak mîn ponaro awehtopo komo xa tak.

Ero yipu yewetîn̂e me awexitaw so ahnoro apanatanmetopo komo yewetîn̂e me rma maxe.

Aweronoman̂e komo mtapotachonho yewetîn̂e me meero maxe.

Ero wa kekn̂e Xesus Parisew ya.

41 Taa,

iito rma ka exitaw so Parisew komo Xesus makîrha tak n̂esencekn̂e n̂examro yakro hara.

42 On wara kekn̂e yîwya so,

Onoke warai me xa Kristu mîhtînoyatu?

Onok yepamtho me nai Noro awya so?

kekn̂e yîwya so.

Tapi yepamtho tî Mîk Kristu,

ketken̂e yîwya.

43 On wara Xesus n̂eyukyakn̂e,

Taa,

ahce wa exirî ke,

Oporin,

kekn̂e Tapi pen cepamthîrî poko rma?

Kir̂wanî ro Yekatî yanme rma ero warai me n̂etahcakn̂e.

44 On wara kacho mewrekn̂e Tapi pen,

On wara tî kekn̂e Kporin komo Oporin ya,

Opanaka ka eremacoko kaari n̂ixa.

Aaxatî pîn komo ka war̂metîkesî.

Anapikrî me kr̂a ka wiir̂asî.

Ero ke oona ka eremakî ar̂matîkacho komo mîtwo,

kekn̂e Kporin komo yîwya,

kacho mewrekn̂e.

45 Ero wa kacho mewrekn̂e Tapi pen Kristu poko.

Ahce wa exirî ke,

Oporin,

kekn̂e yîwya cepamthîrî ya rma?

kekn̂e yîwya so.

Ero wa kekn̂e Xesus Parisew komo ya.

46 Nîtîtmamyatken̂e thakwa mak tak entan̂e komo ahnoro.

Xesus yeyuhtopo yîhtînopîra ro makî tî xatken̂e.

Ero yinhîrî Xesus yakro esentara ro mak tak xatken̂e tooto komo.

Nîkrîyatken̂e mak tak ahnoro.

Ero wa tî xatken̂e.