Ero yinhîrî tak Xesus komo cetken̂e xa hara Xerusaren yesamarî yaw.

Becpaxe pona tak n̂epataketken̂e.

Xerusaren pahnoke xakn̂e Becpaxe,

Oripera Yîpîn yexenaw.

Iito exitaw so Xesus tak n̂en̂epekn̂e tînpanatanmekrî komo asakî.

2 On wara kekn̂e yîwya so,

Mîn pona etocoko ewto pona.

Iina awepatakache so rma buhu tak meen̂axe iito cimiso.

Tîmxîkrî yakro rma nasî iito.

Noro tak yîmhokacoko amn̂e.

Xiya tak ehcoko ohyaka,

kekn̂e yîwya so.

3 On wara na ketu iitono komo awya so,

Ahce kacho buhu maar̂at hara?

ketu na.

Ero wa ketaw awya so on wara eyuhcoko,

Yiixe tî nai Kporin komo,

kacoko mak yîwya so.

Taa,

arko rma,

kexe tak awya so,

kekn̂e Xesus yîwya so tîn̂en̂eperî komo ya.

4-5 Ero wa Xesus kekn̂e Kaan Karitan yaw roro rma cehtome,

kweronoman̂e penî mtapotachonho yaw roro ha.

On wara kekn̂e noro pen pahxa,

On wara kasko Siaw yemsîrî ya,

Mîkro men akayaritomon.

Yukurumîkîra mak mokyasî ahyaka.

Buhu mkaw mak mokyasî,

buhu xîkrî mkaw xa,

kasko yîwya Siaw yemsîrî ya,

kekn̂e pahxa rma.

Ero wa kachonho yaw roro cexi xe xakn̂e Xesus.

6 Ero ke yînpanatanmekrî komo tak cetken̂e Xesusu mtapotarî yaw roro.

7 Buhu tak n̂ekyatken̂e,

yîmxîkrî marha.

Ekîche tpononthîrî komo ke rma tak buhu nîmkayamcetken̂e Xesus totohme yîmkaw.

Ero yipu pona tak n̂eremekn̂e Xesus amuhtoxapu pona.

8 Ero yimaw tak iitono komo pen cetken̂e Xesus wenari mer̂pono pîn.

N̂examro marha n̂iir̂atken̂e tponon komo roowo pona esama yaka.

Anarî komo nîhkocetken̂e wah yarî warai hara.

Ero yipu marha tak n̂iir̂atken̂e esama yaka miya roro.

Ero wa Xesus cekn̂e Xerusaren pona.

9 Poturme cetken̂e anarî komo mer̂pono pîn komo.

Wenari ro marha mokyatken̂e anarî kom hara mer̂pono pîn komo xa marha.

On wara ketken̂e n̂examro Xesus poko,

Osana,

Tapi yepamtho Moso ha.

Kir̂wanî ro Moso okre Kporin komo yanme mohxapu.

Osana,

kyopono ro xa Moso okre,

ketken̂e Xesus poko.

Kar̂pe xa ketken̂e.

10 Ero yinhîrî Xerusaren pona tak n̂epatakekn̂e Xesus.

N̂eserepoketken̂e tak ero pono komo ahnoro.

Onoke Moso mokya hara?

ketken̂e tak Xesus poko.

11 Xesus wenari tîtosom komo tak n̂eyukyatken̂e hara,

Xesus Moso,

kweronoman̂e.

Nasare pono Moso Karireia pono ha,

ketken̂e iitono komo ya.

Ero wa ketken̂e.

12 Ero yinhîrî tak Xesus cekn̂e Kaan mîn yaka.

Iito tak twarawantaxmu komo n̂een̂akn̂e.

N̂examro pen tak n̂en̂epekn̂e.

Iito marha xatken̂e puranta yosom kom hara.

N̂examro purantan yapon tak macakekn̂e kr̂a.

Iito marha xatken̂e potkuku warai poko twarawantaxmu kom hara.

N̂examro yapon marha Xesus macakekn̂e.

13 On wara kekn̂e Xesus twarawantaxmu komo ya,

On wara kacho mexe nasî tmewreso Kaan Karitan,

Kaan yakro kîmtapotacho komo,

kacho me nas on omîn amn̂e,

kacho nasî tmewreso.

Ero warahra reha miir̂at ham ke kica amyamro.

Cen̂epan̂em yeken me mak miir̂atu kica.

Ero ke etocoko kr̂a,

kekn̂e Xesus yîwya so.

Ero wa en̂epeno n̂iir̂akn̂e Xesus Kaan mîn yai.

14 Taa,

iito exitaw rma ka Kaan mîn yaw ewuhnî komo tak mokyatken̂e yîhyaka.

Yîhrepun komo marha mokyatken̂e.

N̂examro tak nakir̂wamekn̂e okre iito rma.

15-16 Rikomo komo marha xatken̂e iito Kaan mîn roron po.

N̂examro tak nahwowatken̂e Xesus poko.

On wara ketken̂e,

Kir̂wanî ro Mîkro Xesus.

Tapi yepamtho xa Mîkro ham,

ketken̂e.

Kar̂pe xa ketken̂e.

Iito marha xatken̂e Tîmsom pokono yenîn̂e komo,

Xutew panatanmetopo mewren̂e komo marha.

Centaporera ro makî tî n̂examro n̂encetken̂e rikomo komo mtapotarî.

Kicicme marha tî xakn̂e yîwya so ewuhnî komo yewtanîrerî Xesus ya,

yîhrepun komo yakir̂wamacho marha.

Ero ke on wara ketken̂e Xesus ya,

Entara ma mai ke rikomo komo mtapotarî apoko ha?

ketken̂e yîwya.

Wencesî rma,

kekn̂e hara Xesus yîwya so.

On wara wîîkesî awya so hara,

Kaan Karitan yenîhra ma mat ke on wara kacho,

Rikomo komo xa miir̂akn̂e kir̂wan̂he awehtopo yekatîmn̂e me?

Moomo pokono komo meero ero wa miir̂akn̂e,

kacho yenîhra ma mat ke?

kekn̂e tak Xesus yîwya so.

17 Ero wa kache n̂examro tak nînomyakn̂e Xesus.

Xerusaren poi tak cekn̂e Betania pona hara iito cenmachome.

Ero wa xakn̂e.

18 Taa,

enmapuche tak Xerusaren pona cekn̂e xa hara Xesus pahxaxaro.

Esama yaw tîcetaw rma nîromanakn̂e tak.

19 Iito xakn̂e piiku yepu esama yakumyaw.

Ero ke eperîrî yenso cekn̂e Xesus.

Okwe,

eperîrî exihra ro mak xakn̂e okwe.

Yaarî mak xakn̂e okwe.

Ero ke on wara kekn̂e Xesus piiku yepu ya,

Epetan me kr̂a tak esko eroromero,

kekn̂e.

Ero yinhîrî yohno rma naawayakn̂e piiku yeputho okwe.

Ero wa xakn̂e.

20 Ero ke n̂eserepokekn̂e tak Xesus npanatanmekrî komo.

On wara ketken̂e Xesus ya,

Ahce wa piiku yeputho naawaipo yohno ro mak okyo?

ketken̂e yîwya.

21 On wara Xesus n̂eyukyakn̂e hara,

Yaaro tan wîîkes awya so,

ero wa ciin̂e me xa marha maxe amyamro hara Kaan pona enîn̂e me awexitaw so.

Apohana,

ero wa ciin̂e me na wai anarimaw mak,

kan̂e pîn me mak awexitaw so ero wara rma piiku yepu miir̂axe amyamro hara Kaan pona enîn̂e me xa awexitaw so.

On wara meero maxe,

tan nasî îîpî,

ero rma tak anana men̂epexe.

Ai îîpî,

mîîkexe,

miya tak etoko.

Tuuna imo kwaka epîrkata,

mîîkexe.

Ero wa ketaw awya so amtapotachonhîrî yaw roro tak tuuna imo kwaka n̂epîrkesî îîpî.

22 Ero ke ero wara ehcoko roro Kaan yakro amtapowataw so.

Ahce na yetahcataw yiixe awehtopo komo,

Wahsîyasî tak ha wa amn̂e,

kacoko tak.

Ero wa ketaw awya so an̂etacithîrî komo tak mahsîyaxe okre,

kekn̂e hara Xesus yîwya so.

23 Taa,

ero yinhîrî Xesus tak n̂ewomyakn̂e Kaan mîn yaka.

Iito tak panatanmekno n̂iir̂akn̂e xa hara.

Ero yimaw tak Xesus yaka mokyatken̂e tîmsom pokono yenîn̂e komo,

Xutew poritomon komo marha.

On wara ketken̂e n̂examro Xesus ya,

Onoke yanme xa twarawantaxmu komo men̂epei Kaan mîn yai?

Onoke yanme panatanmekno miir̂a tan?

Onoke xa awantomekn̂e ero yipu poko ha ke?

ketken̂e yîwya.

24 On wara Xesus n̂eyukyakn̂e hara,

On wara xa matko wîîkes awya so hara.

Omtapotarî ika eyuhcoko.

Ero yinhîrî tak amtapotarî komo weyukyas Ow hara.

Ero yipu poko oyantoman̂enho Mîk Noro,

wîîkesî tak awya so.

25 Onoke yanme xa emicinono n̂iir̂akn̂e Xuaw pen awya so ha?

Kah yawno yanme katî n̂iir̂akn̂e awya so?

Tooto yanme makî katî n̂iir̂akn̂e awya so?

Ero wa kacho ika eyuhcoko,

kekn̂e yîwya so.

Ero ke n̂examro tak n̂esencetken̂e ero poko.

Ahce wa xa ceyukyat ha?

ketken̂e.

Kah yawno yanme xa emicinono n̂iirakn̂e Xuaw,

ketaw kîwya so,

Ahce kacho Noro yewetîra mîxatken̂e hara okwe?

nîîke ha men kîwya so.

26 Tooto yanme kyam mak emicinono n̂iir̂akn̂e,

ketaw reha kîwya so noro yentan̂enho komo men nîrwonatu kpoko so hara.

Mer̂pono pîn komo mîkyam kopi.

Kweronoman̂e xa mîk xakn̂e Xuaw,

kan̂e komo mîkyam ahnoro,

ketken̂e.

Ero wa n̂esencetken̂e n̂examro re.

27 Ero ke on wara ketken̂e Xesus ya,

Apohana,

onoke yanme na emicinono n̂iir̂akn̂e Xuaw,

yîhtînopîra nas amna,

ketken̂e yîwya.

Ai ha,

kekn̂e Xesus yîwya so hara.

Ero ke oyantoman̂enho yekatîmra was Ow hara awya so,

Noro xa ero yipu poko oyantomekn̂e,

kahra wasî,

kekn̂e Xesus yîwya so.

Ero wa kekn̂e.

28 Taa,

on wara kekn̂e xa hara Xesus yîwya so,

tîmsom pokono yenîn̂e komo ya marha,

Pahxa tî xakn̂e tumumukem.

Asakî xakn̂e yumumuru.

Ero ke potuthîrî yaka cekn̂e.

On wara kekn̂e yîwya,

Okopuci,

oroto cma re mîîcesî omararîn pona uupa yatî poko etapickaxi,

kekn̂e yîwya.

29 Apohana okwe,

kekn̂e tîîm ya.

Amn̂e tak n̂esehtînoyakn̂e hara.

Kîwce rma ham,

kekn̂e tak tîhnaw.

Ero ke cekn̂e rma etapickaxi.

30 Amn̂e yîîm cekn̂e mahtîkîthîrî yaka hara.

Ero wa xa marha kekn̂e yîwya hara.

Mararî pona cma re mîîcesî okopuci,

uupa yatî poko etapickaxi,

kekn̂e yîwya.

Taa,

kîwce ham,

kekn̂e noro reha.

Tohra rma tko xakn̂e hara okwe.

31 Taa,

ahce wa mîhtînoyatu amyamro?

Onok warai xa tîîmî mtapotarî n̂ewehcakn̂e awya so?

kekn̂e Xesus yîwya so.

Nnn,

potuthîrî mak ham,

ketken̂e yîwya.

Yaaro mîîkexe,

kekn̂e Xesus yîwya so.

Yaaro marha wîîkes Ow hara awya so,

Kaan tak n̂ewehcaxe kayaritomo purantan yahsîn̂e komo yaake.

Kîîrî pohkan̂enho komo marha tak Kaan n̂ewehcaxe,

wooxam kom ha.

Ero warai komo Kaan n̂ewehcaxe Noro maywen me tak cehtome so.

Pîra reha maxe amyamro okwe.

Mehn̂exe ro mak amyamro Kaan maywen me awehtopo komo poko.

32 Pahxa rma Xuaw mokyakn̂e ahyaka so,

Kir̂wan̂he awehtopo komo poko cma re apanatanmekyatken̂e so.

Yîmtapotarî rma tko ewetîra mîxatken̂e okwe.

Kayaritomo purantan yahsîn̂e komo reha n̂ewehcatken̂e.

Kîîrî pohkan̂enho komo marha n̂ewehcatken̂e wooxam kom ha.

Ero wa n̂examro yehtopo rma re meen̂atken̂e amyamro reha.

Ero warahra tko mîxatken̂e okwe.

Wewehca ham,

kahra rma mîxatken̂e okwe,

kekn̂e hara Xesus yîwya so.

Ero wa kekn̂e.

33 Ero yinhîrî tak on wara kekn̂e hara Xesus yîwya so,

Omtapotarî men entacoko xa hara,

kekn̂e.

Anarî pokono warai wekatîmyas hara awya so.

Pahxa xakn̂e mararî yosom.

Ero ke tak tmararîn pona n̂iir̂akn̂e uupa yatî mer̂pono pîn.

Ero yipu tak wacancekn̂e.

Yîmîtwo marha nahcekn̂e eperîrî yewkukacho.

Mîîmo marha n̂iir̂akn̂e iina naatî mîtkoso kawno.

Ero wa ciriche iitono komo mak tak nantomekn̂e tînatîrî yenîrî poko.

On wara mak kekn̂e osom enîn̂e komo ya,

Eperîrî raconho tîmcoko owya amn̂e epetache roro,

kekn̂e.

Ero yinhîrî tak noro cekn̂e mooxeno pona.

Ero wa xakn̂e mararî yosom.

34 Amn̂e epetarî yimaw tanton komo tak n̂en̂epekn̂e tînatîrî yenîn̂e komo yaka.

Eperîrî raconho wece cma re n̂en̂epekn̂e.

35 Tîmîhra rma tko xatken̂e okwe.

Naatî yosom n̂en̂epetho komo mak nahsîyatken̂e okwe.

Anarî pen thakwa nîhyokyatken̂e oco.

Anarî pen n̂etapetken̂e amoyi ke oko.

Anarî pen n̂etapetken̂e toh ke oko.

Ero wa thakwa n̂iir̂atken̂e naatî yenîn̂e komo.

Ero wara naatî yosom yanton komo n̂emetanmekyatken̂e okwe.

36 Amn̂e anarî komo xa hara n̂en̂epekn̂e osom naatî yenîn̂e komo yaka.

Yaake n̂he tak n̂en̂epekn̂e.

Ero wa xa marha tko n̂examro pen n̂iir̂atken̂e xa hara okwe.

N̂emetanmekyatken̂e xa hara.

37 Amn̂e tak tumumuru rma n̂en̂epekn̂e osom yîhyaka so.

On wara kekn̂e,

Moso xa tak wen̂epesî omumuru.

Noro n̂he tak na n̂een̂atu cewetîsom me,

kekn̂e cma ha re.

38 Ero ke tumumuru tak n̂en̂epekn̂e.

Noro yenîche n̂esencetken̂e tak naatî yenîn̂e komo.

On wara ketken̂e,

Yumumuru xa tak mîkro.

Yîîm waipuche amn̂e noro tak nasî tîîm natîtho yahsîn̂e me.

Ero ke cetapacerî kr̂a yînatîthîrî yahsîtome tak kîwya so,

ketken̂e kica.

39 Ero ke yumumuru tak nahsîyatken̂e.

Mararî poi naar̂atken̂e.

N̂etapetken̂e tak twaihso ro okwe.

Ero wa waihketken̂e.

40 Taa,

osom mokuche tak ahce wa n̂iir̂a naatî yenîn̂e pen komo awya so?

kekn̂e Xesus yîwya so.

41 Nnn,

ketken̂e tak Xesus ya,

n̂etapesî ro kr̂a mak kicicme ro mak exirî ke so.

Anarî komo tak nantomes hara tînatîrî yenîrî poko xa hara.

Kir̂wan komo tak nantomesî eperîrî tîmn̂e komo tak,

epetache roro tîmn̂e komo tak ha,

ketken̂e Xesus ya.

Ero wa ketken̂e.

42 On wara kekn̂e hara Xesus yîwya so,

Enîhra ma matu ke Kaan Karitan on wara kacho,

Toopu xakn̂e mîîmo me ciisomu cma ha re.

Kicicme tko n̂een̂atken̂e mîîmo ciin̂e komo mîîmo me cirihnî me.

Ero yipu rma tko n̂ecir̂akn̂e mîîmo peyecepu me.

Kporin komo rma ero wa n̂iir̂akn̂e.

Ceserepokexe xa tak ero wa ciitopo poko,

kacho yenîhra matu.

43 Ero ke on wara wîîkes awya so,

ero wara rma awowyaxe so tak amn̂e Kaan tmaywen mera tak awehtome so.

Anarî ro komo tak tmaywen me nahsîyas hara amn̂e awekenhîrî komo yakan hara.

Kir̂wan̂he tak Kaanî mtapotarî n̂ewehcaxe n̂examro reha.

Naatî yeperîrî tîmn̂e me tak naxe.

Ero warai pokono rma mîn,

toopu,

kacho.

44 Awetaxikwotopo komo rma mîn toopu anarimaw.

Pona awepîrketaw so metaxikwexe oko.

Apona so epîrketaw reha awapikmexe so ro mak yupupunthîrî me cehso ro mak okwe.

Ero wa awin̂e komo mîn,

toopu,

kekn̂e Xesus yîwya so.

45 Ero yipu n̂ekatîmyakn̂e Xesus anarî pokono warai.

Tpokono komo wara rma tî yîmtapotarî n̂encetken̂e Parisew komo,

tîmsom pokono yenîn̂e komo marha.

46 Ero ke Xesus yahsî xe takî tî xatken̂e ero yimaw rma.

Nukurunanîyatken̂e makî tko Noro yentan̂e komo pona.

Mer̂pono pîn komo mîkyam xatken̂e.

Kweronoman̂e xa Mîkro Xesus,

kan̂e komo mîkyam xatken̂e.

Ero ke n̂examro pona nukurunanîyatken̂e.

Ero wa xatken̂e Parisew komo.